Matta 13

A̱ntyok nai yak

(Markut 4:1-9; Luka 8:4-8)

1Bu ka̱tuk iya Yesu a̱ wruk ka̱ryi ka a̱ si swrang a̱mbeyang kei ba̱shekwot a̱ nwa zzek ba̱nyet ba. 2Ka̱sak ka ba̱nyet ba ban tung a̱ ra̱u ni, na̱ nwa a̱ swrang ka̱yat kpongo, ba̱nyet ba ba sseng a̱za̱ gyep a. 3Na̱ nwa ba̱ zzek nkyang ba̱gingang a̱za̱ misalai, a̱ hywa,

“A̱yanyet a̱ yin nat nai yak. 4Ka̱ram ka na̱n shyi i nai a ni, tswa zaan i kwei a̱zi ryen, na̱non a̱ ba a bu tang. 5Tswa zaan i kwei i kukwak ka̱bvwa ka a̱ byyi mbyen gingang ni ba. Zi ta ba ahwa rot mbyen na yin da̱u ba. 6Ka̱ram ka nom kun tat i, a̱tyin na a̱ hwwi, rot a̱nan na a̱ yin nwa ba̱t ba. 7Tswa zaan i kwei ka̱yat a̱shyim, a̱shyim a a̱ rai a̱ hwwok nwrum yak a. 8Ma tswa zaan i kwei a a̱tsatsak ka̱byen, i ta i sum, na̱dung na̱yaan a̱ byyi tswa ncyi, na̱yaan nswak a̱kitat, na̱yaan tswa nswak ntat.”

9Yesu na̱ bu tyak, a̱ hywa, “A̱yin nu a̱ byyi a̱pfo ni na̱ hok ansham!”

Kyang a̱n byyi Yesu na̱n dyat a misalai ji ni

(Markut 4:10-12; Luka 8:9-10)

10Na̱won pfong Yesu na a̱ nyyai a̱ ba da̱ nu, a̱ bu ku zzim a̱ hywa, “A̱nzan a̱n byyi an ba̱ zzek a̱za̱ misalai ji?”

11Yesu a̱ hywa, “Nyin a̱mi ba ya wwon yi bvwo kyang a shyi nrang i Dityok Tazwa ti ni, bam ba̱ mba ba. 12Rot a̱yin nu a̱ byyi ba̱gingang ni, nu a̱mi ba bo nin ku brang i na̱ ga byyi ba̱gingang brak; a̱yin nu a̱ sang ni, ka̱bankyang ka na̱ byyi ni ba bo ni san a̱ ku wwon. 13Kyang a n byyi n nin dyat ba̱ mba an misalai ji ni, rot ba cyang di ba ryi ba, ba pfong di ba hok a̱ maai ba ko ba hok di ba hok a̱ bvwong ba. 14Ku ba ba̱cicrak bu kyang a a̱ntyok tyyei ba̱ryat Ka̱za nu ba yin yei Ishaya nu ni na̱ yin dyat a̱ hywa,

‘Yi ni swat cyang-cyang, da̱ nyin ba ni ryi ba,

i zzong a̱pfo, da̱ nyin ba ni hok bvwong ba.

15Rot ndya ba̱nyet a̱ ni tyyi ta̱kwu,

ba hweyak a̱pfo mba na

a̱ ga wi pfong ansham,

ba muk a̱ssi mba na

a̱ ga wi cyang ansham,

ho ba bu cyang ba̱ a̱ssi mba na

a̱ hok da̱ a̱pfo mba na,

a̱ bvwo ka̱yat ndya mba ka

a̱ brak a̱ wwon a̱ka̱tukyya mba nu,

n ba̱ creng.’ ”

A̱mi Ka̱za kan hywa.

