Naiˍ htangˍ 24
24
Ang suingˉ Hpeˍliˆ tawngˍ naˍ veu Pawˉluˆ hkaˍ muˍ hkai jiˉ
1Hingˉ nawngˍ veu ngaˍ nuing hkeungˉ yao, yit pa rawˉ hek ang kaeˍ Aˍnaˍniˆ kawngˉ awn hoˉ yaˍ mangˍ htiˍ baˍ uiˍ, Teˍraˍtuˆluˆ nae maengˉ jiˉ ciˍ tangˍ ang hkiˍ nae mangˉ htiˍ hu kawngˉ hiˉ keung veu laˉ jiˉ. Yawng ngaˍ ang meungˉ kaˉ seu ang suingˉ ang huiˍ mangˍ tawngˍ naˍ veu Pawˉluˆ na, naˍ hokˍ chiˉ yao yang beu awˍ lawng hingˉ hkai biˍ jiˍ. 2Pawˉluˆ na ang suingˉ mangˉ haoˉ yao chiˉ jiˉ beu, Teˍraˍtuˆluˆ yang htaˍ veu naˍ hokˍ chiˉ yao ciˍ jiˍ. Laˍ htiˍ ang huiˍ ang suingˉ Hpeˍliˆ veuˉ, nang pa nae gu ca buiˍ duingˉ buiˍ naeˍ hkaoˉ veu ya ca yao, nang beu pingˍ nyaˍ ningˍ paˉ nae changˉ ceuˉ ningˉ saˍ laiˍ, ang liˍ ang kawngˍ ningˍ maenˍ laˉ naeˉ uiˉ saˍ laiˍ nang vaˍ naeˍ yaˇ. 3Ningˉ pa nae yao, hkaˉ hko laˉ hko uiˉ hkaoˉ veu, Aˉ keung na baˍ upˍ, gu nang beu ang buinˉ na chiˍ mawng yao hap yuˉ naeˉ yaˇ. 4Caˇ, ga nang na ang mangˍ nae baˍ ya suk sak laˍ hkiˍ naeˍ uiˉ saˍ laiˍ, otˆ yao gu hkai laˍ siˍ naeˉ ang tangˍ htiˍ htaeˍ nyiˍ htaeˍ hingˍ na iˉ yaˍ naˉ laˍ beun voˍ nae ga nang na paˉ laˍ naeˍ yaˇ. 5Changˉ niˇ maˇ ang haiˉ uiˉ changˉ hpeuˍ yao, nuingˉ chaˍ htaˍ veu cawtˍ Yuˉdaˆ changˉ uiˉ hkaˉ hko laˉ hko hpap laˉ naeˉ uiˉ saˍ laiˍ htuing biˍ naeˍ mangˉ yaˇ. Hao na hpakˍ nga aengˉ jiˉ Naˍzaˍraet ang muˉ hkaoˉ veu muiˉ, yaˇ awn hoˉ htiˍ hu mangˉ yaˇ. 6Ningˉ htaˍ veu muiˉ, ang buinˉ paˉ kyaˉ cawngˉ ang huiˍ na tiˍ chaˍ tiˍ kaeˍ naeˍ uiˉ saˍ laiˍ yang coˇ caˇ yao ha naeˉ na gu bae yao yang na hpui yaeˇ yaˇ. 7(Hta yao muiˉ, hkaw cangˉ luk suikˆ maˇ laˉ yao yang ang to hingˉ gu laˍ puˍ hkaoˍ veu yatˍ yuˍ laˉ laˍ yao). 8Nang yang na maenˍ nae naˉ baoˉ vaˍ, gu yang htaˍ veu naˍ hokˍ chiˉ jiˉ uiˉ ang ceuˉ hkaˉ hko laˉ hko na nang ya bae naeˉ yaˇ nae, Teˍraˍtuˆluˆ ha biˍ jiˍ. 9Yuˉdaˆ changˉ muiˉ yang ciˍ naeˍ lawˉ ang yaˍ yaˇ nae ciˍ yao naˍ hokˍ chiˉ jiˉ. 10Ang meungˉ kaˉ seu ang suingˉ huiˍ maˇ, Pawˉluˆ na hkaˍ muˍ hkai voˍ nae laˍ puˍ maˍ biˍ beu, Pawˉluˆ ha biˍ jiˍ.
Nang ang byaˍ pi changˉ ceuˉ ningˉ uiˉ kawngˉ aˉ muˍ tatˆ myang naeˉ na ga bae yao, ga beu awˍ lawng ningˉ mawnˍ mawnˍ pyawˍ pyawˉ hkai laeˍ laˍ naeˍ yaˇ. 11Ang tuˍ mawt naeˉ uiˉ saˍ laiˍ ga Yeˍruˆsaˍlaemˍ vengˍ veu lae yao, htiˍ cheˍ nyiˍ nuing htaˍ veu baˍ hkeungˉ suing nae na nang ang ya bae yaˇ. 12Ang buinˉ paˉ kyaˉ cawngˉ ang huiˍ veu na baˍ upˍ, Yuˉdaˆ changˉ ceuˉ hpawm lang kyaˉ veu na baˍ up, vengˍ veu na baˍ up, changˉ htiˍ hu na muiˉ ga hteng lang yao changˉ ang muˉ na ciˍ ciˍ caeoˍ caeoˍ nae piˉ ha naeˉ na yawng baˍ myangˍ. 13Ya muiˉ ga htaˍ veu yawng naˍ hokˍ chiˉ laˍ naeˍ awˍ lawng, nang na piˉ huˍ laˍ seuˍ yawng beu saˉ hkiˉ baˍ ca. 14Caˇ, gaˇ nang na ningˉ mae pawngˉ hkai maen laˍ naˇ. Hao na hpakˍ yao aengˉ jiˉ ang muˉ nae yawng ciˍ naeˍ kaˉ ba ang liˍ ningˍ keung gaˇ gu beu aˉ hpiˍ a puˉ uiˉ beu Hpaˍcaoˍ na koˉ koiˍ naeˍ yaˇ. Kaˉ ba ang liˍ ang kawngˍ ang laiˍ nae pa rawˉ hpaet uiˉ beu ang laiˍ hkaoˍ veu hkaˍ taemˉ jiˉ uiˉ ang laiˍ na ga ang yumˉ yaˇ. 15Ang sui ang pawng uiˉ changˉ nae baˍ sui baˍ pawng nae uiˉ chang muiˉ siˉ yao teˍ laˉ laeˍ naeˍ nae yawng kuitˆ yao ca jiˉ lawˉ, ga muiˉ Hpaˍcaoˍ na cuˉ yao kuitˆ yao tangˍ naeˍ yaˇ. 16Hpaˍcaoˍ tawngˍ naˍ veu na baˍ up, changˉ tawngˍ na veu na baˍ up, ga beu bae buˉ naeˉ nuing ba ningˉ ngaˍ ga htaˍ veu naˍ hokˍ chiˉ naeˉ uiˉ baˍ ya ca naeˉ uiˉ saˍ laiˍ ga coˇ caˇ yao vaˍ ngaeˇ yaˇ. 17Ang pi iˉ yaˍ mangˍ nae caeˉ langˉ yao, ga beu changˉ ceuˍ ang saˍ ang baeˍ na pawngˍ naeˍ uiˉ htiˍ baˍ nae, Hpaˍcaoˍ na tanˍ seuˍ uiˍ ga hanˉ yao langˉ byaˇ. 18Ga ningˉ mae ha yao ca beu, ga ang maenˍ ang mang ang liˍ na vaˍ peunˍ yao, ang buinˉ paˍ kyaˉ cawngˉ ang huiˍ hkaoˍ veu yawng ga na ya myangˉ laˍ naeˍ yaˇ. Changˉ ang muˉ byaˍ ga kawngˉ ca naeˉ uiˉ muiˉ baˍ aˍ. Ga ciˍ ciˍ caeoˍ caeoˍ nae ca naeˉ uiˉ muiˉ baˍ aˍ. Caˇ, Aˍsiˆ ang meungˉ veu ca naeˉ changˉ uiˉ laˉ jiˉ. 19Yawng ngaˍ ga htaˍ veu naˍ hokˍ chiˉ naeˉ uiˉ htiˍ ceuˍ ceuˍ ca baoˉ vaˍ, nang tawngˍ naˍ veu yawng laˉ yao ciˍ kyaˍ yaˇ. 20Haeˉ mae baˍ baoˇ Yuˉdaˆ awn hoˉ ang muˉ uiˉ tawngˍ naˍ veu ga cung laˉ beu, Siˉ yao teˍ laˍ laeˍ naeˍ awˍ lawng hingˉ pa nae miˉ nuing ga nawng tawngˍ naˍ veu aˉ muˍ tatˆ naeˉ na ya hkamˉ naeˉ yaˇ nae 21ga kaˍ haengˍ nae haoˉ naeˉ hingˉ htaeˉ baˍ baoˇ, ga hkaoˉ veu aˉ mae uiˉ ang si ca naeˉ na yawng tawˉ yawng na piˉ ciˍ vo nae Pawˉluˆ ciˍ sangˍ jiˍ. 22Ang suingˉ Hpeˍliˆ nawˍ, Kaˉ ba ang liˍ na ang bae nae pa, yang ang nyamˍ hingˍ na sat nga biˍ yao ciˍ jiˍ, Yinˍ cangˉ longˉ Luˆsiˆ hkeu lui beu, nawng awˍ lawng hingˉ ga tatˆ chae laˍ vaˍ nae, yawng na ha biˍ jiˍ. 23Pawˉluˆ na hawˍ vo nae ang suingˉ Hpeˍliˆ nawˍ yinˍ cangˉ htiˍ hu mangˉ na ang tangˍ piˍ jiˍ. Caˇ, yang na kaˍ haengˍ nae baˍ ha nae, yang loˉ naeˉ laˉ mae yang beu ang changˍ uiˍ pawngˍ taw naeˉ uiˉ saˍ laiˍ baˍ haenˍ jo nae ha biˍ jiˍ.
24Kaˉ nawngˍ veu baˍ mangˍ nae, Ang suingˉ Hpeˍliˆ nawˍ, Duˍsiˆleˍ nae maengˉ jiˉ yang beu hkaˍ ba mangˉ kawngˉ htuˍ yaˍ laˉ mae laˉ jiˉ. Yang hkaˍ ba maˇ, Yuˉdaˆ changˉ yaˇ. Ang suingˉ Hpeˍliˆ Pawˉluˆ na haoˉ nga yao, Yeˍsuˆ Hkritˆ na yumˉ naeˉ uiˉ awˍ lawng hkai yao maˍ laˍ naeˍ na yang naˉ jiˉ. 25Pawˉluˆ nawˍ, sui naeˉ pawng naeˉ awˍ lawng, aˍ sangˍ yang beu ang to na kaˍ yaˍ naeˍ uiˉ awˍ lawng nae, kaˉ nawngˍ veu hkeu lui naeˉ aˉ muˍ tatˆ naeˉ uiˉ awˍ lawng hkai yao maˍ biˍ beu, ang suingˉ Hpeˍliˆ hkae yao ciˍ jiˍ, Ya muiˉ awkˍ taw aengˉ beun voˍ, Kaˉ nawngˍ veu ang nyamˍ ya laeˍ beu ga nang na haoˉ laeˍ laˍ vaˍ nae ha biˍ jiˍ. 26Pawˉluˆ yang na hpuˉ piˍ laˍ kuˍ vaˉ nae kuitˆ yao, ang byaˍ cangˍ Pawˉluˆ na haoˉ yao ang changˍ taeng jiˉ.
27Nyiˍ nuing piˍ puing ngangˉ laˉ beu, Hpeˍliˆ ang suingˉ hpeuˍ kyaˍ veu, Pawˆkiˆ Hpeˍtuˆ hpeuˍ laˉ jiˉ. Ang suingˉ Hpeˍliˆ nawˍ, Yuˉdaˆ changˉ uiˉ yang na nuing ba capˆ naeˉ uiˉ na ya siˉ yao, Pawˉluˆ na htawngˉ hkaoˉ veu lawngˉ nga yao chiˉ saˍ jiˍ.
Currently Selected:
Naiˍ htangˍ 24: pyy
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
