Matta 14

Dikwu Yohana A̱yya Baptisma

(Markut 6:14-29; Luka 9:7-9)

1Ka̱ram iya a̱mi Hirudut, a̱gwam Galili na̱ yin hok nkhang Yesu. 2A̱ hywa di na̱macwwang ba̱gwam nu na, “Yohana A̱yya Baptisma a̱mi a̱ shyek. Nkpa n byyi na̱n yya nkyang ka̱hat na.”

3Nu Hirudut a̱ yin tyyi ba pyyem Yohana a̱ si tyyi a jaru rot Hirudiya a̱mbyring a̱wumba nu nu Filibut. 4Yohana a̱ tyyei Hirudut a̱ bo ku tyyei a̱ hywa, “Ku myim a bvwa a̱mbyring a̱ni ba.” 5Hirudut a̱ cat hywat Yohana, ma a̱ pfong ka̱wun ba̱nyet Yahuda ka rot ba yin sook Yohana a̱ yet a̱ntyok tyyei ba̱ryat Ka̱za.

6Nom byin Hirudut bu krang ba, na̱ yya dina, ka̱won ka̱neyang Hirudiya ka a̱ nwa a̱ bu song a̱ta̱ssi ba̱nyet ka a̱ yin shyi ka̱bvwa dina ka ni. Hirudut a̱ hok ansham ba̱gingang 7a̱ hywa di ka̱baneyang ka, “N shyi, bu kyang a a cat i n ni na̱ ryi.”

8Ka̱baneyang ka a̱ brek a̱ nat, a̱naa nka nu Hirudiya a̱ si ka̱ zzek, ka brek a̱ bu hywa da̱ a̱gwam Hirudut, “N cat diccu Yohana A̱yya Baptisma kyi i cicyi naanini.”

9Rya Hirudut i byyan, ma dolet na̱ yya kyang a na̱ ka̱n dyat a̱ta̱ssi ba̱nyet ka ni, a̱ tyyi ba ka̱ yya kyang a ka cat i, 10na̱ tom ba si tyet diccu Yohana ti a jaru nu. 11Ba breng diccu ti i cicyi a̱ bu wrak ka̱baneyang ka, ka san a̱ nat i da̱ a̱naa nka nu. 12Na̱won pfong Yohana na a̱ ba a̱ bu sook kom nu na a̱ si nyat, wwon a̱ nat a̱ si tyyei Yesu.

Yesu a̱ tssung ba̱nyet ncyi kop tsson

(Markut 6:30-44; Luka 9:10-17; Yohana 6:1-14)

13Yesu na̱ bu hok a̱ nwa kpongo a̱ nat ka̱bvwa ka̱yaan ba̱diyin. Ba̱nyet ba a̱ hok a̱ wwon na̱mankrang mba na a̱ ku tssup di a̱tak. 14Yesu na̱ bu wruk a kpongo nu a̱ ryi ka̱tswa ba̱nyet ka, dizot i ku pyyem na̱ creng ba̱nyet nhywu mba ba.

15Ka̱jenshring ka bu yya, na̱won pfong nu na a̱ nyyai a̱ ba da̱ nu a̱ bu hywa da̱ nu, “Nom a tyak, ka̱yit a̱ bo nkaa ni. Se a tun ba̱nyet bani ba nat i na̱mankrang a a̱ si cat kyangya.”

16Yesu a̱ hywa da̱ mba, “Ba se ba nat ka̱bvwa ba; nyin a̱mi ni ba̱ ryi kyang a ba ni ya ni.”

17Ba hywa, “A̱ngbom kyang u zi byyi kyi ni a̱mi a̱ yet burodi pfon bu hwon swa.”

18Yesu a̱ hywa, “Yi n ba bu burodi na bu hwon ji kyi.” 19A̱ tyyi ba̱nyet ba sa̱rei a̱ sswak tazwa ba̱pyyi ka. Na̱ sook burodi na ba̱ nkpa pfon bu hwon ji ba̱ nji swa a̱ yrek a̱ssi nu na tazwa a̱ dyep Ka̱za mi, a̱ sam burodi na, wwon a̱ wwat na̱won pfong nu na ba ka ba̱nyet ba. 20Koyan a̱ ya a̱ swa, wwon na̱won pfong nu na a̱ tung nkpikpit a bvat i a̱n yya na̱nshang swak bu na̱hwa. 21Ba̱nyet ba a̱ ya ni a̱ yet cyi kop tsson, di ba twang ba̱nyring ba bu na̱mawon na a̱n tyyi ba.

Yesu a̱ cong tazwa ba̱shekwot

(Markut 6:45-52; Yohana 6:15-21)

22Yesu a̱ tun na̱won pfong nu na ba ahwa ba nwa kpongo nu a̱ ka̱shyi ma̱nyyi kei ka, na̱ tun ba̱nyet ba a̱ si ba̱ tssup. 23Na̱ bu tun ba̱nyet ba, a̱ wrak a̱ nat an tsok ji ba̱diyin a̱ si yya a̱duwa. Ka̱jenshring a̱ bu yya Yesu na̱ shyi ka̱ yemi ba̱diyin. 24Ka̱ram iya kpongo nu na̱ ka̱n nat gba̱gbang i ba̱shekwot ba, a̱ jim tazwa ba̱shekwot ka rot a̱ka̱tuk wun a̱ yin ku hywap.

25Bai a̱shong a̱ntson Yesu a̱ nyyai a̱ ba da̱ mba a̱ cong tazwa ba̱shekwot ka. 26Na̱won pfong a ba bu ryi Yesu na̱ cong tazwa ba̱shekwot ka, ba hok ka̱wun a̱ hywa, “A̱ninyet a̱mi,” a̱ krok nkun.

27Yesu a̱ ba̱ yei ba ahwa a̱ hywa, “Yi gbung rya ryok hok ka̱wun ba. Nzuk a̱mi.”

28Bitut a̱ yrek diwan nu ti a̱ hywa, “A̱ntyok Ka̱ryi, ki nwan a̱mi, a tyyi n ba da̱ nwan tazwa ba̱shekwot ka.”

29Yesu a̱ hywa, “Da̱ ba!” Bitut a̱ nwa ka̱cyet tazwa ba̱shekwot ka a̱ naat di Yesu. 30Na̱ bu hok wun na ku hywap, ka̱wun a̱ ku pyyem na̱ nwa ta̱yut i ba̱shekwot ba, a̱ tyyi kun, “A̱ntyok Ka̱ryi, n san!”

31Bu i ka̱baram Yesu a̱ neyak bvak a̱ ku kwwat, a̱ hywa da̱ nu, “A̱nzan a̱ na̱ ba an yya shekka na? Tyyi rya nwan na maai ba!”

32Ba nwa kpongo nu ba̱ mba ba̱ hwa, wun na i sseng. 33Na̱won pfong a ka̱yat kpongo ka a̱ sook Yesu ntong, a̱ hywa, “A̱kpak a̱ssi a̱mi a yet Ka̱won Ka̱za.”

Yesu a̱ creng ba̱nyet nhywu Janisarata

(Markut 6:53-56)

34Ba bu byyek a̱ nwa ka̱byen Janisarata. 35Ba̱nyet ka̱nkrang ba ba bu ku ryi a̱ bvwong, ba tssop sa̱rei ka̱byen ka ba ba bu ba̱nyet nhywu da̱ nu. 36Ba ku naai ba̱nyet nhywu ba a̱ shya bu bvak a̱godo nu na a̱ byram. Sa̱rei ba̱nyet ba a̱ ku byram ni a̱ creng.

Currently Selected:

Matta 14: kaj

Highlight

Copy