16“Ma a̱ssi nyin na bu a̱pfo nyin na a̱ yet a̱nying ka̱nu-a̱tan, rot a̱ cyang a̱ bo pfong. 17Ka̱ryong n ya tyyei: ba̱nyet tyyei ba̱ryat Ka̱za ba̱gingang bu ba̱nyet ba̱yaan ba a̱ tyong Ka̱za ni a̱ kun ryi kyang a yi cyang ni a̱ bo hok kyang a yi pfong ni, ma ba ryi ba.”

Kyang a misali ji zi yet i

(Markut 4:13-20; Luka 8:11-15)

18“Yi hok ansham i gi bvwo kyang a misali a̱ntyok nai zwa ji zi yet i. 19Ba̱nyet ba a̱ hok ba̱ryat Dityok Tazwa ba, ma di ba hok a bvwong ni ba, mba a̱mi a̱ ryi di tswa ji kwei a̱zi ryen ka ni. Ka̱ta̱nyrang a̱ nyyai a̱ bu wat zwa ji ba tup ka̱yat ndya mba ka ni. 20Zwa ji kwei tazwa kukwak ka ni nji yet ba̱nyet ba a̱ hok ba̱ryat ba a̱ ba̱ san ba ahwa bu rya sai ni, 21ma ba̱ryat ba a̱ nwa ka̱yat ndya ka ba, rot a̱mi ba sseng ba̱cincong. Ka̱ram ka ka̱bvung ka a̱n ba̱ ba ni, ko ba yya da̱ mba ni, rot ba̱ryat ba ba san ni, a ryi ba kaai a̱ wwon bu i ka̱baram. 22Zwa ji kwei a a̱shyim a ni ryi di ba̱nyet ba a̱ hok ba̱ryat ba ni, ma a̱huhwa ka̱sa nu bu cat krum i ba̱ tuk ba̱ryat ba ba maai sum ba. 23Zwa ji kwei a a̱tsatsak ka̱byen nu ni nji ryi di ba̱nyet ba a̱ hok ba̱ryat ba ni a̱ ba̱ hok a̱ maai, a̱ sum, ba̱yanyet tswa ncyi, ba̱yanyet nswak a̱kitat, ba̱yanyet ma tswa nswak ntat.”

Misali yak bu ba̱pyyi

24Yesu a̱ bo ba̱ ta gan zaan a̱ hywa, “Dityok Tazwa ti ryi di a̱tuba nu a̱ tup a̱tsatsak nzwa i ka̱byen nu ni. 25Ka̱tuk ka̱yaan a̱ta̱tuk koyan na̱ shyi nda, a̱ra̱ndwan nu a̱ nat a̱ sin nai ba̱pyyi ka̱yat yak ka a̱ drok. 26Yak a ku bu rai i nwa trung, ba̱pyyi ba a̱ si ma̱n wruk a̱ sseng ba̱zan. 27Ba̱kwwa a̱ntyok ka̱byen ba a̱ nyyai a̱ bu hywa da̱ nu, ‘A̱ntyok ka̱ryi, zwa ji zi yin nai ni yin yet a̱zizrak, ma zi ryi ba̱pyyi ban ta ba̱t. Ba nyyai ke?’ 28A̱ntyok ka̱ryi nu a̱ hywa, ‘A̱ra̱ndwan a̱yaan a̱mi a̱n tup ba̱pyyi ba.’ Ba hywa da̱ nu, ‘A cat zi nat si wa ba̱pyyi ba weyang o?’ 29Na̱ hywa, ‘Kaai, yi ryok ho yi bu shyi i wa ba̱pyyi ba i si wa yak a nta̱mak. 30Yi ryok ba rai sa̱rei mba, se ka̱ram yya yak ka a̱ ba n si ntyyei ba̱nyet yya yak ba ba wa ba̱pyyi ba a̱ ba̱ tung a̱ rop a̱n tyyi rong, a̱ wwon a̱ si tyyak yak a a̱ sin tyyi mi a a̱ngban.’ ”

Misali zwa ma̱stad bu gan yisti

(Markut 4:30-32; Luka 13:18-19)

31Yesu a̱ bo ba̱ ta gan zaan a̱ hywa, “Dityok Tazwa ti ryi di zwa ma̱stad ji a̱yin na̱ sook a̱ tup i ka̱byen nu ni. 32I rat ra̱u kozan tswa, ma ka̱ram ka zin dai ni a ryi zi ra̱u kozan dityin i ka̱byen ka. Zi tyyi ka̱kon na̱non na cong a̱n yya na̱sa a mbvak a.”

