ŋɩru ŋun ŋapɩlo duwəjo 23
23
asa 23
1na bulus ŋalaḏe kəcərio nuleicɩno lɩmagəri, nyi gwaṯɩje gi jei ganu jeḏi elo ḏugwor ḏe ḏiŋir wei kəbe gwunnɩno. 2na ananiya gwun gwiro gwele gweḏi jɩsis nuluməḏɩjo lun lɩḏuḏɩnu gɩṯo gwalpi ŋwinyu ganu. 3na bulus eicɩno, elo gwaŋapiŋa ḏimɩle ṯe ḏɩpiḏo. ŋa gwo gwakɩminyi ŋuɽun ŋe ŋun ŋigelijɩlo elo musaŋ na ŋele ŋuɽuna nuŋwilpi ŋuɽun ŋun ŋɩkiḏiḏɩlo gworo gwun gwugelijɩlo elo musaŋ a? 4na luŋa lun lɩḏuḏɩnu ga nalarno, ŋa gwaḏeno gɩsisŋ gun gɩbuḏo geḏi elo a? 5na bulus arno, lɩmagəri, nyi gwate gwilɩŋiḏi niarno gwiro gɩsis gun gɩbuḏo no, gi gwune ŋulinu, aṯauməḏəṯo ŋuɽuna ŋɩki kwele gweḏi liji luŋa no. 6na gwune nal bulus lɩŋe kɩḏɩriḏ liro lisadugi na kworo liro lɩbarɩsi nuləri gwula gwubuḏo kəcərio yun yɩbuḏo nuleicɩno, lɩmagəri, nyi gwiro gwubarɩsi, niro ŋaɽe ŋeḏi lɩbarɩsi. na nyalakɩminyi ḏiḏuḏɩnɩjo ḏe na ḏidiɽo ḏeḏi liji lun laiyo. 7na gwune nuar dino na lɩbarɩsi na lisadugi naldiɽi nalbereḏe, na liji lun lutu kenyɩḏiḏi ganu. 8gi gwune lisadugi larno ḏidiɽo gi ḏaiya ḏate, na liji leḏi kanyin late na gwuɽɩwə gwate, na lɩbarɩsi teije ga wei. 9na ḏɩbereḏa diɽi ḏɩbuḏo gworki; na jalgaṯɩm kworo jeḏi lɩbarɩsi naldiɽi naluməḏəṯe gworki naleicɩno, anate nimanbuje ŋuɽuna ŋɩki kwiji kweno no. namɩni ŋɩrṯa ŋiro ḏa gwuɽɩwə maro i gwiji gweḏi kanyin maro gwuməḏɩjo? 10na gwune na ḏɩkenyɩḏiḏia ro ḏɩbuḏo, gwele gweḏi ajana gwun gwubuḏo nuḏonye nuarno liji lar lawawalaḏe bulusŋ ganu, na dino nugele ŋuɽuna ajana yagwulə ŋwuməṯo bulusŋ ŋɩma ŋe kɩlɩgi ganu lagin, naləḏɩje mərkəs. 11ŋɩno gɩlio kono na gwele gwun gwiro elo ḏuḏɩnejo ga nueicɩno, bɩɽiḏi nanu bulus, gi gwune aŋiḏio gwan nyi urucəlim arram ŋalaŋiḏi dino rumiya.
