Maˍkuˆ 11

Yeˍsuˆ aˍ mawngˍ maˍ laˉ ta yao Yeˍruˆsaˍlaemˍ vengˍ hkaoˍ veu awngˉ aeˉ jiˉ

1Yawng Yeˍruˆsaˍlaemˍ vengˍ htang, Saˍlongˍ miˉ kuingˍ na htaeˉ naeˉ Baetˆhpaˍgeˍ hkawngˍ nae Beˍtaˍniˆ hkawngˍ veu hkeu laˉ beu, Yeˍsuˆ yang ta peˍ nyiˍ hu na caiˍ yao aeˉ biˍ jiˍ. 2Naˉ yetˍ huˍ veu ca naeˉ hkawngˍ hkaoˍ hiˍ keung aeˉ voˍ. Hkawngˍ hkaoˍ veu awngˉ nga aengˉ beu htiˍ hu nae muiˉ baˍ ta myang ngangˉ suingˍ nae uiˉ aˍ mawngˍ maˍ laˉ yaˍ htiˍ mangˍ hpui yao chiˉ jiˉ na naˉ yetˍ ya myangˉ aeˉ naeˉ. Aˍ mawngˍ maˍ laˉ yaˍ hingˍ mangˉ na laˍ tuiˍ hpuiˉ yao chuingˉ awkˍ nga langˉ voˍ nae ha biˍ jiˍ. 3Ba ceuˉ ha naeˇ nae changˉ htiˍ hu hu naˉ laˍ baoˉ vaˍ, Gu beu Ang suingˉ mangˉ loˉ naeˉ. Ningˉ keung veu ang vaiˍ nae sa lui laeˍ laˍ vaˍ nae ha bu nae yaˉ yetˍ na ha biˍ jiˍ. 4Haeˉ mae beu, yaˉ yetˍ aeˉ yao kaˉ ba htang keunˉ veu hpui yao chiˉ jiˉ aˍ mawngˍ maˍ laˉ yaˍ mangˍ na myangˉ aeˉ yao laˍ tuiˍ hpuiˉ biˍ jiˍ. 5Haeˉ mae beu, hingˉ keung cung yao ca jiˉ changˉ htiˍ baˍ uiˍ muiˉ aˍ mawngˍ maˍ laˉ yaˍ beu laˍ tuiˍ na hpuiˉ yao ba ceuˉ ha naeˉ nae naˉ jiˉ. 6Yaˉ yetˍ muiˍ Yeˍsuˆ maˍ biˍ jiˍ laˉ mae ciˍ laeˍ sangˍ yao, changˉ uiˉ yaˉ yetˍ na aˉ hkvangˍ piˍ jiˍ. 7Aˍ mawngˍ maˍ laˉ yaˍ mangˍ na Yeˍsuˆ ca naeˉ hingˉ keung chuingˉ nga langˉ yao, yawng beu hkaˍ lao angˍ kaˍ ang tum uiˉ hingˉ mangˉ htaˍ veu hkangˍ ngangˉ biˍ yao Yeˍsuˆ maˇ aˍ mawngˍ maˍ laˉ hingˉ mangˉ na ta jiˉ. 8Changˉ ang byaˍ uiˍ muiˉ yawng beu ang kaˍ ang tum uiˉ kaˉ ba veu hkangˍ biˍ jiˍ. Changˉ htiˍ baˍ uiˉ aˍ hyaˉ htang veu suingˍ hpaˍ uiˍ cae yao kaˉ ba veu hkangˍ biˍ jiˍ. 9Yang kaˉ huˍ kaˉ nawngˍ veu hkeˍ jiˍ changˉ uiˉ muiˉ haoˉ yao ciˍ jiˍ. Hawˍ saˍ naˍ#11:9 Hawˍ saˍ naˍ ningˉ na Heˍblaeˉ tangˍ veu htaiˍ awkˍ lao nae ha siˉ naeˉ. Ningˉ keung veu Hpaˍcaoˍ na chiˍ mawng voˍ nae ha siˉ naeˉ., Ang suingˉ Hpaˍcaoˍ beu ang maengˉ hkaoˉ veu lui jiˉ changˉ mangˉ ang buinˉ ca bu.#Chiˍ mawng naeˉ ang laiˍ 118:25, 26 10Lui yao ca jiˉ gu ang vangˉ Daˍvet beu ang meungˉ nawˍ ang buinˉ ca bu. Buingˍ htaˍ veu muiˉ hawˍ saˍ naˍ hpeuˍ bu nae yawng haoˉ jiˉ. 11Haeˉ mae beu, Yeˍruˆsaˍlaemˍ vengˍ hkaoˍ veu Yeˍsuˆ awngˉ aeˉ yao, ang buinˉ paˉ kyaˉ cawngˉ ang huiˍ hkaoˍ veu aeˉ jiˉ. Kaˉ hko laˉ hko uiˉ na yang hu cawtˍ saˍ nae miˍ hkiˍ vuingˉ ngangˉ luiˍ yao ta peˍ htiˍ cheˍ nyiˍ hu uiˉ htuˍ yaˍ laˉ mae Beˍtaˍniˆ hkawngˍ veu aeˉ jiˉ.

