markus 7

asa 7

yecu wɩrli ŋuɽuna ga ŋeḏi liji lun laṯuməḏoṯo gi liji elo lun lɩdonyo gɩmuri

mṯ. 15:1-20

1na lɩbarɩsi nalaɽuwaḏa ldu lugwun na jalgaṯɩm kworo jun jɩwiḏi urucəlim; 2nalaŋu calɩmis juŋun kworo jiṯi gia di de ḏumɩno daṯe duwonɩlo gi luŋa no. 3gi gwune lɩbarɩsi na liju wei late laṯeʼe gwerre late lɩmawone di dagin muma no, na lore lɩməṯəḏi ŋuɽuna ŋeḏi liji lun luɽun. 4na ḏa lɩmila gi cu late leʼe ḏa late lɩmawone no. ləṯi ŋuɽuna ŋiro kaja ŋutu ŋeḏi liji lagin ŋun ŋɩməṯəḏɩlo, ŋiro gi gwune ḏuweia doɽena deḏi ŋau, na niḏi na niḏi nun niro jaba na jaɽagar. 5na lɩbarɩsi na jalgaṯɩm nalɽoṯəḏɩjo naleicɩno, gwudaro na calɩmis juŋa nalde jagwuje ŋuɽuna ŋeḏi liji lun luɽun nalmɩni e di de dumɩno? 6nulwɩrlijo ŋuɽuna nuleicɩno, isaia gwaŋiḏi ŋuɽuna muma gwan nyaŋa lun ləṯi ŋuɽuna ganu ŋɩttən nuarno,

liji leno ləṯiŋinəji ŋwinyu ŋwe,

naṯɩmɩni dugwor dagin du ganu uro kaja.

7namɩni ləṯiŋiorṯeḏa jai,

naṯɩlalɩmiḏe ŋuɽuna ŋeḏi liji naṯɩlarno ḏalɩmia ḏeḏi elo ḏiro.

8nanyamɩni ouwɩrico ŋuɽuna ŋeḏi elo, nanyamɩni məṯo ŋuɽuna ŋeḏi liji. 9nuleicɩno, gwerkwe nyaldonyo ŋuɽuna ŋeḏi elo nanyamɩni dɩme ŋuɽuna ŋeḏi liji lalo lun luɽun. 10na musa arno, aṯanəji babaŋ gwuŋa na nanaŋ gwuŋa, na gwun gwaṯɩḏene babaŋ i nanaŋ gwuŋun ouwɩrico nuai ḏaiya. 11namɩni nyaŋa nyalaṯarno, ḏa gwete meico babaŋ gwuŋun i nanaŋ gwuŋun no, ŋɩdi wei ŋun ŋəṯilo ŋun ŋəṯi ŋɩma ŋajigelejo uwə ŋiro kurban ŋun ŋiro ŋɩdi ŋeḏi elo, 12nate nyamɩni ouwɩrico ŋu ŋunḏəḏə babaŋ gwuŋun i nanaŋ gwuŋun ŋɩdio no. 13nyalaki ŋɩma ŋeḏi ŋurun ŋeḏi elo ŋuɽun ŋe ŋeḏi liji lalo lun luɽun ŋun ŋɩmanyalḏəḏə nyaɽe nyalo; naṯanyarre ŋuɽuna ŋutu ŋiro gi gworo kwe.

