Luuga 16
16
Wakiil gwina gwati gwapo ŋiro ŋuŋun momaŋ no
1Ŋwabiŋaijo calmiz juŋun ko, ŋwulaici, Kwiji gweta gwuthi ŋida ŋoinyadho, gwina gwuthi wakiil. A liji teje wakiil galo alabiŋaijo kwelenya, alaici, Gwidhigirii galo ŋidi ŋai ŋuŋa. 2Ŋwurnie, ŋwaici, Dhuŋun dhiro dhaŋ dhina dhidiŋininy. Abiŋaijiny dhuŋuna peth dhina dhapaŋa raŋa wakiil gwiny; ŋa gwati gwuthi ŋoma gwaro wakiil gwiny manaŋ no. 3A wakiil abiŋini gi dhugor ganu dhuŋun, ŋwarnu, Nyi gwapaŋa? Kweleny gwiny gwiminy apa ŋiro ŋa wakiil. Nyi gwati gwuthi ŋoma gwakwure no; a nyi gwuthi dhara dothaije lijo galo ŋidi ŋai. 4Nyi gwimaliŋa darnu nyi gwapaŋa dina miny jalo buiny ŋiro ŋa wakiil, a liji laji linyodhadha gi dunu degen. 5Ŋwurnie lijo peth lina luthi gamja ga kweleny gwuŋun alela dugun. Ŋwabiŋaijo gwina gwidhi kwereny, ŋwaici, Gamju ga kweleny gwiny go duguŋa uman? 6Ŋwarnu, Nyi gwuthi jidhir ja ŋela dure thudhina. Ŋwabiŋaijo, ŋwaici, Apo waraga gwuŋa, ŋa jalo babraŋ ŋan ola ganu dure‐ram‐a‐die. 7Ŋwari gwabiŋaijo gwiter, ŋwaici, Abi go duguŋa uman? Ŋwarnu, Nyi gwuthi kela ga ŋwon dure‐thudhina. Ŋwabiŋaijo, ŋwaici, Apo waraga gwuŋa, ŋule dure‐kworoŋo. 8A kweleny orthadha wakiil gwina gwike, ŋinena apuŋw dhuŋuna bebra gwai. Keleŋa ga gidhila ibiga gina go ŋinena gathi bebrani gi keleŋa ga fure. 9Nyi gwa gwabiŋaijaje, ŋajaici, Athanya rujo lidom lalo limedhigen la gwarush gwina gwati gwiŋir no; di maji manya ide, lajapai gi dunu gwina gwathije gwortal. 10Kwiji gwina gwathapai ŋiro momaŋ ŋina ŋitiny, gwathapai ŋiro momaŋ ŋina ŋipa ko; a kwiji gwina gwati gwathapai ŋiro momaŋ ŋina ŋitiny no, gwati gwathapai ŋiro momaŋ ŋina ŋipa ko no. 11A minoŋ ada nyaŋa lati limathapai ŋiro momaŋ gwarush gwai gwina gwati gwiŋir no, ei gwaji gwajabrico nyabapai ŋiro ŋidi ŋai ŋina ŋiŋir? 12A ada nyaŋa lati limapai ŋiro momaŋ ŋidi ŋai ŋa kwiji gwiter no, ei gwaji gwajidhedha ŋida ŋina ŋaje dagalo? 13Gadham getipo gati guthi ŋoma gupijo lelenya ram ŋiro no; athuŋwbi doinya gweta, ŋwuminyi gwiter; i algwije gweta, ŋwirini gwiter. Nyaŋa lati luthi ŋoma lapai ŋiro ŋa Kalo a ŋa gwarush no.
