markus 1

asa 1

yuwana mamadan na ŋuɽun ŋuŋun

mṯ. 3:1-12, lk. 3:1-17

1ŋuɽun ŋun ŋiro uro gwerre ŋeḏi ŋuɽun ŋiŋir ŋeḏi yecu kɩrisṯo, gwun gwiro ŋaɽe ŋeḏi elo, 2ŋiro gi gwune ŋulinu kɩḏam ŋun ŋarɩŋe isaia gwun gwiro nebi,

eʼe, nyi gwo gwuwəjo ḏuwəjo ḏinyi ḏaḏara ḏila lugwuŋa,

ḏaŋagelijo ṯaṯ ḏuŋa kɩɽelo muma;

3ŋwal ŋweḏi gwiji gwete gwun gwaṯəmɩde galo uro kiḏɩwer,

nuarno,

ṯuḏɩnil ṯaṯ galo ḏeḏi gwele gwun gwiro elo,

nyaṯudɩni daṯ duŋun muma.

4yuwana gwiro gwun gwaṯɩbabṯaijiḏi kiḏɩwer, naṯuuməḏɩjo liji ḏibabṯaijɩno ḏe alwɩrla ga nal elo əbɩri ŋuɽun ganu ŋagin ŋun ŋɩki. 5na liji wei leḏi jɩmɩrɩgen jun jan yauḏia na urucəlim naltuḏa nalwila lugwun, nalteije ŋuɽuna galo ŋagin ŋun ŋɩki, nal yuwana babṯaije luŋa wei gi ḏɩrawe ḏun ḏan urdun. 6na yuwana gwaṯɩkani giria ŋun ŋiro jola jeḏi gamɩla, na gwaṯɩkani ŋɩma gi lɩbuɽi, na gwaṯeʼe jama na laiya leḏi geḏo. 7nuuməḏɩjo liji nuleicɩno, gwete gwaje gwila gwun gwəṯəno ŋɩma lugwi; nyi gwate gwɩdeleḏo gwiculɩjo galo gwikədə ŋɩma geḏi giwɩḏe guŋun no. 8gwerkwe nyi gwajibabṯaije ŋau ŋe, namɩni ŋu gwajibabṯaije gwuɽɩwə gwe gwun gwɩpiḏo pɽul.

ḏibabṯaijɩno ḏeḏi yecu

mṯ. 3:13-17, lk. 3:21-22

9ŋwamon ŋwono na yecu walane nasɩra kamɩrɩgen yeḏi jalil, nuwele ḏi yuwana na yuwana babṯaije gi ḏɩrawe ḏun ḏan urdun. 10gwune nudiɽeḏelo ŋau ganu nuaŋu kanyinŋ miḏini na gwuɽɩwə gwun gwɩpiḏo pɽul gwulə lugwun gwiro gi gɩɽiḏir. 11na ŋwal gwulə kanyin nalarno, ŋa gwiro ŋaɽe ŋinyi ŋun ŋaṯiəmɩnyi, ŋa gwaṯɩnyiŋiri ḏugwore.

ḏɩḏeijo ḏeḏi yecu

mṯ. 4:1-11, lk. 4:1-13

12na kaja kono na gwuɽɩwə gwun gwɩpiḏo pɽul nugwuloḏa kiḏɩwer; 13na gwune ju ŋɩne kiḏɩwer ŋwamon ḏuɽi kwoɽo naṯi seiṯan iḏeije, naṯilije lɩḏe le geḏo, na liji leḏi kanyin əpijo ŋɩru.

yecu madiɽo ŋɩru ŋuŋun

mṯ. 4:17, lk. 4:14-15

14gwune na liji ŋele yuwanaŋ kɩrkon, na yecu wila jalil naṯuuməḏɩjo liji ŋuɽuna ŋiŋir ŋeḏi elo. 15nuleicɩno, gaja ŋɩmaro wei na ŋele ŋeḏi elo ŋo gɩṯo. wɩrlal galo ŋuɽun ŋalo ŋun ŋɩki nyəmɩnyi ŋuɽuna ŋiŋir ŋeḏi elo.

calɩmis jun jeḏi gwerre jəmɩḏɩnu

mṯ. 4:18-22, lk. 5:1-11

16gwune nuwele kɩməmu geḏi ḏɩrawe ḏun ḏan jalil, nuaŋu simianŋ na megin gwun gwan anḏarawus ligelo car jeḏi ŋwumi ŋau ganu, na ŋɩru ŋagin ŋiro ŋe ḏuma ŋwumi. 17nal yecu uməḏɩjo nuleicɩno, wilal nyilgwujane, namɩni nyi gwajiduji liji lun laṯumə liji. 18nalwalane gi car jagin nalgwujane. 19gwune nudɩka mɩce, nuaŋu yagubŋ gwun gwiro ŋaɽe ŋeḏi jebəḏi na megin gwun gwan yuwana lun lijo kwu murkab ganu dino lukɩɽo car jagin jeḏi ŋwumi. 20nuləmɩḏe; nalwalane ḏi baba gwagin gwun gwan jebəḏi kwu murkab ganu jaḏam je, nalgwujane.

