Maˍkuˆ 12

Matˍ sa pit kamˉ seun veu kamˉ vaˍ hu uiˉ uˉ paˍ maˍ

1Haeˉ mae beu, Yeˍsuˆ yawng na uˉ paˍ maˍ uiˍ nae maˍ biˍ yao ciˍ jiˍ. Changˉ htiˍ hu makˍ sa pit kamˉ seun hingˉ na hka peunˉ saˍ jiˍ. Yang kamˉ htuik cawtˍ htuik peunˉ saˍ yao, makˍ sa pit chaˉ itˆ kyaˉ tuˍ saˍ jiˍ. Chiˉ kyaˉ tang keuˉ htaˍ muiˍ chaw saˍ jiˍ. Kamˉ seun taeng hu changˉ uiˉ na taeng hpa hpa saˍ biˍ yao, awˍ hta ang meungˉ uiˉ beu yang aeˉ jiˉ. 2Ang suiˍ chu nyamˍ hkeu laˉ yao, kamˉ seun hingˉ hkaoˉ veu makˍ sa pit suiˍ hingˍ na ya naeˉ uiˉ saˍ laiˍ, kamˉ seun taeng naeˉ uiˉ kawngˉ yaˍ cenˍ htiˍ hu mangˉ na yang piˉ aeˉ jiˉ. 3Yawng ngaˍ changˉ hiˉ mangˉ na chu kap yao tuiˍ peunˍ yao ang to ang aeˍ nae piˉ aeˉ laeˍ jiˍ. 4Kaˉ nawngˍ veu htiˍ cangˍ, yaˍ cenˍ htiˍ hu mangˉ na tawk yao yang na yawng kawngˉ piˉ aeˉ laeˍ jiˍ. Yawng muiˉ yang ang tuˍ hingˍ na tuiˍ kvak biˍ yao shaˍ caw kyaˉ taw laˉ biˍ jiˍ. 5Hingˉ nawngˍ veu, htiˍ cangˍ yaˍ cenˍ htiˍ hu mangˉ na piˉ lae yao yawng muiˉ changˉ hiˉ mangˉ na saeˍ jiˍ. Ta peˍ htiˍ baˍ ang byaˍ uiˍ na yang piˉ lae laeˍ yao muiˉ, htiˍ baˍ uiˍ na tuiˍ yao htiˍ baˍ uiˍ na saeˍ jiˍ. 6Yang hak yaeˉ sutˆ nae yang yaˍ kaˍ hpaˍ yaˍ htiˍ hu maˇ yang kawngˉ canˉ laˉ saˍ jiˍ. Ga beu ang yaˍ ningˍ mangˉ na nawˍ yawng ang saˍ nyamˉ yaˇ nae kuitˆ yao, kaˉ nawngˍ lin lin veu htiˍ cangˍ yang yaˍ mangˍ na yawng kawngˉ piˉ aeˉ laeˍ jiˍ. 7Haeˉ mae beu, kamˉ seun vaˍ hu uiˉ aˍ, Changˉ ningˉ maˇ ang keungˍ kawˉ ningˉ na ya kyaˉ mangˉ yaˇ. Lui bao. Yang na saeˍ baiˉ seuˍ. Ningˉ mae baoˉ vaˍ, ang keungˍ kawˉ ningˉ ngaˍ gu keungˍ gu kawˉ hpeuˍ naˇ nae htiˍ hu nae htiˍ hu upˍ lang jiˉ. 8Changˉ mangˉ na chu yao saeˍ peunˍ yao, seungˍ keˍ kamˉ seun ang nyiˉ veu paek taw aeˉ jiˉ. 9Haeˉ mae nae baoˉ vaˍ, makˍ sa pit kamˉ seun yumˉ suingˉ maˇ aˉ mae ha naeˇ. Yang lae yao kamˉ seun vaˍ hu uiˉ na ha saeˍ yao makˍ sa pit kamˉ seun hingˉ na changˉ htiˍ baˍ uiˍ na piˍ naˇ.

10Yumˉ kawˉ naeˉ uiˉ paek taw jiˉ haw ba hingˉ ngaˍ laˍ ceˍ veu kawˉ seuˍ a yeˉ yaiˉ haw ba#12:10 Yeˍsuˆ na ha siˉ naeˉ. hpeuˍ laˉ naeˉ.

