markus 13

asa 13

yecu gwuməḏi ŋuɽuna ŋan ḏɩkeḏa ḏeḏi dunu gweḏi elo na gaja gun giṯɩmige gɩḏilio, gwerre ganu ŋate ŋɩmila no

mṯ. 24:1-31, lk. 21:5-28

1gwune nuar gwədu kwu dunu gweḏi elo gwun gwubuḏo na ṯalɩmis ḏuŋun ḏete eicɩno, mualɩm gwəri, aŋəḏi nyɩdolia nyun nyibuḏo na lɩdunu lun lɩbuḏo. 2na yecu wɩrlijo ŋuɽuna nueicɩno, ŋa gwaŋəḏi lɩduno leno lɩbuḏo a? gɩdol ŋate ganje kworo elo ŋun ŋate gake no.

3gwune jilo gi lɩrgwom elo lun lan seitun naldeŋi duno ganu gweḏi elo gwun gwubuḏo, na buṯrusŋa yagub gwe na yuwanaŋa anḏarawus gwe naluməḏɩjo nyɩkwom naleicɩno, 4uməḏijije ŋuɽuna ŋeno ŋar ŋaje jaḏo. ŋuɽun ŋɩrṯa ŋar ŋaje ŋəŋino ŋun ŋijaŋijo gworo kwe wei? 5nal yecu wɩrlijo ŋuɽuna nuleicɩno, jil muma gwo gwanyanouwɩrico gwetɩdo gwajinḏuji. 6gi gwune lila lutu jiri je jinyi larno, nyi gwiro ŋu, nalaliḏuji lutu. 7na ḏa nyalmadiŋɩni dɩrra de na ŋuɽun ŋeḏi dɩrra, aṯaji dugwor piḏo ganu no. arram ŋɩdi ŋeno ŋaŋini, namɩni ŋeḏi gɩdo ŋore. 8gi gwune liji leḏi amɩrɩgen yete lədiɽo kworo gweḏi amɩrɩgen ŋiro kaja, na ŋele ŋədiɽo ŋele; na jaŋu jaje, na gwɩnyəm gwubəga kalo ŋiro kajakaja. na ŋuɽun ŋeno wei ŋiro ŋun ŋidaro ŋəṯi gwuɽedɩnya.

9jil muma gi lulo lalo. gi gwune laje lajigwuloḏa kəcərio yun yɩbuḏo yeḏi liju nalajipi gi lɩdunu leḏi elo, nyalaḏuḏɩni gi jei ganu jeḏi lɩmudir na jeḏi lele gwan nyi na ḏɩteijo ga lagin, na kɩlɩgi ganu liji leḏi jɩmɩrɩgen wei. 10namɩni ŋuɽun ŋun ŋiŋir ŋeḏi elo arram ŋuməḏɩni gwerre. 11na ḏa lɩmajigwuloḏa kəcərio lɩmajiḏəḏə, aṯanyuməḏɩno gi dugwor ganu ŋuɽuna ŋun ŋanyaliluməḏɩjo no, nyalmɩni uməḏɩjo ŋun ŋwajilḏəḏə gi sa cono, nya lədu liro lar lumə no, namɩni gwuɽɩwə gwun gwɩpiḏo pɽul gwiro. 12na megin ḏəḏə megin ḏaiya, na baba ḏəḏə ŋaɽe ḏaiya, na nyaɽe diɽo nalkiḏiḏi babaŋale, nanaŋale nallɩɽinye. 13nyaladonyini liji le wei gwan jiri jinyi; na gwun gwaḏuḏɩnɩjo gɩdoŋ gwəkədəḏɩni ga.

