Lukga 19
19
1Egi Jesus Jerixo eja hina egi eahiowena.
2Egi horuxujre, wangisha eja jena, Saxeus higairena, e Publikanra hungra herena egi hitajena.
3Egi Jesus hajarna‐ina peshe heregi, egi rush’agshana wankshigra rokanage, wang xununigia herege esge.
4Egi joweja hornuwangshana, egi Sikamore na‐hisha eja hotina, hajakjege, e hahiowekjanege.
5Egi jaja Jesus eja higi, wangeja horuxujshana egi hajarna, egi wagena: Saxeus xapgigire d’ambre, hamb de‐e jhi‐hashinieja hipushakjanena.
6Egi xapgigina eegi d’ambshana egi wogishawaxji eojhieja hokewegigina.
7Egi jaja hajairegi, harnaj haehirena, wairena: Wang washa woishana uisha eja hokewena.
8Egi Saxeus nashina egi Hirukanara wagena: Horuxujre Hirukanara, washa warnira hokiwassig wanajojaisgeja wagakjanena, egi hisha washainja haishjankegi, jopaha hirowagish’unkjanena.
9Egi Jesus wagena: Hamb de‐e wankshig‐iwahira jhidegi jina, nishge Abraham hinigwahira hishaninena.
10Wankshig‐hinigra wornijina egi niamb‐wahijina xawarninankhi.
11Egi jaja washa de‐e naxguinegi, hijaira washisgera wawogiragnankshana Jerusalem hiwusunsh jige esge, egi Maura hungma harnira higuana jantinkjane hirananke esge.
12Esge wawagena: Wang rokanaisha ma hari howarekjanegi, eja hungma nige ruis‐janena egi hakjakirikjanena.
13Egi warera kerepanaisha harnigi wakaragigorna egi hikirua kerepanaisha wawogarna, egi wawagena: Wire wiuanihawiaje hakirigi epa.
14Egi wankshig warnira hosh’ighirena egi worag ruxegigirena wairena: Wang de‐e inke hinukananikjanihawina.
15Egi herena jaja hungmara rusgi egi hakjakirina, waranagra hijaji wa’shina, shura wawogara, wire wiuinegi jarnagashana wiruxurug‐hiregi wiperes‐hikjege.
16Egi jorniherera jina, wena: Hirukanara hikirua hashinira hikirua kerepanaisha ruxurugshana.
17Egi wagena: Phina, ware phi ranina, watagnigkaja harnira phirage, esge jhinagra kerepanaisha hishurukanakjanena.
18Egi hinubra jina, wena: Hirukanara hikirua hashinira hikirua saja ruxurugshana.
19Egi hishge shesge higena, jhinagra saja hishurukanakjanena.
20Egi hijanera jina, wena: Hirukanara horuxujre, hikirua hashinira de‐erena, hishjai‐washaisha hiroweja harnigarnihajena.
21Nanikewege, wang jashishig ranige esge, washurussana e inke ne hijarat’umb‐ninunige, egi eja sto‐warana inke ne horashuninunige.
22Egi wagena: Jaguishare eawau woehi‐hinigiunkjanena ware wowonk‐ranina. Hiraperesgaja wang jashishig harnigi, dusgaja she‐e inke ne jat’umbnigi, egi sto‐wahagaja she‐e inke ne washunigi.
23Jagu‐ungaja inke shura harnira shuro‐hojhieja horashurnishe, egi hakirigi hakarat’arnaga hakurusgunina hiroshura?
24Egi hijarnashinankhi wawagena: Hikiruaishara giruswire, egi hokuwine hikirua kerepanaisha harnijera.
25Egi wagairena: Hirukanara hikirua kerepanaisha harnijegaja.
26Egi hinigawina: Higu peshe junjegi hokuinekjanena, egi hisha jushgunijegi shige harnijegi girus‐hirekjanena.
27Egi jarnaga hunsh’igra e inke wawitu‐kananikjane airera, warnijiwire, egi joweharegi d’ewahiwire.
28Egi jaja deshesge e‐rashjangi, jornirena Jerusalem howarena.
29Egi herena, jaja Bethphage egi Bethania hiwusunsh jigi Oliw xeisha higairegi, eja hironag warnira nupiwi regigina,
30Wena: Jhinag xununig joweregi howarawire, jhinagra horakawawigi shungxete‐najawaxete harexirigia rusgij‐jau hish’ekjanihawina, inkaga haminag hiranisha, rushgawianaga egi hingarni kiriwiaje.
31Egi hisha hinigiwaxwigi, jagu‐u ragishurushgawishe? Deshesge higawiaje: Hirukanara hiunkjanegi esge wauwina.
32Egi rewagigirega harairena, egi jagu wigarnihera shesge hierena.
33Egi shungxete‐najawaxete harexirigra girushgarnag’u, nihijega wawagena: Jagu‐u shungxete‐najawaxete harexirigra ragishurushgawishe?
34Egi wairena: Hirukanara hiunkjanege:
35Egi Jesus hagarniankirirena, egi wainira shungxetenajawaxete harexirigeja washuirena, egi Jesus haminaggigirena.
36Egi regishi, wonashi warninera nagueja wokaramishhirena.
37Egi jaja Oliw xera hanukanagrera hiwusunsh higi, worohanka hironag warnira wogishawaxji egi Maura rajank mashjaxji ajiarairena wowakanjangra roha hajairege esge.
38Wairena: Phingigiwire hungra, Hirukanara rash harnira hiunjina, wangregi rashgunira, egi rajanghirera wangregi herera.
39Egi Pharisera hota worohanka horogeja unagra wagairena: Wawagaxhajawagigira wironag washinira najwisgire.
40Egi horniharna egi wawagena: Hinigawina, de‐e xapguni nashinegi, inira higuana uwa‐hiranana.
41Egi jaja hiwusunsh jigi jhinagra hajarna, egi gixagshana,
42Wena: Hiraperes‐wisheshi hamb hashinira de‐erera, jasgeragi phinkjanera, eshi nuxawankshana inke hashjarniharajena.
43Egi hambra hiranijirekjanihawina, worakish’igwira hogigix mara nigigk’airekjanihawina egi harnigshainekjanihawina, egi hogigix hirananisunsh hahuirekjanihawina.
44Egi maisinsh‐nikjanihawina egi ninkjangnig washinira rogreginagre, egi inke inira nige hisha hirajakikanag harnagnikjanena, hambeja horanijajiwira inke hiraperesni harajege esge.
45Egi wohokhu‐hojhixeteja hokewena, egi jangra wowahas‐shana eja washa wiruwinankhi egi waruwinankhi.
46Wawagena: Wagaxankshana, wajhira Mau gikaraj hojhisha herena, eshi wamanuke hojhi sh’uwina.
47Egi hambhokahi wohokhu‐hojhixeteja washa wagigussana. Egi nabhoruxaj hirukana hungra egi wowagax hiperesra egi wang rokanara d’ehinainena.
48Egi inke washa houphi washa hieranina, wankshigra harnaj mashja harnaxguxjinege esge.
Currently Selected:
Lukga 19: WIN
Highlight
Share
Copy
Want to have your highlights saved across all your devices? Sign up or sign in
Published by the American Bible Society in 1907.
