yuwana 8

asa 8

gwa gwun gwuməṯɩnu kalo ge ḏuriḏa

1namɩni yecu wele gi lɩrgwom lun lan seitun. 2na giləganu mimmi gilio nuəḏi mɩna kwu dunu gweḏi elo gwun gwubuḏo, na liji wei nalwila lugwun; nujiga nulalɩmi. 3na jalgaṯɩm na lɩbarɩsi nalgwuloḏa gwa gwete lugwun gwun gwuriḏilo gwiji gwe gwiro kaja, na gwune nalgele kɩlɩgi ganu, 4naleicɩno, mualim gwəri, eʼe gwa kweno gwɩmanaboḏeica kalo ge ḏuriḏa. 5musa gwuməḏɩjije ŋuɽun ŋun ŋigelijɩlo elo nuarno, arram liji leno lun laṯarre dino lilauce nyɩdol nye, namɩni ŋa gwarau ga? 6nalar dino, gwaliḏeije kani alɩbuje ŋun ŋalŋicɩgiŋuŋu. namɩni yecu nuriḏe nuuli kwɩnyəm lamon le. 7gwune naljɩre gwuməḏɩjilo, nudiɽio lɽa ganu nuleicɩno, ŋu gwun gwate gwəṯi ŋuɽuna ŋɩki lagalo no, ŋuau gɩdol ge gwerre. 8nuaɽu nuriḏe nuuli ga kwɩnyəm. 9namɩni gwune naldiŋɩni dino naṯudu gwun gwuɽun gwetɩdo gwetɩdo kəbe naldu wei, na yecu ṯani gwetɩdo na gwa gwuḏuḏɩnu ga kɩlɩgi ganu. 10gwune na yecu diɽejo lɽa elo, nueico gwa no, gwa, luŋa laḏa lun lar laŋacɩgi? gwate gwetɩdo gwun gwaŋanakɩmi na? 11nueicɩno, gwatɩn gwetɩdo gwele gwi no. na yecu eicɩno, nyi dino nyi gwate gwaŋanakɩmi no, wiḏi ki ŋa gwo gwanape ŋuɽuna ŋɩki mɩna.

bure gweḏi gɩḏilio

12nuaɽu nal yecu uməḏɩjo naleicɩno, nyi gwiro bure gweḏi gɩḏilio. gwun gwigwujane gwate gwele kirɩm no, namɩni gwəṯi bure gwe ḏɩmiḏa. 13na lɩbarɩsi uməḏɩjo naleicɩno, ŋa gwateije ŋuɽuna ga ŋan gwulo gwuŋa. na ŋuɽun ŋuŋa ŋate ŋiro gwerkwe no. 14nal yecu wɩrlijo ŋuɽuna nuleicɩno, ḏa nyi mateije ga ŋan gwulo gwi, na ŋuɽun ŋiro gwerkwe gi gwune nyi gwilɩŋiḏi nyi gwuwiḏi ne na nyi gwele ne; namɩni nyaŋa late lilɩŋiḏi nyi gwuwiḏi ne no, na nyi gwele ne no. 15nyaŋa laṯakɩmi liji; namɩni nyi gwate gwinakɩmi gwetɩdo no. 16ḏa nyi gwaṯakɩmiḏe na ḏakɩmiḏa ḏinyi ḏaŋaro gwerkwe, gi gwune nyi gwədu gwetɩdo no, namɩni nyi gwiro na baba gwun gwuwəjɩŋi. 17ŋulinu kɩḏam ŋeḏi ŋuɽun ŋalo ŋun ŋigelijɩlo elo musaŋ ŋuɽun ŋeḏi liji lɩttən ŋun ŋaŋiḏulo ŋiro gwerkwe. 18nyi gwiro gwun gwiteijo ga ŋan gwulo gwi, na baba gwun gwuwəjɩŋi gwigwiteije ga. 19naleicɩno, baba gwuŋa gwo ka? nal yecu wɩrlijo əuɽuna nuleicɩno, nyaŋa late lilɩŋiḏiŋi i babaŋ gwinyi no. ḏa nyalilɩŋiḏiŋi nyalaŋalɩŋe babaŋ gwinyi dino. 20nal yecu uməḏɩjo ŋuɽuna ŋeno kalo ge ḏigela əlgɩrucə gwune alɩmiŋwulo kwu dunu gweḏi elo gwun gwubuḏo. nate nan ŋwiji məṯo gwetɩdo no, gi gwune sa juŋun jore jate jɩmila no.