Dhuŋun dhina dhibur dhina dhabiŋaijuŋw Farriisiyiin
14A Farriisiyiin ko, lina lidiŋinu dhuŋuna ibidha lina lathil ŋidi amra gigina, alakejuma, anidhagirini. 15Ŋwulabiŋaijo, ŋwulaici, Nyaŋa liro lina lathari liji liter lare nyaŋa liŋir; abi Kalo giliŋidhi dugore dalo; dhuŋun dhina dhathidhi liji are dhiŋir gwuleny dhathika Kaloŋa ganu. 16Naamuus a dhuŋun dha nebiŋa dhijo di Yuuẖanna ila; abi ŋinena muŋwila dhuŋun dha gidhila ga Kalo dhimabiŋini, athin liji peth upiye duni. 17Abi gwijanu galo edeny di Sama erna a gidhila, gi dhuŋun dheta dha naamuus erna dhina dhitinyunu. 18Liji peth lina lathiteje laio galo legen, alago laio liter, lathilwal; a liji peth lina lathago laio lina lathil loma legen teje galo, lathilwal.
Kwiji gwina gwuthi ŋida ŋoinyadho a Liⓐaazar gwina gwati gwuthi ŋida no
19Kwiji gweta gwijo gwina gwathigena ciraŋa jina jimide, jina jure, athuŋweny ŋida ŋina ŋama gigina. 20Athi kwiji gweta dhire galo kour dugun, gwina gwan Liⓐaazar, gwina gwati gwuthi ŋida no, a aŋinu yuŋun peth iro nyuri. 21Ŋwari gweny gwudhibur gwina gwathibirethadhe galo gi tharabeza ganu dha kwiji gwina gwuthi ŋida ŋoinyadho; athi nyin ila, almuna nyuri nyuŋun. 22A kwiji aji ŋwai gwina gwati gwuthi ŋida no, a malaayka odha, ŋwuje gi jabaŋ ganu di Ibraahiim. A kwiji ai ko gwina gwuthi ŋida ŋoinyadho, algwurce. 23A gi kalo gina gathin liji je lina laio dina ithi ŋwuredeny nono gwuleny, ŋwurile, ŋwaŋa Ibraahiimuŋw romine, ŋwaŋa Liⓐaazaruŋw dije gi jabaŋ ganu di Ibraahiim. 24Ŋwure gwula, ŋwaici, Babo gwina gwan Ibraahiim, inudhiny, ŋukeja Liⓐaazaruŋw, ŋwuleje lamun luŋun ŋau ganu, nyiljileje dhiŋila; ŋwuredeny ŋwa ŋwitiny gwuleny mina kiga ibiya. 25Abi Ibraahiim arnu, Ŋari ŋai, aŋidhanu darnu dina midhaŋa, ŋuthi ŋida ŋina ŋiŋir, athibi Liⓐaazar uthi ŋida ŋina ŋike; abi Liⓐaazar gwimuthi ŋida ŋina ŋiŋir ŋinena, a ŋwuredeny ŋwa ŋwithaŋa. 26A dhimireny dho ko keligeny ganu dega dhipa gwuleny, dha dhekajo lijo lina lathari lamura mina aleladha dagalo; a liji lati luthi ŋoma lamura daguri lina lara leladha mine no. 27Ŋwari ŋwarnu, Babo, nyi gwa gwothaijaŋa galo gwuleny nyari ŋa gwukeje Liⓐaazaruŋw dunu gwa babo gwiny. 28Nyi gwuthi limega thudhina. Abrico dilro shuhuud degen, a athil idhi kalo ibiga ga ŋwuredeny ko no. 29A Ibraahiim abiŋaijo, ŋwaici, Ŋediŋa luthi Muusuŋw a nebiŋa. Abricul aldiŋini dhuŋuna dhegen. 30Ŋwarnu, Oo, babo gwina gwan Ibraahiim; abi ada kwiji gweta gwimela degen gwina gwaio, la urle dugore galo gi ŋidi ŋina ŋike. 31A Ibraahiim abiŋaijo, ŋwaici, Ada limadoinya didiŋini dhuŋuna dha Muusaŋa nebiŋa lai, lati luminyi ada gweta gwimadire dai no.
Currently Selected:
Luuga 16: HBN
Highlight
Share
Copy
Want to have your highlights saved across all your devices? Sign up or sign in
First published by the British and Foreign Bible Society in 1966.
