Naiˍ htangˍ 27
27
Roˉmaˆ vengˍ veu Pawˉluˆ heuˍ ta yao lae jiˉ
1Iˍtaˍliˍ ang meungˉ veu gu heuˍ ta yao ya lae naeˉ na ang suingˉ mangˉ kuitˆ chae laeˍ beu, Pawˉluˆ nawˍ awˍ htaˍ veu hpeuˍ laˉ jiˉ changˉ na, Awˇguˇtuˆ luk suitˆ htiˍ tap na chaˍ lang naeˉ Yuˉluˆ nae maengˉ jiˉ saen cangˉ mangˉ beu laˍ puˍ hkaoˍ veu ap yao piˍ jiˍ. 2Aˍsiˆ ang meungˉ hkaoˉ veu chaˍ maeˍ lang ba htang veu ca naeˉ vengˍ uiˍ beu aeˉ naeˉ uiˉ, Aˍdaˍmuˆtiˆ vengˍ changˍ uiˍ beu heuˍ uiˍ na gu ta yao lae yaeˉ. Maˍkeˍdawˉniˆ ang meungˉ hkaoˉ veu Hteˉsaˍlawˉniˆ vengˍ changˍ Aˍriˍtaˍhkuˆ muiˉ, gu kawngˉ ngaeˉ jiˉ yaˇ. 3Kaˉ nawngˍ hingˍ nuing veu gu Siˉdonˍ vengˍ veu saoˍ yaeˍ yaˇ. Pawˉluˆ yang beu ang changˍ htiˍ baˍ uiˍ kawngˉ lae naeˉ uiˉ saˍ laiˍ nae ang changˍ htiˍ baˍ uiˍ yang na hu hpa naeˉ uiˉ saˍ laiˍ, Yuˉluˆ nawˍ yang na saˍ kyaˍ kyaˍ yao aˉ hkvangˍ piˍ jiˍ. 4Gu hiˉ keung veu awkˍ taw aengˉ beu, hawˉ manˉ sai veu baˍ yaˍ nae yao, hawˉ manˉ gu na taw laˍ naeˍ pa nae gu Kuˇpaˉruˆ cunˉ na puing yao cunˉ hingˉ ang htang veu aeˉ yaeˉ. 5Kiˉliˉkiˆ ang meungˉ nae Paˍpuˆliˆ ang meungˉ htang veu ca naeˉ chaˍ maeˍ langˍ ba htiˍ tawnˍ hingˍ na gu hpaiˍ caeˍ lae yao, Luˆkiˆ ang meungˉ hkaoˉ veu ca naeˉ Muˍraˆ vengˍ veu hkeu lae yaeˉ. 6Yinˍ cangˉ maˇ hiˉ keung veu Iˍtaˍliˍ ang meungˉ veu lae naeˉ heuˍ mangˍ na myangˉ yao gu na piˉ awngˉ lae langˍ ngaeˉ. Heuˍ hiˍ maˇ, Aˍleˍsaˍduˆ vengˍ veu laˉ jiˉ.
