Yohana 13
13
Yesu a̱ tssu a̱tak na̱won pfong nu
1Ka̱ram kani A̱swa Swrap wwon nu na̱ bvat nom yring, Yesu a̱ bvwo ka̱ram nu ka a̱ ba ba̱ shishrek, ka̱ram ka na̱ nin wwon ka̱sa ka a̱ brek a̱ nat da̱ A̱tyyi nu ni. A̱ yin gwai ba̱nyet ba a̱ yet ba̱nu i ka̱sa ka ni har bu tat a̱ngbom nom u.
2Yesu bu na̱won pfong nu na ba shyi ya kyangya. Ka̱ram iya a̱gwam a̱ka̱tuk tswa nu na̱ wa ka̱n tyyi an pfwa Yahuda, ka̱won Siman Iskariyoti ka, da̱ wrak Yesu. 3Yesu a̱ bvwo A̱tyyi nu a̱ ka̱n tyyi kozan taka̱i kyang an bvak nu; a̱ bvwo a̱ ba nyyai di Ka̱za na̱ bo bvwot a̱ naat da̱ nka. 4Yesu a̱ si ta̱za nyyai an tebur ji a̱ kruk a̱godo nu nu a̱ sak a̱ sook tawul a̱ ya rop ndyang ka. 5A̱ krok ba̱shekwot i cicyi a̱ nwa n tssu na̱won pfong nu na a̱tak mba na a̱ shok di tawul ji shyi ndyang nu ka ni. 6A̱ bu tat ka̱rek Siman Bitut, Siman a̱ hywa, “A̱ntyok ka̱ryi, nwan n tssu a̱tak nzuk aa?”
7Yesu a̱ hywa da̱ nu, “A bvwo kyang a n yya nnani ni ba, se ka̱baram a̱ bvwa a si ni bvwo.”
8Siman a̱ hywa, “Ko ba̱cincong! N dyi ka̱ram ka a ni ni n tssu a̱tak a ni ba.”
Yesu a̱ hywa da̱ nu, “Ki n ma̱ na̱ tssu a̱tak a ba, kyang bu na̱ mon ba̱ nzuk ba.”
9Siman Bitut a̱ hywa, “Ka̱t, A̱ntyok ka̱ryi, ryok tssu ba̱ a̱tak nzuk a ba, tssu sa̱rei mbvak nzuk a nta̱mak bu diccu ti!”
10Yesu a̱ hywa da̱ nu, “A̱yin nu a̱ ka̱n sso ni a̱ yet a̱zizrak, na̱ bo cat sso yaan ba, seko na̱ tssu ba̱ a̱tak. Sa̱rei nyin yi ryi ba̱zizrak, se ba̱ a̱tuba a̱yring.” 11(Yesu a̱ ka̱n bvwo a̱yin nu a̱ ni ku ryap i. Nkpa yin byyi na̱n hywa, “Sa̱rei nyin yi ryi ba̱zizrak, se ba̱ a̱tuba a̱yring!”)
12Yesu na̱ bu tyak ba̱ tssu a̱tak a, a̱ brek da̱ a̱godo nu nu a̱ grang a̱ brek a̱ si swrang an tebur ji, a̱ hywa da̱ mba. “Yi ryi kyang a n ya yya mi ni bvwong o? 13Yi na n yei Malam bu A̱ntyok ka̱ryi yi ywap ba; n yet a̱mi. 14Ki nzuk A̱ntyok ka̱ryi nyin bu Malam nyin n tssu a̱tak nyin na, nyin meyang yi ma̱n tssu a̱tak ba̱yaan. 15N ya yya misali jini yi gi ma̱n yya kyang a n ya yya mi ni. 16Ka̱ryong n ya tyyei, a̱kwwa a̱n shyi a̱ ra̱u a̱ntyok ka̱ryi nu nu ba, da̱ a̱pfong na̱n shyi a̱ ra̱u a̱yin nu a̱ ku tom ni ba. 17Yi kpo ryi na ba̱zizrak, ki yi yya a̱mi, Ka̱za a̱ ya wwon nda.
18“N dyat ba̱ nyin ba̱sa̱rei nyin ba. N bvwo ba̱nyet ba n ka̱ n tssa ni. Ma dolet ba̱ryat Ka̱za ba a̱ sseng an kyang a ba hywa ni, ‘A̱yin nu a̱ ya yak a ba̱ nzuk ni, nzuk a̱mi na̱ bo rak ryi na!’ 19N ya tyyei a̱mi nyyai ku ka̱n ba ba, rot ki ku bu ba yi shim ‘Nzuk a̱mi n yet Nzuk u.’ 20Ka̱ryong a̱mi n ya tyyei, a̱yin nu a̱ san a̱yin nu n tom ni, a̱ n san a̱nta̱mak. A̱yin nu a̱ bo n san ni, a̱ san a̱yin nu a̱ n tom ni a̱nta̱mak.”