yecu gwuḏɩmini calɩmis ga gi ḏikeḏa ḏun ḏila

21nuaɽu nal yecu uməḏɩjo nuleicɩno, nyi gwele na nyalibunyi, nanyalai ŋuɽun ganu ŋalo ŋun ŋɩki. na galo gun ginele nya late ləṯi ŋɩma ganyanwila no. 22na liju arno, gwar gwaɽinyini gi gwune aruno, galo gun ginele nya late ləṯi ŋɩma ganyanwila no? 23nuleicɩno, nyaŋa leḏi kwɩnyəm liro; namɩni nyi gweḏi kanyin gwiro. nyaŋa leḏi gɩḏilio keno liro, namɩni nyi gwədu gweḏi gɩḏilio keno no. 24na dino, najeicɩno, nyalai ŋuɽun ganu ŋalo ŋun ŋɩki; gi gwune ḏa nya late lɩməmɩnyi nyalmarno, nyi gwiro no, nyalai ŋuɽun ganu ŋalo ŋun ŋɩki. 25naleicɩno, ŋa gwiro gwan əḏi? nal yecu eicɩno, nyi gwiro gwun gwuməḏɩjaje uro gwerre. 26nyi gwəṯi ŋuɽuna ŋutu ŋilumə naŋiŋakɩmiḏe ŋan ŋyaŋa; namɩni ŋu gwun gwuwəjɩŋi gwiro gwerkwe, na ŋun ŋidiŋɩnilo lugwun, niluməḏɩjo gɩḏilio. 27nate nallɩŋe ŋu gwuməḏəṯi ḏi baba no. 28nal yecu eicɩno, ḏa nyalmabuje ŋaɽe elo ŋeḏi liji, na kaja kono nyalalɩŋe nyi gwiro, na nyi gwate gwanduji ŋuɽuna ŋəḏi ŋele ŋe ŋinyi no, namɩni ŋaṯiŋumə gi gwune alɩminyi baba gwi, 29na gwun gwuwəjɩŋi gwaṯanagwije. na ŋu gwate gwaṯiŋinwalane gwetɩdo no, gi gwune nyi gwaṯɩduji ŋuɽuna ŋun ŋəmɩnyulo bubruṯ. 30gwune uməḏu ŋuɽuna ŋeno, naləmɩnyi lutu.

