Naiˍ htangˍ 26
26
Ang suingˉ Aˍgiˉpaˆ tawngˍ naˍ veu Pawˉluˆ ciˍ jiˍ
1Haeˉ mae beu, Ang suingˉ Aˍgiˉpaˆ nawˍ Pawˉluˆ na ha biˍ jiˍ, Nang beu lawng hingˉ ciˍ naeˍ uiˉ aˉ hkvangˍ ang ca yaˇ nae ha biˍ jiˍ. Haeˉ mae yao Pawˉluˆ yang beu laˍ puˍ hingˍ chiˍ hta laeˍ yao yang beu awˍ lawng hingˉ hkai laeˍ biˍ jiˍ.
2Hkunˉ hawˉ hkamˉ Aˍgiˉpaˆ veuˉ, Yuˉdaˆ changˉ htiˍ baˍ uiˍ ga htaˍ veu naˍ hokˍ chiˉ laˍ naeˍ ningˉ uiˉ hkaˉ hko laˉ hko awˍ lawng, miˉ nuing nang tawngˍ naˍ veu ga ya hkaiˍ laˍ yao, ga ang pyawˉ yaˇ. 3Aˉ mae yao nae baoˉ vaˍ, Yuˉdaˆ changˉ uiˉ beu ang liˍ ang kawngˍ nae yawng hteng lang naeˉ awˍ lawng na, nang ang bae maˉ manˉ yaˇ. Hingˉ pa nae, iˉ yaˍ otˆ yao ga beu ang tangˍ ningˍ naˉ yuˉ lao nae ga nang na paˉ laˍ naeˍ yaˇ.
Pawˉluˆ Hpaˍriˆsaeˉ hpeuˍ saˍ myang jiˉ awˍ lawng
4Kaˉ huˍ veu, ga yaˍ keˍ yaˍ beu nae tangˍ yao, ga beu changˉ ceuˉ hkaoˉ veu na baˍ up, Yeˍruˆsaˍlaemˍ vengˍ veu na baˍ up, ga vaˍ naeˍ ang liˍ ang kawngˍ ningˍ uiˉ na Yuˉdaˆ changˉ uiˉ hkaˉ hko laˉ hko ang bae yaˇ. 5Tawngˍ hpanˍ ngang beu nae yawng ga beu lawng na ang bae nae yao, gu beu koˉ koiˍ naeˍ ang liˍ hkaoˍ veu Hpaˍriˆsaeˉ nae maengˉ jiˉ ang liˍ ang haenˍ na caiˍ naeˍ htiˍ muˍ na ga chaˍ lang naeˉ nae yawng saˉ hkiˉ hkamˉ siˉ baoˉ vaˍ, ang kaˍ yaˇ. 6Hpaˍcaoˍ nawˍ gu beu ang hpiˍ ang puˉ uiˉ na piˍ jiˍ saˉ caˉ hingˉ na ga kuitˆ yao ca naeˉ pa, ya muiˉ aˉ muˍ tatˆ naeˉ na ya hkamˉ naeˉ uiˉ saˍ laiˍ, ga ningˉ keung veu cung yao ca gaeˉ yaˇ. 7Gu beu changˉ ceuˉ tiˍ cheˍ nyiˍ ceuˍ uiˉ aˍ, miˍ hkiˍ nuing kawngˉ coˇ caˇ yao Hpaˍcaoˍ na koˉ koiˍ naeˍ hkaoˉ veu, saˉ caˉ hingˉ na ya naeˉ uiˉ saˍ laiˍ yawng kuitˆ yao ca ngaeˉ yaˇ. Hkunˉ hawˉ hkamˉ veuˉ kuitˆ yao chiˉ jiˉ hingˉ pa nae, Yuˉdaˆ changˉ htiˍ baˍ uiˍ ga na naˍ hokˍ chiˉ laˍ naeˍ yaˇ. 8Siˉ aeˉ jiˉ changˉ uiˉ na Hpaˍcaoˍ piˉ teˍ laˉ laeˍ naeˍ hingˉ na yumˉ yao baˍ kaˍ nae baˍ ceuˉ ha yao nawng kuitˆ yao cangˉ ngaeˇ.
