Luuga 9

YASUUV YARASSIL AL IṬNAASHAR

1Wa naada talaamiizu_l iṭnaashar wa addaahum gudra wa sulṭa vala_sh sheyaaṭiin wa vashaan yashfu_l marḍaaniin. 2Wa rassalum yabashshiru be malakuut Allaah wa yashfu_l marḍaaniin. 3Wa gaal leehum, “Maa tashiilu ḥaaja le_s safar, laa vaṣaaya wa laa kiis wa laa veesh wa laa filuus wa laa toobeen. 4Wa aiyi beet daxaltuuhu, agvudu hinaak, lighaayat maa tasiibu_l balad diik. 5Wa kull al maa yagbaluukum, lamma tamrugu min al balad diik, hizzu_t turaab min vala rijleekum vashaan shahaada valeehum.” 6Wa hum ṭalavu, wa kaanu yafuutu vala kullu ḥilla yabashshiru wa yashfu fi kullu maḥall.

7Wa Hiiruudus ra’iis al mudiiriyya simiv be kull al ḥaṣal, wa kaan mitḥayyir vashaan bavḍum gaalu ’innu Yuuḥanna gaam min been al meyyitiin. 8Wa bavḍum gaalu ’innu Iiliyya ẓahar, wa gheerum ’innu nabi min zamaan gaam. 9Wa Hiiruudus gaal, “Ana gaṭavta raas Yuuḥanna, laakin minu da al basmav vannu ḥaajaat zei di?” Wa kaan daayir yashuufu.

10Wa lamma_r rusul rajavu, xabbaroohu be kull al vamaloohu. Wa axadum, wa hum mashu baraahum le balad isima Beetṣaida. 11Wa_n naas, wakit maa virfu, tibivoohu. Wa hu gibilum wa kallamum van malakuut Allaah, wa shafa_l muḥtaajiin le_sh shifa. 12Wa lamma garrab al misa, al iṭnaashar jo wa gaalu leehu, “Rassil an naas vashaan yamshu le_l ḥilal wa_l bilaad al gariiba, wa yanuumu hinaak wa yalgu akil. Vashaan niḥna hina fi makaan xala.” 13Laakin huwa gaal leehum, “Intu adduuhum vashaan yaaklu.” Wa gaalu, “Maa vindana ḥaaja aktar min xamsa rughfaan wa samakteen, illa iza namshi wa nashtari akil le_n naas deel kullahum.” 14Vashaan kaanu xamsat alaaf raajil tagriiban. Wa gaal le talaamiizu, “Xalluuhum yagvudu jamaava xamsiin xamsiin tagriiban.” 15Wa vamalu kida, wa kullahum gannabu. 16Wa axad al xamsa rughfaan wa_s samakteen, wa vaayan le_s sama, wa baarakum, wa kassar, wa adda le_t talaamiiz vashaan yagaddimu le_n naas. 17Wa kulluhum akalu wa shibivu. Wa rafavu_l faḍla min al kisar iṭnaashar guffa.

IVTIRAAF BUṬRUS BE_L MASIIḤ

18Wa ḥaṣal, lamma hu kaan yaṣalli, wa_t talaamiiz kaanu mavaahu, hu sa’alum wa gaal, “An naas biguulu ana minu?” 19Wa raddu wa gaalu, “Yuuḥanna al Mavmadaan. Wa taanyiin biguulu Iiliyya. Wa taanyiin, nabi min zamaan gaam.” 20Wa gaal leehum, “Wa intu taguulu ana minu?” Wa Buṭrus radda wa gaal, “Inta Masiiḥ Allaah.” 21Wa ḥazzarum wa amarum maa yaguulu da le aiyi zool. 22Wa gaal, “Ibn al insaan laazim yitvazzab katiir. Wa_sh shuyuux, wa_l gusus al kubaar, wa muvallimiin al gaanuun birfuḍuuhu wa biktuluuhu. Wa fi_l yoom at taalit huwa biguum.”

23Wa gaal le_l kull, “Iza kaan zool daayir yaji waraai, xalliihu yankir nafsu wa yashiil ṣaliibu kullu yoom wa yatbavni. 24Vashaan kull ad daayir yaxalliṣ nafsu yawaddira, wa kull al yawaddir nafsu vashaanni yaxalliṣa. 25Wa_l faaida shinu iza_z zool liga ad dunya kullaha wa waddar nafsu walla xisira? 26Vashaan iza waaḥid yakuun xajlaan minni wa min kalaami, Ibn al insaan bikuun xajlaan minnu wakit maa yaji fi majdu wa fi majd al Abu wa_l malaaika_l magaddasiin. 27Bakallimkum be_l ḥagg, fih jamaava min al waagfiin hina, maa bimuutu lighaayat maa bishuufu malakuut Allaah.”

