Yohana 12

Maryamu a̱ krok Yesu ba̱myyi a Baitanya

(Matta 26:6-13; Markut 14:3-9)

1A̱swa Swrap wwon nu na̱ bvat nom a̱kitat, Yesu a̱ nat Baitanya. Ka̱ryi Lazarut ka a̱ yin kwu Yesu a̱ si ku shyek i ka yin shyi ka̱ yemi. 2Ba si ku wan kyangya. Martsa na̱ shyi i ka kyangya na, Lazarut a̱ yin yet a̱neyring ka̱yat ba̱nyet ka a̱ yin swat bu Yesu an tebur ji ni. 3Maryamu a̱ nyyai bu a̱gba̱dang shep ka̱sham ba̱myyi ba̱nying krum ba̱t ba yya di nard a̱ bu krok a a̱tak Yesu na a̱ tyyi a̱cat diccu nu na a̱n dyang. Swam ba̱myyi na i tyak ka̱ryi ka sa̱rei. 4A̱yanyet ka̱yat na̱won pfong ka ba ku yei Yahuda Iskariyoti, a̱tuba nu a̱ ni ryap Yesu ni a̱ hywa, 5“A̱nzan a̱ bvwo ryap ba̱myyi bani a̱n shya krum pfong nom cyi tsat a̱ ka ba̱nyet dizot?” 6A̱ yin dyat a̱mi ba wei da̱ pfong dizot ba̱nyet dizot ti ba, se dei a̱ yin yet a̱tang, nu a̱ bo yin breng krum mba ji a̱ trung a̱n yya kyang a na̱ cat i.

7Yesu a̱ hywa, “Yi ku ryok shinshwon. A̱ n jyi a̱n tot nom bu n nyat a. 8Nyin yi ni shyi bu ba̱nyet dizot ba kozan ka̱ram, ma nzuk n ni shyi ba̱ nyin kozan ka̱ram ba.”

Ba bang Lazarut

9Ba̱nyet Yahuda ba̱gingang i hok di Yesu a̱ shyi Baitanya a̱ gbit a̱ nat ka̱ yemi. Ba yin nat a̱ ga si ryi Yesu a̱ bo ryi Lazarut nu a̱ kwu Yesu a̱ ku shyek i. 10Rot a̱mi ba̱cecet ba̱gado Ka̱za ba a̱ cat ryen hywat Lazarut a̱nta̱mak. 11Rot nu a̱mi a̱n byyi ba̱nyet Yahuda na ba̱gingang ban wwon ba̱cecet mba ba a̱ wwat Yesu ndya mba na.

Yesu a̱ nwa Urushalima nwa dityok

(Matta 21:1-11; Markut 11:1-11; Luka 19:28-40)

12Ka̱ntson a̱ wo tat ba̱nyet ba̱gingang ba a̱ ba a̱swa Swrap wwon nu ni a̱ hok di Yesu a̱ bai Urushalima nu. 13Ba bvei a̱pipyyi tswan a̱ wruk a̱ nat myim a ba̱ nu, a̱ tyei nkun a̱ ku tang a̱didyep a̱ hywa, “Zi dyep Ka̱za! A̱yin nu a̱ bai i diyrek A̱gwam njit, Ka̱za ku wwon nda! Ka̱za a̱ wwon A̱gwam Isreila nda!”

14Yesu a̱ shya hwung ka̱janki a̱ wrak, da̱ni ba̱ryat Ka̱za ba ban hywa ni:

15“Ryok hok ka̱wun ba,

nwan ka̱nkrang Sihiyona.

A̱gwam nwan nu a̱ yemi

a̱ bai tazwa hwung ka̱janki.”

16Ma na̱won pfong nu na a̱ hok a̱ maai ka̱ram iya ba; se ka̱ram ka Yesu na̱ bun shya shii nu na ni ba si yring, da ma ba̱ryat Ka̱za ba a̱ hywa a̱mi a̱za̱ nu, mba ba bo ku yya mi.

