luka 23

asa 23

yecu gwuḏuḏɩnu gi jei ganu jeḏi bilaṯus gwun gwiro mudir gwiro gwiji gweḏi rumiya

mṯ. 27:1-2,11-14, mks. 15:1-5, ywn. 18:28-38

1naldiɽi wei ldu lagin nalgwuloḏa ḏi bilaṯus. 2nalɩḏeije ga gwalicɩgi nalarno, anaŋa gwubujana kweno gwuɽuḏijo liji ŋuɽuna ganu, nudonye nuarno gwate gwəḏəḏə gesarŋ ṯulba no, nuarno ŋu gwiro kɩrisṯo gwun gwiro gwele. 3na bilaṯus ɽoṯəḏɩjo nueicɩno, ŋa gwiro gwele gweḏi liju a? nuwɩrlijo ŋuɽuna nueicɩno, ŋa gwame. 4na bilaṯus uməḏɩjo jɩsis jun jɩbuḏo na lun laɽuwaḏo ldu, nuleicɩno, nyi gwate manbuje ŋuɽuna ŋun ŋɩki kwiji kweno no. 5nalmɩni uməḏene gworki, nalarno, ŋu gwaṯiḏiɽi liji, na gwaṯalɩmiḏe yauḏia wei; gwiḏeijo ga uro jalil kəbe ŋɩne.

yecu gwuḏuḏɩnu gi jei ganu jeḏi ərudus

6na gwune na bilaṯus ḏiŋɩni jalil gwe nuɽoṯeḏe ḏa maro gweḏi jalil. 7na gwune nulɩŋe gweḏi ŋele ŋeḏi əruḏus gwiro, nuwəḏɩjo ərudusŋ gwun gwijo dino urucəlim ŋwamon ŋwono. 8namɩni ərudus gwune nuaŋu yecuŋ nuiŋir ganu gworki; gi gwune gwubunyu gwuaŋu kaja gwola ganu gi gwune gwudiŋɩnu gwe ŋuɽuna ŋutu. nueṯeijo gwaŋu ŋɩru ŋun ŋapɩlo ŋun ŋɩbuḏo. 9nuuməḏɩjo galo ŋuɽuna ŋutu, numɩni ate nunwəɽəṯijo kworo ŋetɩdo no. 10na jɩsis jun jɩbuḏo na jalgaṯɩm nalḏuḏɩni, nalcɩgi ḏuməḏɩno ḏe gworki. 11na ərudusŋa ajana ye yuŋun nalduji gi gwate gwiro gwiji no, nalaki jumo; nalgaki jiria jun jiŋir nalwəɽijo bilaṯusŋ. 12na bilaṯusŋa əruḏus gwe nalro ŋɩmaḏia gi lamon leno; gi gwune gwerre ḏikiḏiḏia ḏijo kɩlɩgi ganu lagin.

