markus 9

asa 9

1nuleicɩno gwerkwe ganu nyi gweiceijɩno, lo kworo leḏi liji leno lun lɩḏuḏɩnu ŋɩne late lai no kəbe laŋu ŋelɩnya ŋeḏi elo ŋila ŋɩna ŋe.

yecu gwumɩdinu nupiḏe pɽul

mṯ. 17:1-13, lk. 9:28-36

2gwune na ŋwamon ete nyəɽɩl na yecu gwulo buṯrusŋaije yagubŋa yuwanaŋa nalabo gi lɩrgwom elo lun lolelo cucun. numɩdini gi jei ganu lagin. 3na jiria juŋun nalro nɩɽe bupɽul nalar bibɩɽŋal. gwiji gwate kɩḏilio gwun gwəṯi ŋɩma julpiḏi dino no. 4na musaŋa iliya gwe nalaŋino lagin, nalumə yecuŋale. 5na buṯrus uməḏɩjo yecuŋ nueicɩno, gwele gwəri, ŋiŋir ilo ŋɩne. anoḏa jupiya ṯəɽɩl, yete yan ŋa, na yete yan musa, na yete yan iliya. 6liṯɩl ŋɩḏe bucu, nate nalɩŋe ŋuɽuna ŋe ḏuməḏə no. 7nanmɩni jəbɩɽu wilelo nalɩkiɽɩbə nanu gɩḏiḏɩŋilge, na ŋwal gwulo gi jəbɩɽu nalarno, kweno gwiro ŋaɽe ŋinyi ŋun ŋaṯiəmɩnyi, diŋɩnəḏil. 8naldadɩŋa galo, nate naṯɩlaŋu gwetɩdo no, nalmɩni aŋu yecuŋ gwetɩdo gwun gwijille. 9gwune nalgwulo lɩrgwoma nanu nal yecu uməḏɩjo ŋuɽuna ŋɩbɩɽe, nuarno late luməḏɩjo gwiji gwetɩdo ŋuɽuna ŋun ŋaŋəḏɩlo no, kəbe a ŋaɽe ŋeḏi liji diɽi gi ḏaiya. 10na luŋa nalməṯo ŋuɽuna ŋeno gi lulo lagin, naṯɩluməḏəṯo laginŋu nalarno, ŋuɽun ŋɩrṯa ŋeḏi ḏidiɽo gi ḏaiya. 11nalɽoṯədɩjo naleicɩno, gwudaro gəko na jalgaṯɩm arno arram iliya gwila gwerre? 12nulwɩrlijo ŋuɽuna nuleicɩno, gwerkwe iliya gwila gwerre nuwəɽeice ŋɩdio wei muma ldu, namɩni galakwe ŋulinu ŋan ŋaɽe ŋeḏi liji, arram ŋuiḏe gworki ŋaniŋələḏəṯɩni ganu. 13nuŋwajeicɩno, iliya mila nalarre ŋun ŋɩbunyɩlo gi gwune ŋulinu ŋan ŋu.

