Lukga 17
17
1Egi hironaghirera wawagena: Jasgegi washoshishig‐u wawaxawairekjanena, egi hawekjanena hisha washoshishig‐u wawaxewegi.
2Ini wirujobra hisha napin gigirarnaga tejainja hot’unairegi e hiraijera phingigiranana, eshi xununigra hisha washoshishig‐u hawaxewegi e wojexi wakik’unana.
3Hirakikarawire: Rakhinubra washanisha hirohire ningiungi, najisgiaje, egi najgerakaratekhi git’unaje.
4Egi hambisha shagowiha washinohire ningiungi, egi hambisha shagowiha hiranijiarnaga najgera‐hakarategshana e‐gi, wagit’unaje.
5Egi Apostelra Hirukanara wagairena: Harnaxgu harniwira hijaira hingigiwire.
6Egi Hirukanara wena: Harnaxgura mustard su hirakisgexjiwingi, Sikamin na de‐e waragawinana, rejura hikirushorojre egi tejainja hokishure, egi nigiunkjanihawina.
7Egi hisha warera hashiniwingi ma‐rupurujegi nigeshge wanoijge wakanagigi, jaja maxeja howakirigi, wagarnashe, minagarnaga warujre?
8Jasgegi inke wagarninashe: Worujra hingikorohore, wahaijena, egi hipiragra hijowekaragianaga, egi waigirare, jaja wahaj‐arnaga egi rajga dushjangi, hageja waraijena egi sharajgankjena?
9Jasge hirukanara warajega wainginabnashe, jagu ushira giunge? Inke shesge hiaranina.
10Nishge shesge rakjanihawina, jaja jagu unishirawira harnaj sh’uwingi, awiaje: Ware inke washinkisgarni hiniwingaja. Wore harniwirashana hink’uwingaja.
11Egi herena, Jerusalemra howarena Samaria egi Galilea horogra hahiowena.
12Egi jinagisha eja hokewena, egi wangra kerepanaisha hikiparna lepra u‐waunakshana, hirohari nashinena,
13Egi mashja hit’at’eirena egi wairena: Jesus Hirukanara najungijawine.
14Egi jaja wajagi, wawagena: Nabhoruxaj hirukanainja kikawaha rawire. Egi wauinena, harairegaja hahi rushjainena.
15Egi hisha rushjana hakijagi, wakshana egi mashja hit’et’ena Maura rajankshana.
16Egi si‐hieja hakarashu jimpshana, wainginabshana, egi e Samarit wankshig hisha herena.
17Egi Jesus horniharna, wena: Jasge inke kerepanaisha rushjanishe? Jasge hishankijushguni hiwishe?
18Inke hijanera hisha Maura wainginab‐jinishe, hijahi howajijaneshana?
19Egi Jesus wagena: Nashina, karare, harnaxgu hashinira rushjanina.
20Egi jaja Pharisera Jesus wigiwaxhiregi, jajanagi Maura hungma harnigi jikjanegi, horniharna wawagena: Maura hungma harnira inke harusharani jinikjanena.
21Egi inke wairanikjanena, horuxujre egi jena, shige inke goja jena. Horuxujwire Maura hungma harnira rogra horniuanjena.
22Egi hironaghirera wawagena: Hambra jikjanegi, eja Wankshig‐hinigra hamb warnira hisha haja roragukjanihawina, egi inke hashjarnikjanihawina.
23Egi warnigairekjanihawina, horuxujwire egi jena, egi horuxujwire goja jena, inke eja howarawinianje, inke wawironagwinianje.
24Wakanja hojambnisge kerajo kuhana nigekira hohambgashge, hijaneaka harnaj hohambshunura, hishge Wankshig‐hinigra shesgekjanena hamb earnieja.
25Egi jorni washara roha hawekjanena, egi wankshighoi de‐e wajis‐hirekjanena.
26Egi Noah hamb hounihera hikisgekjanena hishge Wankshig‐hinigra hamb harnira herekjanegi.
27Waruj‐hirena, egi rajgainena, hinug‐kanaghirena, kikanag wagigirena. Noah wajra hambisha hoikewegi ejipa, egi nijana jiarnaga harnaj mahujarna.
28Shige Lot hamb hounihera hikisgena waruj‐hirena, rajgainena waruwine, wiruwine, hoshuire, jhi‐uine,
29Eshi Lot Sodom eja hihinabgi hambeja pej shurna egi Brimstone, egi harnaj mahujarna.
30Shesgekjanena hambeja Wankshig‐hinigra khikawahagi.
31Hamb eja hisha jhi‐hihageja unjegi egi washa warnira jhi‐rogejanankhi, inke d’ambarnaga wakurusninana, egi hisha max‐eja unjegi inke hishge hijakirininana.
32Wewiwine Lot hijawina.
33Higu peshe rora hornigi niamb‐karaginaingi, xawarnikjanena. Egi higu peshe wankshighoina xawarnikaragigi, wankshighoi kiruxuruigkjanena.
34Hornigitagwina, hahe eja nupiwi homigra hishankira homighirekjanena, hisha rus‐hiranaga egi hisha d’unairekjanena.
35Hinugra nup warujobhajegi, hisha rus‐hirekjanena egi hisha d’unairekjanena.
36Wangra nup max‐eja u‐anjegi, hisha rus‐hirekjanena egi hijanejega d’unairekjanena.
37Egi hornigihairena egi wagairena: Hirukanara hajinja? Egi wawagena: Higu hajinja ro‐d’eranankhi eja jaxshebra sto‐khinekjanena.
Currently Selected:
Lukga 17: WIN
Highlight
Share
Copy
Want to have your highlights saved across all your devices? Sign up or sign in
Published by the American Bible Society in 1907.
