yuwana 3

asa 3

ḏuməḏo nikudimus gwe

1na gwəmɩnyo gwijo gweḏi lɩbarɩsi gwun gwan nikudimus, gwiro gwele gwete gweḏi liju. 2ŋu gwuweləḏi ḏi yecu gilio, nueicɩno, mualɩm gwi, analɩŋiḏi ŋa gwiro mualɩm gwun gwuwiḏi ḏi elo, gi gwune gwiji gwate gwun gwəṯi ŋɩma gwagele ḏəŋinio ḏun ḏaṯagele no namɩni elo gwijilgwe. 3na yecu wɩrlijo ŋuɽuna nueicɩno, gwerkwe, gwerkwe ganu, nyi gweicaŋa no, ḏa gwiji gwate gwɩmalɩŋini uro#3:3 i mɩna kanyin no, gwate gwəṯi ŋɩma gwaŋu ŋelɩnya ŋeḏi elo no. 4na nikudimus eicɩno, gwiji gwun gwuɽun gwəṯi ŋɩma gwelɩŋini galakwe? gwəṯi ŋɩma gwəḏi kare ganu geḏi nana gwuŋun nulɩŋini mɩna? 5na yecu wɩrlijo ŋuɽuna nueicɩno, gwerkwe, gwerkwe ganu, nyi gweicaŋa no, ḏa gwiji gwate gwɩmalɩŋini ŋau ŋe na gwuɽɩwə gwe gwun gwɩpiḏo pɽul no, gwate gwəṯi ŋɩma gwəḏi ŋele ŋeḏi elo no. 6gwun gwilɩŋinu aŋɩnu ye gwiro aŋɩnu, na gwun gwilɩŋinu gwuɽɩwə gwe gwun gwɩpiḏo pɽul gwiro gwuɽɩwə. 7aṯaŋobeḏaga ṯuṯ no, gi gwune eicaŋano, arram nyalalɩŋini uro kanyin no. 8ḏɩron ḏaṯare nadiŋɩni ŋwal ŋwuŋun, naṯamɩni lɩŋeḏa ḏɩwiḏi nigwegwe no. gwiro dino gi liji wei lun lilɩŋinu gwuɽɩwə gwe gwun gwɩpiḏo pɽul. 9na nikudimus wɩrlijo ŋuɽuna nueicɩno, ŋuɽun ŋeno ŋaje galakwe? 10na yecu wɩrlijo ŋuɽuna nueicɩno, ŋa gwiro mualɩm gweḏi liji leḏi isreiyil naṯamɩni lɩŋeḏa ŋuɽuna ŋeno na? 11gwerkwe, gwerkwe ganu, nyi gwuməḏɩjaŋa nuŋwaŋeicɩno, anaṯumə ŋuɽuna ŋun ŋilɩŋiḏanalo, nanalumə ŋun ŋaŋəḏanalo, naṯanyalmɩni donye. 12ḏa nyi majuməḏɩjo ŋuɽuna ŋeḏi gɩḏilio ŋate ŋanyaləmɩnyi no, namɩni nyaləmɩnyi galakwe ḏa nyi majuməḏɩjo ŋuɽuna ŋeḏi kanyin?

13na gwiji gwate gwun gwɩmabo kanyin no namɩni gwun gwugwulu kanyin, gwiro ŋaɽe ŋeḏi liji ŋun ŋaṯɩje kanyin. 14na ŋiro gi gwune abujɩne musa ḏuŋɩnyaŋe elo kiḏɩwer gwiro dino arram ŋaɽe ŋeḏi liji ŋabuḏɩni dino, 15kani a liji wei lun ləmɩnyu late lai no namɩni ləmɩḏe gi gɩḏilio. 16elo gwaṯəmɩnyi liji leḏi gɩḏilio, nulḏəḏə ŋaɽe ŋuŋun ŋetɩḏo, na ḏa gwiji məmɩnyi ŋuŋu gwate gwai no, namɩni gwəmɩḏe gi gɩḏilio. 17gi gwune elo gwate gwuwəjo ŋaɽe ŋuŋun kɩḏilio gi ḏakɩmia liji no, numɩni wəjo kani liji leḏi gɩḏilio ləkədəḏɩni ga ŋu gwe. 18gwun gwəmɩnyu ŋaɽe gwate gwakɩmini no, namɩni gwun gwate gwəmɩnyu no gwimalakɩmi gwunnɩno, gi gwune gwate gwəmɩnyu jiri je jeḏi ŋaɽe ŋetɩdo ŋeḏi elo no. 19na ŋuɽun ŋe ḏakɩmiḏa ŋiro dino: bure gwɩmila kɩḏilio naṯɩmini liɽi əmɩnyene girɩm kwu bure gi gwune kiḏi ŋuɽun ŋagin. 20liji wei lun lɩmape ŋuɽuna ŋɩki laṯɩdonye bure, na late laṯɩweləḏa kwu bure no, gi gwune ŋuɽun ŋagɩn ŋate ŋiluḏɩnu no, 21namɩni gwun gwaṯape ŋuɽuna ŋun ŋiro gwerkwe gwaṯɩwele kwu bure, kani nuaŋiḏi ŋuɽuna ŋuŋun ŋərrinu ŋɩma ŋe ŋeḏi elo.