yecu gwudi ḏiŋeroma kwiji ganu kabranaum

lk. 4:31-37

21nalwele kabranaum, na gi lamon le sabiṯ nuəḏi kwu ḏunu gweḏi elo nualɩmi liji. 22na liji obaga ṯuṯ gi ḏalɩmia ḏuŋun nulalɩmi gwiro gi gwune gwiji gwun gwəṯi ŋelɩnya, gwate gwiro gi jalgaṯɩm no. 23na gwiji gwete je kwu dunu gweḏi elo gwagin gwun gwəṯi ḏiŋeroma, nuərəjo gwula, 24nueicɩno, ŋa gwar anada yecu gweḏi nasɩra? ŋa gwuwiḏi ŋa gwijiɽinye a? nyi gwilɩŋiḏaŋa, ŋa gwiro gwun gwɩpiḏo pɽul gweḏi elo. 25na yecu lo, nueicɩno, ji nyɩkwom, ŋətu lugwun. 26na ḏiŋerom məṯo gwiji ki nuəri gwula gwubuḏo, nutu. 27na luŋa wei nalobaga ṯuṯ, naluməḏəṯə laginŋu nalarno, gwudaro gwuwei? ŋuɽun ŋiya ŋɩrṯa ŋiro ŋeno? gi gwune uməḏɩju ḏiŋeroma ŋele ŋe naləṯeijo nani. 28na ŋuɽun wɩreḏelo coucou ŋan ŋu kalo wei gun guɽeico jalilŋ galo.

yecu gwugelo gwunən gweḏi buṯrus gwun gwiro gwa muma na liji lutu

mṯ. 8:4-17, lk. 4:38-41

29nalwalane kwu dunu gweḏi elo naləḏi yagubŋa yuwanaŋa kwu dunu gweḏi simianŋa anḏarawus gwe. 30namɩni gwunən gweḏi simian gwun gwiro gwa gweḏeḏo nanu aŋɩnu yuŋun yɩbuḏu nanu, na luŋa naluməḏɩjo yecuŋ. 31nuwele lugwun numəṯo gi ḏi, nudiɽi. na ŋɩɽainy ete cou, nuləpijo ŋɩru.

32gwune na anyin gwuli, na galo ro nyinyabir, nal liji gwuluḏɩjo wei lun leḏeḏo nanu na lun ləṯi ḏiŋeroma, 33na liji wei leḏi amɩrɩgen nalaɽuwaḏe ldu kouwɩr. 34nulgele muma lutu lun liṯɩlo ŋɩɽainy ŋiro kajakaja, nuti ḏiŋeroma dutu; naṯuouwɩrico ḏiŋeroma dumə no, gi gwune gwilɩŋiḏɩlo.

yecu gwuwiḏi gi ḏuməḏɩjo eloŋu, nuouwɩrico kabranaum

lk. 4:42-44

35na giləganu nudiɽi nudu mimmi gilio gwerre galo gaṯe gimuɽe no, nuwele kiḏɩwer gwetɩdo nuuməḏɩjo eloŋu. 36na simian na liji lun laṯɩligwuḏiḏe, nalgwujane, 37na gwune nalbuje naluməḏɩjo naleicɩno, liji wei lo lɩbunyaŋa. 38nuluməḏɩjo nuleicɩno, ilwele gi jɩmɩrɩgen jun jijo gɩṯogɩṯo nyiuməḏɩjo liji ŋɩnəwei dino; nyi gwuweləḏi ŋuɽun ŋeno. 39nuwele gi lɩdunu wei lagin leḏi elo jalil nuuməḏɩjo liji nuti ḏiŋeroma.

ḏiŋiriḏa nanu ḏeḏi gwiji gwnn gwiṯi ŋilo

mṯ. 8:1-4, lk. 5:12-16

40na gwiji wila lugwun gwun gwiṯi ŋilo nuɽoṯədɩjo gworki nuculɩjo galo ŋwurko ŋwe nueicɩno, ḏa ŋa məmɩnyi ŋa məṯi ŋɩma ŋiiŋiri nanu. 41na yecu ino nukuwa ḏi nuḏɩmumi nanu nuuməḏɩjo nueicɩno, nyi gwəmɩnyu; iŋiriḏi nanu. 42gwune na yecu uma dino na ŋilo abɩre lugwun nuiŋir nanu. 43na yecu uməḏɩjo ŋuɽuna ŋɩbɩɽe nukuwa cou, 44nueicɩno, aṯaŋuməḏɩjo gwiji gwetɩdo no; ŋamɩni wele ŋaŋijo gɩsisŋ aŋɩna yuŋa, ŋəḏəḏə eloŋu ŋɩdio ŋun ŋaŋijaŋalo musa ani liji aŋu. 45numɩni tu, naṯuuməḏɩjo liji luṯu nuureiji ŋuɽuna elo ŋeno kalo wei, na yecu gwate gwəṯi ŋɩma gwele kamɩrɩgen gwanaŋino no, nuje kaja kiḏɩwer, na liji wila lugwun kalo wei.

Currently Selected:

markus 1: OTR1966

Highlight

Copy