Pawˉluˆ Hkritˆ yanˍ uiˍ na hkanˍ yaˍ chuiˍ yaˍ myang jiˉ awˍ lawng
9Naˍzaˍraet changˉ Yeˍsuˆ hingˉ na haenˉ taw naeˉ uiˉ saˍ laiˍ ang byaˍ ceuˍ ha kyaˉ yaˇ nae ga maˉ manˉ ang kuitˆ laeˍ myang yaˇ. 10Yeˍruˆsaˍlaemˍ vengˍ hkaoˍ veu ga haeˉ mae ang ha myang yaˇ. Yit pa rawˉ hek ang huiˍ uiˍ kawngˉ a hkvangˍ ya yao, Hkritˆ yanˍ changˍ ang byaˍ hu na htawngˉ hkaoˉ veu lawngˉ myang ngaeˉ. Hao yawng na saeˍ beu, ga nuing ba buiˍ yao laˍ puˍ ang chiˍ laeˍ myang yaˇ. 11Yuˉdaˆ changˉ ceuˉ hpawm lang kyaˉ uiˉ hkaoˉ veu ga yawng na ang byaˍ cangˍ ciˍ yangˍ yao, yawng beu Hpaˍcaoˍ na baˍ saˍ baˍ nyamˍ nae ciˍ taw luiˍ naeˍ uiˉ saˍ laiˍ ga ya caeˉ vaˍ saiˍ. Nuing ba inˍ naeˍ hkaoˉ veu, hao meungˉ hao manˉ uiˉ beu vengˍ veu tiˍ hkeu ga yawng na hkanˍ yaˍ chuiˍ yaˍ yaeˍ.
Pawˉluˆ Hkritˆ yanˍ hpeuˍ laˉ jiˉ awˍ lawng hkai biˍ jiˍ
12Hkunˉ hawˉ hkamˉ veuˉ, ga ningˉ mae vaˍ yao ca naeˉ hkaoˉ veu, Yit pa rawˉ hek ang huiˍ uiˍ ga na kanˉ ningˉ ap nga laˍ yao aˉ hkvangˍ piˍ laˍ jiˍ pa nae, ga Daˍmaˍsaetˆ vengˍ veu lae yaeˉ. 13Kaˉ ba veu nuing kawngˉ kawngˉ yuing ngang beu, buingˍ htaˍ veu miˍ nuing ta chae nae haengˍ naeˍ ang chit yangˍ, ga nae ga kawngˉ htuˍ yaˍ laˉ mae aeˉ jiˉ changˉ uiˉ na cawtˍ htawngˉ nga laˍ naeˍ na ga ya myangˉ ngaeˉ. 14Gu hkaˉ hko laˉ hko nuingˉ chaˍ htaˍ veu heung nga aengˉ beu, Heˍbraeˉ tangˍ ciˍ yao ningˉ mae ha laˍ naeˍ ang tangˍ na ga ya kyaˍ yaeˍ. Sawˉluˆ veuˉ, Sawˉluˆ veuˉ, baˍ ceuˉ ha yao ga na hkanˍ yaˍ chuiˍ yaˍ laˍ naeˇ. Aˍ myangˍ na chuik naeˉ tamˉ hpeˍ hingˍ na nang htaek baoˉ vaˍ, nang naˇ ya daˉ naeˉ nae ha laˍ ngaeˉ. 15Ang suingˉ veuˉ, naˇ aˍ sangˍ nae ga naˉ beu, Ang suingˉ mangˉ hpaw laeˍ langˍ ngaeˉ, Gaˇ nang hkanˍ yaˍ chuiˍ yaˍ laˍ naeˍ mangˉ Yeˍsuˆ yaˇ. 16Hta laˉ yao pawngˉ nae cung laˉ voˍ. Aˉ mae yao nae baoˉ vaˍ, nang ga na ya myangˉ laˍ jiˍ ningˉ ngaˍ, ningˉ saˍ laiˍ yaˇ. Nang ga na ya myangˉ nga laˍ jiˍ awˍ lawng na baˍ up, kaˉ nawngˍ veu ga na ya myangˉ laeˍ laˍ naeˍ na baˍ up, nang kanˉ vaˍ yao saˉ hkiˉ hkamˉ naeˉ uiˉ saˍ laiˍ, ga nang na cheˉ yuˉ yao chiˉ laˍ byaˇ. 17Yuˉdaˆ changˉ uiˉ nae Changˉ ceuˉ htiˍ baˍ uiˍ mi nuing ya myangˉ laˉ naeˉ uiˉ saˍ laiˍ, Yuˉdaˆ changˉ uiˉ kawngˉ ga nang na piˉ aeˉ laˍ yao, yawng beu laˍ puˍ hkaoˍ veu nang na piˉ caeˉ laˍ naeˍ yaˇ. 18Yawng mi nuing myangˉ laˉ yao, vuingˉ vangˉ naeˉ na paek taw saˍ yao, ang chit veu laˉ naeˉ yaˇ. Ningˉ htaˍ veu muiˉ, Saˍtanˍ beu laˍ htiˍ hingˍ na paek taw saˍ yao Hpaˍcaoˍ kawngˉ laˉ naeˉ yaˇ. Hingˉ pa nae yao yawng naˍ hokˍ poiˉ naeˉ na muiˉ ya yao ga na yumˉ laˍ naeˍ hkaoˉ veu seungˍ laˍ sangˉ laˉ jiˍ changˉ uiˉ kawngˉ htuˍ yaˍ laˉ mae ya ca naeˉ yaˇ.
Buingˍ htaˍ veu piˉ bae jiˉ hingˉ na Pawˉluˆ naˉ yuˉ jiˉ
19Hingˉ pa nae ang suingˉ Aˍgiˉpaˆ veuˉ, buingˍ htaˍ veu hpuiˉ yao piˉ huˍ laˍ jiˍ hingˉ ceuˉ na ga ba naˍ yuˉ naeˉ baˍ aˍ. 20Kaˉ huˍ veu Daˍmaˍsaetˆ vengˍ changˍ uiˍ na baˍ upˍ, hingˉ nawngˍ veu Yeˍruˆsaˍlaemˍ vengˍ nae Yuˉdaˆ ang meungˉ hkaˉ hko laˉ hko uiˉ beu na baˍ up, Changˉ ceuˉ htiˍ baˍ uiˍ beu na muiˉ baˍ upˍ, ga ang buinˉ maˍ biˍ yaeˍ. Yawng ngaˍ aˍ sangˍ yang beu naˍ hokˍ na kuitˆ puiˉ laeˍ yao, Hpaˍcaoˍ kawngˉ hpap nga langˉ laeˍ yao, naˍ hokˍ na kuitˆ puiˉ laeˍ jiˍ uiˉ kanˉ na kuingˉ lang naeˉ uiˉ kanˉ na vaˍ taw naeˉ uiˉ saˍ laiˍ ga yawng na maˍ biˍ yaeˍ. 21Ningˉ pa nae, ang buinˉ paˉ kyaˉ cawngˉ ang huiˍ hkaoˍ veu Yuˉdaˆ changˉ uiˉ ga na hpui laˍ yao saeˍ laˍ naeˍ yaˇ 22Caˇ, miˉ nuing veu tiˍ hkeu Hpaˍcaoˍ pawngˍ laˍ yao ga ningˉ keung veu ya cung yao, changˉ hkawˍ changˉ iˉ hkaˉ hko laˉ hko na saˉ hkiˉ hkamˉ yao ca ngaeˉ. Aˉ mae ya hpeuˍ laˍ naeˉ uiˉ awˍ lawng Hpaˍcaoˍ beu pa rawˉ hpaet uiˉ aˍ Moˉseˍ ciˍ jiˍ hingˉ lawˉ yaˇ ga ciˍ naeˍ. 23Yawng ciˍ naeˍ hingˉ, Hkrit maˇ ya tuk ya hpan yao, siˉ jiˉ hkaoˉ veu yaˇ kaˉ huˍ veu teˍ laˉ laeˍ naeˍ pa nae, Yuˉdaˆ changˉ uiˉ Changˉ ceuˉ htiˍ baˍ uiˍ na ang chit pa naeˉ awˍ lawng maˍ biˍ upˍ biˍ naeˍ yaˇ nae Pawˉluˆ ciˍ jiˍ.