14na ḏa nyalmaŋu gwaŋe gwun gwaṯiki duno gweḏi elo gwun gwubuḏo gwuḏuḏɩnu kalo gun gitumuḏu, ouwɩrico gwun gwəgiri nudiŋɩni, ouwɩricɩlo lun lijo yauḏia alabɩre ŋwurgwom; 15na gwun gwijo kwu dunu elo gwate gwagwuləḏa ga, i gwanəḏi gwanapa ŋɩdio ŋədi gidəno no; 16na gwun gwijo gi ḏɩri ganu gwate gwanaɽuwa gwanapa giria guŋun no. 17na ŋɩki lagin lun lɩgwuli na lun liji nyaɽe ŋan kaja gəwei. 18na uməḏɩjil eloŋu kani nyate nyabɩre ḏoɽom ḏe no. 19na kaja kono ḏɩḏia ḏaje ḏate ḏɩmanɩɽe ḏiro dino uro kaja gun gigelɩŋe elo gɩḏilio kəbe gwunnɩno, na ḏate ḏaje minu no. 20na ḏa gwele gwun gwiro elo gwate mouɽo ŋwamon ganu ŋəwei no, gwiji gwate gwetɩdo gwankədəḏɩni ga no, namɩni lɩnulwəɽəḏɩjo ŋwamon ganu gwan luŋa lun lɩməṯɩnu. 21na kaja kono ḏa gwete majeicɩno, eʼe kɩrisṯoŋ gwo ŋɩne, i eʼe ŋu gwo ŋɩnəwei, gwo gwanyanidəḏɩjo. 22laje ləḏiɽo lun liro lɩwɩɽɩgal lun larno lan kɩrisṯo, na nebɩŋa lun liro lɩwɩɽɩgal, nalaŋiḏi ḏəŋinio na ŋɩdi ŋun ŋɩmobeje liji ga ṯuṯ nalḏuji liji lun lɩməṯɩnu leḏi elo na ḏa ŋɩmandro. 23nyamɩni ji muma nyaŋa; nyi gwuməḏɩjaje ŋuɽuna wei gwerre ŋate ŋɩmila no.

24na ŋwamon ŋwono na ḏa ḏɩḏia ṯeno ḏɩmete, na anyin yerimi ganu na uwə ate nuoɽa ga no, 25na ŋwudum beɽeṯeḏa ga kanyin, na ŋɩma ŋeḏi kanyin ubəga. 26na kaja keno laŋu ŋaɽe ŋeḏi liji gi ḏaɽuwa gi jəbɩɽu ŋɩma ŋe ŋun ŋɩbuḏo na ḏoɽeḏa ḏe. 27na ŋu gwouwəjo liji luŋun leḏi kanyin nalwəɽeice liji luŋun ldu lun lɩməṯɩnu gala ganu kwoɽo geḏi ḏɩron na gi ḏiɽil ḏeḏi gɩḏilio uro gi ḏiɽil ḏeḏi kanyin.

arram liji ləṯigirini

mṯ. 24:32-36,42, lk. 21:29-33

28na gwune lɩŋiḏɩl ŋuɽuna ŋun ŋɩlɩbo ŋeḏi gwuwɩḏa. gwune na dɩrna ar daneḏa naligiliḏo nyalalɩŋe nyalarno ŋwuram ŋwo gɩṯo. 29na dino gwune ḏa nyalmaŋu ŋɩdio ŋeno ŋɩmila dino, lɩŋiḏɩl ŋu gwo gɩṯo kouwɩr. 30gwerkwe ganu nyi gweiceijɩno, liji leḏi gwunne late lanete no kəbe ŋuɽun ŋeno ŋila wei. 31kanyin na gɩḏilio lete namɩni ŋuɽun ŋinyi ŋate ŋete no. 32namɩni gwan lamon lono na sa cono gwiji gwatɩn gwetɩḏo gwun gwilɩŋiḏi no, i liji leḏi kanyin, i ŋaɽe, namɩni baba.

33jil muma, nyagirini nyuməḏɩjo eloŋu, gi gwune nya late lilɩŋiḏi lamon laro jado no. 34liro gi gwune gwiji gwun mawalane kwu dunu gwuŋun nuwele kalo gwola ganu nuḏəḏə lɩwainya luŋun ŋelɩnya, nulḏəḏə ŋɩru ŋuŋun gwete gwete, nuuməḏɩjo gwiji gweḏi dɩmeḏa ouwɩr nugirini. 35na ŋiro dino dɩmenɩl ga, gi gwune nya late lilɩŋiḏi gwiji gweḏi dunu gwaɽuwa garage, i gɩlɩgina ganu, i mimmi gilio nune aṯi ŋwugwugiɽe əri gwula, i giləganu no, 36gwəṯi wɽi ŋwila girimu gwajilbuje ŋwar 37ŋun ŋeiceijiŋe nyaŋa no, na ŋeicɩlɩŋe wei no, dɩmenɩl ga.

Currently Selected:

markus 13: OTR1966

Highlight

Copy