14gwune nuəmɩḏe liji wei nuleicɩno, diŋɩnɩl nyaŋa wei nyaliŋe. 15ŋɩdi ŋate ŋede ŋiro kaja ŋəḏi kwiji ganu gwalduji ŋɩrleḏ no; namɩni ŋɩdi ŋun ŋaṯɩduḏo kwiji ganu ŋiro ŋun ŋaṯɩduji ŋɩrleḏ. 16na ḏa gwiji gwuməṯi nəni neḏi diŋɩna, ŋwudiŋɩni. 17na gwune nuəḏi kwu dunu nuwalane gi liji kɩluḏo na calɩmis juŋun ɽoṯəḏɩjo ŋuɽun ŋe ŋun ŋɩlɩbo. 18nuleicɩno, nyaŋa dino nya late lidiŋɩnu na? nya late lilɩŋiḏi ŋun ŋaṯəḏi kwiji ganu ŋun ŋiro kaja ŋate ŋaṯɩḏuji ŋɩrleḏ no, 19ŋi gwune ŋate ŋaṯəḏi gi dugwor ganu no, ŋaṯəḏi kare ganu naltu lugwun? na ŋuɽun ŋeno nalwei ŋɩdio wei ŋe ḏiṯa. 20nuarno, ŋun ŋaṯɩduḏo kwiji ganu ŋiro ŋun ŋaṯɩduji ŋɩrleḏ. 21namɩni gi dugwor ganu deḏi liji ḏaṯɩdio ḏuməḏɩno ḏun ḏɩki, na ḏurɩḏa galo dino, 22na ŋuɽam, na ḏiɽɩnyɩḏa ḏimar, na ŋeḏor na ḏutiḏa jei ganu, na ŋuɽun ŋun ŋɩki, na ḏirdəḏeico, na ḏidonyɩḏa ḏɩməṯo jiŋɩno, na ḏɩkiḏiḏia gi jei, na ḏɩḏenɩḏia, na ḏɩbuḏia gwula, na ŋɩɽilo; 23ŋuɽun ŋeno wei ŋun ŋɩki ŋaṯɩduḏo gidəno ŋaṯɩduji gwiji ŋɩrleḏ.

ḏigela muma ḏeḏi ŋaɽe ŋeḏi liji lun liro ga dino

mṯ. 15:21-28

24nudiɽo ŋɩnəwei nuwele gi diɽil deḏi sur na saida. nuəḏi kwu dunu, gwate gwarno gwiji gwalɩŋe no, namɩni gwate gwəṯi ŋɩma gwalɩbe no. 25na gwa gwete diŋɩni ŋu gwe, gwəṯi ŋaɽe ŋun ŋiro gwa ŋuməṯi ḏiŋerom nuwila nuiḏi ŋwara ganu lugwun. 26na gwa gwiro gwugrigi gweḏi winijia suria, nuɽoṯəḏɩjo yecuŋ nuti ḏiŋeroma ŋaɽe ŋuŋun. 27na yecu eicɩno, ouwɩrico nyaɽe alpe gwerre, ŋate ŋiŋir gwiji gwaɽe gia geḏi nyaɽe nugiwinɩjo nyino no. 28nuwɩrlijo ŋuɽuna nueicɩno, gwele gwinyi, namɩni nyin nyun nyijo gi ṯarabesa ganu nyanoṯene gia gi jɩŋaḏ gun gaṯi nyaɽe bɩɽeṯeje ga. 29nueicɩno, na ŋuɽun ŋeno wiḏi, na ḏiŋerom ḏɩmətu ŋaɽe. 30gwune nuaɽuwa dunu nuwuɽəje ḏigeroma ḏɩmətu na ŋaɽe ŋuŋun ḏɩre ga kajagar.

ḏiŋiriḏa nanu ḏeḏi gwiji gwun gwɩki ḏiŋɩla

mṯ. 15:29-31

31nutu mɩna gi diɽil deḏi sur, nuwila saida gwe gi ḏɩrawe ḏeḏi jalil kɩlɩgi ganu gi diɽil deḏi jɩmɩrɩgen jun jiro di. 32nalgwuluḏɩjo gwete gwɩrimə gi nəni, ḏiŋɩla ḏuŋun ḏɩmɩɽiḏo ldu; nalɽoṯəḏɩjo nalarno gwunŋele ḏi ḏuŋun elo. 33na yecu gwulo gi liji ganu nugwutə ga kaja, nugele ŋwamon ŋwuŋun gi nəni. nukwoinya, nuḏɩmumi ḏiŋɩla ḏuŋun, 34nuŋalaḏe kanyin nugele uwə nueicɩno, iwaṯa, ŋeno ŋarno iḏinu. 35na coucou na nəni nuŋun iḏini na ḏiŋɩla ḏuŋun kədəḏɩni ga nuumə muma. 36nugele ŋuɽuna nuarno late lanuməḏɩjo gwiji no, namɩni gi gwune uməḏɩjanulo naṯɩlmɩni uməḏɩjene liji lutəno. 37nalobaga ṯuṯ gworki nalarno, ŋu gwapo ŋuɽuna wei muma; kəbe na liji diŋɩni lun lɩrimə gi nəni na lun lɩmɩɽiḏo diŋɩla ŋwudu nalumə.

Currently Selected:

markus 7: OTR1966

Highlight

Copy