Yohana 16

1“N ya tyyei nkyang ani ho yi bu nwa digrap. 2Ba nin ya bvwo nwai a bat a̱duwa. Ka̱ram ka̱yaan a̱n shyi ma a̱ ri bai a̱yin nu a̱ ya hywat i a̱ ni ryi na̱ yya Ka̱za pfong. 3Ba ni yya a̱mi ba̱ nyin rot ba bvwo A̱tyyi nu ba, di ba n bvwo ba. 4N ya tyyei nkyang ani rot ki ka̱ram ka a̱ bu yya yi yring n ka̱n ya tyyei.”

Pfong Tswa Ka̱za na

“N ya tyyei nkyang ani nyyai ka̱tsitsrang ka ba, rot n yin shyi ba̱ nyin. 5Ma ba̱nyying n nin brek n nat da̱ a̱yin nu a̱ n tom ni, da̱ a̱yin nyin na̱ si wa n zzim, ‘A naat ke?’ ba. 6Nnanini a n ya tyyei yi nwa bu yya ndyen. 7Ma ka̱ryong n ya tyyei, ku ran n nat, rot ki n nat ba A̱tuba ya brang u a̱ ni ba ba. Ma ki n nat, n naat n si ku tun na̱ ba. 8Ka̱ a̱ ba a̱ ni tyyei ba̱nyet ka̱sa ba ba bvwo a̱ka̱tuk nkyang u ba yya ni bu kyang a myim ba yya ni, a̱ bo ba̱ tyyei shirya Ka̱za ji: 9tazwa a̱ka̱tukyya ka, nu a̱ yet rak n san mba na; 10tazwa a̱tsatsak yya ka, rot n naat da̱ A̱tyyi, da̱ nyin ba bu ni n dyi ba; 11tazwa nshirya ka, rot n ka̱n yya a̱gwam ka̱sa a̱ni shirya.”

12“N byyi nkyang ba̱gingang nying na n ni ya tyyei ni, ma yi ni maai i na̱ san tyyi nnani ba. 13Ma ka̱ram ka Tswa ka̱ryong ji zin ba ni n ni ya tyyang ka̱ryong ka sa̱rei, rot kyang a na̱ ni ryat i ni yet nying diccu nu ba se kyang a na̱ hok ni, a̱ ya tyyei sa̱rei kyang a ri bai ni. 14A̱ ni n dyi shii, rot kyang a na̱ ni ryat ba̱ nyin ni ni nyyai da̱ nzuk. 15Sa̱rei kyang a yet nying A̱tyyi na ni ku yet nzuuk, nkpa n byyi n nin hywa di kyang a Tswa ji ni ya tyyei ni ni nyyai da̱ nzuk.”

Yesu a̱ ni nat a̱ bo si brek

16“Ka̱baram a̱ bvat ba̱cincong yi bu ni n dyi ba, ka̱baram ba̱cincong yi si bu n dyi.”

17Na̱won pfong ba̱yaan nu a̱ hywa di ba̱yaan, “A̱nzan taka̱i ba̱ryat a̱ si-swat a̱ni? A̱nzan a̱ yet ‘Ka̱baram a̱ bvat ba̱cincong yi bu ni n dyi ba, ka̱baram ba̱cincong yi si bu n dyi.’? A̱ si bo hywa, ‘Rot n naat da̱ A̱tyyi nu.’ ” 18Ba hywa, “A̱nzan a̱ yet ‘ka̱baram ba̱cincong ka’? Zin kai kyang a na̱ ryat i ba.”

19Yesu a̱ bvwo ba cat ku zzim, a̱ hywa da̱ mba, “Yi ya zzim kyang a yet ‘Ka̱baram a̱ bvat ba̱cincong yi bu ni n dyi ba, ka̱baram ba̱cincong yi si bu n dyi’ e? 20Ka̱ryong n ya tyyei: ndya nyin ni byyan yi tyei nkun, ma ba̱nyet ka̱sa ba a̱ ni gwai. Ndya nyin ni byyan, ma i cong bu tyyi ndya sai. 21Ka̱ram ka a̱ra̱mbyring na̱n naat byin ni, a̱ na byyi rya byyan rot ka̱ram sswa ka̱bvung nu ka a̱ ba. Ma ka̱ram ka na̱ bun byin ka̱won ka ni, a̱ na bring ka̱bvung nu ka, rot a̱ gwai na̱n byin ka̱won ka̱yat ka̱sa ka. 22A̱mi yin shyi bu ndya byyan, ma n bo ni ba da̱ nyin, ka̱ram iya a̱mi ndya nyin na na nin brak sai, da̱ a̱yin na̱ ni sook rya sai nyin na ba.

23“Ka̱tuk iya yi bu ni byyi kyang a yi ni n naai ni ba. Ka̱ryong a̱mi n ya tyyei: kozan kyang yi naai A̱tyyi nu a̱ ni ya ryi, rot yi naai i diyrek nzuk. 24Har ba̱nyying yi ka̱n naai kyang i diyrek nzuk ba. Yi naai yi ni shya, hok ansham nyin na i gi tyyi ba̱zizrak.”

Yesu a̱ sswa cet tazwa ka̱sa ka

25“Sa̱rei nkyang ani n ya tyyei ni bu gan a̱mi n ya tang i. Ma ka̱ram a̱ ri bai n ni ya tyyei kozan kyang tazwa A̱tyyi ka ba̱ a̱za̱kpai. 26Ka̱tuk iya yi ni naai i diyrek nzuk. N hywa di n ni ya naai i da̱ A̱tyyi nu ba. 27Rot nu ma diccu nu a̱ ya cat. A̱ ya cat rot yi n cat i bu shim di n nyyai di Ka̱za. 28N ba ka̱sa ka nyyai di Ka̱za, an bo ni wwon ka̱sa ka n brek n nat da̱ A̱tyyi nu.”

29Na̱won pfong nu na a̱ hywa, “Nhiin! A si ryat ba̱ njit ba̱zizrak, gan bu n shyi ba. 30Ba̱nyying zi bvwo a bvwo kozan kyang, a̱yin a̱ bo byyi na̱ zzim kyang ba; ku za tyyi zi bu shim brak a ba nyyai di Ka̱za.”

31Yesu a̱ hywa da̱ mba, “Nnani yi wrak ndya nyin naa? 32Ka̱ram a̱ bai, ka wa ka̱n ba, ba ni ya wop ba̱sa̱rei, koyan a̱ nat ka̱ryi nu yi bu n wwon ba̱diyin. Ma n ni shyi diyin ba, rot A̱tyyi nzuk u a̱ shyi ba̱ nzuk. 33N ya tyyei nkyang ani yi gi shya myyi ndya. Ka̱yat ka̱sa ka dei yi ni sswa ka̱bvung, ma yi myyi bu ndya nyin na rot n ka̱n sswa cet ka̱sa na.”

Currently Selected:

Yohana 16: kaj

Highlight

Copy