Yuuẖanna 2
2
Agiye gwa Gaana
1A lamun la thirilŋa a agiye je Gaana ga Jaliil; a nana gwa Yasuuⓐŋa je mine. 2Alornaije Yasuuⓐŋaije, calmiz jai juŋun, gimure ga dhago. 3A ma ŋau ŋa dugur meadhe, a nana gwa Yasuuⓐ aicinu, Lati luthi ŋau ŋa dugur no. 4A Yasuuⓐ aicinu, Kwa gwai, nyi gwaŋupijaŋa? Saaⓐa jiny joma jati jidhi no. 5A nana gwuŋun abiŋaijo jadham, ŋwulaici, Dhuŋun peth dhina dhajil dhai abiŋaijo, apul. 6A nyidhe nyiril nyijo mine nyina nyiro nyol nya dhuŋun dha dhuni dha Yahuud, nyina nyathiro s̱afiiẖa ganu thudhina. 7A Yasuuⓐ aicinu, Oinyajul ŋau nyidhe alaŋ. Aloinyadhe ŋwinyalaŋ. 8Ŋwulaici, Agillo, nyalapai di kweleny gwa gimure. Allapai. 9Dina ma kweleny gwa gimure ŋila ŋau ŋina ŋigitinu ŋau ŋa dugur, athuŋw liŋidhi darnu ŋidhi na no; (albi jadham liŋa jina jagikilo;) ŋwurnie kwoma gwa dhago. 10Ŋwaicinu, Liji peth lathidhedha kwerkwereny ŋau ŋa dugur ŋina ŋiŋir; a maji maliye ŋoinyadho, allibidhedha ŋau ŋa dugur ŋina ŋimulo; ŋalbabrico ŋina ŋiŋir di ŋinena ro. 11Ŋiro ibiŋa ŋiro ŋipiŋipa ŋina ŋapilo Yasuuⓐ kwerkwereny Gaana ga Jaliil, ŋwulaŋajo majdh gwuŋun; a calmiz juŋun uminyi. 12Ŋwaji ŋwula Kafranaaẖuum, a nana gwuŋun a limegen a calmiz juŋun; allijalo ŋwamun coŋ dogo.
Iŋirini gwa hekal
13A Ŋidwa ŋa Yahuud ŋa dh’Abrico je githo, a Yasuuⓐ alo Urushaliim. 14Ŋwubuje lijo gi hekal lina lathelaŋ nyidhra a jaŋal a jiridhir, a lina lathupeye gwarush ganu diljalo. 15A dina muŋwmideje dar nono, ŋwulteye hekal ganu, a jaŋal a nyidhri; ŋwubuluje gwarush galo gwa liji lina lathupeye ganu, ŋwupeje darabeza galo. 16Ŋwulabiŋaijo lina lathelaŋ jiridhir, ŋwulaici, Abirul ŋida ibiŋa mine; athanya rujo duna gwa Babo gwiny gwa dhelaŋ no. 17A calmiz juŋun aŋidhani darnu dhulinu, Dunu gwuŋa gwumirudhiny gwuleny, gwiminyeny. 18A Yahuud abiŋaijo, alaici, Ŋa gwijaŋajo aŋa gwina gwinaŋ, ŋinena apaŋa dhuŋuna ibidhe? 19Al Yasuuⓐ abiŋaijo, ŋwulaici, Kiyul kaniisa ibiga, a gaji ŋwamun thiril ginyi direye. 20Abi Yahuud aicinu, Kaniisa ibiga gaicinu jidhileo dure‐ram‐a‐nyiril, ŋa bare gaŋa direye ŋwamun thiril a? 21Ŋwubabiŋa kaniisa ga aŋinu yuŋun. 22A dina muŋwdire dai, a calmiz juŋun aŋidhani darnu labiŋaijuŋwulo dhuŋuna ibidha; aluminyi kitham, a dhuŋun dhina dhabiŋaijilo Yasuuⓐ. 23Dina juŋw gi Urushaliim gi lamun la Ŋidwa ŋa dh’Abrico, a liji loinyadho uminyi jiriny juŋun, dina aŋadhilo ŋiro ŋipiŋipa ŋina ŋapuŋwulo. 24Athilbi Yasuuⓐ dhedhi gwidom gwuŋun no, ŋinena liŋidhuŋw lijo peth. 25Athuŋw bupo gweda duŋwuro shaahid gwa kwiji no; ŋinena liŋidhuŋw dugor da liji peth.
Currently Selected:
Yuuẖanna 2: HBN
Highlight
Share
Copy
Want to have your highlights saved across all your devices? Sign up or sign in
First published by the British and Foreign Bible Society in 1966.