17Ba̱nyet ba a̱ yin shyi bu Yesu ka̱ram ka na̱ yin yrek Lazarut nyyai yabyen ka ni a̱ ku yei na̱ wruk ryak a ni ba ka̱n si tyyei kyang a Yesu na̱ yya ni. 18Nkpa yin byyi ba̱nyet ba ba̱gingang ba yin wruk a̱ nat myim a ba̱ nu, rot ba hok kyang ka̱hat na na̱ ka̱n yya ni. 19Ba̱nyet Farisa na i nwa ya tyyei i hywa, “Yi ryi anha! Zi ni maai ba. Cyang ka̱sak ka sa̱rei ka̱sa ka kan ku tssup ni.”

Helenawa yaan cat ryi Yesu

20Ka̱yat ba̱nyet ka a̱ yin ba yya Ka̱za sujada a ka̱ram a̱swa ka ni, ba̱yanyet a̱ yin yet Helenawa. 21Ba nyyai a̱ ba di Filibut (a̱ yin nyyai Baitsaida i ka̱byen Galili) a̱ bu hywa da̱ nu, “A̱ntyok ka̱ryi, zi cat ryi Yesu.”

22Filibut a̱ nat a̱ si tyyei Andrawut, ba nat ba̱ mba ba̱hwa a̱ si tyyei Yesu. 23Yesu a̱ hywa da̱ mba, “Ka̱ram ka ba nin tyyei shii Ka̱won A̱neywu ni a̱ yya. 24Ka̱ryong a̱mi n ya tyyei, tswa yak ni yet bu tswa jring, se kpa ka̱byen i kwu si wa bvwa n wrak tswa ba̱gingang. 25A̱yin nu a̱ cat sso nu ji ni a̱ wa ni za̱ wai. Ma a̱yin nu a̱ rak sso nu i ka̱sa kani ni a̱ ni za̱ sak i sucet wityak. 26A̱yin nu a̱ cat n yya dikwwa ni, dolet se na̱ n tssup a̱ ga shyi ba̱ nzuk kozan ka̱ram. A̱tyyi nzuk u a̱ ni wrak a̱yin nu a̱ n yya dikwwa ni shii.”

Yesu a̱ tyyei dikwu nu

27“Nnani rya nzuk a tyyi ba̱ brika̱tei. To, a̱nzan n ni hywa? N hywa da̱ A̱tyyi a̱ n san ka̱ram ka ni e? Kaai! Ma rot ka̱ram ka̱bvung kani a̱mi n wa n ba. 28A̱tyyi, tyyei shii diyrek nwan na.”

Diwan i hyok nyyai Tazwa i hywa, “N ka̱n tyyei shii nzuk a, an bo ni kpo tyyei nda̱u a̱mi.”

29Ba̱nyet ba a̱ sseng ka̱rek ka ni a̱ hok a̱ hywa, “Za tat!”

Ba̱yanyet a̱ hywa, “Kaai, a̱pfong Ka̱za a̱mi a̱ ryat ba̱ nu!”

30Ma Yesu a̱ hywa da̱ mba, “A̱zi hywak nyin a̱mi diwan tini tin krang, ba a̱zi hywak nzuk ba. 31Ka̱ram ka ba nin yya ka̱sa ka shirya ni a̱ yya. Ba̱nyying ka ba ni yrik a̱gwam ka̱sa a̱ni a̱ rot. 32Ka̱ram ka ba ni n yrek a̱ wwon ka̱sa ka ni n ni kwwat sa̱rei ba̱nyet ba n ya tyyi mi.” 33(Ba̱ryat bani a̱ tyyei taka̱i dikwu na na̱ ni kwu ni).

34Ba̱nyet ba a̱ hywa da̱ nu, “Ba̱ryat Ka̱za a̱ za tyyei di Kristi nu a̱ ni kwu ba. Nwan ba yya ni n hywa di ba ni yrek Ka̱won A̱neywu tazwa? A̱nyan a̱ yet Ka̱won A̱neywu ka a ryat i?”

