Yohana 15

Yesu a̱mi a̱ yet ma̱ndyim a

1“Nzuk n yet ma̱ndyim a̱nap ka̱ryong a; A̱tyyi nzuk u a̱mi a̱ yet a̱keyak u. 2Bvak a i shyi a nzuk i rak disum ti ni a̱ na kpo tyyak. Bvak a ma̱ sum ni a̱ na kpo jyi ku gi sum ansham. 3Ba̱ryat ba n ya ryat i ni a̱ ka̱n tyyi yi tyyi ba̱zizrak ba̱nyet. 4Yi swrang ba̱ nzuk, nzuk meyang n ma̱ ni shyi ba̱ nyin. Da̱ni di yin bvwo bvak ma̱ndyim a̱nap na ni maai disum ba, se ku swrang a̱zi ma̱ndyim a, a̱mi nyin meyang yi ni maai disum ba, se yi shyi ba̱ nzuk.

5“Nzuk a̱mi n yet ma̱ndyim a̱nap na, nyin a̱mi yet mbvak a. A̱yin nu a̱ shyi ba̱ nzuk n ma̱n shyi ba̱ nu ni a̱ ni sum ba̱gingang. Ki n shyi ba̱ nyin ba, yin maai yya kyang ba. 6A̱yin nu a̱ shyi ba̱ nzuk ni ba, ba ni ku tyyak a̱ jing di bvak ma̱ndyim a na̱ kwot ni, na̱ kwot. Ntaka̱i mbvak ma̱ndyim iya a̱mi ba na tung a̱ tyyi an dong a na hwwi. 7Ki yi shyi ba̱ nzuk, ba̱ryat nzuk ba a̱ shyi ka̱yat mpfwa nyin, kozan kyang yi naai i cat yi ni shya. 8A̱duniya disum nyin nu a̱ ni tyyei shii A̱tyyi nzuk a, a̱ bo tyyei yi yet na̱won pfong nzuk. 9Ka̱sak ka A̱tyyi nzuk u na̱ ni n cat i, a̱mi n ma̱n ya cat. Yi sseng ka̱yat cat nzuk ka. 10Ki yi tssup truwang nzuk ji yi ni wwon cat nzuk a ba, da̱ni di n nin tssup truwang A̱tyyi nzuk ji ni a ma̱n swat ka̱yat cat nu ka.

11“N ya tyyei ba̱ryat bani yi gi shya hok ansham nzuk a a nyin, ndya nyin na i gi hok ansham ba̱gingang. 12Truwang nzuk jinji ni: yi cat ba̱yaan ka̱sak ka n ni ya cat i. 13A̱gba̱dang cat u a̱yin na̱ ni maai a̱ byyi i hywak ba̱rywai nu ni nu a̱ yet na̱ wrak sso nu ji i hywak mba. 14Nyin a̱mi yet ba̱rywai nzuk ba ki yi tssup truwang ji n ya tyyei ni. 15N bo n byyi ya yei ba̱kwwa ba, rot a̱kwwa a̱ bvwo kyang a a̱ntyok ka̱ryi nu nu na̱ yya ni ba. Ma n ya yei ba̱rywai, rot n ka̱n ya tyyei sa̱rei kyang a n hok da̱ A̱tyyi nzuk u ni. 16Nyin a̱mi n tssa ba, nzuk n ya tssa n ya tyyi yi nat wrak disum ti ba̱gingang, disum ti ti ni tyak ni ba, si wwon, kozan kyang yi naai da̱ A̱tyyi nzuk u i diyrek nzuk ti a̱ ni ya ryi. 17Kyang a n ya tyyei ni nkpa yet yi cat ba̱yaan.”

Ka̱sa ka a̱ ni ya rak

18“Ki ba̱nyet ka̱sa ba a̱ ya rak, yi bu bvwo nzuk a̱mi ba tason a̱ rak. 19Yi da yet ba̱nying ka̱sa ba, se ba ya gwai di ba̱nyet mba ni; ma ka̱sak ka n ni ya tssa n tun ka̱yat ka̱sa ka ni, nkpa n byyi ka̱sa ka kan ya rak. 20Yi yring kyang a n ka̱n ya tyyei ni; a̱kwwa a̱ ka̱n da̱u a̱ntyok ka̱ryi nu ba. Ki n sswa ka̱bvung da̱ mba, nyin ma yi ma̱ ni sswa ka̱bvung da̱ mba. Ki ba tssup ba̱ryat nzuk ba, ba ma̱ ni tssup ba̱nyiin ba meyang. 21Ma ba ni ya yya nkyang ani sa̱rei, rot yi yet ba̱ nzuuk, rot ba bvwo a̱yin nu a̱ n tom ni ba. 22N da n dyok ba n bu ba̱ tyyei ba̱ryat ba ni ba, se ba byyi hywak ba; ma nnanini ba bo byyi kyang hywa i hywak a̱ka̱tukyya mba nu ba. 23A̱yin nu a̱ n dak ni a̱ rak A̱tyyi nzuk u a̱nta̱mak. 24Da ba byyi a̱ka̱tukyya ba, ki n si bu ryok yya nkyang a a̱yanyet da̱ maai a̱ yya ka̱yat mba ni ba, da ni kun dyi ni ba ka̱n dyi nkyang a n ka̱n yya ni ba bo n dak a̱nta̱mak ba̱ A̱tyyi nzuk u. 25Ma dolet ku ryi a̱mi, rot kyang a ba ba̱ jem i ka̱yat Truwang mba ka ni i gi yet ka̱ryong: ‘Ba n dak di ba byyi hywak a ba ni n dak ni ba.’

26“A̱tuba ya brang u a̱ ni ba, nu a̱ yet Tswa ji a̱ tyyei ka̱ryong ka ni a̱ bai nyyai da̱ A̱tyyi nu. N ni ku tom nyyai da̱ A̱tyyi nu, a̱ ni ryat ba̱ nyin tazwa nzuk. 27Nyin yi ma̱ ni ryat tazwa nzuk, rot yi shyi ba̱ nzuk nyyai ka̱tsitsrang ka.

Currently Selected:

Yohana 15: kaj

Highlight

Copy