11Ningˉ kanˉ ningˉ ngaˍ Ang suingˉ Hpaˍcaoˍ pa nae hpeuˍ laˉ yao gu mi nuing suiˍ huˍ veu manˍ kyaˍ uiˍ#Chiˍ mawng naeˉ ang laiˍ 118:22-23. nae Camˉ lik hingˉ na baˍ hpatˍ myang laˍ nae Yeˍsuˆ ha biˍ jiˍ.

12Haeˉ mae beu, yit pa rawˉ hek ang huiˍ ang kaeˍ uiˍ nae Camˉ lik ang hkiˍ saˍ laˉ uiˉ nae awn hoˉ changˉ ang huiˍ ang kaeˍ uiˍ yawng ngaˍ uˉ paˍ maˍ ningˉ ngaˍ gu na jaˇ ha laˍ siˍ naeˉ nae bae laeˍ yao, Yeˍsuˆ na ya chu naeˉ uiˉ saˍ laiˍ kuitˆ haoˉ jiˉ. Caˇ, changˉ ang muˉ uiˉ na ang hkae nae Yeˍsuˆ na chiˉ saˍ yao, awkˍ taw aengˉ jiˉ.

Hkawnˉ kan naeˉ uiˉ awˍ lawng

13Yeˍsuˆ hkaˍ mu hkai naeˉ hkaoˉ veu, aˉ mae jeuˇ ciˍ si laeˍ naeˍ nae ya bae naeˉ uiˉ saˍ laiˍ, Hpaˍriˆsaeˉ nae Heˍrot beu ta peˍ htiˍ baˍ uiˍ na Yeˍsuˆ kawngˉ piˉ lae jiˉ. 14Yawng laˉ yao Yeˍsuˆ na, Saˍ laˉ, naˇ changˉ ang sui ang pawng aˍ sangˍ na muiˉ baˍ hkae nae gu ang bae yaˇ. Aˉ mae yao nae baoˉ vaˍ, saˍ laˉ nawˍ changˉ beu mae kaˍ na baˍ hu nae Ang suingˉ Hpaˍcaoˍ beu kaˉ ba ang keung lawng na seungˍ maˍ naeˍ yaˇ. Hkunˉ hawˉ hkanˉ Kaeˉsaˍ na hkawnˉ kan biˍ naeˍ ningˉ ngaˍ ang yaˍ laˍ, baˍ yaˍ laˍ. 15Gu kan biˍ kyaˍ jiˉ laˍ, baˍ kan biˍ kyaˍ jiˉ laˍ nae naˉ jiˉ. Yeˍsuˆ nawˍ yawng beu tiˍ keˍ keˍ naeˍ nuing ba suiˍ hingˍ na bae yao, Ba ceuˉ ha yao ga na camˍ langˍ ngaeˇ. Ga hu seuˍ hpuˉ htiˍ pyaˍ ga kawngˉ hanˉ nangˉ lao nae ha biˍ jiˍ. 16Haeˉ mae yao, yawng hanˉ na langˉ jiˉ. Yeˍsuˆ maˇ, Ningˉ keung aˍ sangˍ beu ang maengˉ aˍ sangˍ beu awˍ hang jeuˇ nae naˉ jiˉ. Yawng muiˉ, hkunˉ hawˉ hkanˉ Kaeˉsaˍ beu awˍ hang nae yang ang maengˉ yangˍ ngaˇ nae ha biˍ jiˍ. 17Yeˍsuˆ mangˉ muiˉ ang suingˉ Kaeˉsaˍ beu ang keungˍ nawˍ ang suingˉ Kaeˉsaˍ na kan biˍ vo. Hpaˍcaoˍ beu ang keungˍ uiˉ aˍ Hpaˍcaoˍ na kan bu nae ha biˍ yao, yawng muiˉ Yeˍsuˆ na manˍ hko jiˉ.

