Johnga 17
17
1Washa de‐e Jesus ena, egi wangeja horuxujshana egi wena: Jaji, howagixra jina Hinigraga gloriagiune, egi Hinigraga nishge glorianingigikjena.
2Homashja hunakuna rora harnaj wirukana hinagigire, esge E jarnaga horak’una wankshighoi hisgeja wok’unkjanena.
3Egi de‐e wankshighoi hisgejara herena, hiniperes‐hiregi, Mau wogisogra neshana ninera, egi Jesus Kristus E huragigira.
4Gloria‐ningigiginina manegi. Woreisha haunkjege hunak’una hau‐dushjana.
5Egi shegunegi Jaji gloriawina nexji‐hashinina hiu, gloria e wagena harnikishu hau‐harniharegi kheni managre jinagni.
6Rash hashinira hiperes‐waharna wankshigra jarnaga manegi horus woirak’una. She‐e Ne‐washinira, egi she‐e Ne‐woirak’una, egi hoit’e hashinira harninankshana.
7Shegunegi hiperes‐hirena, washa woirak’una harnaj, eja howajiagra.
8Hoit’e woirak’ura, she‐e wawak’una, egi warus‐hirena, egi wogisogji hiperes‐hirena eja wawajira, egi harnaxguinena Ne‐huinagigira.
9Gikaraj warnigigina: Inke managre gikaraj warnigiginina, eshi jarnaga hunak’una, she‐e Ne‐washinige esge.
10Egi warnira harnaj Ne‐washinina, egi washinira Newarnina, egi gloria‐waharna.
11Egi inke hinupahana manegi haunikjanena, eshi de‐e manegi uinekjanena egi hiranigikjanena. Jaji wakanjangra, rash hashinira wirakara hiuanje, jarnaga hunak’una, e hishankirairekjege hishankira hinina shesge.
12Manegi wakishu hauanjeregi wirakarajena rash hashinira hia‐uanaga. She‐e woirak’una wirakarajena, egi inke hisha xawarninina, hinig xawarni‐nashana, wowagaxra exji herekjege.
13Shegunegi hiranigikjanena, egi washa de‐e maneginagre wirowakit’ajena, e wogishawa harnira harnaj exji harninekjege esge.
14Hoit’e hashinira wagarna, egi managre wosh’igshana, inke manegi hereraninge esge, inke manegi hereaninige hiakisgena.
15Inke maneginagra washuruisde ningikarajnina, eshi wirarakarakjena inke washoshishig howairanikjege.
16Inke manegi hereranina, inke manegi winenina hiakisgena.
17Wakanjank wahire wogisog hashinira hik’unge. Hoit’e hashinira wogisogra herena.
18Manegi howa‐huinagigira, hikisge hishge mara howarewagigina.
19Egi e‐wawagiunge wakanjank hakhina, e nishge wakanjank hirekjege wogisogra hiu.
20Inke de‐e eshana gikaraj‐wanigiginina, eshi hishge jarnaga harnaixgungi hoit’e warninera hiu.
21E harnaj hishankirairekjege, Jaji hunajhira egi hornijhira shesge, egi hishge hishankirairegi wangojhirekjege, egi managre harnaxguinekjena Ne‐huinagigira esge.
22Egi gloria hunak’una, she‐e wawagarna, e hishankirairekjege, hishankira hinina shesge.
23Wawajhina, egi hunajhina, e hishankiraxji hirekjege, egi managre hiperesjege Ne‐huinagigira, egi waworagixetena, woiragixetera shesge.
24Jaji shesgekjena hajinja hauanjegi, woirak’una hishge eja wakishu haunkjena, gloria harnira hajairekjege e hunak’ura esge. Woiragixetegaja kheni managre jinagni.
25Jaji pixjina, managre inke hiniperesnina, de‐eshi hiniperes‐shana egi de‐e hiperes‐hirena Ne‐huinagigira.
26Egi wawagitagshana rash hashinina, egi wawagitaikjanena, egi wogixete she‐e hiwoiragixetera hojhirekjawige egi wawajhikjege.
Currently Selected:
Johnga 17: WIN
Highlight
Share
Copy
Want to have your highlights saved across all your devices? Sign up or sign in
Published by the American Bible Society in 1907.
