maṯa 15

asa 15

yecu wɩrli ŋuɽuna ga ŋeḏi liji lun laṯuməḏəṯo gi liji elo lun lɩdonyo gɩmuri

mks. 7:1-23

1na lɩbarɩsi na jalgaṯɩm leḏi urucəlim nalwila di yecu, nalarno, 2gwudaro gəko na calɩmis juŋa naṯɩlki ŋuɽuna ŋeḏi liji lun luɽun gi gwune luŋa late laṯɩwone di dagin gi anaŋa gwune lar laʼe gia no? 3nulwɩrlijo ŋuɽuna nuleicɩno, nyaŋa dino, gwudaro gəko nanyaki ŋuɽuna geḏi elo gwan ŋuɽun ŋalo ŋun ŋuɽun? 4gi gwune elo gwigelo ŋuɽuna, nuarno, aṯanəji babaŋ gwuŋa na nanaŋ gwuŋa, na gwun gwaṯɩdene babaŋ i nanaŋ gwuŋun ouwirico nuai ḏaiya. 5namɩni nyaŋa nyalaṯarno, gwun ŋweico babaŋ i nanaŋ gwuŋun no, ŋɩdi wei ŋun ŋəṯilo ŋun ŋəṯi ŋɩma ŋajigelejo uwə ŋiro ŋɩdi ŋeḏi elo. 6gwate gwanəji babaŋ i nanaŋ gwuŋun no. na dino nyalaki ŋɩma ŋeḏi ŋuɽun ŋun ŋigelijɩlo elo musaŋ ŋuɽun ŋe ŋalo ŋun ŋuɽun. 7nyaŋa lun ləṯi ŋuɽuna ganu ŋɩttən, isaia gwuməḏi ŋuɽuna muma ŋan nyaŋa, nuarno,

8liji leno laṯiŋinəji ŋwinyu ŋwe,

naṯimɩni dugwor dagin du ganu uro kaja.

9namɩni laṯiŋiorṯeḏa jai,

naṯɩlalɩmiḏe ŋuɽuna ŋeḏi liji naṯɩlarno ḏalimia ḏeḏi elo ḏiro.

10nuəmɩḏe liji lun lutu nuleicɩno, diŋɩnɩl, nyalɩŋe. 11ŋɩdi ŋədu ŋun ŋaṯədi gi linyu leḏi gwiji ŋaṯɩduji ŋɩrleḏ no, namɩni ŋun ŋaṯɩduḏə gi linyu ŋiro ŋaṯɩduji gwiji ŋɩrleḏ. 12na calɩmis juŋun wila naleicɩno, ŋa gwate gwilɩŋidi lɩbarɩsi nalobɩlkejo gwune diŋɩnilo ŋuɽuna ŋeno na? 13nulwɩrlijo ŋuɽuna nuleicɩno, ḏigwuḏe wei ḏun ḏate ḏikwuḏi baba gweḏi kanyin no ŋəwələḏɩni ga. 14ouwɩricɩlo mino; luŋa lun lɩrimə gi jei nalro ləṯigwuloḏa liji lun lɩrimə ŋi jei. na ḏa gwun gwɩrimə gi jei mugwuloḏa gwun gwɩrimə gi jei, lideḏe berene gi libuɽul. 15na buṯrus wɩrlijo ŋuɽuna nueicɩno, aŋijije ŋuɽuna ŋeno ŋun ŋɩlɩbo. 16nal yecu eicɩno, nyaŋa dino nya lore late lilɩŋiḏanyalo na? 17nyaŋa lore late lilɩŋiḏi ŋɩdi wei ŋun ŋaṯəḏi gi linyu ŋele kare ganu ŋədu lugwun na? 18namɩni ŋɩdi ŋun ŋaṯɩduḏə gi linyu gila gi ḏugwor ganu na ŋiro ŋeno ŋaṯɩduji gwiji ŋɩrleḏ. 19namɩni gi ḏugwor ganu ḏaṯɩdio ḏuməḏɩno ḏun ḏɩki, na ḏijinyɩḏa ḏɩmar, na ŋeḏor na ḏuriḏa galo dino, na ŋuɽam, na ḏugiḏio, na ḏɩḏenɩḏia. 20ŋɩdi ŋeno ŋiro ŋun ŋaṯɩduji gwiji ŋɩrleḏ, namɩni ḏiṯa di de date duwono no, ḏate ḏaṯɩduji gwiji ŋɩrleḏ no.

