Naiˍ htangˍ 25
25
Ang suingˉ kaeˉ saˍ kawngˉ aeˉ naeˉ uiˉ Pawˉluˆ paˉ jiˉ
1Ang suingˉ Hpeˍtuˆ nawˍ, ang meungˉ hingˉ hkaoˉ veu hkeu lui yao, sumˍ nuing hkeu beu, yang Kaeˉsaˍriˆ vengˍ veu htaˍ laeˍ yao Yeˍruˆsaˍlaemˍ vengˍ veu aeˉ jiˉ. 2Haeˉ mae beu, yit pa rawˉ hek ang huiˍ uiˍ nae Yuˉdaˆ changˉ uiˉ beu awn hoˉ htiˍ baˍ uiˍ Pawˉluˆ awˍ lawng baˍ maenˍ nae uiˉ ang suingˉ Hpeˍtuˆ na hkai biˍ jiˍ. 3Yawng ciˍ jiˍ, Ang buinˉ na cuˉ yao, Pawˉluˆ na Yeˍruˆsaˍlaemˍ vengˍ veu iˉ yaˍ sa luiˍ lao nae, ang suingˉ Hpeˍtuˆ na paˉ jiˉ. Aˉ mae yao nae baoˉ vaˍ, kaˉ ba veu yawng caw yao Pawˉluˆ na saeˍ lang naeˉ nae yawng kuitˆ yao chiˉ jiˉ. 4Ang suingˉ Hpeˍtuˆ mangˉ ha biˍ jiˍ. Pawˉluˆ na Kaeˉsaˍriˆ vengˍ veu lawngˉ yao chiˉ byaˇ. Baˍ mangˍ nae ga ang to hingˉ keung veu aeˉ laeˍ naeˍ yaˇ. 5Hingˉ pa nae yao, awn hoˉ htiˍ baˍ uiˍ ga kawngˉ aeˉ yao, changˉ hiˉ mangˉ htaˍ veu naˍ hokˍ chiˉ kyaˉ ang ca nae baoˉ vaˍ chiˉ voˍ nae yang na ha biˍ jiˍ. 6Hpeˍtuˆ yawng kawngˉ nyiˍ nuing laˉ mae ca yao hingˉ nawngˍ veu, yang Kaeˉsaˍriˆ vengˍ veu lae laeˍ naeˍ yaˇ. Kaˉ nawngˍ veu hingˉ nuing yang aˉ muˍ tatˆ kyaˉ paˍ langˍ veu duingˉ yao, Pawˉluˆ na suiˍ luingˉ voˍ nae yang ang tangˍ piˍ jiˍ. 7Pawˉluˆ hkeu lui beu, Yeˍruˆsaˍlaemˍ vengˍ veu ca yao lui jiˉ Yuˉdaˆ changˉ htiˍ baˍ uiˉ, yang na cung cawtˍ biˍ yao, yawng saˉ hkiˉ baˍ piˍ hu taw yao muiˉ, huiˍ sutˆ nae uiˉ naˍ hokˍ yang htaˍ veu chiˉ jiˉ. 8Pawˉluˆ yang beu awˍ lawng uiˉ hkaiˍ biˍ yao ciˍ jiˍ, Yuˉdaˆ changˉ uiˉ beu ang liˍ na baˍ up, Ang buinˉ paˉ kyaˍ cawngˉ ang huiˍ na baˍ up, Ang suingˉ kaeˉ saˍ na gaˇ htiˍ ceuˍ nae muiˉ baˍ tiˍ si nae ha biˍ jiˍ. 9Caˇ, ang suingˉ Hpeˍtuˆ nawˍ, Yuˉdaˆ changˉ uiˉ yang na nuing ba capˆ naeˉ uiˉ saˍ laiˍ na ya siˉ naeˉ pa nae, Pawˉluˆ na ha biˍ jiˍ. Ningˉ lawng ningˉ uiˉ ga tawngˍ naˍ veu aˉ muˍ tatˆ hkiˍ naeˍ uiˉ saˍ laiˍ, naˇ Yeˍruˆsaˍlaemˍ vengˍ veu lae siˉ naeˉ laˍ nae naˉ jiˉ. 10Pawˉluˆ ciˍ laeˍ sangˍ jiˍ, ang suingˉ ang huiˍ laˍ htiˍ ang ca Kaeˉsaˍ beu aˉ muˍ tatˆ kyaˉ nawˆ ga cung yao cangˉ ngaeˇ yaˇ. Ningˉ keung veu yaˇ ga na aˉ muˍ tatˆ laˍ kyaˍ. Nang ang to maenˍ nae bae jiˉ lawˉ, gaˇ Yuˉdaˆ changˉ ningˉ uiˉ na htiˍ ceuˍ nae muiˉ baˍ tiˍ si. 11Ga tiˍ siˍ jiˉ uiˉ siˉ yao ang kuingˉ nae htiˍ ceuˍ ceuˍ ang ca nae baoˉ vaˍ, siˉ naeˉ hingˉ na ga ba hpaeˍ aengˉ. Caˇ, yawng ga htaˍ veu naˍ hokˍ chiˉ naeˉ hingˉ uiˉ, htiˍ ceu nae muiˉ baˍ ca nae baoˉ vaˍ, yawng beu laˍ puˍ hkaoˍ veu ga na htiˍ hu nae muiˉ ap laˍ yao baˍ kaˍ, ang suingˉ ang huiˍ Kaeˉsaˍ kawngˉ piˉ aeˉ lao nae ga paˉ laˍ naeˍ yaˇ nae ha biˍ jiˍ. 12Haeˉ mae beu, ang suingˉ Hpeˍtuˆ nawˍ, yang beu aˉ muˍ tatˆ naeˉ ang muˉ uiˉ kawngˉ sing cat nga lang yao, nang ang suingˉ ang huiˍ Kaeˉsaˍ kawngˉ lae naeˉ nae paˉ laˍ yao, ang suingˉ ang huiˍ Kaeˉsaˍ kawngˉ nang ya aeˉ naeˉ yaˇ nae ha biˍ jiˍ.