ḏɩteijo ga ḏeḏi yuwana mamadan ḏibədaicinu

22na gwune na ŋuɽun ŋeno ete na yecuŋa wila calɩmis je juŋun kamɩrɩgen yun yan yauḏia; nalijiga ŋɩnəwei naṯubabṯaijiḏi 23na yuwana dino gwaṯɩbabṯaijiḏi kamɩrigen yun yan aiyinun yun yijo giṯo salim, gi gwune ŋau ŋijo ŋɩnəwei ŋutu; naṯɩlwila ŋɩnawei naṯɩlbabṯaijini. 24gi gwune yuwana gwijɩre gwate gwimalgele kɩrkon no.

25na gwiju gwete diɽi naluməḏəṯe calɩmis je jeḏi yuwana ŋuɽun ŋeḏi ḏuwona ḏeḏi liju. 26nalwila ḏi yuwana, naleicɩno, mualɩm gwəri, ŋu gwun gwijanyagwe gi ḏuɽo ganu ḏeḏi ḏɩrawe ḏun ḏan urḏun, gwun gwaṯɩteije ga, eʼe ŋu gwibabṯaijiḏi naṯi liji wila lugwun wei. 27nal yuwana wɩriijo ŋuɽuna nuleicɩno, gwiji gwate gwəṯi ŋɩma gwaŋapa ŋuɽuna ŋədi no ḏa ŋate ŋɩmaliḏəḏə kanyin no. 28nyaŋa gi lulo lalo nyaligwiteijo ga gi gwune nyi gwarno, nyi gwate gwiro kɩrisṯo no, namɩni nyi gwuwəjɩnu nyi gwadara gwerre. 29ŋu gwun gwago ŋeria gwiro gwiji gwe ḏaga, namɩni meḏin gweḏi gwiji gwe ḏaga, gwun gwaḏuḏɩni gwaḏiŋɩni gwadile ganu gworki gwune nudiŋɩni ŋwal ŋweḏi meḏin, na ḏidila ganu ḏinyi ṯeno ḏimenyeḏe, 30arram ŋu gwabuṯane namɩni nyi gwourəne.

31ŋu gwun gwuwiḏi kanyin ŋu gwo gi liji elo wei, na gwun gwuwiḏi kwɩnyəm gweḏi gwɩnyəm gwiro, gwaṯumə ŋuɽuna ŋeḏi gwɩnyəm, namɩni ŋu gwun gwuwiḏi kanyin ŋu gwo gi liji elo wei. 32na ŋu gwiteijo ga gwan ŋuɽun ŋun ŋaŋəḏulo na ŋun ŋidiŋɩnulo, namɩni gwiji gwate gwete gwun manəmɩnyi ŋuɽuna ŋuŋun no. 33namɩni gwun gwəmɩnyu ŋuɽuna ŋuŋun ŋun ŋəteijini ga numɩɽenyə kaṯɩm ge ŋuɽun ŋeno ŋarno elo gwiro gwerkwe. 34na gwun gwuwəjo elo naṯumə ŋuɽuna ŋeḏi elo, gi gwune elo gwate gwaṯɩḏəḏə gwuɽɩwə gwun gwɩpiḏo pɽul gwɩtigwɩti no. 35baba gwəmɩnyu ŋaɽe, nugele ŋɩdio wei gi ḏi ḏuŋun. 36gwiji gwun gwəmɩnyu ŋaɽe gwəṯi ḏɩmiḏa gi gɩḏilio; namɩni gwun gwate gwəṯeijo ŋaɽe gəni no gwate gwanaŋu ḏɩmiḏa no, namɩni ḏɩɽeḏa ganu ḏeḏi elo ḏajaḏaṯa lugwun.

Currently Selected:

yuwana 3: OTR1966

Highlight

Copy