markus 15

asa 15

yecu gwuḏuḏmu gi jei ganu jeḏi bilaṯus gwun gwiro mudir gwiro gwiji gweḏi rumiya

mṯ. 27:1-2,11-26, lk. 23:1-5,13-25, ywn. 18:26—19:16

1giləganu mimmi gilio na jɩsis jun jɩbuḏo na liji lun luɽun na jalgaṯɩm na liji wei leḏi əcərio yun yɩbuḏo yeḏi liju, naluməḏəṯe, nalgaki yecuŋ nalgwuloḏa nalḏəḏə bilaṯusŋ. 2na bilaṯus ɽoṯəḏɩjo nueicɩno, ŋa gwiro gwele gweḏi liju a? nuwɩrlijo ŋuɽuna nueicɩno, ŋa gwame. 3na jɩsis jun jɩbuḏo cɩgi ŋuɽun ŋe ŋutu, numɩni jiga nyɩkwom. 4na bilaṯus ɽoṯəḏɩjo mɩna nueicɩno, ŋa gwate gwəṯi ŋuɽuna ŋeḏi ḏuməḏo na? eʼe licɩgiaŋa ŋuɽun ŋe ŋutu. 5naṯɩmɩni yecu uməḏo no, na bilaṯus obaga ṯuṯ.

6na kɩmuri naṯi bilaṯus kədə lɩbabunya ga letɩdo lun laṯɩlbunyi. 7na lete je kɩrkon lun lan barabas, lijil liji le lun lɩwɩrlano ganu lun lɩɽinyɩḏo ḏɩmar 8na liji ərəjo bilaṯusŋ gwula nalarno gwaɽe ŋuɽuna ŋun ŋaṯulape bubruṯ. 9nalmɩni bilaṯus wɩrlijo ŋuɽuna nuleicɩno, nyalarno nyi gwajikədəḏɩjo gwelɩnya ga gweḏi liju a? 10gi gwune gwilɩŋiḏi nuarno jɩsis jun jɩbuḏo gwiḏəḏɩlo nalɩkijo yecuŋ dugwore. 11namɩni jɩsis jun jɩbuḏo nalḏiɽo liji nanu kani ŋwilkədəḏɩjo barabasŋ ga. 12nal bilaṯus uməḏɩjo mɩna nuleicɩno, nyalar nyi gwəpijo gwiji kweno aŋe gwun gwaṯanyeico gwele gweḏi liju? 13naləri gwula mɩna nalarno, ɽinyɩḏɩl gi luɽi lun lɩmalɩḏo ganu. 14nal bilaṯus uməḏɩjo nuleicɩno, gwarra? gwapaŋe gwɩki? naləriene gwula mɩna nalarno, ɽinyɩḏɩl gi luɽi lun lɩmalɩḏo ganu. 15na bilaṯus ar gwiŋiri liji dugwore, nulkədəḏɩjo barabasŋ ga, na gwune nupi yecuŋ nulḏəḏə gwalɽinye gi luɽi lun lɩmalɩḏo ganu.

ajana aki yecuŋ jumo

mṯ. 27:27-31, ywn. 19:2-3

16na ajana gwulo gi ḏɩgara ganu ḏeḏi mudir naləmɩḏaṯe ajana wei. 17nalgaki giria gun gure gumɩno ganu, na gwune nalɽenyo jugi gi laḏe nalgaki gi lɽa elo. 18nalmɩɽənyo naleicɩno, ŋa gwiŋir ŋa gwele gweḏi liju a? 19nalpi kɩɽelo iṯa ye, nalgwoginya nanu, nalculɩjo ŋwurko ŋwe lugwun. 20na gwune akɩl jumo nalwala giria gun gure gumɩno ganu, nalgaki jiria juŋun, nalgwuloḏa gwalɽɩnye gi luɽi lun lɩmalɩḏo ganu.

ḏiyinyɩḏa ḏeḏi yecu gi luɽi lun lɩmalɩḏo ganu

mṯ. 27:32-44, lk. 23:26-43, ywn. 19:17-27

21na gwiji gwete gwan simian gweḏi amɩrɩgen yun yan gerawan gwun gwiro baba gweḏi iskandaraŋa rupus gwe, nuwila geḏo nalobeḏe ṯaṯ ganu nalremeṯeḏeice gi dapa luɽi lun lɩmalido ganu. 22nalgwuloḏa kalo gun gan juljuṯa, jun jarno, galo geḏi gwunə, 23nalici ŋau geḏi jaɽe jun jiro gi ḏuɽuuṯ ŋuɽuḏɩlo ganu mur gwe, nalarno ŋulyu nulmɩni donye. 24nalɽinye gi luɽi lun lɩmalɩḏo ganu, nalgəginyeḏe jiria juŋun ganu naljɩmɩri gwumara. 25na sa jiro ṯoḏɩnekwoɽo giləganu, gwune ɽinyɩḏɩlo gi luɽi lun lɩmalɩdo ganu. 26na gi luɽi elo lun lijo elgwogwo ŋuɽun ŋulinu ŋun ŋicɩgilɩŋe lugwun ŋarno, gwele gweḏi liju. 27nalɽinye luɽama lɩttən yecuŋale ŋwuɽi ŋwun ŋwɩmalɩḏo ganu, gwete gi ḏi ḏuŋun ḏun ḏiro ḏɩŋir, na gwete gi ḏi ḏuŋun ḏun ḏiro ḏouwɩr, 28na ŋuɽun ŋeḏi gɩḏam geḏi elo ṯɩmi ŋun ŋarno, ḏuɽəḏɩlo lijiŋale lun lɩki.

