luka 17

asa 17

ŋuɽun kworo ŋeḏi yecu ŋun ŋuməḏulo

mṯ. 18:6-7,21-22, mks. 9:42

1nueico calɩmis juŋun no, arram ŋuɽun ŋe ḏobɩlkəḏɩnə ŋila, namɩni ŋɩki kwiji gwun gwatɩn ŋuɽun ŋe ḏobɩlkəḏɩnə wila. 2ŋiŋirano lugwun ḏa makani ele kwulo nalgwiwini gi ḏɩrawe. gi ŋuŋu obɩlkeja gwete gi liji leno lun loga. 3jil muma. ḏa magalo gwete maŋapijo ŋuɽuna ŋɩki ŋamɩni lo, na ḏa mouwɩrla ga ŋamɩni ḏuḏɩjo ganu. 4na ḏa ŋɩmagapijo ŋuɽuna ŋɩki gi lamon letɩdo ŋwamon ganu kwoɽoṯəɽɩl, na maŋaɽuwəjo marno nyi mawɩrla ga gi lamon letɩdo ŋwamon ganu kwoɽoṯəɽɩl, ŋamɩni ḏuḏɩjo ganu

5na duwəjo naleico gwelɩnya gwun gwiro elo no, baḏaico ḏɩməṯo ḏəri. 6nal gwele eicɩno, na ḏa nyaləṯi ḏɩməṯo gi ŋaɽe ŋete ŋeḏi gwaɽe gwun gwan kardal ŋun ŋɩti, nanyaleico gwaɽe kwe gwun gwiro gwida, wəlinu ga ŋakwuḏɩni ga gi ḏɩrawe, na gwajeṯeijo gəni.

7na əḏi gwiro gwete lagalo gwəṯi wainya gwaṯɩkwuri i gwaṯiʼi gwueico, ḏa mila gi ḏɩri ganu no, wila cou ŋaleʼe. 8na nate nueico gwerre no, gelo muma ŋɩdio ŋe ḏiṯa ḏinyi, ŋakani giria ŋɩma ge ŋiapijo ŋɩru kəbe nyiʼe na nyiyu, na gɩdo ŋa gweʼe na ŋa gweyu a? 9na gwaḏɩŋane wainya kwe gi gwune nularre gi ŋun ŋeicuŋe a? ŋate ŋiro dino no. 10na ŋiro dino nyaŋa dɩno ḏa ŋɩmanyalarre wei gi ŋun ŋeiceijilɩŋe nyamɩni arno, anaŋa liro lɩwainy lun late ləṯi ḏaḏɩŋana kɩlɩgi no; ŋarranalo gi ŋun ŋijo mino kuwei.

yecu gwiŋiri liji nanu lun liro nyilo di

11na gwune wiḏu urucəlim nuwele kɩlɩgi ganu samɩra na jalil. 12na gwune nuobene gi lɩrgwom lete nalobeḏeṯe ləmɩnyəŋale lun liro di lun liṯɩlo ŋilo. nalḏuḏɩnaḏeṯo gala gwola ganu, 13nalərəjo gwula naleicɩno, yecu, gwele gwəri, inəḏije. 14na gwune nulaŋu nuluməḏɩjo nuleicɩno, wiḏɩl nyəŋijo jɩsisŋ jiŋɩno jalo. na gwune nalwele naliŋir nanu. 15na gwete lagin gwune nuaŋu aŋɩna yuŋun yimiŋir nanu, nuaɽuwe nubuḏi eloŋu ŋwal ŋwe ŋwɩbuḏo; 16nuiḏi gi jei ganu ŋwara ganu lugwun gweicu sukran. na ŋu gwiro gwusamɩra. 17na yecu wɩrlijo ŋuɽuna nueicɩno, liji late liro di lun limiŋir nanu na? namɩni laḏa lun liro ṯoḏɩnekwoɽo? 18gwate gwumabuḏini gwun gwaɽuwa gi ḏɩbuḏia eloŋu no numɩni buḏini kweno gwun gwate gwiro gwiju no. 19nuuməḏɩjo nueicɩno, diɽu ŋele. ḏɩməṯo ḏuŋa ḏɩmaŋiŋiri nanu.