yecu gwuti ḏiŋeroma ŋaɽe

mṯ. 17:14-21, lk. 9:37-43

14gwune nalwila gi calɩmis nalaŋu liji lutu luwujeicɩlo galo, na jalgaṯɩm nalumə galo. 15gwune na liji wei aŋu nalobaga ṯuṯ naleneḏe lugwun nalmɩɽənyo. 16nulɽoṯəḏɩjo nuleɩcɩna, nyaluməḏi ka? 17na gwiji gwete gi loro ganu wɩrlijo ŋuɽuna nueicɩno, mualɩm gwəri, nyi gwaŋapijo ŋaɽe ŋinyi ŋun ŋate ŋaṯumə no ŋəṯi ḏiŋeroma. 18na ŋalo ŋun ganiməṯo nuaici ga kwɩnyəm. ŋabubuja abonya naŋeʼe jɩŋaḏ, na ŋɩrebɩna. muməḏɩjo calɩmis juŋa nuarno ḏaldi namɩni ḏiməliḏami. 19nuwɩrlijo ŋuɽuna nuleicɩno, liji le leḏi gwunne lun late ləṯi ḏɩməṯo no, jaḏo gwiro gwun gwar gwilgwije? na nyiməṯo ḏugwor lagalo ŋwamon umɩnyo? apijɩnyi ŋaɽe. 20nalapijo. na gwune na ḏiŋerom aŋu yecuŋ nurogwogwɩnyeje ŋaɽe cou ḏiḏir; nuaici ga kwɩnyəm nuḏaḏiɽe ga, nuabuja abonya gi jɩŋaḏ. 21na yecu ɽoṯəḏɩjo babaŋ gwuŋun nueicɩno, jaḏo gwiro gwiduḏu gwe ŋaɽe dino? nueicɩno, mimmi ŋoga, 22na ŋwamon ŋwutu naṯuideḏe kigo na ŋau ganu kani ŋwuɽinye. na ḏa ŋa məṯi ŋɩma ŋa gwanduji ŋuɽuna ŋədi, inəḏije ŋijiŋelejo uwə. 23na yecu eicɩno, na ḏa ŋa məṯi ŋɩma gwəmɩnyi, ŋɩdi wei ŋandro gwun gwəmɩnyu. 24na baba gweḏi ŋaɽe əri gwula nuecɩno, gwele gwi, nyi gwəmɩnyu, baḏəṯiji ḏɩməṯo ḏi ḏɩti. 25gwune na yecu aŋu liji lɩmeneḏa ldu nulo ḏiŋeroma nuecɩno, ḏiŋerom ḏun ḏiro gɩɽilo, nyi gwo gwuməḏɩjaŋa tuḏi lugwun ŋa gwo gwəḏi lugwun mɩna. 26na ḏiŋerom əri gwula, nurogwogwɩnyeje ŋaɽe ḏiḏir nudu. nuro gi ŋaɽe ŋun ŋaiyo kəbe na liji arno ŋɩmai. 27na yecu məṯo gi ḏi nudiɽi; nuḏuḏɩni elo.

28gwune naləḏi kwu dunu na cəlɩmis juŋun ɽoṯəḏɩjo nyɩkwom, naleicɩno, gwudaro gəko nate nanəṯi ŋɩma ḏanəḏi no? 29nuleicɩno, ḏiŋerom ḏiro ṯono ḏate ḏaṯɩdu ga dino no, namɩni ḏuməḏɩjo ḏe eloŋu na ḏɩməṯo əbuṯo.

yecu gwuməḏi ŋuɽuna ŋan ḏaiya ḏuyun na ḏidiɽo gi ḏaiya gwerre ganu ŋate ŋɩmila no

mṯ. 17:22-23, lk. 9:43-45

30na luŋa naldu ŋɩnəwei naldare jalil gwe. na gwate gwarno gwiji aŋel no, gi gwune nualɩmi calɩmis juŋun. 31nuleicɩno, ŋaɽe ŋeḏi liji ŋalḏəḏə liji gi di dagin. ŋalɽinye, na ŋaje ŋwamon ṯəɽɩl na ŋədiɽi. 32nalmɩni ate nallɩŋe ŋuɽuna ŋono no, naldonye gi alɽoṯəḏɩjo.

