luka 2

asa 2

dilɩŋino ḏeḏi yecu

mṯ. 1:18-25

1na ŋwimon ŋweno na uguṯus gesar ŋele ŋuɽuna arram iluli jiri jeḏi liji wei. 2na ḏulio ŋeno ḏiro ḏun ḏiro lɽa gwune na kirinius ro mudir gweḏi suriya. 3na liji wei nalwele gi jɩmɩrɩgen jagin gi ḏulio jiri jagin. 4na yusib dino walane kamɩrɩgen yeḏi jalil yun yan nasɩra, nuwele yauḏia nuobene kamɩrɩgen yeḏi ḏauuḏɩŋa yun yan beṯlam gi gwune gwiro əriḏ yeḏi ḏauuḏɩŋa, 5lulino mariam gwe gwun gwiro gwa gwuŋun gwun gwagwu, gwun gwugwuli. 6na gwune jilo ŋɩnəwei na gaja ro gun gar gagilɩŋe. 7nulɩŋe ŋaɽe ŋun ŋiro lɽa ŋun ŋiro gwəmɩnyo; nukɩɽɩbə ga jiria je, nuḏɩri ŋɩɽada ganu gi gwune galo ŋate gan ḏɩre gi mədelə no.

8na laɽa je kamɩrɩgen yəwei lun liḏɩrijo joŋolia jagin geḏo gilio. 9na gwiji gweḏi kanyin gweḏi gwele nulḏuḏɩnejo na ḏoɽeḏa ḏeḏi gwele nuloɽejo galo, naldonye gworki. 10nal gwiji gweḏi kanyin uməḏɩjo nuleicɩno, nyaḏonyɩḏa no; nyi gwo gwuməḏɩjaje ŋuɽuna ŋiŋir ḏidila ḏe ganu ḏɩbuḏo ŋun ŋaje gi liji wei. 11gi gwune ŋɩmajilɩgŋinɩjo ŋete gwunnɩno kamɩrɩgen yeḏi ḏauuḏɩŋa ŋun ŋəkədə liji ga ŋuɽun ŋagin ŋun ŋɩki, ŋun ŋiro kɩrisṯo ŋun ŋiro gwele. 12na ŋeno ŋaro ḏəŋinio lagalo: nyalabuje ŋaɽe ŋɩkiɽɩbənu ga ŋɩḏɩro ga ŋɩɽada ganu. 13na cou na gwiji gweḏi kanyin aŋino ajana ye yeḏi kanyin yutu lorṯeḏa eloŋu nilarno,

14ḏɩbuḏia ḏi elo gwun gwo uro kanyin,

na ŋɩne kwɩnyəm na ḏouwɩɽiḏa ḏaje kɩlɩgi ganu gi liji lun

gwaṯɩliŋiri ḏugwore.

15gwune nani liji leḏi kanyin walane nalabo kanyin, na laɽa uməḏəṯe laginŋu nalarno, ilele beṯlam gwunne ilaŋaḏa ŋuɽuna ŋeno ŋun ŋɩməṯi jei ganu ŋun ŋaŋijijɩlo gwele gwun gwiro elo. 16nalwele cou nalbuje mariamŋaije yusib gwe na ŋaɽe ŋɩḏɩro ga ŋɩɽada ganu. 17na gwune nalaŋu nalwɩreḏelo ŋuɽun ŋe ŋeḏi ŋaɽe ŋeno ŋun ŋuməḏɩjilɩlo. 18na wei lun lɩdiŋɩnu nalobaga ṯuṯ ŋuɽun ŋun ŋuməḏɩjilɩlo laɽa; 19namɩni mariam aḏɩŋane ŋuɽuna ŋeno wei, naṯuŋuməḏɩni gi ḏugwor ganu ḏuŋun. 20na laɽa aɽuwa nalbuḏi eloŋu nalorṯeḏa ŋuɽun wei ŋun ŋidiŋɩnilo na wei ŋun ŋaŋəḏɩlo ŋiro gi gwune uməḏɩjilɩne.

21gwune na ŋwamon ṯɩmi dubə ŋwe ewalŋwuɽə ŋaɽe, nalḏəḏə jiri jan yecu, gi gwune eicɩne gwiji gweḏi kanyin gwerre ganu ŋate ŋɩmalgwuli kare ganu no.

ḏapaḏa ḏeḏi yecu kwu dunu gweḏi elo

22gwune na ŋwamon ṯɩmi ŋwun ŋwar ŋwalŋwiŋir nanu ŋuɽun ŋe ŋun ŋigelijɩlo elo musaŋ nalapaḏa urucəlim nalḏəḏə gwelɩnya gwun gwiro elo, 23gi gwune ŋulinu ŋuɽun ŋeḏi gwele gwun gwiro elo, ŋarno, nyaɽe wei nyun nyiro ŋwuɽa nyun nyiro ləmɩnyo nyaleico nyipiḏo pɽul kwele. 24nalŋele ḏiḏuga gi gwune ŋulinu ŋuɽun ŋeḏi gwele gwun gwiro elo, ŋarno, jiɽidir jɩttən i ŋwubuɽa ŋwɩttən ŋwun ŋwoga.