Siˉ yao teˍ laˉ laeˍ naeˍ lawng na naˉ jiˉ

18Hingˉ nawngˍ veu, teˍ laˉ laeˍ naeˍ uiˉ baˍ ca nae ciˍ yao ca jiˉ Saˍduˆkaeˉ yawng ngaˍ Yeˍsuˆ kawngˉ lui yao naˉ lui jiˉ. 19Saˍ laˉ veuˉ, Moˉseˍ gu saˍ laiˍ ningˉ mae taemˉ yao chiˉ saˍ jiˍ. Changˉ htiˍ hu mangˉ beu yang aiˉ mangˉ ang yaˍ baˍ ca luiˍ saˍ nae siˉ saˍ baoˇ. Yang hpaeˉ htiˍ hu mangˉ hkaˍ ba hingˉ mangˉ na yuˉ laeˍ yao yang aiˉ saˍ laiˍ ang ceuˉ ang canˉ piˉ ya saiˍ ceuˉ nae taemˉ yao chiˉ saˍ jiˍ. 20Ang pawngˍ aiˉ cetˍ hu ca yao ang aiˉ yaˍ huˍ maˇ hkaˍ ba yuˉ yao ang yaˍ baˍ ca lui kuingˉ nae singˉ byaˇ. 21Nyiˍ hu htiˍ hu mangˉ muiˉ hkaˍ ba yaˍ hingˍ mangˉ na yuˉ yao ang yaˍ baˍ ca luingˉ beu singˉ yao, Sumˍ hu htiˍ hu mangˉ muiˉ ningˉ lawˉ yaˇ. 22Ningˉ lawˉ yaˇ ang pawngˍ aiˉ cetˍ hu veu tiˍ hkeu ang yaˍ baˍ ca luiˍ saˍ. Yawng hkaˉ hko laˉ hko uiˉ siˉ peunˉ yao hkaˍ ba yaˍ mangˍ muiˉ singˉ byaˇ. 23Teˍ laˉ laeˍ naeˍ nuing hingˉ ngang beu hkaˍ ba yaˍ hingˍ maˇ aˍ sangˍ beu hkaˍ ba hpeuˍ naeˇ. Aˉ mae yao nae baoˉ vaˍ, kaˍ hpaˍ yaˍ cetˍ hu mangˉ hkaˍ ba yaˍ hingˍ mangˉ kawngˉ hkaˍ ba laˉ mae htuˍ yaˍ lawˉ ca saˍ byaˇ nae naˉ jiˉ. 24Yeˍsuˆ yawng na ha biˍ jiˍ. Nawng ngaˍ Camˉ lik na muiˉ, Hpaˍcaoˍ beu laˍ htiˍ na muiˉ nawng baˍ bae nae pa nae kuitˆ si jaˇ. 25Aˉ mae yao nae baoˇ, siˉ jiˉ uiˉ changˉ teˍ laˉ laeˍ beu, hkaˍ ba ang bongˉ yuˉ lang naeˉ uiˉ baˍ ca laˇ. Piˉ yuˉ piˉ saˉ lang naeˉ uiˉ baˍ ca nae buingˍ htaˍ veu ca naeˉ buingˍ htaˍ naiˍ htangˍ uiˍ lawˉ hpeuˍ naeˍ. 26Siˉ jiˉ uiˉ changˉ teˍ laˉ laeˍ naeˍ awˍ lawng hingˉ na chaˍ yao Moˉseˍ beu Camˉ lik veu suingˍ mup awˍ lawng taemˉ ngaˍ jiˉ hiˉ keung Hpaˍcaoˍ maˇ, Gaˇ Aˍbraˍhamˍ beu Hpaˍcaoˍ, Iˉcak beu Hpaˍcaoˍ, Yaˍkok beu Hpaˍcaoˍ mangˍ yaˇ nae Moˉseˍ na ciˍ sangˍ jiˍ na nawng ngaˍ baˍ hpatˍ myang laˍ. #12:26 Awkˍ taw nae ang laiˍ 3:6 27Ang suingˉ Hpaˍcaoˍ nawˍ siˉ jiˉ uiˉ beu Hpaˍcaoˍ baˍ aˍ nae a sak teˍ yaˍ naeˍ uiˉ beu Hpaˍcaoˍ mangˍ yaˇ. Nawng ngaˍ kuitˆ si maˇ maˇ jaˇ nae ha biˍ jiˍ.

