Matta 2
2
Liji lina libebra lidhi daŋa Yasuuⓐuŋw
1Dina ma Yasuuⓐ liŋini Betlaẖm gwa Yahuudiiya gi lamun lina liro lai Hiiruudus malik, a liji ila lina libebra sharak gwai, aleladha Urushaliim. 2Alarnu, Malik gwa Yahuud gwiliŋinu na gwai? Anaŋa laŋadhi luduma luŋun sharak gwai, anabeladha dorthadha. 3A dina ma Hiiruudus gwina gwiro malik diŋini dhuŋuna ibidhe, ŋwalo galo dir, a liji peth la Urushaliim. 4Ŋwuwureje lelenya peth la gusus liduŋw a jathib ja liji, ŋwulothaije galo kalo gai gina ga giliŋina al Masiiẖ. 5Alabiŋaijo, alaici, Betlaẖm gwa Yahuudiiya; gwulinina minoŋ kitham ga nebi, 6Betlaẖm gwai, gi len la Yahuudha, ŋa gwati gwitinyanu gi leleny ganu la Yahuudha no; duguŋa Mudiir gwaji gwabinyina, a gwaji gwaro gwora gwa Israayiil lina liro liji liny. 7A Hiiruudus ukejiye gi liji lina libebra nyim, ŋwulothaije galo micol lamun lai lina luŋinu lai ludum. 8Ŋwulbukeje gi Betlaẖm, ŋwulaici, Idhul nyaliŋedha kaloŋa gina gijina ŋari ŋina ŋogaŋ; abi manya liŋedha kaloŋa, nyilbaura, nyilabiŋaijo, nyela ko nyorthadha. 9A dina mal diŋini dhuŋuna dha malik, alela gi dhai dhegen; a ludum lina laŋadhilo sharak gwai ŋwulmadhinijo, di ŋwila ŋwudhuna kalo alaŋ gina gijina ŋari ŋina ŋogaŋ. 10A dina aŋadhilo luduma aliŋir dugore gwuleny. 11Alila gi dunu, alaŋa ŋare ŋina ŋogaŋ Maryam gwai gwina gwiro nana gwuŋun; alide ŋwurko ŋwai, alorthadha; aligiye ŋida ŋegen, aldhedha hadiiya, gwina gwiro dahab, a ŋara ŋina ŋiro gwudhurul, a murr. 12Albi Kalo teje galo dhiŋidia ŋwari lati laurai di Hiiruudus no, albela gi len legen dhai dhiter.
Abire gwegen gwina gwubirudhil gwai gi Mas̱r
13A dina malela, a malaak gwa Kweleny uŋina dhiŋidia di Yuusuf, ŋwaicinu, Diro, ŋapai ŋare ŋina ŋogaŋ a nana gwuŋun, ŋela Mas̱r, athenaŋa ŋa dire galo kalo ibige no di maŋabiŋaijo; ŋinena ari Hiiruudus gwarinya ŋare ŋina ŋogaŋ. 14Minoŋ ŋwudire, ŋwapai ŋare ŋina ŋogaŋ a nana gwuŋun gile, ŋwulela Mas̱r. 15Alje mine di ma Hiiruudus ai; a dhuŋun uthi je ganu dhina dhabiŋu Kweleny kitham ga nebi, ŋwarnu, Gi Mas̱r nyi gwurnio ŋari ŋiny.
Hiiruudus gwirinyii keleŋa gina gitigitiny gina gathije Betlaẖm
16A dina ma Hiiruudus liŋa darnu gwukinejo liji ganu lina libebra, ŋwuka dhugore gwuleny, ŋwukeje lijo gi Betlaẖm dilrinya keleŋa peth gina gitigitiny gina giro loma, a ŋwen peth ŋwina ŋwijaiji galo Betlaẖm ŋalai, gina giro jidhileo ram a gidon, ŋwaliŋa lamun lina muŋwudiŋini lijo lina libebra. 17A dhuŋun uthi je ganu dhina dhabiŋu Irmiya gwina gwiro nebi, ŋwarnu, 18Gi Raama ŋwal ŋwijo, alare, alruni gwuleny, Raaẖiil gwurudhi keleŋa guŋun, ŋwudoinya inaŋw gwa liji, ŋinena athilijo no.
Aura gwegen gi Mas̱r
19Abi dina ma Hiiruudus ai, a malaak gwa Kweleny uŋina dhiŋidia di Yuusuf gi Mas̱r. 20Ŋwaici, Diro, ŋapai ŋare ŋina ŋogaŋ a nana gwuŋun, ŋaure gi len la Israayiil; ŋinena ma ŋediŋa ai lina lara larinya ŋare. 21Ŋwudire, ŋwapai ŋare ŋina ŋogaŋ a nana gwuŋun, ŋwaura gi len la Israayiil. 22Abi ma Yuusuf diŋini darnu Arkhiilaawus gwimaro kweleny gwa Yahuudiiya gi li dhugur la babo gwuŋun gwan Hiiruudus, ŋwudhenya duŋwela mine; a Kalo abiŋaijo dhiŋidia, ŋwela, ŋwuje gi len leta la Jaliil. 23Ŋwila, ŋwuje gi len leta lina lan Naas̱ira; a dhuŋun dha nebiŋa uthi je ganu, alarnu, Gwaji gwan Gwinaas̱ira.
Currently Selected:
Matta 2: HBN
Highlight
Share
Copy
Want to have your highlights saved across all your devices? Sign up or sign in
First published by the British and Foreign Bible Society in 1966.