7Ang nuing ang nyamˍ iˉ yaˍ mangˍ nae gu lae yao, yakˍ ngaeˍ sutˆ nae uiˉ hkaoˉ veu Kaˍniˆ vengˍ htang veu hkeu lae yao, hawˉ manˉ sai kaˉ seu baˍ yaˍ nae yao, gu kaˉ huˍ kaˍ seu ba lae taw nae yao, hawˉ manˉ baˍ naengˍ nae ang awˍ hingˍ pakˍ kyaˍ Kaˍreˍteˍ cunˉ na puing yao Saˍmoˍneˍ vengˍ pakˍ kyaˍ aeˉ yaeˉ. 8Yakˍ naeˍ uiˉ hkaoˉ veu cunˉ hingˉ htang veu gu aeˉ yao, Laˍsaeˉ vengˍ na htaeˉ lang naeˉ Saoˍ kyaˍ ang hu buiˍ nae maengˉ jiˉ hiˉ keung hkeu aeˉ yaˇ. 9Ang nuing ang nyamˍ ang byaˍ peunˉ na yao, ang caˍ cheˉ naeˉ ang nuing caeˉ saˍ jiˍ pa nae, heuˍ ta naeˉ ningˉ hkae kyaˉ nyamˍ veu hkeu laˉ jiˉ. Pawˉluˆ yawng na saˍ tiˍ piˍ yao ciˍ jiˍ. 10Ang changˍ htiˍ baˍ yawng veuˉ, ya muiˉ heuˍ ta yao aeˉ baoˉ vaˍ, heuˍ nae ang keungˍ hingˍ uiˉ ya kangˍ naeˍ htiˍ yaˍ baˍ aˍ. Gu beu a sak ningˉ muiˉ ya sumˍ ya seˉ naeˉ na ga kuitˆ bae lae byaˇ nae ha biˍ jiˍ. 11Caˇ, yinˍ cangˉ longˉ uiˉ Pawˉluˆ beu ang tangˍ hingˍ na htaˍ veu muiˉ heuˍ awn hoˉ nae heuˍ yumˉ suingˉ uiˉ tangˍ na naˉ jiˉ. 12Saoˍ kyaˍ hingˍ nga, chawˍ myamˍ nae, chawˍ nyamˍ hkaoˍ veu ca naeˉ uiˉ saˍ laiˍ baˍ maenˍ. Hingˉ pa nae, hingˉ keung awkˍ taw aengˉ yao kaˍ baoˉ vaˍ, Hpiˆniˆ vengˍ hawˆ saoˍ kyaˍ veu hkeu yao, chawˍ nyamˍ hingˍ peunˉ na beu tiˍ hkeu hiˉ keung veu ca naeˉ ningˉ changˉ ang byaˍ uiˍ nuing ba capˆ jiˉ. Hpiˆniˆ vengˍ veu heuˍ saoˍ kyaˍ langˉ koiˍ veu, Kaˍreˍteˍ cunˉ veu ca yao, miˍ nuing taw kyaˉ ang htaˍ ang awˍ na myangˉ naeˉ yaˇ.
Chaˍ maeˍ langˍ ba hingˉ na miˍ hawˍ hawˉ manˉ taw laˉ jiˍ.
13Ang awˍ kaˍ seuˍ ca yao hawˉ manˉ taw yao laˉ beu, yawng kuitˆ yao chiˉ jiˉ lawˉ hpeuˍ laˉ byaˇ nae kuitˆ yao, samˉ ang koiˍ na kuinˍ taw hko laeˍ yao, Kaˍreˍteˍ cunˉ htang veu hpaiˍ yao aeˉ yaeˉ. 14Caˇ, baˍ mangˍ nae, miˍ nuingˍ taw naeˉ laˍ ce kaˉ seu laˉ naeˉ miˍ hawˍ nae haoˉ naeˉ hawˉ manˉ hiˉ maˇ, nuingˉ chaˍ kaˍ seu ca yao ya caeˉ taw luiˍ naeˍ. 15Hawˍ manˉ hiˉ mangˉ heuˍ mangˍ na htawngˍ lui beu, heuˍ yangˍ baˍ hkamˍ ka. Hingˉ pa nae, gu heuˍ hingˍ na haeˉ mae poiˉ nga yao, heuˍ hingˍ na hawˉ manˉ taw yao hanˉ na aeˉ ngaeˉ. 