Hogusra 43
43
1Egi dokewehira manaka rokanana.
2Egi wauinena, jaja waisgabra jebi‐hiregi Egipt‐eja howarnihakirirera, hianj‐hirera wawagena: Shige rawire, waruj hingiruwi rawire.
3Egi Juda hokit’ena wagena: Wang‐jega hasohixji hakihaha hingawina, wena: Inke hishjara hinshjarnikjanihawina rakhinubwira inke harakishu rajiwinigi.
4Hakhinubwira hakishu re‐hinagigiwigi tawianaga egi waruj ningi‐tuwinkjawina.
5Eshi inke reragiginigi, inke tanikjanihawina, wangjega waigawina, hishja harnira inke hashjani‐kjanihawina rakhinubwira inke harakishu rajiwinigi.
6Egi Israel wena: Jagu‐u washinohire de‐e hinagish’uwi, wangjega horagi‐sharagwi shige hisha rakhinubwigi?
7Egi wairena: Wang‐jega washara harnaj hingiwaxwina egi washokhi warniwira harnaj wiwaxshana, wena: Jasge hianj‐rawiga niamb‐nakshe, hisha shige rakhinubwishe, egi jagushana hiwaxra wagitagwina, egi jasge hawianaga hiaperes‐winashe, rakhinubwira harnijiwiaje ekjanegi.
8Egi Juda hianjra Israel wagena: Hojinjinigra hakishu reingigire, egi nashiwinge egi tekjawina, e wankshighiinkjawina egi inke hit’arnikjawina, ne‐winewianaga egi ne‐ninege egi shige xununig hiwarniwira.
9Hiakipagax hajekjena, hina‐karatakjena inke harnigarni hakirinigi, egi inke joweraija ningikerenigi, egi hageja manegus hoshishigra hinuisjena.
10Inke hinusirij‐winigi shejana jasgegi hinupahana hinkiri‐winana.
11Egi hianj‐hirera Israel wawagena: Jasgegi shesgekjanegi, de‐e uwine: Managre eegi jagu phixji harni hajegi woshu washiniwieja hoshu wang‐jega wagarnirawire hok’u. Balsam wikinira hisge egi hesig‐danishura hisge, washa tegra hisge, egi Mirrhra egi panja jexi egi almond panja.
12Egi shura hijane ruswige, egi shura pa washiniwi ihaijanank washini rakiriwira shige warni‐rawire, ningete hikaraishana wauineguni.
13Egi hishge rakhinubwira ruswige, egi nashiwine egi shige wangjega eja howarawire.
14Egi Mau homashjara harnaj harninagra najojaine ninkjena wang‐jega jowehieja, egi rakhinubwira gugigikjena egi Benjamin. Ninkjang jushguni harnikjege waungi, ninkjang jushguni harnikjanegaja.
15Egi wangnanka wogara warus‐hiranaga egi shurara nupihi harni‐harairena egi Benjamin, egi nashiranaga egi Egipt‐eja howarairena, egi Joseph jowehieja nashinena.
16Egi jaja Joseph Benjamin hakishu hahirera hajagi, jhi hirukana harnira wagena: Wang de‐e jhieja warnikarare, egi wanoijge d’ehige egi hirushja wahire, wangnagre wirarojonjegi waruj wakishu haunkjanena.
17Egi wang‐jega una Joseph jagu ushira, egi wang‐jega wangnanka Joseph hojhieja warnigina.
18Egi wangnanka naxirairena, Joseph hojhieja warnihagirege esge. Egi wairena: Jegeja pa hiwarniwieja shurara hoshu hakja hiwarningiwira, esge eegi wangarni hokawairawigaja washa hirakira wangogini‐kjanihawina, egi wangarni‐jimp‐kjanihawina, egi wang warnihi wangaukjanihawina, egi shige shungxete‐najawaxete hiwarniwira.
19Egi Joseph jhi hirukana harnira hirahirena, egi hokit’airena jhirob‐eja.
20Egi wairena: Hirukana phira, hisgexji jorni waruj ruwi‐rashana wagiu hajiwina,
21Egi wauna, jaja hikiware hojhieja hagiwira para wakuruewina egi horuxujre, wangra jarnagara shura warninera pa ihaija nankshana shura warniwira hosgingrera harnaj karak’u, egis hige harnaj warni‐hajiwina.
22Egi shura hijane harni‐hajiwina waruj hiruwi. Inke hiaperes‐winina shura warniwira peshe pa warniwieja woigishuwigi.
23Egi wena: Rashguni‐wire, inke naxirawinine, Mau hashiniwira egi hianj‐rawiga Mau harnira woga hornik’uwina pa washiniwieja wornigishuwina. Shura washiniwira warni‐gituswina. Egi Simeon harni wawigihinabshana.
24Egi wang‐jega wang‐ananka Joseph hojhieja harniwoikewegi egi ni wawogarna egi sira wakurushairena egi shungxete‐najawaxete warninera waruj wogarna.
25Egi wogara eegi washuirena Joseph wirarojonjegi kirikjanege, egi waruj hirekjane naxguinege.
26Egi jaja Joseph kirigi, wogara hagarni‐hahirena jhieja warni‐hokawairera egi jowehi mainja wakhu‐himphirena.
27Egi Joseph wawigiwaxshana wankshig‐hoira jasgarnankhi, egi shige wena, hianj‐rawiga wanaishguni‐nankshe wangnunig hisha hosharag‐wira? Jasge higu niambanakshe?
28Egi hornihairena: Ware hashinira hianj‐hawira wankshig‐hoira phinakshana, higu niambanakshana. Egi wakhuirena egi mainja‐himp‐hirena.
29Egi woruxujshana egi khinubra Benjamin hajarna hiunira hinigra, egi wena: Jasge de‐e rakhinubwi xununa hereshe, hunagi‐sharagwira? Egi wena: Maura naj‐hornigijankjena, hinig haxji.
30Egi Joseph xapge hihinabshana najgera takaj huge wakhinubra woxete wahige, egi hoxag hornina egi jhi hakohi earnieja hoikewena egi eja xagshana.
31Egi hishjara kurusharna egi hihinabshana egi mashja khina egi wena: Warujra hija hashuwire.
32Egi injab hija hagishuirena egi wakhinubra injab hija wagishuirena, egi Egipt wankshigra e hakishu waruj hirera shige injab wagishuirena, Egipt wankshigra inke Hebraer wankshig hakishu waruj hiraninana, washa de‐e Egipt wankshigra mashja hoshig hiranara esge.
33Egi jowehieja minag wagigirena, jowarera jorni minag‐gigirena hirakiruxera hirakiruxe minag wagigirena xunuxjieja hipa, egi wangnaka khoranankshana.
34Egi waruj phixji ruijanera darnaga rewagigina, eshi Benjamin waruj phixji harnira hijanenanka warninera sajaha wawiraijera harnina egi rajgainena egi wogishawa hakishu uinena.
Currently Selected:
Hogusra 43: WIN
Highlight
Share
Copy
Want to have your highlights saved across all your devices? Sign up or sign in
Published by the American Bible Society in 1907.
