Yuuẖanna 11

Dire gwa Liⓐaazar dai

1Kwiji gweta gwijo gwuma, gwan Liⓐaazar, gwa Betⓐanya gi len la Maryamŋa megen gwai gwan Martha. 2(A Maryam ro gwina gwibrutho Kwelenya ŋela ŋai ŋina ŋiro gwudhurul, ŋwudamire ŋwora ŋwuŋun uru yai yuŋun; megen gwan Liⓐaazar gwiro gwina gwuma). 3A limegen ukeje dugun, alaicinu, Kweleny gwai, aŋadhi, gwina gwuminyaŋa gwa gwuma. 4Dina ma Yasuuⓐ diŋini dhuŋuna ibidhe, ŋwarnu, Gumiye ibiga gati ga dhai no, abi gan majdh gwa Kalo, di Ŋari ŋa Kalo majidhini. 5Athi Yasuuⓐ uminyi Marthaŋaije megen gwai, a Liⓐaazar. 6Dina muŋwdiŋini darnu ŋeda gwa gwuma, ŋwujalo nanaŋ ŋwamun ram kalo geta geta gina gijuŋwuna. 7Ma ŋwamun ibiŋwe erna, ŋwabiŋaijo calmiz juŋun, ŋwulaici, Alela Yahuudiiya manaŋ. 8A calmiz juŋun aicinu, Muⓐallim gwai, Yahuud lara laŋaice nyol nyai kwereny; ŋabare gwela mine manaŋ a? 9Al Yasuuⓐ aicinu, Saaⓐa jati jathiro die‐a‐ram gi lamun letipo na? Ada kwiji gweta gwimela aŋina, athuŋw dikudhinu no, ŋinena aŋadhuŋw fure gwadhi gidhila ibiga. 10Abi ada kwiji gweta gwimela gile, gwadikudhini, ŋinena irinii fure dugun. 11Gwabiŋu dhuŋuna ibidhe; a gwaji ŋwulabiŋaijo, ŋwulaici, Madhiguri gwan Liⓐaazar gwa gwidhiro; abi nyi gwela gwiny birtheye ŋwar. 12A calmiz juŋun aicinu, Kweleny gwai, ada ŋeda gwimadhire, gwaji gwiŋir. 13Abi Yasuuⓐ abiŋa dai gwuŋun; alabiŋini, alarnu gwarnu gwidhiro ŋwugathuwa. 14Al Yasuuⓐ abiŋaijo momaŋ, ŋwulaici, Liⓐaazar gwimai. 15Nyi gwiŋir dhugore dagalo nyi gwati gwijo mine no, ŋinena ada nyaŋa limuminyi; abi abricije alela dugun. 16A Tuuma, gwina gwan Towam, aici calmiz jiter nu, Alela ko, allai ŋeda ŋalai.