Ang liˍ ang kawngˍ hkaoˍ veu huiˍ sutˆ nae yangˍ

28Haeˉ mae beu, Camˉ lik ang hkiˍ saˍ laˉ htiˍ hu laˉ yao yawng hteng lang naeˉ na kyaˍ yao, Yeˍsuˆ yawng na maenˍ nae hkai bae laeˍ biˍ na myangˉ jiˉ. Ang liˍ ang kawngˍ hkaˉ hko laˉ hko hkaoˉ veu ang liˍ ang kawngˍ aˉ mangˉ jeuˇ huiˍ naeˍ maˇ nae naˇ jiˉ. 29Yeˍsuˆ maˇ, Kaˉ huˍ veu ang liˍ ang kawngˍ yangˍ maˇ, Oˇ, Iˉsaˍreˍlaˆ changˉ ceuˉ naˉ bao. Gu beu Ang suingˉ Hpaˍcaoˍ maˇ htiˍ hu nae uiˉ Hpaˍcao yaˇ. 30Nang beu Ang suingˉ Hpaˍcaoˍ mangˍ na nuing ba hkaˉ hko laˉ hko, nang beu nuing ba ang hkawˍ laˉ hkaˉ hko laˉ hko, nang bae buˉ jiˉ uiˉ hkamˍ kuit hkaˉ ca naeˉ uiˉ nae nang beu nuing ba kaˍ hkaˉ ca naeˉ uiˉ nae ya hak naeˉ.#Ang buinˉ maˍ naeˍ ang laiˍ 6:4-5. 31Ang liˍ ang kawngˍ nyiˍ lumˍ htiˍ lumˍ yangˍ maˇ hkaˍ tawng na hkaˉ yang lang naeˉ uiˉ na hkaˍ tawng laˉ mae ya hak naeˉ.#Ang tuˍ mawt naeˉ ang laiˍ 19:18. Ningˉ ang liˍ kawngˍ nyiˍ lumˍ htaˍ veu huiˍ naeˍ uiˉ ang liˍ kawngˍ baˍ ca laeˍ laˇ nae tawpˍ laeˍ jiˍ. 32Camˉ lik ang hkiˍ saˍ laˉ mangˉ muiˉ ang yaˍ yaˇ saˍ laˉ veuˉ, Ang suingˉ Hpaˍcaoˍ nawˍ htiˍ hu naˇ ca jiˉ. Ang suingˉ Hpaˍcaoˍ hiˍ mangˉ baˍ baoˇ Hpaˍcaoˍ htiˍ hu baˍ ca laeˍ laˇ nae saˍ laˉ ciˍ naeˍ ningˉ ang yaˍ yaˇ. 33Ang suingˉ Hpaˍcaoˍ na nuing ba hkaˉ hko laˉ hko, hkamˍ kuit hkaˉ ca naeˉ uiˉ, kaˍ hkaˉ ca naeˉ uiˉ nae hak yao hkaˍ tawng na hkaˉ yang lang nae uiˉ na hkaˍ tawng laˉ mae hak naeˉ ningˉ ngaˍ miˍ htawˍ hpi yao tanˍ naeˍ hkaˉ hko laˉ hko nae tanˍ seuˍ hkaˉ hko laˉ hko uiˉ htaˍ chae huiˍ naeˍ nae yang na ha biˍ jiˍ. 34Yang maenˍ nae kuitˆ na laeˍ yao tawpˍ luiˍ laeˍ naeˍ hingˉ na Yeˍsuˆ ya myangˉ yao, Naˇ, Hpaˍcaoˍ ang meungˉ veu baˍ veuˍ lang jiˉ laˇ nae ha biˍ jiˍ. Hingˉ nawngˍ veu changˉ htiˍ hu nae muiˉ Yeˍsuˆ na baˍ naˍ caw.

Daˍvet beu Ang yaˍ awˍ lawng na naˉ jiˉ

35Yeˍsuˆ ang buinˉ paˉ kyaˉ cawngˉ ang huiˍ hkaoˍ veu maˍ biˍ beu, yang htiˍ cangˍ ciˍ laeˍ jiˍ. Hkrit maˇ Daˍvet beu Ang yaˍ mangˍ yaˇ nae ba ceuˉ ha yao, Camˉ lik ang hkiˍ saˍ laˉ uiˉ ha naeˇ. 36Ang hkawˍ laˉ ang seungˍ sangˉ mangˉ Daˍvet na kuitˆ pawngˍ biˍ naeˍ hkaoˉ veu yang ciˍ jiˍ. Ang suingˉ Hpaˍcaoˍ nawˍ ga beu ang suingˉ mangˉ na ha biˍ jiˍ. Nang beu lanˍ suˍ uiˍ na nang laˍ hkuiˍ tawngˍ kaˍ veu ga chiˉ beu tiˍ hkeu ga beu laˍ maˍ kaˍ seu duingˉ yao ca voˍ nae ciˍ saˍ jiˍ#Chiˍ mawng naeˉ ang laiˍ 110:1.. 37Daˍvet ang to yang na ang suingˉ nae haoˉ baoˉ vaˍ, aˉ mae yao yang beu Ang yaˍ hpeuˍ naeˇ nae naˉ jiˉ. Changˉ ang muˉ ang byaˍ uiˍ a, yang beu ang tangˍ hingˍ na mawnˍ yao pyawˉ yao naˉ yuˉ jiˉ.