bilaṯus, barabas na yecu

mṯ. 27:15-26, mks. 15:6-15, ywn. 18:39—19:16

13na bilaṯus əmɩḏe jɩsis jun jɩbuḏo na lele na liji, 14nuleicɩno, nyalapo gwiji kweno lugwi gi gwete gwun gwaṯidiɽi liji. nyi gwuməḏiji gi jei ganu jalo, na nyi gwate manbuje kwiji kweno ŋuɽuna ŋun ŋɩki ŋun ŋicɩgianyaŋe no; 15i ərudus dino, gi gwune nyi majiwəḏɩjo lugwun. ŋu gwate manape ŋuɽuna ŋəḏi ŋun ŋuŋai no. 16na ŋiro dino gwipi na gwikədə ga. 17na arram laṯulkəḏəḏɩjo ga gwete kɩmuri. 18naləri gwula wei nalarno apɩl gwiji kweno; namɩni ŋwijikədəḏɩjo barabasŋ ga. 19na ŋu gwigelɩlo kɩrkon gi gwune ḏɩbereḏa ḏijo kamɩrɩgen na ḏiɽinyɩḏa. 20na bilaṯus naləmɩḏe mɩna, na ŋu gwubunyu ŋwəkṯḏə yecuŋ ga; 21nalmmi ori gwula nalarno, ɽinyɩḏɩl, ɽinyɩḏɩl gi luɽi lun lɩmalɩḏo ganu. 22nuleico gi lamon lun ləduji loro ṯəɽɩl no, gwudaro, gwapo ŋuɽuna ŋɩrṯa ŋun ŋɩki? nyi gwate manbuje ŋuɽuna ŋun ŋuŋai no. na ŋiro dino gwipi na gwikədə ga. 23nalmɩni ariene gwula ŋwal ŋwɩbuḏo gworki, lɩbunyu gwalɽinye. na ŋwal ŋwagin na ŋweḏi jɩsis jun jɩbuḏo nalḏamane ganu. 24na bilaṯus arre gi ŋun ŋɩbunyɩlo. 25nulɩkədəḏɩjo ga gwun gwijo kɩrkon ŋuɽun ŋe ḏɩbereḏa na ḏiɽinyɩḏa, gwun gwubunyilo, numɩni ḏəḏə yecuŋ ŋuɽun ŋe ŋagin.

ḏɩɽinyɩḏa ḏeḏi yecu gi luɽi lun lɩmalɩḏo ganu

mṯ. 27:32-44, mks. 15:21-32, ywn. 19:17-27

26na gwune nalgwulo nalməṯo simianŋ gwun gweḏi gerawan gwuwiḏi geḏo, nalupi luɽi lun lɩmalɩḏo ganu luape gi ḏuɽo ganu ḏi yecu. 27na liji gwujane lutu na la lun laṯɩpəne gi jabba ganu nalrone. 28na yecu wɩrla ga lagin nuleicɩno, nyaɽe nyun nyiro la nyeḏi urucəlɩm, nyilərɩḏo no, nyamɩni əri gwula gwan lulo lalo na nyaɽe nyalo. 29gi gwune ŋwamon ŋwila ŋwun ŋwalŋwarno, ḏɩmoreḏa ḏaje gi la lun liro ŋwudum, na nare ne nate nugwuli no, na jɩḏu jun jate jiɽi no. 30naleico ŋwurgwoma no, idəḏijine elo, na ŋwurgwom ŋwun ŋwɩtiŋwɩti, kɩɽɩbədijil. 31na ḏa ŋɩmalarre dino ḏa luɽi lɩmorɩwe, na ŋarre ŋɩrṯa ḏa limuḏe?

32nalgwuloḏə dino liji lɩttən lun liro kaja lun lapo ŋṯɩɽuna ŋɩki lallɩɽinye ŋuŋale. 33na gwune nalgwele kalo gun gan gwunə, nalɩɽinye ŋɩnəwei ŋwuɽi ŋwun ŋwɩmalɩḏo ganu yecuŋale, lun lapo ŋuɽuna ŋun ŋɩki, gwete gi ḏi ḏun ḏiro ḏiŋir na gwiro kaja gi ḏi ḏun ḏiro ḏouwɩr. 34na yecu arno, baba, ḏuḏɩjilɩn ganu; gi gwune ŋate ŋilɩŋiḏɩlo ŋɩrṯa ŋiro ŋapɩlo no. nalgeginyəḏe jiria juŋun ganu naljɩmɩɽi gwumara. 35na liji lɩḏuḏɩnəḏelo nanŋalaḏe. na lele dino naṯɩlaki jumo nəlarno, ŋu gwaṯɩkədə liji ga lun liro kaja; ouwɩricil ŋwukədə gwula gwuŋun ga, ḏa ŋumaro kɩrisṯo gwun gwuməṯi elo. 36na ajana dino naṯɩlaki jumo naṯɩlwila nalgico ŋau ŋun ŋan kal, 37naṯɩleicɩno, ḏa ŋa maro gwele gweḏi liju ŋəkədə gwula gwuŋa ga. 38na ŋwule ŋwijo ŋwulinu kɩɽelo lugwun dino, ŋwarno, kweno gwiro gwele gweḏi liju. 39na gwete gi liji lun lapo ŋuɽuna ŋɩki lun labuḏo. nuḏene nueicɩno, na ḏa ŋa maro kɩrisṯo, ŋəkədə gwula gwuŋa ga ŋwijikədə ga. 40na gwete nuwɩrlijo ŋuɽuna nulo nueicɩno, ŋa gwate gwiḏonyo eloŋu na ŋa gwo gi ḏakɩmino ṯeno na? 41namɩni anaŋa ŋuɽun ŋun ŋɩḏuḏɩnu ŋa, ŋi gwune nalalape ŋiliŋeḏeṯo ŋun ŋɩḏujialalo, namɩni kweno ŋate ŋapune ŋədi ŋun ŋɩki no. 42nueico yecuŋ no, aḏɩŋaninyi gwele gwi, ḏa ŋa mar gwila ŋele ŋuŋa. 43na yecu eicɩno, gwerkwe ganu, nyi gweicaŋano, gwunanyine alaje kalo gun giŋir geḏi liji lun laiyo.