28Wa bavd al kalaam da be tamaanyat aiyaam tagriiban, Yasuuv axad Buṭrus wa Yuuḥanna wa Yavkuub, wa ṭalav vala_j jabal vashaan yaṣalli. 29Wa wakit kaan yaṣalli, washshu itghayyar, wa hiduumu biga abyaḍ wa laamiv. 30Wa shuuf! raajleen itkallamu mavaahu, wa hum Muusa wa Iiliyya. 31Wa hum ẓaharu fi majd, wa kaanu yitkallamu van mootu, al kaan yagarrib yatimmu fi Uurushaliim. 32Wa laakin Buṭrus wa_l mavaahu kaanu ghargaaniin fi_n noom. Wa lamma gaamu min an noom, shaafu majdu wa_r raajleen al waagifiin mavaahu. 33Wa ḥaṣal lamma_r raajleen kaanu yamshu min Yasuuv, Buṭrus gaal le Yasuuv, “Yaa Muvallim, kwaiyis nakuun hina. Xalliina navmil talaata xiyaam, waaḥda leek wa waaḥda le Muusa wa waaḥda le Iiliyya.” Wa huwa maa vaarif al biguulu. 34Wa wakit kaan bikallim, ja saḥaab wa ghaṭṭaahum. Wa xaafu lamma daxalu fi_s saḥaab. 35Wa ja ṣoot min as saḥaab yaguul, “Da huwa Ibni_l muxtaar. Asmavu leehu.” 36Wa bavd aṣ ṣoot da, Yasuuv itlaga baraahu. Wa sakatu wa maa kallamu aiyi zool fi_l aiyaam diik be aivi shi al hum shaafoohu.

37Wa fi_l yoom at taani lamma nazalu min aj jabal, jamav kabiir gaabaloohu. 38Wa shuuf! raajil min aj jamav koorak wa gaal, “Yaa Muvallim! Aṭlub minnak vaayin le waladi, vashaan huwa waladi_l waḥiid. 39Wa shuuf! ruuḥ biyamsiku, wa ṭawwaali hu bikoorik wa bitḥarrak katiir lighaayat maa yazabbid. Wa hu yaxalliihu be ṣuvuuba, wa yaxassir jismu. 40Wa ṭalabta min talaamiizak yaṭallivuuhu, wa maa gidru.” 41Wa Yasuuv radda wa gaal, “Yaa awlaad az zaman al maa miṣaddigiin wa raasum gawwi, le miteen akuun mavaakum w_aṣbur valeekum? Jiib waladak hina!” 42Wa wakit huwa jaai, ash sheeṭaan ramaahu wa jismu kaan bihizz. Laakin Yasuuv wabbax ar ruuḥ an najis wa shafa_l walad, wa sallamu le abuuhu. 43W_istaghrabu kulluhum min majd Allaah.

Wa lamma_n naas kulluhum kaanu yitvajjabu vala kullu_l huwa vamal, gaal le talaamiizu, 44“Xallu_l kalaam da yakuun fi iḍneekum! Vashaan Ibn al insaan yitsallam le iideen an naas.” 45Wa laakin hum maa fihmu_l kalaam da, wa kaan madsuus minnahum, vashaan maa yafhamuuhu. Wa kaanu xaayifiin yas’aluuhu van al kalaam da.

MINU AL AKBAR

46Wa gaam beenum su’aal van yaatu fiihum bikuun akbar. 47Laakin Yasuuv, lamma virif fikir guluubum, axad walad wa waggafu jambu. 48Wa gaal leehum, “Al bigbal al walad da b_ismi, bigbalni. Wa_l bigbalni, bigbal ar rassalni. Vala kida, al aṣghar fiikum, da huwa al kabiir.”

49Wa Yuuḥanna radda wa gaal, “Yaa Muvallim! Shufna zool yaṭalliv sheyaaṭiin b_ismak, wa manavnaahu, vashaan maa yatbav mavaana.” 50Yasuuv gaal leehu, “Maa tamnavuuhu, vashaan al maa valeekum, huwa mavaakum.”

51Wa lamma tammat al aiyaam le rafvu le_s sama, xalla kullu baalu, vashaan yamshi le Uurushaliim. 52Wa rassal maraasiil giddaamu. Wa mashu wa daxalu ḥilla min ḥilal as Saamiriyyiin, vashaan yajahhizu leehu. 53Wa maa gibloohu vashaan kaan maashi le Uurushaliim. 54Wa lamma shaafu da, Yavkuub wa Yuuḥanna talaamiizu gaalu, “Yaa Rabb! (?) Inta daayirna naguul ’an naar tanzil min as sama wa taḥrigum, zei maa vamal Iiliyya kamaan?” 55Wa itlafat wa wabbaxum, wa gaal, “Intu maa tavrifu min yaatu ruuḥ intu bititkallamu. 56Vashaan Ibn al insaan maa ja vashaan yaxarrib ḥayaat an naas, laakin vashaan yaxalliṣa.” Wa mashu le ḥilla taanya.

57Wa lamma kaanu maashiin fi_ṭ ṭariig, zool gaal leehu, “Ana batbavak fi aiyi maḥall tamshi leehu.” 58Wa Yasuuv gaal leehu, “At tavaalib vindahum maḥallaat an noom, wa ṭuyuur as sama vindahum vishaash. Laakin Ibn al insaan maa vindu makaan vashaan yaxuṭṭ raasu foogu.” 59Wa gaal le zool taani, “Atbavni.” Wa gaal leehu, “Yaa Saiyid, addiini izn amshi fi_l awwal w_adfin abuui.” 60Wa Yasuuv gaal leehu, “Xalli_l meyyitiin yadfinu meyyitiinum. Laakin inta, amshi wa bashshir be malakuut Allaah.” 61Wa zool taani gaal, “Batbavak, yaa Rabb. Bass addiini izn fi_l awwal aguul mava_s salaama le ahl beeti.” 62Laakin Yasuuv gaal leehu, “Maa fih zool al bixuṭṭ iidu vala_l miḥraat wa yavaayin le wara, vindu faaida fi malakuut Allaah.”

Currently Selected:

Luuga 9: APD1978

Highlight

Copy