16Kaˍlawˉdeˍ nae haoˉ nae cunˉ ang iˉ, hawˉ manˉ baˍ haenˍ nae hingˉ kyaˉ veu gu aeˉ yao ca beu, heuˍ mangˍ baˍ ya kangˍ naeˍ uiˉ saˍ laiˍ, kaˍ haengˍ coˇ caˇ naeˉ hkaoˉ veu heuˍ mangˍ na kuinˍ yao heuˍ ang huiˍ mangˍ htaˍ veu chiˉ ta yao ca biˍ. 17Heuˍ ang huiˍ hiˍ mangˉ baˍ ya kangˍ naeˍ uiˉ saˍ laiˍ, yawng laˍ tuiˍ yuˉ yao maenˍ nae hpui yao chiˉ jiˉ. Haeˉ mae beu, saiˍ ang kawng uiˉ beu ang hteungˍ aeˉ saˍ hkiˍ yaˇ nae yawng kuitˆ yao, ang hpaenˉ ang kvaˉ uiˉ na hanˉ lungˍ nga aengˉ yao, hawˉ manˉ taw naeˉ kaˉ seu piˉ aeˉ jiˉ. 18Miˍ hawˍ hawˉ manˉ mangˉ ang haenˍ nae pa nae yao, heuˍ mangˍ ta ta lungˍ lung nae ca yao, kaˉ nawngˍ veu hingˉ nuing veu yawng tangˉ jiˉ uiˉ ang keungˍ htiˍ ba uiˍ na yuˉ taw yao paek saˍ jiˍ. 19Sumˍ nuing hkeungˉ beu, heuˍ mangˍ beu ang keungˍ htiˍ baˍ uiˍ na muiˉ yawngˉ yawng nae hpya taw yao paek taw saˍ jiˍ. 20Ang nyamˍ mangˍ ngangˍ yao muiˉ miˍ nuing, awˍ ha na baˍ yaˍ myangˉ nae htaˍ veu muiˉ, miˍ hawˍ hawˉ manˉ taw yao ca naeˉ pa nae, gu ang caeˉ taw yaˇ nae kuitˆ kyaˉ iˉ yaˍ nae muiˉ baˍ ca. 21Yawng caˍ keungˍ baˍ ca naeˍ na myangˉ peunˉ naeˉ nawngˍ veu, Pawˉluˆ yawng kawngˉ nuingˉ veu hta laˉ yao ciˍ jiˍ. Ang changˍ htiˍ baˍ yawng veuˉ, nawng ga tangˍ hingˍ na naˉ yao Keˍreˍteˍ cunˉ veu ca yaeˉ uˉ vaˍ, kangˍ naeˍ chaw naeˉ ningˉ na baˍ ya htawngˍ hpuˍ laˇ. 22Caˇ, ba hkae jo. Ga nawng na paˉ laˍ naeˍ yaˇ. Nawng hkaoˉ veu htiˍ hu nae muiˉ baˍ ya siˉ, heuˍ ningˍ mangˉ naˇ kangˍ chaw naeˉ. 23Aˉ mae yao nae baoˉ vaˍ, ga na upˆ peungˍ laˍ yao ga koˉ koiˍ naeˍ Hpaˍcaoˍ maˇ. Yang beu buingˍ htaˍ naiˍ htangˍ htiˍ hu na piˉ lui yao, mi kawngˉ hkiˍ ga kawngˉ cung yao ciˍ ngaeˉ. 24Pawˉluˆ veuˉ, baˍ hkae jo. Hkunˉ hawˉ hkamˉ ang huiˍ Kaeˉsaˍ tawngˍ naˍ veu yang cung naeˉ yaˇ. Nang kawngˉ htuˍ yaˍ laˉ mae heuˍ ta yao ca naeˉ uiˉ changˉ muiˉ, Hpaˍcaoˍ nang na piˍ laˍ naeˍ#27:24 baˍ ya siˉ yaˇ nae ga na ciˍ sangˍ laˍ byaˇ. 25Hingˉ pa nae ang changˍ htiˍ baˍ yawng veuˍ baˍ hkae jo. Ga ciˍ sangˍ laˍ jiˍ lawˉ hpeuˍ laˉ naeˉ yaˇ nae, ga Hpaˍcaoˍ na ang yumˉ yaˇ. 26Caˇ, gu aˍ, cunˉ htiˍ lumˍ lumˍ hingˍ veu ya buingˉ haoˉ naeˉ nae, Pawˉluˆ yawng na ha biˍ jiˍ. 27Htiˍ cheˍ hanˍ nuing hkiˍ hkeungˉ yao, gu Aˍdiˆ chaˍ maeˍ langˍ ba hingˉ na hpai yao ca beu, muˍ hkiˍ tiˍ hkuinˍ hingˉ nyamˍ veu, gu nuingˉ chaˍ htiˍ tawngˍ tawngˍ na htaeˉ langˉ baoˉ nae, heuˍ htaˍ veu kanˉ vaˍ naeˍ uiˍ hkai lang jiˉ. 28Yawng langˉ hingˉ na taekˍ ngangˍ beu, nyiˍ cheˍ vaˍ laˍ mawk naˍ naeˍ na ya bae jiˉ. Kaˉ nawngˍ veu baˍ mangˍ nae taekˍ ngangˍ laeˍ beu htiˍ cheˍ ngaˍ vaˍ naˍ naeˍ na ya bae jiˉ. 29Yawng ngaˍ law ba na htawngˍ yang lae naeˍ na kuitˆ hkae laeˍ yao, heuˍ tawngˍ miˍ kaˍ seu samˉ ang koiˍ hanˍ laemˍ hka aeˉ biˍ yao ang vaiˍ nae buingˍ paenˉ ngangˉ laˍ bao nae ang buinˉ paˉ jiˉ. 30Heuˍ htaˍ veu kanˉ vaˍ naeˍ uiˉ aˍ, heuˍ hiˍ mangˉ na paek nga saˍ yao hpangˉ ngangˉ naˇ nae kuitˆ yao chiˉ jiˉ. Ningˉ pa nae, heuˍ mangˍ beu ang tuˍ kaˍ seu samˉ ang koiˍ hka aengˉ biˍ jiˍ laˉ mae ha yao, heuˍ ang iˉ yaˍ mangˍ na langˉ hkaoˉ veu yuˉ lungˍ ngangˍ beu, 31Pawˉluˆ nawˍ saen cangˉ nae luk suikˆ uiˉ na ha biˍ jiˍ. Changˉ ningˉ uiˉ heuˍ htaˍ nawˆ baˍ ca nae baoˉ vaˍ, nawng baˍ ya caeˉ taw nae ha biˍ jiˍ. 32Haeˉ mae beu, luk suikˆ htiˍ baˍ uiˍ heuˍ hingˉ uiˉ beu laˍ tuiˍ na tawnˍ chae yao, chaˍ maeˍ langˍ ba veu suiˍ aeˉ jiˉ. 33Buingˍ saˉ paenˉ laˉ nae beu, yawng hkaˉ hko laˉ hko na hangˍ caˍ bao nae Pawˉluˆ yawng na kaˍ piˍ htaengˍ yao ciˍ jiˍ. Nawng kuitˆ manˍ kuitˆ hawngˉ laeˍ naeˍ hkaoˉ veu hawˍ yao ca yao, caˍ keungˍ htiˍ ceuˍ na baˍ caˍ nae yang miˉ nuing hkeungˉ laˉ byaˇ. 34Hingˉ pa nae, caˍ keungˍ caˍ vo nae ga nawng na paˉ laˍ naeˍ yaˇ. Ningˉ ngaˍ, nawng ya punˍ naeˍ uiˉ saˍ laiˍ ga hkai laˍ naeˍ yaˇ. Aˉ mae yao nae baoˉ vaˍ, nawng htiˍ hu nae muiˉ samˉ hkuingˉ htiˍ hkuingˍ nae nyamˍ baˍ ya lawnˉ nae, Pawˉluˆ yawng na ha biˍ jiˍ. 35Yang ningˉ mae ciˍ peunˍ yao, hkaoˍ munˍ na yuˉ yao, yawng tawngˍ naˍ veu Hpaˍcaoˍ na chiˍ mawng laeˍ yao, yawng hkaoˍ munˉ hingˉ hpaetˍ yao caˍ jiˍ. 36Haeˉ mae beu, yawng muiˉ mawnˍ yao ang caˍ caˍ jiˍ. 37Heuˍ hiˍ mangˉ htaˍ veu ta yao ca jiˉ uiˉ nyiˍ pakˍ cetˆ cheˍ hkoˍ hu ca jiˉ. 38Yawng caˍ kawˍ lae jiˍ nawngˍ veu, kaw lumˍ kaw chenˉ uiˉ na chaˍ maeˍ langˍ ba veu paek taw saˍ yao heuˍ mangˍ na piˉ nyangˉ yaˍ laˉ jiˉ.