Ang suingˉ Aˍgiˉpaˆ nae Beˍraˍniˆ tawngˍ naˍ veu Pawˉluˆ na suiˍ yao lae jiˉ.
13Kaˉ nawngˍ veu baˍ mangˍ nae, ang suingˉ Aˍgiˉpaˆ nae yang hkaˍ ba Baˍraˍniˆ nawˍ, ang suingˉ Hpeˍtuˆ na hap yuˉ naeˉ nae Kaeˉsaˍriˆ vengˍ veu hkeu lui jiˉ. 14Yaˉ yetˍ hiˉ keung veu iˉ yaˍ mangˍ nae ca naeˉ hkaoˉ veu, ang suingˉ Hpeˍtuˆ nawˍ, Pawˉluˆ beu awˍ lawng hingˉ ang suingˉ mangˉ na ningˉ mae hkai biˍ jiˍ. Ang suingˉ Hpeˍtuˆ htawngˉ hkaoˉ veu lawngˉ nga saˍ jiˍ uiˉ changˉ muiˉ htiˍ hu ang ca suiˍ yaˇ. 15Ga Yeˍruˆsaˍlaemˍ vengˍ hkaoˍ veu ca beu, yit pa rawˉ hek ang huiˍ uiˍ aˍ Yuˉdaˆ awn hoˉ yaˍ mangˍ htiˍ baˍ uiˍ, yang beu awˍ lawng hingˉ hkai laˍ yao, yang na aˉ muˍ tatˆ bu nae, yawng ga na paˉ laeˍ naeˍ yaˇ. 16Ga yawng na hkai laeˍ biˍ yaeˍ, naˍ hokˍ chiˉ naeˍ na ya hkamˉ jiˉ uiˉ changˉ tiˍ hu maˇ, naˍ hokˍ chiˉ jiˉ mangˉ na mae kaˍ hpaw lang yao, naˍ hokˍ chiˉ naeˉ awˍ lawng hingˉ na yang baˍ ya ciˍ laeˍ sangˍ ngangˍ suing nae baoˉ vaˍ, aˉ mangˉ na baˍ up, hao laˍ htu hkaoˉ veu ap naeˉ na Roˉmaˆ changˉ beu ang liˍ baˍ ca nae, ga yawng na ha biˍ yaeˍ. 17Hingˉ pa nae, yawng ningˉ keung veu lui yao hpawm lang beu, ga ang nyamˍ baˍ sat nae, nawngˍ cangˍ nuing veu aˉ muˍ tatˆ kyaˉ paˍ langˍ htaˍ veu duingˉ yao, changˉ hiˉ mangˉ na suiˍ langˉ voˍ nae ang tangˍ piˍ jiˍ. 18Haeˉ mae beu, yang hta laˉ yao changˉ hiˉ mangˉ htaˍ veu naˍ hokˍ chiˉ beu, ga kuitˆ yao ca jiˉ naˍ hokˍ htiˍ ceuˍ nae muiˉ baˍ chiˍ la. 19Caˇ, yawng koˉ koiˍ naeˍ ang liˍ ang kawngˍ htiˍ baˍ uiˍ awˍ lawng hingˉ, Yeˍsuˆ nae maengˉ jiˉ siˉ peunˉ jiˉ mangˉ changˉ htiˍ hu awˍ lawng hingˉ naeˍ naˇ hteng lang yao ca jiˉ. Yeˍsuˆ hiˉ maˇ teˍ yaˍ yao cangˉ suing ngaeˇ ya nae Pawˉluˆ ciˍ jiˍ. 20Awˍ lawng ningˉ na ga aˉ mae naˉ hu ceuˇ nae baˍ kuitˍ awkˍ nga laeˍ taw nae, Ningˍ lawng ningˉ uiˉ na Yeˍruˆsaˍlaemˍ vengˍ hkaoˍ veu aˉ muˍ tatˆ yao, nang hiˉ keung veu ang aeˉ siˉ laˍ nae, ga yang na naˉ hu yaeˉ. 21Caˇ, Pawˉluˆ nawˍ, ang suingˉ ang huiˍ mangˍ na aˉ muˍ tatˆ laˍ naeˍ uiˉ saˍ laiˍ chiˉ laˍ beun voˍ nae paˍ yao, yang na ang suingˉ ang huiˍ Kaeˉsaˍ kawngˉ piˉ lae beu tiˍ hkeu hawˍ yao ca voˍ nae ga ang tangˍ piˍ byaˇ nae, ang suingˉ Hpeˍtuˆ ha biˍ jiˍ. 22Haeˉ mae beu, ang suingˉ Aˍgiˉpaˆ ciˍ jiˍ, Ga muiˉ yang tangˍ na ang kyaˍ siˍ yaˇ nae ang suingˉ Hpeˍtuˆ na ha biˍ beu, na seuˇ nang ang ya kyaˍ yaˇ nae, ang suingˉ Hpeˍtuˆ mangˉ ha laeˍ biˍ jiˍ.
