Hoixgara 1
1
1Theophilra jorni woragra ningipagaxra, Jesus washara jarnaga jeg‐hojikereja ungi egi washa wagigusra.
2Hamb wangregi howarniankarairega ejipa nigipagaxshana, egi Naxirag Wakanjangra hiu Apostelra uwashira wogarna, e waijara.
3E shige niambra wagi‐kikawaharna hawarnaga hageja wijanti‐khira roha hiu. Hajairena hambra kerepanajopaha, egi Maura hungma harnieja washara roha ena.
4Egi sto‐wakishu una, Jerusalem eja inke nigeowakarairanikje ena, eshi Hianjra homanaj harnira haperekjege, nainaxguwishare ena.
5Johnga hisgexji ni wagiuna wawaxura, eshi Naxirag Wakanjangra harni‐waxunkjanihawina inke hambra rohani epa.
6Jaja stoiregi, higiwax‐hirena, wairena: Hirukanara, xapgenig Israel hung‐mara shige waphina gishunkjaneshe?
7Egi wawagena: Inke ne‐hiraperes‐nikjanihawina jajanagi herekjanegi, shige heregi, she‐e Hianjihiwira E unkjanena homashja earnira hiu.
8Eshi homashja hashinikjanihawina, Naxirag Wakanjangra hiranijiwigi hageja, egi ne worag harninikjanihawina Jerusalemra, egi Judeara harnaj egi Samariara egi manegi harixjinankhi woragi‐sharagikjanihawina.
9Egi jaja washa de‐e arnakhi, horuxuj‐nank’u, wangregi howakerena, egi maxiwi rus‐hirena inke hinupahara hajairanina.
10Egi wangeja horuxujnank’u, wangrowakerege, horuxujwire wangra nupiwi waini sga‐u nashinankshana.
11E wairena: Wang Galilea‐eja herera jagu‐u nanashiwianaga egi wangregi shewesiwi harajeshe? Jesus de‐e, E ningirus hirawire wangregi howakarare shige shesge jikjanena, wangregi howakere hashjawire shesge.
12Egi hakja Jerusalem‐eja howakarairena Oliw‐xera higairera eja howagi, Jerusalem‐eja howahira Sabath hoikiwareishana.
13Egi jaja hoikawairegi, jhiwangeja hahirena, eja hiwushairena Peter egi Jakob egi John egi Andreas, Philip egi Thomas, Bartholomeus egi Mattheus, Jakob Alpheus hinigra egi Simon Selotes egi Judas Jakob khinubra.
14De‐e harnaj warnaira hishankira hiunankshana gikarajra egi exjinag, hinugra wakishu, egi Maria Jesus hiunira, egi wakhinubra wakishu.
15Egi hambananka Peter nashina, wironagnanka horogeja egi wena: (Harnajra ejaxji hogwihishanaga egi kerepananup‐hashana,)
16Wangra egi hikhinubwira, wowagax de‐e exji herera phina, e Naxirag Wakanjangra jornineja Dawid e‐gigige wena: Judas haehi, e wajoginige Jesus harukos‐hirena.
17E hakishu wangaikarab‐hirawira hisherena, egi wore de‐e nige ruxurugkajerera.
18Egi wang de‐e max‐hisha ruwina, wankshigd’ehi woirowera hiu, egi shibrena, kissag gikunugshana, egi ujwoshura harnaj hihinabshana.
19Egi Jerusalem hajhira harnaj hiperes‐hirena, esge max she‐e wagairena hit’e earninera Hakeldama higairena, wa‐i maxra higewairena.
20Psalm wawagaxra shesge wagaxankshana: Hojhira maisinjshana egi inke hisha hijajhinina, egi wore earnira hijane rus‐hirekjanena.
21Esge wangnagre, e wangakishu unangwina hoishib, Hirukanara Jesus horog‐hihiwiregi hoikawarnaga egi hihinabjera,
22Johnga niwawaxu jeghojikerehi harnieja ejipa egi hambeja wangregi wangakurus‐hirawira, wihohira hisha hakishu hiuwingi phinana hakiha‐wankshig‐inra horag.
23Egi nupiwi gijhainena, Joseph Barsabas higairera, egi shige Justus higairena, egi Matthias higairera.
24Egi gikaraj‐hirena egi wairena: Hirukana ranira, wankshigra harnaj najgera wiraperes‐rajegaja, hipereswiwine nup hajane waraijangi.
25E wore de‐e nige unkjena egi Apostelkjena, Judas e gixagaja, e mojabeja howakerekjena.
26Egi hushereg gishox harninera wogairena, egi Matthias e gikirinakshana, egi Apostel hishankira‐hashanainja wakishu gikarabhirena.
Currently Selected:
Hoixgara 1: WIN
Highlight
Share
Copy
Want to have your highlights saved across all your devices? Sign up or sign in
Published by the American Bible Society in 1907.
