luka 7

asa 7

ḏiŋiriḏa nanu ḏeḏi gaḏam geḏi gwele gweḏi ajana ŋun ŋiro ḏuɽi di

mṯ. 8:5-13

1na gwune nuṯɩmi ŋuɽuna ŋuŋun wei na liji deŋɩnejo nuobene kabranaum. 2na wainy gwete gweḏi gwele gweḏi ajana yun yiro ḏuɽi di gweḏeḏo nanu gwijo gɩṯo gwar gwai na ŋu gwəmɩnyɩnu gworki kwele gwuŋun. 3na gwune nudiŋɩni yecu gwe, nuwəje liju lun luɽun gwalɽoṯəḏɩjo ŋwuwila ŋwumiḏi wainya gwuŋun. 4gwune nalwila ḏi yecu nalɽoṯəḏɩjo ḏibɩɽeḏa ḏe nanu gworki naleicɩno, ŋu gwɩdeleḏo gwaŋərrɩjo ŋuɽuna ŋeno; 5gi gwune gwaṯəmɩnyi liji ləri na ŋu mijikədɩjo duno gweḏi elo. 6nalwele yecuŋale. na gi gwune gwate gwijo gala gwola ganu kwu dunu no, na gwele gweḏi ajana yun yiro ḏuɽi di nuwəje lɩmeḏin gwaleicɩno, gwele gwəri, ŋoureḏo ganu no, gi gwune nyi gwate gwɩdeleḏo ŋa gwəḏi kwu dunu gwi no. 7gi gwune dino nyi gwarno nyi gwate gwɩdeleḏo nyi gweləḏa lugwuŋa no; ŋamɩni umə ŋuɽuna mino na gaḏam ginyi gəmɩḏe. 8gi gwune nyi dino nyi gwiro gwiji gwun məṯɩnu ŋele na nyi gwəṯi ajana gi ḏi ḏinyi. na ḏa mieico yeno no, wiḏi, namɩni yele; na ŋiro kaja ḏa mieicɩno wila, numɩni wila; na ḏa mieico wainya gwi no, arrɩlo ŋeno namɩni ŋularre. 9na gwune na yecu diŋɩni ŋuɽuna ŋeno nuobaga ṯuṯ lugwun, nuwɩrla ga gi liji lun lugwujano nuleicɩno, nyi gweiceijɩno, nyi gwate manbuje gi liji leḏi isreiyil ḏɩməṯo ḏɩbuḏo ḏiro gi gworo kweno no. 10na gwune lun lɩwəjɩlo aɽuwe dunu nalbuje wainya gwun gweḏeḏo nanu gwuməmɩḏe.

ḏidiɽo gi ḏaiya ḏeḏi ŋaɽe ŋeḏi gwa gwun gwiro gwinino neiyin

11na gi lamon lun ligwujo gworo ganu nalwele kamɩrɩgen yun yan neiyin. nalwele lutu lun liro calɩmis juŋun na liji lutu. 12na gwune nuje gɩṯo kouwɩr yeḏi amɩrɩgen na liji apa gwiji gwete gwun gwaiyo; gwiro ŋaɽe ŋetɩdo ŋeḏi gwa gwun gwiro gwinino. na lijo kijiŋale lutu leḏi amɩrɩgen. 13na gwune na gwele gwun gwiro elo aŋu nuino nueicɩno, ŋərio gwula no. 14nuwele nuḏɩmumi aɽagara, na liji lun lapo nalḏuḏɩni. nueicɩno, gamal ke, nyi gweicaŋa no, diɽu. 15na gwun gwaiyo nudiɽəḏo ga nuumə; nuḏəḏə nanaŋ gwuŋun. 16na liji wei obaga ṯuṯ nalbuḏi eloŋu nalarno, madiɽo lage gwun gwiro nebi gwubuḏo gworki, namɩni, elo mila gi liji luŋun. 17na ŋuɽun ŋeno wɩreḏelo gi jɩmɩrɩgen wei jeḏi yauḏia na kalo gun guɽeico galo wei.

yuwana mamadan

mṯ. 11:2-19

18na calɩmis jeḏi yuwana uməḏɩjo ŋuɽuna ŋeno wei; 19na yuwana əmɩḏe calɩmis juŋun jɩṯɩen nulwəje ḏi yecu naleicɩno, ŋa gwiro gwun gwar gwila, i anaḏuḏɩnɩjo gwiro kaja? 20na ləmɩnyo wila lugwun naleicɩno, yuwana mamadan wəjije lugwuŋa, gwarno, ŋa gwiro gwun gwar gwila, i anaḏuḏɩnɩjo gwiro kaja? 21na kaja keno nulgele muma lutu ŋɩɽainy ŋagin ŋun ŋiro kajakaja, na lun ləṯi ḏiŋeroma, na lun lɩrimə gi jei lutu nuluɽi jei ganu. 22nuwɩrlijo ŋuɽuna nuleicɩno, wiḏɩl nyuməḏɩjo yuwanaŋ ŋun ŋaŋaḏanyalo na ŋun ŋidiŋɩnanyalo, liji lun lɩrimə gi jei ladaŋa ga, na jɩbɩjo jawewele, na lun lɩṯɩlo ŋilo naliŋir nanu, na lun lɩrimə gi nəni ləḏiŋɩni, na lun laiyo ləḏiɽi, na lun late ləṯi ŋɩdio no na ŋuɽun ŋun ŋiŋir ŋeḏi elo ŋuməḏɩni lagin; 23na ḏɩmoreḏa ḏaje lugwun gwun gwate gwobɩlkəḏɩni lugwi no.

24na gwune na liji wele lun lɩwəjɩlo yuwana, nuuməḏɩjo liji gwan yuwana, nuleicɩno, nyalduḏi kiḏɩwer nyalar lanaŋaḏa aŋe? iṯa yun yaṯi ḏɩron əri a? 25namɩni nyalduḏi nyalar lanaŋaḏa aŋe? gwiji gwun gwukanu jiria jun jɩmide ganu a? eʼe, lono lun lɩkanu jiria jun jiŋir jutu jilɩnya, nalaṯɩjiga ŋele ganu, laṯɩje gi lɩdunu leḏi lele. 26namɩni nyalduḏi nyalar lanaŋaḏa aŋe? nebɩŋ a? i, nyi gweiceijɩno gwun gwubuṯano ḏi nebi. 27gwiro kweno gwun ŋulinu ŋan ŋu,

eʼe, nyi gwuwəjo ḏuwəjo ḏinyi ḏadara kɩɽelo lugwuŋa

gwun gwagele ṯaṯ ḏuŋa muma kɩɽelo lugwuŋa.

28nyi gweiceijɩno, gi wei lun lilɩŋinu gi la, gwatɩn gwete gwubuṯano ḏi yuwana no; namɩni gwun gwɩtieno ŋele ŋeḏi elo gwubuṯano lugwun. 29gwune na liji wei diŋɩni na lun laṯɩmeje ṯulba, nalarno elo gwiŋir ŋuɽuna, na luŋa libabṯaijinu ḏibabṯaijɩno ḏe ḏeḏi yuwana. 30namɩni lɩbarɩsi na ɩun laṯalɩmiḏe ŋuɽuna ŋun ŋigelijɩlo elo musaŋ naldonye ŋuɽuna ŋun ŋigelɩlo elo ŋan lulo lagin, gi gwune laŋe libabṯaijinu lugwun no.

31na liji leḏi gwunne nuarno, liro gi aŋe? liro gi əḏi? 32liro gi nyaɽe nyun nyijiga gi cu naṯɩləmɩḏe gworo ŋɩmaga, nanyarno,

anaŋa lərijəje nyuda namɩni nya late lariṯe no,

anərijəje gwula namɩni nya late lɩməri gwula no.