Suingˍ hpuk pangˉ mangˉ na saengˉ vanˉ jiˉ

12Buingˍ paenˉ laˉ laeˍ nae Beˍtaˍniˆ hkawngˍ veu ca yao yawng awkˍ taw laˍ laeˍ beu, Yeˍsuˆ na hangˍ baeˍ yaˍ biˍ jiˍ. 13Haeˉ mae beu, ang hpaˍ kawnˉ yaeˉ sutˆ nae uiˉ suiˍ hpuk pangˉ htiˍ pangˍ ang veuˍ veu ca naeˉ na ya myangˉ jiˉ. Ang pangˉ mangˉ beu htiˍ ceuˍ nawˍ ang suiˍ ang ca yaˇ nae ang pangˉ htang veu aeˉ hkeu beu, suingˍ hpuk ang suiˍ suiˍ nyamˍ baˍ aˍ nae ang hpaˍ hingˍ naˇ yang ya myangˉ aeˉ jiˉ. 14Haeˉ mae yao, Yeˍsuˆ maˇ, Miˉ nuing nae tangˍ yao ningˉ htaˍ veu nang beu ang suiˍ hingˍ ngaˍ aˍ sangˍ na muiˉ baˍ piˍ ca jo nae suingˍ hpuk pangˉ mangˉ na ciˍ sangˍ jiˍ. Yeˍsuˆ haeˉ mae ciˍ beu yang ta peˍ uiˍ muiˉ ya kyaˍ jiˍ.