Yesu a̱ tyyei ka̱sak ka ba nin ku ryap ni
(Matta 26:20-25; Markut 14:17-21; Luka 22:21-23)
21Yesu na̱ bu tyak ryat a a̱mi, rya nu na i byyan. Na̱ ba̱ tyyei ba̱zizrak a̱ hywa, “Ka̱ryong n ya tyyei, a̱tuba a̱yring ka̱yat nyin a̱ ni n dyap.”
22Na̱won pfong nu na a̱ bvan a̱ ya cyang a̱ hwa a̱yin nu na̱ ryat i. 23A̱pfong a̱yring u Yesu na̱ yin cat i a̱ yin swat a̱ hywot Yesu. 24Siman Bitut a̱ ku bvut a̱ssi a̱ hywa, “Ku zzim na̱ za tyyei a̱yin nu na̱ ryat i.”
25A̱pfong u a̱ shek a̱ nat gbigbak bu Yesu a̱ ku zzim, “A̱nyan a̱mi, A̱ntyok ka̱ryi?”
26Yesu a̱ hywa da̱ nu, “A̱yin nu a ryi n tyyi bvak nzuk a i ryei a n tun dikwang burodi ti n ku ryi ni, nu a̱mi.” Wwon na̱ tun dikwang burodi ti a̱ ssuk ka̱yat dinyying a̱ wrak Yahuda ka̱won Siman Iskariyoti. 27Yahuda na̱ bu ya burodi na, Ka̱ta̱nyrang a̱ ku nwa. Yesu a̱ hywa da̱ nu, “Gha si yya kyang a na̱ shyi ni.” 28Ma kpikpit ba̱nyet a shyi bu Yesu ka̱rek swrang ka ni, a̱yin a̱ bvwo kyang a nbyyi Yesu na̱n ku tyyei a̱mi ni ba. 29Yahuda a̱mi a̱ yin breng krum mba ji; rot a̱mi ba̱pfong Yesu ba̱yaan a̱ hwa da̱ a̱ ku tom na̱ nat a̱ si san kyang a ba ni ya a a̱swa nu ni, ko a̱ naat ka ba̱nyet dizot kyang.
30Yahuda a̱ san burodi na a̱ brak a̱ rot a̱ wruk ba ahwa. A̱ta̱tuk yemi.
A̱hwai truwang
31Yahuda na̱ bu drok, Yesu a̱ hywa, “Ba̱nyying ba sin tyyei shii Ka̱won A̱neywu na, an bvak nu ba bon tyyei shii Ka̱za na. 32Ki Ka̱za a̱ ni tyyei shii nka na an bvak nu, to Ka̱za a̱ ni tyyei shii Ka̱won A̱neywu na ka̱yat nka, a̱ ni yya a̱mi ba̱nyying ka. 33Na̱won nzuk, n bo n byyi ka̱ram ba̱t ba̱ nyin ba. Yi ni n cat, ma n ya tyyei kyang a n ka̱n tyyei ba̱cecet ba̱nyet Yahuda ba ni, ‘Yi ni maai ba ka̱bvwa ka n nin naat ni ba.’ 34A̱hwai truwang nu n ya jyet, nu a̱ yet: yi ya gwai. Da̱ni n nin ya gwai ni, dolet yi ma̱ ya gwai. 35Ka̱sak ka yi ya gwai ni a̱ ni tyyi ba̱nyet ba ba bvwo ka̱sak ka yin yet na̱won pfong nzuk a ni.”
Yesu a̱ tyyei ka̱sak ka Bitut na̱ nin ton ku bvwo ni
(Matta 26:31-35; Markut 14:27-31; Luka 22:31-34)
36Siman Bitut a̱ ku zzim, “A̱ntyok Ka̱ryi, a naat ke?”
Yesu a̱ hywa, “Yi ni maai i n tssup ba ka̱bvwa ka n ni naat ba̱nyying ni ba, se ka̱baram a ra ba̱cincong yi si n tssup.”
37Bitut a̱ zzim a̱ hywa, “A̱ntyok Ka̱ryi! A̱nzan a̱ ni nin bvwo na̱ tssup a ba̱nyying? Ko dikwu n ni kwu sabo ba̱ nwan.”
38Yesu a̱ hywa, “A si wu ni maai i kwu i hywak nzuk o? Ka̱ryong n ni na̱ tyyei: a ni ton da a n bvwo ba bvwa ka̱tat, a̱ngbak na̱ ka̱n tyyak ba.”
Currently Selected:
Yohana 13: kaj
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
