yuwana 16

asa 16

ŋuɽun ŋun ŋuməḏɩjɩlo yecu calɩmis ŋan ḏiwila wɽi

1nyi gwuməḏɩjaje ŋuɽuna ŋeno kani nyate nyobɩlkəḏɩni no. 2na laje lajidio kwu dunu gweḏi elo. i, gwerkwe gaja gaje gila gun gajigi gwijiɽinye namɩni gwarno gwəpijo eloŋu ŋɩru. 3na lajərri ŋuɽuna ŋeno gi gwune late lilɩŋiḏi babaŋ, niŋɩlɩŋe no. 4namɩni nyi gwuməḏɩjaje ŋuɽuna ŋeno, kəbe ḏa gaja gagin gɩmar gɩmila nyamɩni aḏɩŋane nyi gwuməḏɩjɩjaje. na ŋeno ŋate ŋuməḏɩjejɩlo uro gwerre no gi gwune lijo. 5namɩni gwunnɩno nyi gwawele ḏi gwun gwuwəjɩŋi, na gwate gwete lagalo gwun gwɩnyijoṯəḏɩjo gwanarno, ŋa gwar gwene no? 6namɩni gi gwune nyi majuməḏɩjo ŋuɽuna ŋeno; na dugwor dalo denyeḏe ḏɩrona. 7namɩni nyi gwajuməḏɩjo ŋuɽuna ŋun ŋiro gwerkwe, ŋiŋir lagalo ḏa nyi majɩnwalane; gi gwune ḏa nyi gwate majɩnwalane no, ŋu gwun gwaṯɩmoɽe ganu gwate gwila lagalo no; namɩni ḏa nyi mele, nyi gwajiwəḏɩjo. 8na ḏa maje mila nuəŋijo liji leḏi gɩḏilio gwan ŋuɽun ŋun ŋɩki, na ŋuɽun ŋun ŋiŋir na ŋe ḏakɩmiḏa; 9gwan ŋuɽun ŋun ŋɩki, gi gwune late lamɩnyinyi no; 10na ŋuɽun ŋun ŋiŋir gi gwune nyi gwar gwele ḏi baba gwinyi, na nya late linyiaŋu minu no; 11na ḏakɩmiḏa gi gwune gwele gweḏi gɩḏilio keno gwəkɩminu. 12nyi gwore gwəṯi ŋuɽuna ŋutu ŋun ŋajɩluməḏɩjo, namɩni nya late ləṯi ŋɩma ŋanyalməṯo gwunnɩno no; 13namɩni ḏa ŋu gwun gwiro gwuɽɩwə gweḏi ŋuɽun ŋun ŋiro gwerkwe mila gwaje gwajigwuloḏa ŋuɽun wei ŋun ŋiro gwerkwe; ŋi gwune gwate gwaṯumə ŋuɽuna ŋele ŋe ŋuŋun no, namɩni wei ŋun ŋaṯuldiŋɩni ŋiro ŋaṯuŋumə, na gwajumədɩjo ŋuɽuna ŋun ŋaje ŋila. 14na ŋu gwinyibuḏi gi gwune gwape ŋuɽuna ŋinyi na gwajuməḏɩjo. 15wei ŋun ŋijo ḏi baba, ŋinyi ŋiro, na ŋiro dino niarno, ŋu gwape ŋuɽuna ŋinyi na gwajuməḏɩjo.