Heuˍ mangˍ kangˍ ngangˍ jiˉ
39Buingˍ paenˉ laˉ laeˍ beu, nuingˉ chaˍ hingˉ tawngˍ na yawng baˍ bae. Caˇ, saiˍ ang ca langˉ koiˍ na yawng ya myangˉ yao, ang kaˍ taw nae baoˉ vaˍ, heuˍ mangˍ na hiˉ keung veu kaˍ yao aeˉ naeˉ nae kuitˆ jiˉ. 40Haeˉ mae yao, heuˍ beu samˉ ang koiˍ na hpui jiˉ uiˉ langˉ hkamˍ hkaoˍ veu hpuiˉ yao paek hka saˍ jiˍ. Heuˍ beu hpui jiˉ ang tuˉ uiˉ na muiˉ hpuiˉ yao, heuˍ ang tuˍ kaˍ seu ang hpaenˉ hingˉ na muiˉ hawˉ manˉ taw naeˉ kaˉ seu chiˍ ta laeˍ yao saiˍ ang ca langˉ ba kaˉ seu kaˍ laeˍ jiˍ. 41Caˇ, langˉ baˍ naˍ nae taeˉ veu nuingˉ chaˍ na htawngˍ yang yao, heuˍ mangˍ hkamˉ ngangˉ jiˉ. Heuˍ ang tuˍ kyaˍ kaˍ seu ang yiˍ hkamˉ ngangˉ yao, iˉ yaˍ nae muiˉ ba sat. Haeˉ mae beu, tawngˍ miˍ htiˍ tawnˍ kyaˍ kaˍ seu langˉ samˍ ang hka uiˍ cap laˉ yao kangˍ ngang jiˉ. 42Hpui yao chiˉ jiˉ uiˉ changˉ uiˉ langˉ htaek htaek yao huinˍ taw vaˉ na kuitˆ hkae laeˍ yao yawng na saeˍ baiˉ seuˍ nae sing lang ga jiˉ. 43Caˇ, saen cangˉ longˉ maˇ Pawˉluˆ na piˉ caeˉ siˉ yao yawng sing lang jiˉ na haenˉ tap jiˉ. Haeˉ mae beu, langˉ htaek ang htaek hkiˍ uiˉ langˉ hkaoˉ veu awngˉ nga aengˉ yao la tawngˉ veu lae taw voˍ nae yinˍ cangˉ mangˉ ang tangˍ piˍ jiˍ. 44Awˍ htaˍ veu changˉ uiˍ aˍ, htiˍ baˍ baˍ tawnˍ paenˍ na ta voˍ nae, htiˍ baˍ baˍ heuˍ mangˍ beu ang hkuing hingˉ na ta voˍ nae, yang ang tangˍ piˍ jiˍ. Haeˉ mae yao, changˉ hkaˉ hko laˉ hko uiˉ la tawngˉ veu hkeu lae yao ya punˍ jiˍ.
Currently Selected:
Naiˍ htangˍ 27: pyy
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