ḏiwila ḏeḏi ŋaɽe ŋeḏi elo

mṯ. 24:26-28,37-41

20na gwune na lɩbarɩsi ɽoṯəḏɩjo galo, jaḏo gwiro gwun gwagwi ŋele ŋeḏi elo wila? nuleicɩno, ŋele ŋeḏi elo ŋate ŋila ḏidɩmena ḏe ga no. 21late larno, eʼe, ŋo ŋɩne no, i eʼe, ŋo ŋɩnəwei no, gi gwune ŋele ŋeḏi elo ŋo kɩlɩgi ganu lagalo. 22nueico calɩmis juŋun no, ŋwamon ŋwaje ŋwila ŋwun ŋwanyaŋwubunyi nyarno nyalaŋu lamon lete ŋwamon ŋweḏi ŋaɽe ŋeḏi liji, namɩni late lanyaŋu no. 23nalajeicɩno, eʼe ŋo ŋɩne, i ŋo ŋɩnəwei, nya lo lele na nya lo lanyalgwujane; 24na ŋiro gi ḏɩmana ḏeḏi ŋau gwune iṯu mɩlaŋ kɩḏɩriḏ kanyinŋ gelio na yoɽa ga kɩḏɩriḏ gede kanyinŋ gelio, na ŋiro dino ŋaɽe ŋeḏi liji ŋaje gi lamon luŋun. 25namɩni gwerre arram ŋu gwiḏe gworki na gwadonyini gi liji leḏi gwunne. 26na gi gwune dino ŋwamon ŋweḏi nouwa na ŋaro dino ŋwamon ŋweḏi ŋaɽe ŋeḏi liji. 27kaja kono luŋa laṯeʼe naṯɩlyu, naṯɩlago naṯɩlagini kəbe gi lamon lun lɩmali nouwa aḏi kwu murkab ganu, na ŋau wila nuɽinye liji wei. 28na ŋiro dino ŋwamon ŋweḏi loṯ, laṯeʼe naṯɩlyu, naṯɩleḏɩla naŋaleḏɩla, nalakwoi naluṯe; 29namɩni gi lamon lun lɩmali loṯ duḏo sadum na ŋau ŋun ŋiro igo na lɩbaruḏ nalna kanyin nalɽinye liji wei. 30na ŋaro dino gi lamon lun lali ŋaɽe ŋeḏi liji aŋino. 31na gi lamon ləwei, gwun gwaje kwu dunu elo na ŋɩdi ŋuŋun ŋaje dunu, gwo gwuləḏəga ŋwulape, na ŋiro ḏino gwun gwaje gi ḏɩri ganu gwo gwaɽuwaḏa ŋɩdo. 32aḏɩŋanɩl gwa gweḏi loṯ. 33gwun gwar gwaḏɩme ḏɩmiḏa ḏuŋun ḏuḏuji, na gwun ḏuḏuji gwumiḏi. 34nyi gweiceijɩno gilio kono ləmɩnyo laje lɩttən kajagar; na gwalape gwete namɩni gwanwalane gwete. 35na la lɩttən laje gi ḏɩruḏe; na gwalape gwete na gwanwalane gwete. 36na ləmɩnyo laje lɩttən gi ḏɩri ganu na gwalape gwete na gwanwalane gwete. 37nalwɩrlijo ŋuɽuna naleicɩno, ŋwo ka gwele gwəri? nuleicɩno, ŋalo ŋun gaṯɩn aŋɩnu je yun yaiyo, ŋɩnəwei na ŋwibɩrṯa aɽuwaḏe ldu.

Currently Selected:

luka 17: OTR1966

Highlight

Copy