Aˍgiˉpaˆ Yeˍsuˆ na yumˉ laˉ naeˉ uiˉ saˍ laiˍ Pawˉluˆ maˍ biˍ jiˍ
24Pawˉluˆ ningˉ mae tawpˍ laeˍ laeˍ yao ca beu, Ang suingˉ Hpeˍtuˆ ciˍ jiˍ, Pawˉluˆ veuˉ, naˇ yaˍ cangˍ hpeuˍ jaˇ, naˇ ang laiˍ ang byaˍ nae henˍ yao yaˍ cangˍ hpeuˍ jaˇ nae, ang tangˍ kaˍ haengˍ naeˍ haoˉ jiˉ.
25Pawˉluˆ ciˍ laeˍ sangˍ jiˍ, laˍ htiˍ ang huiˍ ang suingˉ Hpeˍtuˆ veuˉ, gaˇ yaˍ cangˍ hpeuˍ ngaeˉ baˍ aˍ. Changˉ tangˍ maenˍ nae dungˍ naeˍ bat naeˉ hkaoˉ veu ga nang na ang sui ang pawng tangˍ ciˍ sangˍ langˍ ngaeˇ yaˇ. 26Ningˉ awˍ lawng ningˉ na ang suingˉ Aˍgiˉpaˆ bae yao, ga yang na maenˍ nae hkai biˍ yao ang kaˍ yaˇ. Ningˉ ngaˍ ang paˉ veu hpeuˍ laˉ jiˉ kanˉ baˍ nae yao, ningˉ awˍ lawng na ang suingˉ baˍ kyaˍ baˍ bae nae baˍ ca laˇ nae ga ang yumˉ yaˇ. 27Hkunˉ hawˉ hkamˉ Aˍgiˉpaˆ veuˉ, Hpaˍcaoˍ pa rawˉ hpaet beu ang tangˍ na nang yumˉ naeˉ laˍ, nang yumˉ naeˉ nae ga ang bae yaˇ nae ha biˍ jiˍ.
28Ang suingˉ Aˍgiˉpaˆ maˇ Pawˉluˆ na ha biˍ jiˍ, Tiˍ chit nae hkaoˉ veu ga Hkritˆ yanˍ hpeuˍ laˉ naeˍ uiˉ saˍ laiˍ nang kuitˆ yao cangˉ ngaeˉ jiˉ leˍ nae ha biˍ jiˍ. 29Pawˉluˆ ciˍ laeˍ sangˍ jiˍ, Ang nyamˍ tawt naeˉ na baˍ up, ang nyamˍ mongˉ naeˉ na baˍ up, nang ang to hingˉ muiˉ miˉ nuing ga beu ang tangˍ na ya kyaˍ yao changˉ hkaˉ hko laˉ hko muiˉ, samˉ laˍ tuiˍ hpui yao chiˉ jiˉ uiˉ baˍ baoˇ, ga laˉ mae hpeuˍ laˍ naeˉ uiˉ saˍ laiˍ ga Hpaˍcaoˍ na ang buinˉ paˉ naeˉ yaˇ nae ha biˍ jiˍ. 30Haeˉ mae beu, ang suingˉ mangˉ hta laˉ yao, ang meungˉ veu ang suingˉ huiˍ mangˍ muiˉ, Beˍraˍniˆ muiˉ, yawng kawngˉ duingˉ yao ca jiˉ changˉ uiˉ muiˉ hta laˉ jiˉ. 31Yawng awkˍ taw aengˉ naeˉ nawngˍ veu, yawng htiˍ hu nae htiˍ hu hkai lang jiˉ. Changˉ niˉ maˇ, saeˍ yao na baˍ up, hpui yao na baˍ up, naˍ hokˍ htiˍ ceuˍ baˍ ca jiˉ nae ha lang jiˉ. 32Ang suingˉ Aˍgiˉpaˆ nawˍ, ang suingˉ Hpeˍtuˆ na ha biˍ jiˍ, Changˉ niˇ maˇ, ang suingˉ Kaeˉsaˍ kawngˉ aeˉ naeˉ nae baˍ pa la nae uˉ vaˍ, yang na poiˉ yao muiˉ ang kaˍ yaˇ nae hkai lang jiˉ.
Currently Selected:
Naiˍ htangˍ 26: pyy
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