33Yesu a̱ bo ba̱ tyyei misali zaan a̱ hywa, “Dityok Tazwa ti ryi di yisti u a̱ra̱mbyring na̱n sook a̱ kyyai bu mpyyi a ryei ni, na ngeyak a̱ bu tyyi a̱gba̱dang dikwang.”

Ka̱sak ka Yesu na̱n dyat a misalai ji ni

(Markut 4:33-34)

34Yesu a̱ zzek ka̱tswa ba̱nyet ka sa̱rei ba̱ a misalai. Ba kyang a na̱ ba̱ zzek a̱ wi n tyyi misali ni ba. 35Ku cong ba ba̱cicrak bu kyang a a̱ntyok tyyei ba̱ryat Ka̱za a̱yaan na̱ yin jem ni a̱ hywa,

“N ni ryat ba̱ mba a̱za̱n misalai

n ba̱ tyyei nkyang a shyi i ka̱nrang nyyai ka̱ram ka ba ka̱n yya ka̱sa ka ni ba.”

Kyang a misali ba̱pyyi ji zi yet i

36Yesu a̱ wwon ka̱tswa ba̱nyet ka a̱ brak a̱ nwa ka̱yat ka̱ryi. Na̱won pfong nu na a̱ nyyai a̱ bu hywa da̱ nu, “Zi cat a za tyyei kyang a misali ba̱pyyi ji zi yet i.”

37Yesu a̱ hywa da̱ mba, “A̱yin nu a̱ tup a̱tsatsak nzwa nu ni a̱mi a̱ yet nzuk Ka̱won A̱neywu. 38Ka̱byen keyak ka a̱mi a̱ yet ka̱sa ka. A̱tsatsak nzwa nu a̱mi a̱ yet ba̱nyet ba a̱ shyi i Dityok ti ni. Ba̱pyyi ba a̱mi a̱ yet ba̱nyet ba a̱ yet ba̱nying Ka̱ta̱nyrang ba ni. 39A̱ra̱ndwan nu a̱ tup ba̱pyyi ba ni a̱mi a̱ yet a̱gwam a̱ka̱tuk tswa nu. Ka̱ram yya yak ka a̱mi a̱ yet tyak ka̱sa na. Ba̱nyet yya yak ba a̱mi a̱ yet ba̱pfong Ka̱za ba. 40Da̱ni di ban tung ba̱pyyi ba a̱ rop a̱ tyyi an dong a ni, a̱mi ku nin dyi i tyak ka̱sa na. 41Nzuk Ka̱won A̱neywu n ni tom ba̱pfong Ka̱za nzuk, ba bu tun i Dityok nzuk ti sa̱rei ba̱nyet ba a̱ tyei ka̱ywap i bu ba̱ka̱tuk ba̱nyet, 42a̱ ba̱ tung sa̱rei a̱ krok i bvong ndong. Ka̱ yemi ba nin kun a̱ rywei mbvak a̱ ta̱sang. 43Wwon ba̱nyet ba a̱ yet ba̱nyet Ka̱za ba ni a̱ ya a̱ssi di nom ni i Dityok A̱tyyi mba ti. A̱yin nu a̱ byyi a̱pfo ni na̱ hok ansham.”