29na liji lun laṯɩdara galo gwaṯɩlḏene naṯɩlirəri ŋwuɽa. galo ŋwagin, naleicɩno, ŋwole gwun gwarno gwaki duno gweḏi elo gwun gwubuḏo numɩni arno gwowuṯe ŋwamon ṯəɽɩl, 30kədəḏi gwula gwuŋa ga ŋagwuləḏə ga gi luɽi lun lɩmalɩdo ganu. 31na dino naṯɩl jɩsis jun jɩbulḏo nalaki jumo jalgaṯɩmŋale. na gwune naluməḏəṯe nalarno, gwaṯɩkədə liji liro kaja ga; namɩni gwate gwəṯi ŋɩma gwakədəḏə gwula gwuŋun ga no. 32ouwɩricil kɩrisṯoŋ gwun gwiro gwele gweḏi isreiyil nugwuləḏə ga gwunne gi luɽi lun lɩmalɩḏo ganu, kəbe anaŋu anəmɩnyi. na liji lun lijille ŋwuɽi ŋwun ŋwɩmalɩḏo ganu nalaki jumo dino.

ḏaiya ḏeḏi yecu

mṯ. 27:45-56, lk. 23:44-49, ywn. 19:28-30

33na uro anyino ganu na gɩḏilio rimi ganu wei kəbe na sa ro ṯəɽɩl. 34gwune na sa ro ṯəɽɩl na yecu əri gwula ŋwal ŋwɩbuḏo nuarno, eloi, eloi, lama sabakṯani? ŋuɽun ŋeno ŋarno elo gwi, elo gwi, gwudaro gəko nuŋinwalane? 35na liji kworo lun lɩḏuḏɩnu ga gwune naldiŋɩni nalarno, diŋɩnɩl, ŋu gwo gwəmɩḏo iliyaŋ. 36na gwiji gwete eneḏe nuenyeje ŋau ŋun ŋan kal gi sawinja ganu jun jɩməṯi ŋau, nuəḏɩje kiṯa, nuabuje elo, nuici dino, nuarno, ilaŋu na ḏa iliya mara mila gwugwuləjo ga. 37na yecu əri gwula ŋwal ŋwɩbuḏo nukuwa gwuɽɩwə gwuŋun. 38na giria geḏi dunu gweḏi elo gwun gwubuḏo ṯɩrṯəḏɩni ganu gi ḏiɽil ḏeḏi elgwogwo ke nuobeḏe kalo gi ḏiɽil ḏun ḏijo gelio. 39na gwune na gwele gweḏi ajana yun yiro ḏuɽi di aŋu ḏaiya dino gwun gwuḏuḏɩnu ga, nuarno gwerkwe ganu, kweno gwiro ŋaɽe ŋeḏi elo. 40na la kworo ŋalaḏe dino uro ŋɩnəwei, gwete gwan mariam majdaliya, na gwete gwan mariam gwun gwiro nana gweḏi yagubŋa gwun gwɩtieno na yusi, na saluma, 41lun gwaṯɩlgwujane naləpijo ŋɩru ḏa maje jalil; na la liro kaja lutu lun lɩgwuḏiḏɩle nalwele urucəlim.

ḏɩkwura ḏeḏi yecu

mṯ. 27:57-61, lk. 23:50-56, ywn. 19:38-42

42gwune na galo ro garage, na lamon liro le ḏigela ŋɩdio muma gwerre gi lamon le sabiṯ, 43na yusib wila gweḏi amɩrɩgen yun yan rama, gwun gwiŋir gweḏi əcərio yeḏi liju, gwun gwaṯɩḏuḏunɩjo ŋelɩnya ŋeḏi elo, nuwele ḏibɩɽeḏa ḏe nanu nuɽoṯəḏɩjo bilaṯusŋ aŋɩnu ye yeḏi yecu. 44na bilaṯus obaga ṯuṯ gi gwune nudiŋɩni larno gwumai, nuəmɩḏe gwelɩnya gweḏi ajana yun yiro ḏuɽi di nuɽoṯəḏɩjo yecu gwe ḏa mai. 45na gwune nudiŋɩni gwele gweḏi ajana yun yiro ḏuɽi di arno ŋuɽun ŋiro gwerkwe, nuḏəḏə yusibŋ aŋɩna yeḏi yecu. 46gwune na yusib eḏɩla giria gun gimɩde ganu mɩdeḏ, nugwuləjo yecuŋ ga numɩɽi nanu giria ge, nuḏɩri kil gwun gikwurinu kɩmu ganu, nuḏeḏiɽio gɩḏolia ga kouwɩr yeḏi gil. 47na mariam majdaliya na mariam gwun gwiro nana gweḏi yusi nalaŋu gala gun gɩḏɩrune.

Currently Selected:

markus 15: OTR1966

Highlight

Copy