ḏalɩmia ḏeḏi dujia gwula gwiti

mṯ. 18:1-5, lk. 9:46-48

33nuobene kamɩrɩgen yun yan kabranaum. na gwune jilo dunu nulɽoṯəḏɩjo nuleicɩno, nyaluməḏi ŋuɽuna ŋɩrṯa lagaloŋu gi ṯaṯ? 34nalji nyɩkwom gi gwune luməḏəṯi laginŋu gi ṯaṯ nalarno əḏi gwiro gwubuṯano. 35nujiga, nuəmɩḏe calɩmis jun jiro di na gwuttən nuleicɩno, gwun gwarno gwar gwaje kɩɽelo arram gwaje gɩdo wei, na gaḏam geḏi wei. 36nuapa ŋaɽe ŋun ŋoga nuḏuḏɩneje kɩlɩgi ganu, nuape di de nuleicɩno, 37gwun gwəmɩnyu ŋaɽe ŋun ŋiro dino jiri je jinyi gwəmɩnyi, na gwun gwiəmɩnyi gwate gwiəmɩnyi cucun no, namɩni gwəmɩnyi gwun gwuwəjiŋi.

ŋɩki gi ḏakaja gwiji gwun gwapo ŋuɽuna ŋiŋir

lk. 9:49-50

38na yuwana wɩrlijo ŋuɽuna nueicɩno, mualɩm gwəri, anaŋəḏi gwete gwudi ḏiŋeroma jiri je juŋa. na ŋu gwate gwaṯɩligwuḏɩḏe no, nanakajo gi gwune gwate gwaṯɩligwuḏɩḏe no. 39na yecu eicɩno, nyakaja no, gwiji gwate gwanarre ŋɩru ŋɩma ŋe ŋɩbuṯano kworo gweḏi liji jiri je jinyi no na coucou na gwiḏene. 40gwun gwate gwɩkiḏiḏɩle no gwage gwiro. 41na gwun gwajiḏəḏə ŋau kɩɽudo ge jiri je jinyi gi gwune nyaleḏi kɩrisṯo liro, gwerkwe ganu nyi gweiceijɩno ŋu gwate gwaḏuji ŋɩdio ŋuŋun no.

ḏɩminu ga gwan ḏakaja liji lun liro kaja

mṯ. 18:6-9, lk. 17:1-2

42namɩni gwun gwobɩlkejo ŋete gi nyaɽe nyeno nyun nyiti nyun nyəmɩnyi, gwiŋir lugwun ŋukanane ele kwulo gwuŋun yun yɩbuḏo nalgwuwini gi ḏɩrawe. 43ḏa ḏi ḏuŋa ḏimaŋobɩlkejo uɽəḏi ga. gwiŋir ŋa gwəḏi gi ḏɩmiḏa gwiro luḏan, gi gwune aŋanəṯi di dɩttən ŋədugwuli kigo yeḏi jenam yun ŋate yaṯai no, 44kalo ŋun ŋate gaṯɩn lodolo ai no naṯi igo ai no. 45ḏa lara luŋa limaŋobɩlkejo uɽə ga. gwiŋir ŋa gwəḏi gi ḏɩmiḏa gwiro luḏan gi gwune aŋanəṯi ŋwara ŋwuttən ŋaŋgwuli kigo yeḏi jenam yun ŋate yaṯai no, 46kalo ŋun ŋate gaṯɩn lodolo ai no naṯi igo ai no. 47na ḏa gei guŋa ŋɩmaŋobɩlkejo weləḏi ga. gwiŋir ŋa gwəḏi ŋele ŋeḏi elo gwiro gaḏuny gi gwune aŋanəṯi jei jɩttən ŋajagwuli kigo yeḏi jenam, 48kalo ŋun ŋate gaṯɩn lodolo ai no naṯi igo ai no. 49na liji wei lapiḏe pɽul igo ye, na ŋɩdi ŋun ŋaṯɩl liji ḏugijo eloŋu ŋaṯanal gwugwereje ŋwuco ŋe. 50ŋwuco ŋwiŋir, namɩni ḏa ŋwuco ŋɩmaicɩwe na galakwe ŋanyaləjɩco mɩna alaɽuwe alḏɩnye? ouwɩricil ŋwuco alje gi lulo lalo, na ouwɩricil ḏouwɩɽida ŋwuje lagaloŋu ŋɩmaga.

Currently Selected:

markus 9: OTR1966

Highlight

Copy