Dityok Tazwa ryi di zwa ji ba nyat i

44Yesu a̱ bo ya ka̱son a̱ hywa da̱ mba, “Dityok Tazwa ti ryi di zwa ji shyi nrang ka̱yat ka̱byen ni. A̱yanyet a̱ si za̱ shya, a̱ bap a̱ wwon. A̱ brek bu gwai a̱ si zzap sa̱rei nkyang a na̱ byyi ni a̱ ga bun san ka̱byen ka zwa ji zin shyi ni.”

Dityok Ka̱za bu lu'ulu'u

45A̱ bo hywa da̱ mba brak, “Dityok Tazwa ti ryi di a̱tuba nu a̱ wruk cat a̱tsatsak lu'ulu'ai ni. 46Ka̱ram ka na̱ sin shya a̱gba̱dang a̱tsatsak u ni a̱ brek a̱ bu zzap sa̱rei nkyang a na̱ byyi ni a̱ ga sin ku san.”

Dityok Tazwa ba̱ a̱riryek pyyem hwon

47A̱ bo hywa da̱ mba, “Dityok Tazwa ti ryi di a̱riryek pyyem hwon nu ba krok i ba̱shekwot ba ni, na̱ si cei kozan kyang a̱ tyyi. 48Na̱ bun hywat, ba̱nyet pyyem hwon ba a̱ nyyai a̱ bu tun a̱ kwwat hwon ji a̱ wruk i. A̱ trung a̱tsatsak hwon nu a̱ krok i kukut, kpikpit nkyang nzaan na ba weyang. 49A̱mi ku nin dyi i tyak ka̱sa na. Ba̱pfong Ka̱za ba a̱ ni ba a̱ bu tun ba̱tsatsak ba̱nyet ba a̱ wruk i, a̱ wwon ba̱ka̱tuk ba 50a̱ tyyi i bvong dong a. Ka̱ yemi ba nin kun a̱ rywei mbvak a̱ ta̱sang.”

A̱ryen ba̱ a̱hwai nkyang

51Yesu a̱ ba̱ zzim a̱ hywa, “Yi hok kyang a n dyat i bvwong o?”

Ba hywa, “Ee.”

52Na̱ hywa da̱ mba, “Kozan malam Truwang nu ba ku zzek tazwa Dityok Tazwa ti ni a̱ ryi da̱ a̱ntyok ka̱ryi nu a̱ bvwo sa̱rei a̱ryen ba̱ a̱hwai nkyang a ka̱yat bat saai nkyang nu ka ni.”

Ba rak Yesu Nazarat

(Markut 6:1-6; Luka 4:16-30)

53Ka̱ram ka Yesu na̱ bun tyak tang gan nu ji ni, a̱ drok ka̱bvwa iya 54a brek a̱ nat ka̱nkrang nu ka. A̱ si nwa a̱ zzek i bat a̱duwa mba na. Ba̱nyet ba a̱ ku hok ni a̱ yya ka̱hat, a̱ hywa, “A̱ si shya a̱za̱ncyi na ni ke? Nkyang ka̱hat nani na̱ bo yya ni hwa? 55Nu a̱mi a̱ yet ka̱won kafinta ka baa? Maryamu a̱mi a̱ yet a̱naa nu nu, ka̱ni? Ba̱nyet Yakubu, bu Yusufu, bu Siman bu Yahuda a̱mi a̱ yet ba̱wumbeyang nu ba, ka̱ni? 56Har ma ba̱nap nu ba a̱ swat kyi ba̱ njit ka̱ni? A̱yin a̱ni a̱ si shya nkyang a ni ke? 57Rot a̱mi ba hok diryen nu.”

Yesu a̱ hywa da̱ mba, “Da ma a̱ntyok tyyei ba̱ryat Ka̱za, koke ba ku cyang bu shok, bam bu ka̱nkrang nu bu ka̱ryi nu ba.” 58Rot a̱mi na̱ yya nkyang ka̱hat ba̱t ka̱ yemi ba, rot ban tyyi ndya mba na ba.

Currently Selected:

Matta 13: kaj

Highlight

Copy