yecu gwəṯi ŋuɽuna ŋiro kaja gi liju

31na yecu eico liju leno lun ləmɩnyu no, ḏa nyalmamaṯaḏe ŋuɽuna ŋinyi, na gwerkwe ganu nyalro calɩmis jinyi; 32na nyalalɩŋe ŋuɽuna ŋun ŋiro gwerkwe, na ŋuɽun ŋun ŋiro gwerkwe ŋajikədə ga. 33nalwɩrlijo ŋuɽuna naleicɩno, andro nyaɽe nyeḏi ibraim, nanate lɩmandro lɩwainy kwiji gwədi ḏuṯ no, namɩni galakwe naŋarno, nya laje ləkədəḏɩni ga? 34nal yecu wɩrlijo ŋuɽuna nuleicɩno, gwerkwe, gwerkwe ganu, nyi gweiceijɩno, gwun gwaṯape ŋuɽuna ŋun ŋɩki gwiro wainy gweḏi ŋuɽun ŋun ŋɩki. 35na wainy gwate gwajaḏaṯa kwu dunu gi gɩḏilio no; namɩni ŋaɽe ŋajaḏaṯa gi gɩḏilio. 36na dino ḏa ŋaɽe ŋɩmajikəḏə ga nyalmakəḏəḏɩni ga wutiwuti. 37nyi gwilɩŋiḏi nyalro nyaɽe nyeḏi ibraim; namɩni nyalar nyaliŋiɽinye, gi gwune ŋuɽun ŋinyi ŋate ŋəṯi gala lagalo no. 38ŋaṯiŋumə ŋun ŋaŋəḏɩlo ḏi baba gwi; namɩni nyaŋa ŋaṯanyaŋape ŋɩru ŋun ŋaŋəḏənyalo ḏi baba gwalo. 39nalwɩrlijo ŋuɽuna naleicɩno, ibraim gwiro gwurnəri gwəri. nal yecu eicɩno, ḏa nyalro nyaɽe nyeḏi ibraim, nyalaṯaŋape ŋɩru ŋeḏi ibraim. 40namɩi gwunnɩno nyalar nyaliŋiɽinye, namɩni nyi gwiro gwiji gwun gwuməḏɩjaje ŋuɽuna ŋun ŋiro gwerkwe ŋun ŋiḏiŋɩnili ḏi elo. namɩni ŋuɽun ŋalo ŋeno ŋate ŋaṯɩl ibraim ape no. 41nyalaṯape ŋɩru ŋeḏi baba gwalo. naleicɩno, anaŋa late liro nyaɽe nye ḏuriḏa no; anəṯi babaŋ gwetɩdo na ŋu gwiro elo. 42na yecu eicɩno, ḏa elo gwiro baba gwalo nyaŋa laṯɩnyiəmɩnyi, gi gwune nyi gwutuḏi ḏi elo niwiia. gi gwune nyi gwate gwaŋila ŋele ŋe ŋinyi no, namɩni ŋu gwuwəjɩŋi. 43gwudaro gəko nate nanyalɩŋe ŋuɽuna ŋinyi no? gi gwune nya late ləṯi ŋɩma nanyadiŋɩni ŋuɽuna ŋinyi no. 44nyaŋa leḏi baba gwalo gwun gwan iblis, na nya lar lape ḏɩbunya ḏun ḏɩki ḏedi baba gwalo. ŋu gwiro gwun gwaṯɩɽinyɩḏe uro gwerre, nate numaṯaḏe ŋuɽun ŋun ŋiro gwerkwe no, gi gwune ŋuɽun ŋun ŋiro gwerkwe ŋate lugwun no. na ḏa mumə ŋɩwɩɽigala naṯulumə ŋan ŋuɽun ŋuŋun, gi gwune gwiro gwuwɩɽɩgal na baba gweḏi ŋɩwɩɽɩgal. 45namɩni nyi gaṯɩluməḏo ŋun ŋiro gwerkwe, namɩni nya late laṯɩnyiəmɩnyi no. 46əḏi gwiro gwete lagalo gwinyiaŋijo ŋuɽuna ŋun ŋapɩlo ŋun ŋɩki? namɩni ḏa nyi majuməḏɩjo ŋuɽuna ŋun ŋiro gwerkwe namɩni gwudaro gəko nate nanyəmɩnyi no? 47gwiji gwun gweḏi elo gwaṯɩdiŋɩni ŋuɽuna ŋeḏi elo. na ŋiro dino nya late ladiŋɩni no gi gwune nyaŋa lədu leḏi elo no. 48na liju wɩrlijo ŋuɽuna naleicɩno, anate numəḏi muma nanarno, ŋa gwiro gwusamɩra na ŋa gwəṯi ḏiŋeroma na? 49nal yecu wɩrlijo ŋuɽuna nuleicɩno, nyi gwate gwəṯi ḏiŋeroma no, namɩni nyi gwaṯɩnəji babaŋ gwinyi, namɩni nyalaṯɩŋiapi ḏare. 50namɩni nyi gwate gwubunyu ḏɩbuḏia kwulo gwi no, gwo gwete gwun ḏaṯubunyi na gwiro gwun gwaṯakɩmiḏe. 51gwerkwe, gwerkwe ganu, nyi gweiceijɩno, ḏa gwiji gwete madɩme ŋuɽuna ŋinyi gwate gwanaŋu ḏaiya gi gɩḏilio no. 52na liju eicɩno, gwunne nanalɩŋe ŋa gwəṯi ḏiŋeroma. ibraim gwɩmai na nebɩŋa dino, namɩni ŋa gwarno, ḏa gwiji gwimaḏɩme ŋuɽuna ŋuŋa gwate gwai gi gɩdilio no. 53ŋa gwiro gwubuṯano ḏi baba gwəri gwun gwan ibraim gwun gwɩmai a? na nebɩŋa lɩmai dino. ŋa gwiduji gwula gwuŋa əḏi? 54na yecu wɩrlijo ŋuɽuna nuleicɩno, ḏa nyi mabuḏi gwula gwi, namɩni ḏɩbuḏia ḏinyi ḏate ḏəṯi jei ganu no. baba gwi gwiro gwun gwatɩnyibuḏi, gwun gwaṯanyagwarno gwiro elo gwalo. 55namɩni gwate gwilɩŋiḏanya no, namɩni nyi gwilɩŋiḏi; na ḏa nyi marno nyi gwate gwilɩŋiḏi no, nyi gwiro wɩɽɩgal gi nyaŋa; namɩni nyi gwilɩŋiḏi nɩdɩme ŋuɽuna ŋuŋun. 56baba gwalo gwun gwan ibraim gwadile ganu gwaŋu lamon linyi; nuaŋu nuiŋir ganu. 57na liju eicɩno, ŋa gwore gwate gwumaro jɩḏilio ḏuɽi ṯoḏine no, namɩni arno ŋamaŋu ɩbraim ye? 58nal yecu eicɩno, gwerkwe, gwerkwe ganu, nyi gweiceijɩno. gwerre ganu ibraim gwate gwilɩŋinu no, nyi gwijo. 59nalmɩni ape nyɩdolia nalar gwalauce, namɩni yecu gwulɩbo, nutu kwu dunu gweḏi elo gwun gwubuḏo.

Currently Selected:

yuwana 8: OTR1966

Highlight

Copy