33gi gwune yuwana mamadan gwuwiḏi nate naṯunʼe gia i nunyu ŋɩmidie no, nyamɩni arno, ŋu gwəṯi ḏiŋeroma. 34ŋaɽe ŋeḏi liji ŋɩmila ŋaʼe naŋuyu, naṯanyamɩni arno, eʼe gwiji gwiro gəḏou na gwaṯɩyu ŋɩmidiə ŋutu, na gwaṯəmɩnyi liji lun laṯɩmeje ṯulba na lun lɩki. 35na ḏilɩŋeḏena ḏɩmədə ga nyaɽe nye nyuŋun wel.

gwa gwuwɩrṯi yecuŋ ŋwara ŋila ŋe; na ŋuɽun ŋun ŋɩlɩbo ŋeḏi liji lɩttən lun ləṯi gəmɩju

36na gwete gweḏi lɩbarɩsi uməḏɩjo nuarno gwalgweʼe; nuəḏi kwu dunu gweḏi gwubarɩsi gwajiga. 37na gwa gwijo kamɩrɩgen gwun gwɩki. na gwune nulɩŋe gwo kwu dunu gweḏi gwubarɩsi nuwila lɩbi le lun lɩkədinu gowe ge, ləṯi ŋila ŋiro ŋɩḏini. 38nuḏuḏɩni ga ŋwara ganu gi ḏuɽo ganu lugwun gwəri gwula, gwar gwawei ŋwara ŋwuŋun ŋwal ŋwe. naṯumuje nanu əɽu ye yuŋun, naṯuməṯo ŋwara ŋwuŋun, naṯuwɩrṯi ŋɩḏini ŋe. 39na gwune na gwubarɩsi aŋu dino gwun gwəmɩḏu, nuuməḏɩni kwulo gwuŋun nuarno, ḏa gwəmɩnyo kweno gwiro nebi gwaŋalɩŋe gwa gwiro gwira kweno gwun gwuḏɩmumu nanu, gi gwune gwiro ewiji gwɩki. 40na yecu wɩrlijo ŋuɽuna nueicɩno, simian, nyi gwəṯi ŋuɽuna ŋete ŋaŋaluməḏɩjo. nueicɩno, uməḏɩlo mualɩm gwi. 41gwiji gwijo gwete gwiḏəḏi liji lɩttən jɩnei gəmɩju ge. gwete gwəṯi gəmɩju jɩnei ḏuɽi ṯoḏɩne, na gwete jɩnei ṯoḏɩne. 42na gwune nate naləṯi jalwəɽɩjo no, nuldoije ga berene. eiciŋi no, əḏi gwiro lagin gwəmɩnyenu? 43na simian wɩrlijo ŋuɽuna nueicɩno, gwəṯi, nyi gwar ca no, gwun jimuldəḏijoga jutəno. nueicɩno, ŋa ŋɩmalakɩmi muma. 44nuwɩrli ganu kwa, nueico simianŋ no, ŋa gwaŋəḏi gwa kweno a? nyi gwəḏi kwu dunu gwuŋa, nate nuinḏəḏə ŋau ŋeḏi ŋwara ŋwi no; namɩni ŋu nuwei ŋwara ŋwi ŋwal ŋwe na nulmuje nanu əɽu ye yuŋun. 45namɩni ŋa gwate minyinmɩɽənyə no; namɩni gwa kweno gi gwune niəḏi gwate miouwɩrico ḏɩməṯo ḏe ŋwara ŋwinyi no. 46nate niŋinwɩrṯi lɽa ŋila ŋe no; namɩni ŋu ŋiwɩrṯi ŋila ŋe ŋun ŋiro ŋɩḏini ŋwara. 47na kalo geḏi ŋuɽun ŋeno, na nyi gwaŋeicɩno, ŋuɽun ŋuŋun ŋun ŋɩki ŋutu ŋɩmaganiḏuḏɩjo ganu, gi gwune gwəmɩnyu gworki. na ŋun ŋɩmaganiḏuḏɩjo ganu ŋɩti gwəmɩnyu ŋɩti dino. 48nueico gwa no, ŋuɽun ŋuŋa ŋun ŋɩki ŋɩmaganiḏuḏɩjo ganu. 49na lun lijillega gi ḏiṯa naluməḏəṯe laginŋu, nalarno, əḏi gwiro gwun gwaḏuḏe ganu ŋuɽun ŋun ŋɩki? 50nueico gwa no, ḏɩməṯo ḏuŋa ḏimaŋakədəga. wiḏi ḏouwɩɽiḏa ḏe.

Currently Selected:

luka 7: OTR1966

Highlight

Copy