23Haeˉ mae yao, kaˉ nawngˍ veu htiˍ nuing hingˉ ngang beu ang suingˉ Aˍgiˉpaˆ nae Beˍraˍniˆ yaˉ yetˍ muiˍ, laˍ htiˍ ca naeˉ hkaw cangˉ uiˉ nae, vengˍ hkaoˍ veu changˉ ang huiˍ htiˍ baˍ uiˍ kawngˉ hpawm lang kyaˉ ang hawngˉ hingˉ hkaoˉ veu mun hpungˉ ca naeˉ hkaoˉ veu awngˉ lae jiˉ. Ang suingˉ Hpeˍtuˆ ang tangˍ piˍ beu, Pawˉluˆ na hao suiˍ langˉ jiˉ. 24Haeˉ mae beu, ang suingˉ Hpeˍtuˆ ciˍ jiˍ, Hkunˉ hawˉ hkamˉ Aˍgiˉpaˆ nae ningˉ keung veu hpawm lang yao ca naeˉ uiˉ changˉ yawng veuˉ, ya muiˉ nawng myangˉ yao ca naeˉ changˉ niˇ maˇ, Yeˍruˆsaˍlaemˍ vengˍ veu na baˍ up, ningˉ keung veu na baˍ up, yang lawng hingˉ Yuˉdaˆ changˉ uiˉ ga kawngˉ laˉ yao, niˉ maˇ teˍ yaˍ yao baˍ kuingˍ nae yawng kaˍ haengˍ haoˉ naeˉ. 25Caˇ, changˉ ningˉ mangˉ hkaoˉ veu siˉ yao kuingˉ naeˉ uiˉ naˍ hokˍ na ga baˍ myangˍ. Yang ang to ang suingˉ ang huiˍ mangˍ kawngˉ lae naeˉ nae paˉ laˍ yao, yang na piˉ lae naˇ nae ga kuitˆ chae laeˍ byaˇ. 26Yang beu awˍ lawng hingˉ ga beu ang suingˉ huiˍ mangˍ na ang laiˍ taemˉ laeˍ biˍ naeˍ nae ang ti htiˍ ceuˍ nae muiˉ baˍ ca. Hingˉ pa nae, gu yang na maenˍ nae naˉ htamˉ nga baoˉ vaˍ, yang beu awˍ lawng hingˉ ga htiˍ ceuˍ ceuˍ taemˉ taw hkiˍ naeˍ uiˉ saˍ laiˍ, nawng ningˉ mawk ningˉ tawngˍ naˍ veu na baˍ upˍ, ang suingˉ Aˍgiˉpaˆ veuˉ, ya caeˉ nae nang tawngˍ naˍ veu na baˍ upˍ, ga yang na suiˍ langˉ byaˇ. 27Aˉ mae yao nae baoˇ, htawngˉ hkaoˉ veu lawngˉ nga jiˉ changˉ htiˍ hu mangˉ na sa laeˍ beu, yang na naˍ hokˍ chiˉ naeˉ awˍ lawng htiˍ baˍ uiˍ ang laiˍ maenˍ nae baˍ taemˍ biˍ nae baoˉ vaˍ, iˉ yaˍ nae muiˉ baˍ yaˍ nae ga kuitˆ yaeˉ nae ang suingˉ Hpeˍtuˆ ciˍ jiˍ.
Currently Selected:
Naiˍ htangˍ 25: pyy
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