ḏigela muma ḏeḏi ŋaɽe ŋeḏi liji lun liro ga dino

mks. 7:24-30

21na yecu walane kalo kono nuwele gi diɽil deḏi jɩmɩrɩgen jun jan sur na saida. 22na gwa gweḏi kanan duḏə gi diɽil ṯeno, nuarəjo gwula nueicɩno, inəḏi gwele, ŋaɽe ŋeḏi ḏauuḏ. ŋaɽe ŋinyi ŋun ŋiro gwa ŋo ŋɩḏo gworki ḏiŋerom ḏe. 23numɩni ate nuuməḏɩjo ŋuɽuna ŋəḏi no. na calɩmis juŋun wila nalbunyi naleicɩno, kuwəḏi gi gwune gwarəjije gwula gi lɩbuɽi. 24nuwɩrlɩjo ŋuɽuna nueicɩno, nyi gwuwəjɩnu gi joŋol jun jɩḏuḏo jeḏi dunu gweḏi isreiyil kuwei. 25namɩni nuwila nuiḏi gi jei ganu lugwun, nueicɩno, gwele gwi, gelejɩnyi uwə. 26nuwɩrlijo ŋuɽuna nueicɩno, ŋate ŋiŋir gwiji gwaɽe gia geḏi nyaɽe nugiwinɩjo nyino no. 27na gwa eicɩno, i gwele gwi namɩni nyin nyanoṯene gwəḏibura gi jɩŋaḏ gwun gwaṯɩbɩjeṯeḏe ga gi ṯarabesa elo ḏeḏi liji luŋun. 28na ŋiro dino na yecu wɩrlɩjo ŋuɽuna nueicɩno, gwa, ga gwəṯi ḏɩməṯo ḏutu gworki; ŋaro lugwuŋa ŋun ŋɩbunyalo. na ŋaɽe ŋuŋun gelɩni muma gi sa ceno.

liji lutu lɩmiŋir nanu

mks. 7:31-37

29na yecu walane kalo kono nuwele kɩməmu ge ḏɩrawe ḏeḏi jalil; nuabo gi lɩrgwom elo nujiga ŋɩnəwei. 30na liji lutu wila lugwun nalapijo lun liro jɩbɩjo, na lun lɩrimə gi jei, na lun late laṯumə no, na ŋwuḏan, na lun liro kaja lutu, nalɩgele ga ŋwara ganu ŋweḏi yecu nulgele muma; 31kəbe na liji obaga ṯuṯ gwune nalaŋu liji lun late laṯumə no nalumə, na lun liro ŋwuḏan nalro muma, na jɩbɩjo nalwewele, na lun lɩrimə gi jei naldaŋa ga, nalbuḏi eloŋu gweḏi isreiyil.

ḏia liji lun liro alɩb kwoɽo

mks. 8:1-10

32na yecu əmɩḏa calɩmis juŋun nuleicɩno, nyi gwino liji lutu lono, gi gwune lɩmanalɩje ŋwamon ṯəɽɩl late ləṯi ŋɩdio ŋe ḏiṯa no. na nyi gwate gwəmɩnyu lilkuwa jaŋu no, gi gwune gwəṯi, lele ləḏɩmiḏɩnəne gi ṯaṯ. 33na calɩmis juŋun eicɩno, nigwogwe ŋɩne kiḏɩwer iləṯi gia gutu kani a liji leno lutu e wei alpe? 34nal yecu eicɩno, nyaləṯi gia umɩnyo? naleicɩno, kwoɽoṯəɽɩl na gwumi ŋwɩti. 35nuuməḏɩjo liji alijiga kwɩnyəm. 36nuape gia kwoɽoṯəɽɩl na gwumi nueico eloŋu sukran, nubɩleṯɩnya ganu nuḏəḏə calɩmis juŋun na calɩmis ḏəḏə liji. 37na liji eʼe wei nalpe, nalwəɽeice ŋɩdio ldu ŋun ŋiṯɩlɩne ganu nalenyeje jɩḏi kwoɽoṯəɽɩl. 38na lun liṯi liro alɩb kwoɽo lun liro ləmɩnyo na laṯe lɩmanḏuɽə la na nyaɽe no. 39gwune nukuwa liji nuəḏi kwu murkab ganu nuwila gi diɽil deḏi majdala.

Currently Selected:

maṯa 15: OTR1966

Highlight

Copy