Johnga 1

1Jegjikerehigi Hoit’era ejanakshana, egi Hoit’era Maura eakishu una, egi Hoit’era Maura erena.

2E hakishu nakshana Maura jegjikerehigi.

3Jarnaga washara unga E wauna, egi inkijanihanigi inke washara hisha uninana, washa jarnaga unga.

4E wankshighoina herena, egi wankshighoi de‐e hohamb wagigina wankshigra.

5Egi hohamb de‐e hokawasregi hatakajhijena, egi hokawasra inke hiperes‐hiranina.

6Wangisha Maura hugigigi, Johnga higairena.

7Wang she‐e woragjina Hohambjega horagjina wankshigra harnaj eja howahi harnaxguinekjege.

8Inke hohamb de‐e ereni, nunige hohamb de‐e horag hugigirena.

9She‐e hohamb wogisogra erena, E hohamb‐wagigina wankshigra jarnaga manegi howajihugi.

10Manegi jina, egi managre E una, nunige managre inkigiranina.

11E‐warnige wirajina, egi ewarninunige inke rus‐hiranina.

12Eshi jarnaga rusra, she‐e homashja wogarna Maura hinig wahikjanena, jarnaga rash harnira harnaxgungi.

13She‐e wankshiginegi inke wai wankshighi‐iranina, egi inke ro‐woshga wankshighi‐iranina, egi inke wankshig woshgara wankshighi‐iranina eshi Maura E wankshighiinena.

14Egi Hoit’era hahi rona, egi horogregi jhina, gloriara hagija hajawina gloria she‐e eshanaherena Hianj‐hirera harnira, najwojana egi wogisogra rokana.

15Johnga woragra, hagarnijina, egi uwana: Wena, de‐e erena hisha wagajera, hagni jinunige, jornineja herena, kheni winenineja herera esge.

16Egi hoixji harnijena harnaj eja horuiskjanihawina, najwojara egi shige najwojara.

17Woehira Moses eja howaji wangok’u hirawina, nunige najwojara egi wogisogra Jesus Kristus eja howajirena.

18Inkaga wankshigrisha Maura hajarnina, eshana Hinigrerege Hianjra mang‐hieja nakshana, hiperes‐wangahiwina.

19Egi de‐e Johnga worag harnira herena Judra nabhoruxaj hirukanara egi Lewitra hijowarewagigire, Jerusalem eja howahirena, higiwaxhirena peshe nineshe higairena?

20Egi hokaragshguni egi inke khibakhini, egi hokaragshana Kristus inke newinenina.

21Egi higiwaxhireshguni, jagu ranigaja, Elias nenineshe? Egi wena, inke newinenina. Prophet airera nenineshe? Egi wena, inka.

22Egi wagaireshguni: Peshe ninegaja? Huingigirawira wawagitaikjawina, jagu hirakigarajegi?

23Johnga wena: Hisha hora jantijegi, mojainainja uwanjegi newinena. Hirukanara nagura roja hagigihajena, prophet Esaias era hauanjena.

24Egi jiwagigirega e Pharise waunankshana.

25Egi higiwaxhireshguni egi wagaireshguni, jagu‐u niwashawaxurajeshe Kristus inke neninenigi, shige inke Elias egi prophetjega inke neninenigi?

26Johnga wawagena: Ni‐wagiuhajena wapaxuhajane, eshi horograwieja hisha nashinjera, she‐e inkiragiwinina.

27Erejena hagni jinunige, jornineja herena, wagujesika harnira inke girushge duxurugnina inke washa hiakisgarni hajege esge.

28Washa de‐e Jordan sanigeja wauinena Batabara eja, Johnga eja ni‐wawaxujena.

29Haininegi Johnga Jesus eowahu‐hegi hajarna, Johnga wena: Horuxujwire Maura jhasga‐ningnig harnira E washoirohire manegirera wak’iankshana.

30De‐e erena, hisha wagera, hagharegi wangisha jikjaneshe hihera, E jornineja herena, E jorni hereanaga hagregi winege esge.

31Egi E inke hiaginina. Egi E Israel hiperes‐hirekjege esge hajina ni‐wagiuhajena wapaxuhajane.

32Egi Johnga woragra harnijina, wena: Naxiragra hajharna wangregi howajina rujgesga‐nisge egi hihageja hiwusharna.

33Egi E inke hiaginina, eshi Hisha ni‐wawaxu huingigira E waigena: Naxiragjega wangeja howaji hashjagi egi peshe hihageja hashegi erekjanena hingena egi eja hiushakjanena, erena Naxirag Wakanjangra wawaxukjanera.

34Egi hajharna, egi hornigitagwina She‐e Maura Hinigra herena.

35Shige haininegi Johnga eja nashinjena egi wironag warnira nupiwi hakishu.

36Egi Jesus horuxuj‐jeshguni howemaniankhi wena: Horuxujwire, Maura jhasganingnig harnira.

37Egi wironag nup hajega she‐e naxguhireshguni hit’et’era, egi Jesus hironaghirena.

38Jesus hijopahinashina egi wajarna hironaganakhi egi wawagena: Jagu horani‐hashawankshe? Wagaireshguni: Rabbi, wawagaxhajawagigi‐hungra ewaireshe airena, hajinja shu’rajeshe?

39Egi wawagena: Huwire, egi hashjakjawina. Hahireshguni egi hajairena hajinja unjegi, egi hakishu hiwushairena hambeja, ejaxji howagix kerepanaishanegi wauineguni.

40De‐e nuphajane hisha Johnga hit’et’era naxgungi egi hironagshana Andreas Simon Peter khinubra.

41E jorni khinubra Simon hiena, egi wagena: Messias hiegaja, Kristus ewairena.

42Egi Jesus eja harnihina. Egi Jesus hajarna wena: Neninegaja Simon, Jona hinigra, Kephas hinigairekjanena, inira ewairena.

43Haininegi Jesus Galilea eja howarena, eja hiena Philipga egi wagena: Hiroinagre.

44Philipga Bethsaida eja herena egi Andreas egi Peter hishge jhinak eja hererena.

45Philipga Nathanael hiena egi wagena: Hiaewina Moses woehieja wagaxnihera egi shige prophetra, Jesu Nasaretheja herera Joseph hinigra.

46Egi Nathanael wena: Eja washa phira hisha howajinashe Nasaretheja? Philipga wena: Hure, hashjakjena.

47Jesus hajarna Nathanael hijowahuhegi wagena: Horuxujwire, Israel wankshig wogisogjisha heregaja inke woishjanke hiperes‐niankshana.

48Nathanael wena: Jasge hinaperes‐she? Jesus horniharna egi wagena: Kheni Philipga nigigorni, Fig‐najera khuhainja shu‐shawangreja harnijharna.

49Nathanael horniharna egi wagena: Rabbi, Maura Hinigra neninegaja, Israel hung harninera neninegaja.

50Jesus horniharna egi wagena: Fig‐najera khuhainja shu‐shawangreja harnijharna hi‐ni‐gera, esge harnainaxgushe? Washara hiraijera hashjakjanena.

51Egi wagena: Hisgexjina, hisgexjina hinigena, howarehire wangregi gihas hashjakjanihawina egi Maura waxopiniwarajire warnira hogitinagikjanena egi hanukanag‐nagikjanena, Wankshig‐hinigra wanghiregi.

Currently Selected:

Johnga 1: WIN

Highlight

Copy