17A dina ma Yasuuⓐ ela, ŋwubuje gwimadhire gi dhel ganu ŋwamun kworoŋo. 18A Betⓐanya gwijo githo Urushaliim gwaro miil ram. 19A Yahuud loinyadho eladha di Marthaŋa Maryam gwai, linudhilo dhuŋun dhai dha megen. 20A Martha diŋini darnu Yasuuⓐ gwa gwidhi, ŋwunela ganu, algwibudhe; abi Maryam jalo nanaŋ dunu. 21A Martha aici Yasuuⓐuŋw nu, Kweleny gwai, ada ŋa gwina gwijii mina, maguri gwati gwaiai no. 22Abi nyi gwiliŋidhi ŋinena dhuŋun peth dhina dhaŋa dhothaije Kaloŋa galo, dhaji dhaŋa Kalo dhedha. 23A Yasuuⓐ aicinu, Magalo gwadire manaŋ. 24Abi Martha aicinu, Nyi gwiliŋidhi darnu ŋeda gwaji gwadire manaŋ gi lamun ladhi dire dai lina laji lamra. 25A Yasuuⓐ aicinu, Nyi gwiro gwadhi direye a midhe; gwina gwinyuminyi, ada gwimai, gwamidhe manaŋ. 26A gweda gwina gwamidhe a nyuminyi gwati gwai gatur no. Au gwuminyu dhuŋuna ibidha a? 27Ŋwaicinu, Ye, Kweleny gwai, nyi gwuminyu darnu ŋa gwiro al Masiiẖ, gwina gwiro Ŋari ŋa Kalo, gwina gwaiela kidhila. 28A dina muŋwabiŋi minoŋ, ŋwela gi dhai dhuŋun, ŋwurnie megen gwan Maryam girimu, ŋwaicinu, Muⓐallim gwimila, ŋa urnie. 29A dina muŋwdiŋini, ŋwundira ganu, ŋwela dugun. 30A Yasuuⓐ gwoma gwati gwidhi nanaŋ gi len no, ŋwubije kalo ibige gina gibudhina Martha gwai. 31A Yahuud lina lijilai kiru allina, a dina malaŋa Maryamuŋw didire galo babraŋ ŋwutuya por, algwuje, alarnu, Gwiludhi gi dhel dare mine. 32A dina ma Maryam obani kalo gina gijina Yasuuⓐ, ŋwaŋa, ŋwide ŋwora ganu dugun, ŋwaicinu, Kweleny gwai ada ŋa gwijii mina, maguri gwati gwaiai no. 33A dina ma Yasuuⓐ aŋa dare, a Yahuud ko are lina lidhilai, ŋwuruni gi dhigirim, ŋwuke dhugore. 34Ŋwarnu, Gwa gwigwurcanya na? Alaicinu, Kweleny gwai, ila ŋaŋa. 35A Yasuuⓐ are. 36A Yahuud arnu, Aŋadhul, gwuminyuŋw. 37Abi coŋ degen arnu, Kwiji ibigwa, gwina gwuriyo ŋwudhibaŋa gi je, gwati gwuthi ŋoma gwekajo kwijo ibigwa dai na? 38A Yasuuⓐ runi manaŋ, ŋwela gi dhel dhiro kimu, dhiluthinu kol gai. 39Al Yasuuⓐ aicinu, Direyul kolya. A Martha, gwina gwiro megen gwa kwiji gwina gwimai, aicinu, Kweleny gwai, ŋwamun ibiŋwa gwimawei gwimaje ŋwamun kworoŋo. 40A Yasuuⓐ aicinu, Nyi gwati gwaicaŋanu, Ada ŋa gwina gwuminyii, ŋa gwaji gwaiaŋa majdh gwa Kalo na? 41Aldireye kolya kalo gina gidhirna kwiji gwina gwaio, a Yasuuⓐ baŋalaŋ kabo, ŋwarnu, Babo, nyi gwaicaŋa shukran ŋinena deŋinaijiny. 42A nyi gwiliŋidhi darnu ŋa gwathiny deŋinaijo gigina; abi ŋinena dhunejiny liji galo, nyi gwabiŋu, aluminyi darnu ŋa gwiro gwina gwukejiny. 43A dina muŋwabiŋi minoŋ, ŋwurnie ŋwal ŋwai ŋwipa, ŋwarnu, Liⓐaazar, tuia. 44A gwina gwaio ŋwutuya por, gwigukinu doi a ŋwora ciraŋ jai ja dhigwurcie; a je juŋun gukini mandiil gwai. Al Yasuuⓐ aicinu, Gududhul galo, nyabrico ŋwela. 45A Yahuud loinyadho lina lidhi di Maryam a dina malaŋa dhuŋuna dhina dhapo Yasuuⓐ, aluminyi. 46Abi coŋ degen ela gi Farriisiyiin, allabiŋaijo dhuŋuna dhina dhapo Yasuuⓐ.

Dhuŋun dha leleny la gusus dhina dhabiŋilo nyim dhan ai gwa Yasuuⓐ

47A leleny la gusus a Farriisiyiin auradha liduŋw gi juriya, alarnu, Alapaŋa? Kwiji ibigwa gwathapai ŋiro ŋoinyadho ŋina ŋipiŋipa. 48Ada gwimalabrico minoŋ cucun, a gwa liji peth uminyi; a Ruumaaniyiin laji lila alapai kaloŋa gega, alapai lijo lega. 49Abi gweta degen gwina gwan Gayaafa, gwiro kweleny gwa gusus gidhila ibige, ŋwulaicinu, Nyaŋa lati liliŋidhi dhuŋuna dheda no, 50i nyaŋa lati lireyo je galo darnu aŋ gwiŋiranu dega, di kwiji gwetipo ai ŋwura lijo galo, i athi liji peth irinii no. 51Gwati gwabiŋudhi gi gwidom gwuŋun no; abi gwiro kweleny gwa gusus gidhila ibige, gwabiŋu kwereny, ŋwarnu, Yasuuⓐ gwaiai ŋwura Yahuud galo. 52Gwati gwaio ŋwura Yahuud galo dogo no, a minoŋ ko gwaji gwawareje keleŋa ga Kalo liduŋw letipo gina gimabai galo. 53Gi lamun ibile athil othadhije galo dilrinya. 54Athi Yasuuⓐ idhi galo ditir gi Yahuud ganu manaŋ no; ŋwubela gi len lina lijo githo gi leba la mediina gwina gwan Afraaiim, alijalo calmiz jai juŋun mine. 55A Ŋidwa ŋa dh’Abrico ŋa Yahuud je githo; a loinyadho gathani ŋwena alela Urushaliim kwereny nanaŋ ŋidwa ŋati ŋijo no, aljarimani. 56Abi dina bupilo Yasuuⓐuŋw dina dhunadhilo gi hekal, alabiŋaijiye, alarnu, Nya larakwai? Ŋeda gwati gwaji gwila ŋidwa na? 57A leleny la gusus a Farriisiyiin dhedha lijo amr, alaicinu, Ada kwiji gweda gwimaliŋa kaloŋa gina gijuŋwuna, ŋwaŋiye, almutha.

Currently Selected:

Yuuẖanna 11: HBN

Highlight

Copy