Yohana 14

Yesu a̱mi a̱ yet ryen cong da̱ A̱tyyi

1Yesu a̱ bo hywa da̱ mba, “Yi ryok wwon ndya nyin i byyan ba. Yi wrak ka̱ryong di Ka̱za i bu n dyi ka̱ryong brak. 2Na̱bvwa swat a̱n shyi ba̱gingang ka̱ryi A̱tyyi nzuk ka. N naat n si ya jyi na̱bvwa swat a. Ku dan dyok ryi a̱mi ba, sei n ya tyyei kyang ba. 3Ki n si tyak ya jyi ka̱bvwa ka n ni brek n bu nat ba̱ nyin yi si swrang ka̱bvwa ka n ni shyi ni. 4Nyin ma yi bvwo ryen ka̱rek a n ni naat i.”

5Toma a̱ hywa, “A̱ntyok ka̱ryi, zi bvwo ka̱rek ka an naat i ba; zi ni yya ni n bvwo ryen na?”

6Yesu a̱ hywa, “Nzuk n yet ryen na bu ka̱ryong ka bu sucet a. A̱yin nu a̱ hyok da̱ nzuk ni ba a̱ ni maai si tat ka̱rek A̱tyyi ka ba. 7Nyin ba dan bvwo a̱yin nu n yet i, da nyin ba bvwo A̱tyyi nzuk u. Ba̱nyying ka yi bvwo A̱tyyi nzuk u, nyin ba bu ka̱ ku ryi.”

8Filibut a̱ hywa da̱ nu, “A̱ntyok Ka̱ryi, zi cat a za tyyei ba̱ A̱tyyi nu.”

9Yesu a̱ hywa, “Filibut, nyyai gba̱gbang ka ni yin shyi ba̱ nzuk ni a ka̱ n bvwo baa? A̱yin nu a̱ n dyi ni a̱ ryi A̱tyyi nzuk u. A ni cong ni n zzim di n ya tyyei A̱tyyi nu? 10Wato a ka̱n shim di n shyi ba̱ A̱tyyi nu, A̱tyyi nu a̱ ma̱n shyi ba̱ nzuk, baa?” A̱ bo hywa da̱ mba, “Ba̱ryat ba n ya tyyei ni a̱ yet ba̱ nzuuk ba. Ba̱nyying A̱tyyi nzuk u a̱ shyi ba̱ nzuk ni, nu a̱ yya pfong nu. 11Se yi shim ka̱ram ka n nin hywa n shyi ba̱ A̱tyyi nu na̱ ma̱n shyi ba̱ nzuk. Ka̱ a̱mi ba, shim nkyang a n yya ni. 12Ka̱ryong a̱mi n ya tyyei: A̱yin nu a̱ n dyi rya nu na ni, nkyang ani n yi-yya nani ni a̱ ma̱ ni na̱ yya har bu nying na ra̱u a̱mi ni ma, rot n naat da̱ A̱tyyi nu. 13Kyang a yi naai i diyrek nzuk ni n ni ya yya mi, ba ga ryi shii A̱tyyi na i Ka̱won ka. 14Bu kyang a yi naai i diyrek nzuk ni n ni ya yya mi.”

Ba za nang Tswa Ka̱za

15“Ki yi n cat, yi ni tssup truwang nzuk ji. 16Nzuk n ma̱ ni zzim A̱tyyi nu na̱ ya ryi A̱ntyok ya brang, na̱ swat ba̱ nyin har a̱ba̱da. 17Nu a̱ yet Tswa ji a̱ tyyei ka̱ryong ka ni. Ka̱sa kani a̱ maai ku san ba, rot ka maai ku ryi na a̱ bo ku bvwo ba. Ma nyin yi ku bvwo, rot a̱ swat ba̱ nyin a̱ si bo ni shyi ka̱yat nyin kozan ka̱ram.

18“N ni ya wwon di na̱kunak ni ba. N bo ni brek n ba da̱ nyin. 19Ka̱baram a̱ bvat ba̱cincong ba̱nyet ka̱sa ba a̱ bo ni n dyi ba, ma nyin yi ni n dyi, yi ni shya sucet rot n swat a̱cet. 20Ki nom iya ba, yi ni bvwo n shyi ba̱ A̱tyyi nzuk u, nyin yi ma̱n shyi ba̱ nzuk, ka̱sak ka n nin shyi ba̱ nyin ni.

21“A̱yin nu a̱ san truwang nzuk ji a̱ za̱ tssup ni, nu a̱mi a̱ n cat. A̱yin nu a̱ n cat i, A̱tyyi nzuk u a̱ ma̱ ni ku cat; nzuk meyang n ma̱ ni ku cat n tyyei diccu nzuk ka̱rek nu.”

22Yahuda (ba Yahuda Iskariyoti ba), a̱ hywa, “A̱ntyok ka̱ryi, a̱nzan a̱ nin byyi an za tyyei diccu nwan wwon ka̱sa ka?”

23Yesu a̱ hywa, “Sa̱rei a̱yin nu a̱ n cat i a̱ ni tssup ba̱ryat nzuk ba, A̱tyyi nzuk u a̱ ni ku gwai ba̱t. Nzuk ba̱ A̱tyyi nzuk u zi ni ba bu swrang ba̱ nu. 24A̱yin nu a̱ n cat ni ba a̱n tssup ba̱ryat nzuk ba ba. Ba̱ryat ba yi hok da̱ nzuk ni a̱ yet ba̱ nzuuk ba. Ba nyyai da̱ A̱tyyi nu a̱ n tom ni.

25“N ya tyyei nkyang ani n ri shyi ba̱ nyin. 26A̱tyyi nu a̱ ni ya tom di Tswa Ka̱za ji i diyrek nzuk ti. Nji a̱mi a̱ ni ya brang, a̱ ya zzek kozan kyang, a̱ bo ya brang yi yring sa̱rei nkyang a n ka̱n ya tyyei ni.

27“N ya ryi myyi rya. Myyi rya nzuk a a̱mi n ya ryi. Ka̱sak ka n ya ryi ni ka̱sa ka a̱n ya ryi a̱mi ba. Yi ryok wwon ndya nyin i byyan ko yi hok ka̱wun ba. 28Yi hok n ka̱n ya tyyei n hywa n ni yen ya wwon, ma n bo naat n si brek n ba da̱ nyin. Ki yi da n cat, se nyin ba gwai rot n naat da̱ A̱tyyi nzuk u, rot a̱ n da̱u. 29N ya tyyei nkyang ani na si wa bvwa a̱n ba, rot ka̱ram ka na bun ba ni yi gi wrak ka̱ryong. 30N bo ni ryat ba̱ nyin nat gbang ba, rot a̱gwam ka̱sa nu a̱ yemi a̱ bai. A̱ byyi cet zi diccu nzuk ba, 31ma dolet ba̱nyet ka̱sa bani a̱ bvwo ka̱sak ka n nin gwai A̱tyyi nu ni; nkpa n byyi n nin yya sa̱rei kyang a na̱ n tyyi yya na ni.

“Yi ba zi drok ka̱bvwa ka ni.”

Currently Selected:

Yohana 14: kaj

Highlight

Copy