ḏaiya ḏeḏi yecu

mṯ. 27:45-56, mks. 15:33-41, ywn. 19:28-30

44na galo garo anyino ganu ca, na gɩḏilio rimi ganu wei kəbe na sa ro ṯəɽɩl. 45na anyin rimi ganu; na giria geḏi dunu gweḏi elo gwun gwubuḏo ṯɩrṯəḏɩni ganu kɩlɩgi ganu. 46na yecu əri gwula ŋwal ŋwɩbuḏo gworki nuarno, baba, nyi maŋele gwuɽɩwə gwi gi ḏi ḏuŋa; na gwune nuar dino nuai. 47na gwele aŋu gweḏi ajana yun yiro ḏuɽi di ŋuɽuna ŋun ŋɩmila, nubuḏi eloŋu nuarno, gwerkwe ganu kweno gwiro gwiji gwiŋir. 48na liji wei lun laɽuwaḏo ldu gi ḏiŋalaḏa ŋuɽun ŋun ŋɩmila nalaɽuwe nalpəne gi jabba ganu. 49na wei lun gwilɩŋiḏɩlo na la lun ligwujano jalil lɩḏuḏɩnu uro kaja naniŋalaḏe.

ḏikwura ḏeḏi yecu

mṯ. 27:57-61, mks. 15:42-47, ywn. 19:38-42

50na gwəmɩnyo je gwun gwnn yusib gweḏi əcərio, na gwiro gwəmɩnyo gwiŋir gwuḏuḏɩnu ga. 51na kweno late liŋəki ŋuɽuna kal gete ŋun ŋaliŋele no. na ŋu gweḏi rəmɩ gwun gwiro amɩrɩgen yeḏi liju, na ŋu dino nuḏuḏɩnɩjo ŋelɩnya ŋeḏi elo. 52na kweno nuwele ḏi bilaṯus nuɽoṯeḏe aŋɩna yeḏi yecu. 53nugwulio numɩɽi nanu giria ge gun gimɩde ganu, nugele kil gikwurinu kɩmu ganu ŋun ŋate gigelɩnɩne gwiji ganu no. 54na lamon leno liro lamon le ḏigela ŋɩdio muma, na lamon le sabiṯ lijo gɩṯo. 55na la gwujane lun lɩwiḏɩle jalil nalaŋaḏa gil na galakwe nalŋele aŋɩna yuŋun. 56nalaɽuwe nalŋele ŋila ŋun ŋiro ŋɩḏini. na gi lamon le sabiṯ nalobe uwə gwe ŋuɽun ŋe ŋun ŋigelijɩlo elo musaŋ.

Currently Selected:

luka 23: OTR1966

Highlight

Copy