Ang buinˉ paˉ kyaˉ cawngˉ ang huiˍ hingˍ na piˉ seungˍ piˉ sangˉ jiˉ

15Yeˍsuˆ nae yang ta peˍ uiˍ Yeˍruˆsaˍlaemˍ vengˍ veu hkeu lae laeˍ jiˍ. Yeˍsuˆ ang buinˉ paˉ kyaˉ cawngˉ ang huiˍ hiˍ keung awngˉ lae jiˉ. Ang buinˉ paˉ kyaˉ cawngˉ ang huiˍ hingˍ hkaoˉ veu ang keungˍ vuiˉ naeˉ kawngˍ naeˍ uiˉ changˉ na kaˍ taw jiˉ. Hpuˉ penˉ hu changˉ uiˉ beu hangˍ hpeunˍ hingˍ nae kawngˍ hkaoˍ kawngˍ naeˍ uiˉ beu tangˍ kawnˍ hingˍ uiˉ ta ta yang naengˍ heung biˍ jiˍ. 16Ang keungˍ htiˍ ceuˍ ceuˍ na hanˉ yao ang buinˉ paˉ kyaˉ cawngˉ ang huiˍ hingˍ keung changˉ htiˍ hu na muiˉ piˉ hpaiˍ naeˍ uiˉ aˉ hkvangˍ baˍ piˍ. 17Yeˍsuˆ yawng na seungˍ maˍ yao ciˍ sangˍ jiˍ. Ga yumˉ ningˉ ngaˍ changˉ ceuˉ hkaˉ hko laˉ hko uiˉ beu ang buinˉ paˉ kyaˉ yumˉ nae Camˉ lik hkaoˉ veu taemˉ saˍ jiˍ baˍ aˍ la.#Iˉsaˍyaˆ 5:16. Hta yao muiˉ, nawng ngaˍ yumˉ ningˉ na hkingˍ con con yaˍ kyaˍ piˉ hpeuˍ jaˇ#Yeˍraˍmiˆ 7:11. nae yawng na seungˍ maˍ jiˍ. 18Camˉ lik ang hkiˍ saˍ laˉ uiˉ nae yit pa rawˉ hek ang huiˍ uiˍ hingˉ lawng na ya kyaˍ yao, Yeˍsuˆ na ya saeˍ naeˍ uiˉ aˉ hkvangˍ saˉ hu jiˉ. Changˉ ang byaˍ uiˍ yang seungˍ maˍ naeˍ hingˉ lawng na manˍ hko jiˉ hingˉ pa nae, Camˉ lik ang hkiˍ saˍ laˉ uiˉ nae yit pa rawˉ hek ang huiˍ uiˍ yawng ngaˍ Yeˍsuˆ na hkae saw jiˉ. 19Miˍ hkiˍ ang nyamˍ hkeu yao, Yeˍsuˆ nae yang ta peˍ uiˍ muiˉ vengˍ ang ngiˉ veu awkˍ taw aeˉ jiˉ.

Suingˍ hpuk pangˉ mangˉ haeoˍ kui aengˉ jiˉ

20Kaˉ nawngˍ veu htiˍ saw hingˉ ngang beu yawng kaˉ ba hingˉ na yawˍ yao lae laeˍ beu, suiˍ hpuk pangˉ hingˉ maˇ tawngˍ cheˍ veu tangˍ yao haeoˍ kui laeˍ jiˍ na ya myangˉ jiˉ. 21Peˍtruˆ kuitˆ puiˉ laeˍ yao, Ang suingˉ Yeˍsuˆ veuˉ, hu beun nang saengˉ vanˉ na jiˉ suiˍ hpuk pangˉ mangˉ haeoˍ kui laeˍ jaˇ nae ha biˍ jiˍ. 22Yeˍsuˆ maˇ, Nawng muiˉ Ang suingˉ Hpaˍcaoˍ na yumˉ saˉ naeˉ uiˉ ca biˍ vo. 23Ga maˉ manˉ nae hkai laˍ vaˍ, changˉ htiˍ hu yumˉ si naeˉ uiˉ nuing ba baˍ ca nae hkaˍ tawng ciˍ jiˍ lawˉ hpeuˍ laˉ naeˉ nae yumˉ baoˉ vaˍ, miˉ kuingˍ hingˍ na ca kyaˉ veu hkai yao, langˉ hkamˍ veu sat kla aeˉ voˍ nae ha biˍ yao muiˉ yang ciˍ jiˍ lawˉ yaˇ hpeuˍ laˉ naeˉ. 24Haeˉ mae yao, Ga nawng na hkai laˍ naeˍ. Nawng ang buinˉ paˉ naeˉ hingˉ hkaoˉ veu hkaˉ paˉ jiˉ uiˉ hkaˉ hko laˉ hko ang ya yaˇ nae yumˉ bao. Haeˉ mae yumˉ baoˉ vaˍ, nawng ya naeˉ uiˉ yaˇ. 25Nawng cung yao ang buinˉ paˉ yao ca beu, changˉ htiˍ hu hu htaˍ veu nang naˍ hokˍ chiˉ baoˉ vaˍ, naˍ hokˍ hingˍ na poiˉ a bu. Haeˉ mae ha baoˉ vaˍ, buingˍ htaˍ veu ca naeˉ nawng beu Ang vangˉ nawˍ, nawng beu naˍ hokˍ hingˍ na muiˉ poiˉ laˍ naeˍ yaˇ nae ha biˍ jiˍ. 26Caˇ, nawng naˍ hokˍ baˍ poiˍ baoˉ vaˍ, buingˍ htaˍ veu ca naeˉ Ang vangˉ mangˉ muiˉ nawng tiˍ si jiˉ naˍ hokˍ hingˍ uiˉ na poiˉ laˍ naeˍ uiˉ baˍ aˍ nae ha biˍ jiˍ.