simaun na ḏorṯeḏa ḏuŋun

25na gwəmɩnyo gwijo gwete urucəlim gwun gwan simaun. na gwəmɩnyo kweno gwiŋir gwaṯɩḏonye eloŋu gwuḏuḏɩnɩjo ḏɩmoɽa ga ḏeḏi liji leḏi isreiyil na gwuɽɩwə gwun gwɩpiḏo pɽul gwijo lugwun. 26na ŋuɽun aŋinijo gwuɽɩwə gwe gwun gwɩpiḏo pɽul ŋu gwate gwanaŋu ḏaiya gwerre gwate gwumaŋu kɩrisṯoŋ gweḏi gwele no. 27na ŋu nuwila gwuɽɩwə gwe kwu dunu gweḏi elo gwun gwubuḏo; na gwune nanaŋa baba gwe naləḏi ŋaɽe ŋe ŋun ŋan yecu nalarre ŋuɽun ŋe ŋun ŋigelijɩlo elo musaŋ,

28nuape di de duŋun nubuḏi elonu nuarno,

29na gwele gwi gwunne ŋa gwouwɩrico gaḏama guŋa ŋele

ḏouwɩɽiḏa ḏe,

gi gwune ŋuɽun ŋuŋa dino,

30gi gwune jei jinyi jimanu ḏɩkədəḏɩnə ga ḏuŋa

31ḏun ḏigico gi jei ganu jeḏi liji wei.

32bure gwuɽəḏɩjo liji ga lun liro ga dino,

na ḏoɽeḏa ḏeḏi liji luŋa lun liro lisreiyil.

33na baba na nana gwuŋun nalobaga ṯuṯ ŋuɽun ŋun ŋuməḏulo ŋan ŋu. 34na simaun mora ki nueico mariamŋ gwun gwiro nana gwuŋun no, ŋaɽe ŋeno ŋɩməṯɩnu gi ḏaica ga na gi ḏidiɽio liji lutu leḏi isreiyil, na ŋaro ḏəŋinio ḏun ḏuməḏəṯini elo. 35na ŋiro dino ŋa gwaḏugini kɩwiḏ ge gwula gwuŋa, gi gwune ḏuməḏɩno ḏeḏi dugwor ḏeḏi liji lutu ḏɩmaḏəḏə ga.

ana

36na nebi gwijo gwun gwiro gwa gwan ana, gwiro ŋaɽe ŋeḏi panwil kəriḏ. yeḏi asɩr. na ŋu gwuməṯi jiḏilio jutu gworki, nalijiga gwəmɩnyo gwuŋun gwe jɩḏilio kwoɽoṯəɽɩl gi gwune nundiɽo. 37na ŋu majiga gwate gwəmɩnyo jɩḏilio ḏuɽi dubə na kwoɽo. nate nunouwɩrico duno gweḏi elo gwun gwubuḏo no, namɩni naṯuəpijo eloŋu ŋɩru ḏɩməṯo ḏe əbuṯo na ḏiɽoṯeḏa ḏe gilio na anyine. 38na ŋu gi sa ceno ŋuḏuḏɩnu ga nueico eloŋu sukran, nalgwumə luŋaŋale wei lun lɩḏuḏɩnɩjo ḏɩkədəḏɩə ga urucəlim jili je.

ḏɩbuḏa ḏeḏi yecu

39gwune nalṯɩmi ŋɩḏio wei ŋuɽun ŋe ŋeḏi gwele gwun gwiro elo, nalaɽuwe jalil kamɩrɩgen ŋagin yun yan nasɩra. 40na ŋaɽe buḏe, nubɩɽe nanu gwuɽɩwə gwe, na ḏilɩŋeḏa ḏe, na ḏeḏi elo ḏijo lugwun.

41na babaŋa nana gwe gwuŋun laṯɩwele urucəlim jɩḏilio wei kɩmuri ge ḏouwɩrico. 42na gwune nuro jɩḏilio di na gwuṯɩen nalabo urucəlim gwiro gi gwune aṯɩnuwele kɩmuri. 43gwune nalṯɩmi ŋwamon wei, nalar laɽuwe namɩni ŋaɽe ŋun ŋan yecu. ŋijɩre urucəlim, na baba na nana gwuŋun gwe nate nallɩŋe ŋɩmanɩwalane no. 44nalar gi larno ŋo gi liji ganu lun lɩwiḏɩle, nalwele gi ṯaṯ lamon letɩdo nalbunyi gi liji ganu lagin na gi liji lun lilɩŋiḏɩlo. 45gwune nalbunyi bibi nalaɽuwe urucəlim mɩna nalbunyi. 46gwune na ŋwamon ete ṯəɽɩl nalbuje kwu dunu gweḏi elo gwun gwubuḏo, lijiga gidəno limuwalɩm le, nudiŋɩni nulɽoṯəḏɩjo ga. 47na wei lun lɩdiŋɩnu nalobaga ṯuṯ ḏilɩŋeḏa ḏuŋun na ḏɩwəɽəṯɩjo luŋaije ŋuɽuna ŋwara. 48na gwune nalaŋu nalobaga ṯuṯ gworki, na nana gwuŋun uməḏɩjo nueicɩno, ŋaɽe ŋinyi, gwudaro gəko nuŋwijərrɩjo dino? baba gwuŋa na nyi anbunyaŋa ke niji dugwor mɩɽi. 49nulmɩni umeḏɩjo nuleicɩno, gwudaro gəko ninyilbunyi? nya late lilɩŋiḏi nanyarno, arram nyi gwəpijo babaŋ gwi ŋɩru na? 50nate nalɩŋe ŋuɽuna ŋun ŋuməḏɩjulo no. 51nalgwulo nalwele nasɩra naṯɩləṯeijo gəni. naṯɩmɩni nana gwuŋun aḏɩŋane ŋuɽuna ŋeno wei gi ḏugwor ganu ḏuŋun. 52naṯi yecu dare ḏilɩŋeḏena na ḏɩbuḏa ḏe, naṯi elo nəji na liji.

Currently Selected:

luka 2: OTR1966

Highlight

Copy