16ŋwamon ŋwouwɩrio nya late linyiaŋu no; na ŋwamon ŋwouwɩrio mɩna nya laɽu linyiaŋu. 17na calɩmis juŋun kworo uməḏəṯe laginŋu nalarno, ŋuɽun ŋɩrṯa ŋeno ŋəruŋeno, ŋwamon ŋwouwɩrio nya late linyiaŋu no na ŋwamon gwouwɩrio mɩna, nanyalinyiaŋu, na, gi gwune nyi gwar gwele ḏi baba? 18nalarno, ŋuɽun ŋɩrṯa ŋeno ŋəruŋe ŋwamon ŋwouwɩrio? anate ŋilɩŋiḏanalo ŋɩrṯa ŋiro ŋuməḏuŋe no. 19na yecu lɩŋe ŋuɽuna luŋa gwar gwalɽoṯəḏɩjo, nuleicɩno, nya luməḏəḏəṯo gi gwune nyi gwarno ŋwamon ŋwouwɩrio nya late linyiaŋu no; na ŋwamon ŋwouwɩrio mɩna nya linyiaŋu a? 20gwerkwe, gwerkwe ganu, nyi gweiceijɩno nya laje ləri gwula na nyalarone, namɩni gɩḏilio gadile ganu; nya larone namɩni ḏɩrona ḏalo ḏawɩrla ga gi ḏidila ganu. 21gwa ḏa mar gwalɩŋe gwa ŋwuɽede enyeḏe nanu gi gwune gaja guŋun gɩmila, namɩni ḏa mar malɩŋeḏa ŋaɽe gwate gwaḏɩane ŋwuɽedɩnya ŋwuŋun minu no, namɩni gwadile ganu gi gwune malɩŋe ŋaɽe kɩḏilio. 22na nyaŋa dino nya ləṯi ḏɩrona gwunnɩno; namɩni nyi gwajaŋu. mɩna, na dugwor dalo dadile ganu. na gwate gwetɩdo gwun gwajiwala ḏidila ganu ḏalo no. 23na gi lamon leno nya late lanɽoṯeḏe ŋuɽuna ŋədi no. gwerkwe, gwerkwe ganu, nyi gweiceijɩno ḏa nyalmaɽoṯeḏe ŋuɽuna ŋəde ḏi baba jiri je jinyi gajilḏəḏə. 24uro ŋɩne kəbe gwunnɩno nya late nyalmanɽoṯeḏe ŋuɽuna ŋədi jiri je jinyi no; ɽoṯeḏɩl nanyalape, kani a ḏidila ganu ḏalo enyeḏe.

25nyi gwuməḏɩjaje ŋuɽuna ŋeno ŋun ŋɩlɩbo, namɩni gaja gaje gila, nyi gwate gwajuməḏɩjo ŋuɽuna ŋun ŋɩlɩbo no, namɩni nyi gwajuməḏɩjo ŋuɽuna ŋan baba nɩuma. 26gi lamon lono nya laɽoṯeḏe jiri je jinyi, na nyi gwate gwuməḏɩjaje nyi gwuməḏəṯɩjo babaŋ lagalo no; 27gi gwune baba kwulo gwuŋun gwajəmɩnyi, gi gwune nyaləmɩnyi, na nyəmɩnyi nanyarno nyi gwuduḏi ḏi baba. 28nyi gwuduḏi ḏi baba niwila kɩḏilio, na nyi gwawalane kɩḏilio, na nyi gwele ḏi baba mɩna. 29na calɩmis juŋun eicɩno, yɩti gwunnɩno, ŋa gwuməḏo muma na ŋa gwate manuməḏo ŋuɽuna ŋun ŋɩlɩbo no. 30gwunnɩno analɩŋe nanarno ŋa gwilɩŋiḏi ŋuɽuna wei, na ŋa gwate gwubunyu gwiji gwetɩḏo gwaŋanɽoṯəḏɩjo no, na ŋuɽun ŋeno anəmɩnyi nanarno ŋa gwuduḏi ḏi elo. 31nal yecu wɩrlijo ŋuɽuna nuleicɩno, nya ləmɩnyu gwunnɩno a? 32eʼe gaja gaje gila, i, gɩmila gwunnɩno, nya louwɩreḏelo gwete gwete lagalo, na nya liŋinwalane gwetɩdo; namɩni nyi gwate gwoga gwetɩdo no, gi gwune anoga baba gwe.

33nyi gwuməḏɩjaje ŋuɽuna ŋeno kani nyəṯi ḏouwɩɽiḏa lugwi. na ŋuɽun ŋaje lagalo kɩḏilio ŋɩbɩɽe, nyamɩni bɩɽe nanu. nyi gwimaḏami gɩḏilio.

Currently Selected:

yuwana 16: OTR1966

Highlight

Copy