35Yesu a̱ hywa da̱ mba, “Ka̱bvwa sai ka ka ri bvat da̱ nyin ba̱cincong. Yi sook bu ryen nyin na nyyai ka̱bvwa ka ri sai, ho ryin na bu sswa cet nyin. Rot a̱yin nu a̱ cong an dyin ni a̱n bvwo ka̱rek ka na̱ cong a̱n tyyei ni ba. 36Yi san ka̱bvwa sai ka tyyi an ndya nyin nyyai ka ri shyi ba̱ nyin, yi gi yet na̱won ka̱bvwa sai.”

Ba̱nyet Yahuda a̱ rak san Yesu

Yesu na̱ bu hywa a̱mi a̱ drok a̱ ba̱ wwon a̱ si nrang. 37Ko di ban dyi sa̱rei a̱cecet nkyang ka̱hat nu na̱ yya a a̱ssi mba ni, ma ba ku shim ba, 38ku gi cong ba ba̱cicrak bu kyang a Ishaya, a̱ntyok tyyei ba̱ryat Ka̱za nu, na̱ yin hywa ni,

“A̱gwam Ka̱za! A̱nyan a̱ san ba̱ryat njit ba?

Ba̱nzan A̱gwam Ka̱za na̱ ba̱ tyyei cet nu na?”

39Nkpa a̱mi n byyi ba yin n wi san na, rot Ishaya a̱ bo hywa,

40“Ka̱za a̱ bat a̱ssi mba na,

a̱ bo muk mpfwa mba na,

a̱ssi mba na a̱ ga wi cyang,

mpfwa mba na na ni ryi a̱ bvwong ba,

di ba ni brek a̱ ba da̱ nzuk n ba̱ creng ba.

Ba̱ryat Ka̱za a̱ hywa a̱mi.”

41Ishaya a̱ yin dyat a̱mi rot a̱ yin dyi shii Yesu na a̱ ryat tazwa nu.

42Ko da̱ a̱mi ni ba̱cecet ba̱nyet Yahuda ba̱gingang ma a̱ yin san Yesu a̱ tyyi an pfwa mba na, ma ba wruk a̱za̱kpai a̱ tyyei ba, rot ba pfong ka̱wun ba̱nyet Farisa ka ba bu ba̱ nyying i na̱bvwa a̱duwa na, 43rot ba cat a̱didyep nyyai di ba̱nyet a̱ ra̱u a̱nying nyyai di Ka̱za na.

Ba̱ryat Yesu ba a̱ ni yya shirya

44Yesu a̱ yrek diwan ti a̱ hywa, “A̱yin nu a̱ n san ni, ba ba̱ nzuk na̱ san ba ma a̱n san a̱nta̱mak ba̱ a̱tuba nu a̱ n tom ni. 45A̱yin nu a̱ n dyi ni a̱ ryi a̱yin nu a̱ n tom ni. 46N ba di ka̱bvwa sai ni i ka̱sa ka, ba̱nyet ba a̱ n san ni a̱ ga wruk a̱ wwon ryin na. 47A̱yin nu a̱ hok ba̱ryat nzuk ba a̱ rak n tyyi i rya ni, nzuk n ni ku yya shirya ba. N ba yya ka̱sa ka shirya ba ma n ga ka̱ ryi sucet. 48A̱yin nu a̱ n dak ni a̱ bo rak hok ba̱ryat nzuk ba ni, ba̱ryat ba n hywa ni mba a̱ ni ku yya shirya ji ka̱tuk a̱ngbom nom ka. 49Rot kyang a n dyat i yet nying diccu nzuk ba, ma A̱tyyi nu a̱ n tom ni nu a̱ n tyyei kyang a n ni hywa ni bu ka̱sak ka n nin kpo hywa ni. 50N bo n bvwo ba̱ryat nu ba a̱ wwat sucet wityak. Rot a̱mi kyang a n dyat i nkpa yet kyang a A̱tyyi nu na̱ n tyyei da̱ n dyat ni.”

Currently Selected:

Yohana 12: kaj

Highlight

Copy