Yeˍsuˆ Camˉ lik ang hkiˍ saˍ laˉ uiˉ na saˍ tiˍ piˍ jiˍ

38Yeˍsuˆ seungˍ maˍ yao ca jiˉ hkaoˉ veu yang htiˍ cangˍ ciˍ laeˍ jiˍ. Camˉ lik ang hkiˍ saˍ laˉ uiˉ na saˍtiˍ ca bu. Yawng ngaˍ hkaˍ lao ang mongˉ uiˉ tum yao aeˉ laˉ siˉ naeˉ. Katˆ hkaoˉ veu hao yawng na saˍ nyamˉ lanˍ na baˍ upˍ. 39Yuˉdaˆ changˉ ceuˉ hpawm lang kyaˉ hkaoˉ veu laˍ htiˍ aˉ yaˍ ang ca duingˉ kyaˉ na baˍ up. Poiˍ kyaˍ lamˍ kyaˍ veu ang maenˍ ang mang tangˍ kawnˍ duingˉ kyaˉ veu na baˍ upˍ yawng ya siˉ naeˉ nae ha biˍ jiˍ. 40Yawng ngaˍ mae maiˉ ba beu yumˉ na yatˍ buˍ yao, naˍ hokˍ baˍ ya taw laˉ naeˉ uiˉ saˍ laiˍ ang mangˍ nae ang buinˉ paˉ naeˉ. Haeˉ mae changˉ uiˉ ngaˍ hao htaˍ chae huiˍ sutˆ nae uiˉ ciˍ yangˍ naeˍ uiˉ yawng ya hkamˉ buˉ naeˉ nae ha biˍ jiˍ.

Mae maiˉ ba hpuˉ tanˍ jiˍ

41Hingˉ nawˍ veu, Yeˍsuˆ nawˍ hpuˉ tanˍ kyaˍ kaˍ seu mae kaˍ hpaw yao duingˉ jiˉ. Changˉ uiˉ hpuˉ uiˉ nae hpuˉ kan kyaˉ veu tanˍ laˉ naeˉ na hu yao ca jiˉ. Ang ca pang uiˉ aˍ ang byaˍ tanˍ jiˍ. 42Haeˉ mae beu, ang saˍ baeˍ mae maiˉ ba htiˍ hu mangˉ laˉ yao, met muˍ nyiˍ met kan laˉ jiˉ. Cet met muˍ hingˍ nyiˍ met hingˉ ngaˍ htiˍ paeˍ laˍ mawk naeˍ naˇ yeˍ kuingˉ lang naeˉ. 43Yeˍsuˆ yang ta peˍ uiˍ na haoˉ nga yao ciˍ sangˍ jiˍ. Ga nawng na maˉ manˉ nae hkai hkaemˍ laˍ vaˍ. Changˉ mae maiˉ ba ningˉ maˇ hpuˉ kan kyaˉ kam pangˍ veu hao taˍ chae kan na byaˇ. 44Aˉ mae yao nae baoˇ, yawng hkaˉ hko laˉ hko uiˉ aˍ yawng beu ca pang naeˉ uiˉ hingˉ hkaoˉ veu kan jiˉ. Mae maiˉ ba ningˉ maˇ yang saˍ naeˍ baeˍ naeˍ hkaoˉ veu yang beu hkaˉ ca jiˉ uiˉ ang keungˍ uiˍ, yang aˉ sak po laeˍ seuˍ hkaˉ hko laˉ hko uiˉ kan na byaˇ nae ha biˍ jiˍ.

Currently Selected:

Maˍkuˆ 12: pyy

Highlight

Copy