ḏikaiya ḏeḏi liju ḏe ḏiɽinyɩḏa bulusŋ
12na gwune na galo uɽe na liju kworo aɽuwaḏa ldu, nalgaki lula lagin gi ḏərɩmiə, nalarno late leʼe na lanyu no gwerre late lɩmaɽinye bulusŋ no. 13na liji lijo lutəno gi ḏuɽi kwoɽo lun ləmɩnyəḏiḏi ḏərɩmiə ṯeno. 14nalwila gi jɩsis jun jɩbuḏo na liji lun luɽun, naleicɩno, anamakaii lula ləri gi ḏərɩmiə ḏun ḏɩbuḏo, anate nanɩliŋəico ŋɩdio ŋədi no gwerre anate nimaɽinye bulusŋ no. 15na ŋiro dino nyaŋa na liji leḏi əcərio uməḏɩjil gwelɩnya gweḏi ajana gwun gwubuḏo ŋwajigwuluḏɩjo bulusŋ lagalo giləganu, gi gwune bunyanya gwanyakɩmiane gworki ŋuɽun ŋuŋun; gwanaḏuḏɩnɩjo gwanaɽinye gwerre ganu gwate magwulo no. 16na gwune na ŋaɽe ŋeḏi megin gweḏi bulus gwun gwiro gwa diŋɩni gwo gwuḏuḏɩnijɩlo, nuwele nuəḏi mərkəs, nuuməḏɩjo bulusŋ. 17na bulus orniḏaṯe gwete lugwun gweḏi lele leḏi ajana yun yiro ḏuɽi di nueicɩno, gwuluḏi gamɩlia keno kwele gweḏi ajana gwun gwubuḏo; na gwəṯi ŋuɽuna ŋar ŋuluməḏɩjo. 18na dino nugwulo nugwele kwele gweḏi ajana gwun gwubuḏo nueicɩno, bulus gwun gwiro lɩbabuny gworniḏi nuarno, nyi gwaŋagwuluḏɩjo gamɩlia keno, gəṯi ŋuɽuna ŋaŋaluməḏɩjo. 19na gwele gweḏi ajana gwun gwubuḏo məṯo nugwutu kaja nuɽoṯəḏɩjo, ŋa gwar gwiuməḏɩjo ŋuɽuna ŋɩrṯa? 20nueicɩno, liju luməḏəṯo laginŋu lar laɽoṯeḏe lugwuŋa ŋalgwuluḏɩjo bulusŋ giləganu kəcərio, gi gwune bunyilo gwalakɩmiane gworki. 21namɩni ŋa gwo gwəmɩnyi gi gwune lutəno gi ḏuɽi kwoɽo lelḏuḏɩnɩjo lun lɩkanu ḏərɩmiə ḏe, nalarno late lanʼe na lanyu no gwerre late gwumalɽinye no; na gwunnɩno lo lɩḏuḏɩnu nalarno ŋa gwəmɩnyi. 22na gwele gweḏi ajana gwun gwubuḏo ouwɩrico gamɩlia nudu nuuməḏɩjo ŋuɽuna ŋɩbɩɽe nueicɩno, ŋa gwo gwanuməḏɩjo gwiji ŋeicɩno ŋa minuməḏɩjo ŋuɽuna ŋeno
bulus gwuwəjɩnu gesaria
23nulorniḏaṯe lɩttən lugwun lun liro lele leḏi ajana yun yiro ḏuɽi di nuleicɩno, məṯɩl ajana jɩnei jɩttən na jalbuliḏ ḏuɽi kwoɽoṯəɽɩl na jɩnei jɩttən yun yəṯi nyire alwele gesaria sa ṯoḏɩnekwoɽo gilio. 24nyalḏəḏə lɩməṯaŋe alape bulusŋ muma ḏi mudir gwun gwan bilikɩs. 25nuuli gɩḏam dino, 26kuluḏiyusa lisias gwusalɩmi mudirŋ gwun gwan bilikɩs gwun gwiŋir gworki, 27na liju məṯo gwəmɩnyəŋe kweno, gwune nalar gwalɽinye, anawiḏi ajana ye nanəbɩrio, gi gwune nyi gwudiŋɩnu gwiro gwiji gweḏi rumiya. 28na gwune niarno nyi gwalɩŋe ŋuɽuna ŋun ŋicɩgilɩŋe lugwun niapaḏa kəcərio yagin yun yɩbuḏo, 29nibuje gwicɩgilo ŋuɽun ŋe ŋagin, namɩni late ləṯɩn ŋuɽuna ŋe ḏiɽinyɩḏa na ŋe ḏigakia no. 30na gwune nidiŋɩnno gwo gwuḏuḏɩnɩjo liju ga niwəjo lugwuŋa cou, nigele ŋuɽuna gi liji lun gwicɩgilo alumə ŋuɽuna gi jei ganu lugwuŋa ŋun ŋuməḏəṯɩlo lugwun. 31na dino na ajana yagwulo bulusŋ gilio anḏibaṯrus ŋiro gi gwune uməḏɩjɩlo gwele gweḏi ajana. 32na giləganu nalouwɩrico jalbuliḏa nalwele bulusŋale, nalaɽuwa mərkəs. 33na gwune na jalbuliḏ wele gesaria nalḏəḏə mudirŋ gɩḏam na dino nalaŋijo bulusŋ. 34na gwune na mudir əgɩri gɩḏam nuɽoṯəḏɩjo ŋu gweḏi amɩrɩgen yira na gwune nulɩŋe gwiro kilikia, 35nueicɩno, nyi gwadiŋɩni ŋuɽuna ŋuŋa ḏa liji lɩmila lun licɩgiaŋa dino. nugele ŋuɽuna gwaldɩme mərkəs gweḏi ərudus.
Currently Selected:
ŋɩru ŋun ŋapɩlo duwəjo 23: OTR1966
Highlight
Share
Copy
Want to have your highlights saved across all your devices? Sign up or sign in
Nuba, Otoro New Testament
© British and Foreign Bible Society, 1966.