Yeˍsuˆ aˉ yaˍ ya jiˉ hingˉ na changˉ uiˉ naˉ jiˉ

27Hingˉ nawngˍ veu yawng Yeˍruˆsaˍlaemˍ vengˍ veu htiˍ cangˍ hkeu aeˉ laeˍ jiˍ. Yeˍsuˆ ang buinˉ paˉ kyaˉ cawngˉ ang huiˍ hkaoˍ veu aeˉ beu, yit pa rawˉ hek ang huiˍ uiˍ nae Camˉ lik ang hkiˍ saˍ laˉ uiˉ nae awn hoˉ yaˍ mangˍ uiˍ Yeˍsuˆ ca naeˉ veu laˉ yao, 28Naˇ ningˉ kanˉ ningˉ uiˉ na aˉ mae uiˉ aˉ hkvangˍ aˉ yaˍ nae ha naeˇ. Baˍ aˍ baoˇ, ningˉ mae ha taw naeˉ uiˉ saˍ laiˍ aˍ sangˍ nang na aˉ yaˍ piˍ langˍ ngaeˇ nae naˉ jiˉ. 29Yeˍsuˆ mangˉ muiˉ, Ga nawng na htiˍ htaeˍ naˉ laˍ hu vaˉ. Ga na tawpˍ laeˍ lao. Haeˉ mae baoˉ vaˍ, ningˉ kanˉ ningˉ aˉ mae uiˉ aˉ mingˍ nae ga va jeuˇ nae nawng na upˍ laˍ vaˍ. 30Yoˉhanˍ beu baˆtiˆsamˍ hingˍ ngaˍ buingˍ htaˍ veu uiˉ laˍ, baˍ aˍ baoˇ changˉ uiˉ kawngˉ nae hpeuˍ jiˍ uiˉ laˍ. Ga na tawpˍ lao nae ha biˍ jiˍ. 31Yawng htiˍ hu nae htiˍ hu sing lang yao ciˍ jiˍ. Buingˍ htaˍ veu ya jiˉ nae gu ciˍ baoˉ vaˍ, haeˉ mae baoˇ ba ceuˉ ha yao, yang na baˍ yumˍ naeˇ nae yang gu na tawpˍ laˍ nae yaˇ. 32Caˇ, changˉ uiˉ kawngˉ ya jiˉ nae ciˍ baoˉ vaˍ, baˍ kaˍ laoˍ nae yawng upˍ lang ga jiˉ. Haeˉ mae baoˉ vaˍ, Yoˉhanˍ nawˍ Hpaˍcaoˍ beu pa rawˉ hpaet yaˇ nae changˉ hkaˉ hko laˉ hko uiˉ bae naeˉ pa nae changˉ ang byaˍ uiˍ na yawng muiˉ hkae jiˉ. 33Hingˉ pa nae, Gu baˍ bae nae Yeˍsuˆ na yawng tawpˍ jiˍ. Yeˍsuˆ mangˉ muiˉ, Ga aˉ mae uiˉ aˉ mingˍ aˉ hkvangˍ ya yao kanˉ ningˉ uiˉ na vaˍ ngaeˇ nae nawng na ga baˍ upˍ laˍ nae yawng na hkai laeˍ biˍ jiˍ.

Currently Selected:

Maˍkuˆ 11: pyy

Highlight

Copy