Markga 14

1Hambra nupahanaga hageja Pasxa worujra hereanaga egi waisgab winawohi rokanira herena. Egi nabhoruxaj‐hirukana hungra egi wowagax‐hiperesra jasge‐hiranaga washokit’une hiranaga rus‐hiranagi horninena egi d’ehiranagi.

2Egi wairena: Inke woruj hambeja herenikjena inke wankshigra hiwarupuru‐nikjawige.

3Egi Bethania eja unakshana Simon Leper‐unga hojhieja, warujeja minaganak’u, hinugisha jina Alabaster kog‐hisha harni Nard hoshu wikinipana phixji egi jexihirena. Egi kogra gixuxshana egi Jesus nassueja hawaxuinena.

4Egi hota hijarnankhi inke giphini‐hirena egi wairena: Jagu‐u wikinipana phi de‐e hoinige xawarnihishe?

5Denaria hogihi‐danira hiraijera hiruwinana, egi wanajojaisgeja wogarnana. Egi hinugananka haehirena.

6Egi Jesus wena: Shegu unaghiwire jagu‐u najgewojirawishe? Wore phi hingiu waunakaja.

7Wanajojaisgera hoishib warakishu sh’unkjanihawina, egi higu jajana raipiwingi washophi waragish’unkjawina. Eshi Ne inke hoishib hinakishu sh’unikjanihawina.

8Hinug‐nagre jasge hiruxurugra unakshana. Hinug‐nagre jorni ro‐harnira wikini hingiwaxu jina hixairekjanera wagiu.

9Hisgexjina hinigawina, higu hajinja managre harnaj woragphi de‐e wihokhuinegi, hinug de‐e jagu une hishge horag‐hiranaga wewi‐ranihekjanena.

10Egi Judas Iskariot, nup‐hashanara hisha herera, nabhoruxaj‐hirukana hung‐eja howarena, wawimangiraikjege.

11Egi jaja naxguinegi giphinena, egi shura hokuinekje mangiraj‐hirena. Egi jasge‐hianaga himanagra houngiphinagi hornijirena.

12Egi waisgab winawohi rokani hamb‐jornineja, eja Pasxara d’ehirena, wironag warnira wagairena: Hajinja howare roiragiguwishe hirushjahi, Pasxara raijanegi.

13Egi wironag warnira nupiwi regigina, egi wawagena: Jhinagregi howarawire, egi eja wang‐hisha harnikihikjanihawina, rexoro rex‐hisha ni hoshu ruankhi, hironag‐wiaje.

14Egi higu hajinja hokewegi, jhi hirukanara wagawiaje, Hirukanara wena: Hajinja jhi‐worujra hereshe, eja wironag warnira wakarakishu Pasxara haijawina?

15Egi jhiwang xeteisha womishhire egi hirushja himanigiraikjanihawina, eja hingi‐korohowiaje.

16Egi wironag warnira harairena, egi jhinageja hahirena, egi jagu era shesge hierena. Egi Pasxara hirushjahirena.

17Egi hoxjarnagi nuphashanara wakarakishu hina.

18Egi minaghiranaga egi waruj‐nank’u, Jesus wena: Hisgexjina hinigawina, waruj hinakishu sh’u‐hashanagwire hisha himaisharaikjanihawina.

19Egi najgerateg hajiarairena, egi hinikehishana wagairena: Newineshe? Egi hijanera wena: Newineshe?

20Egi horniharna egi wawagena: Nup‐hashanara hisha herena wasgeja hiroshu hakishu haungi.

21Jasgegi Wankshig‐hinigra wowagax‐eja jasge wagaxhirera eowakshana, eshi hawekjanena wang‐jagura hisha Wankshig‐hinigra himanakhi, wang she‐e phi howarnana inkaga wankshig‐iningishi.

22Egi warujnank’u Jesus waisgabduj russana egi wainabshana egi rujhena egi wironagnanka wawogarna egi wena: Ruswianaga egi rujwire, de‐e ro‐harnira herena.

23Egi ni‐wirajgara russana egi jaja wainab‐rashjangi wawogarna, egi harnaj rajgairena.

24Egi wawagena: De‐e wai‐harnira herena Testament jeg hauna. E roha xu‐wagigirena.

25Hisgexjina hinigawina, inke shige habsinsh‐hueja hasni dajganikjanena hamb‐eja epa shige jeg dajgankjanena Maura hung‐ma harnieja.

26Egi jaja nawa rashjainegi, Oliw‐xeja howarairena.

27Egi Jesus wawagena: Hahe de‐e harnaj watoiragixi‐kjanihawina, deshesge wagaxankshana: Jhasga hirakarara wajinkjanena, egi jhasga hornihera mokhiekja nena.

28Eshi hakikawa‐anaga hageja Galilea mowagaxeja jornigini hagikjanihawina.

29Eshi Peter wagena: Harnaj watornigixi hireshge inkaga watoaxinikjanena.

30Egi Jesus wagena: Hisgexjina hinigena, hamb, de‐e hahe de‐e, kheni bagawaxge‐wangra nupaha xagni daniha khiba hinakhinkjanena.

31Eshi Peter mashja hiraijera wena: Harnikishu jekjanegi, inke washara hisha hawau khibani‐kinikjanena. Hishge wironag hijanenanka harnaj shesge airena.

32Egi max‐hisha Gethsemane higairegi eja hahirena, egi wironag warnira wawagena: Eegi minagwire, hagikaraj hikjanihare.

33Egi Peter egi Jakob egi Johnga wakishu rena, egi Jesus naxirera rokana jirena egi warnaira mashja hirawassunsh‐shana.

34Egi wawagena: Naxirag harnira najgetegra rokanana jowe d’ewinana, eegi hiwushawire egi hikhianagwire.

35Egi jowexjinig hiraijera jowera howarena, egi mainja himpshana, egi gikarajshana, ruxurug‐phingi howagix de‐e hinxagjena.

36Egi wena: Abba, Jaji washara harnaj shuruxurugshanakaja, niwirajga de‐e hingirusre, egi inke jagu haiphingi eshi jagu Ne raiphingi herekjanena.

37Egi kirina egi nanank’u wiena, egi Peter wagena: Simon ranashanakshe? Inke howagix hisha hikhi shuruxurugnishe?

38Hikhiwine egi gikarajwire, nigete washa woishana u wahieja horakit’u‐sharawiege. Naxiragra hisgexji giphinang‐nunige eshi rora inke mashjanina.

39Egi shige rena egi gikarajshana egi shige hoit’era e waena.

40Egi jaja shige kirigi, shige nanank’u wiena hishjasu warninera shjuwara hoixjinanke, egi inke hiperes‐hiranina jagu higairekjera.

41Egi hidanihana kirina egi wawagena: Nawinane, egi xgasigiwire. Sheguna, howagixra jina, horuxujwire Wankshig‐hinigra washa woishana ura nab‐warnieja horushjarehirena.

42Nashiwine, hinekjawina, horuxujwire hiwusunshjiginina himainaikjanera.

43Egi hit’at’ajau higuana Judas jina nup‐hashanara hisha herena egi hornihe xetexji hakishu, wigijgux egi wiwapox harni, nabhoruxaj hirukana hungeja egi wowagax‐hipereseja egi xeteja howajirena.

44Egi hisha himanaikjanera wijanti wagiungi wena: Hisha iwakhiwankjanera erena, ruswiaje egi shja harukos harnikarawiaje.

45Egi higu jigi, higuana hirajina, egi wena: Hirukanara, Hirukanara, egi iokiwankshana.

46Egi harukos‐hiranaga egi rus‐hirena.

47Egi hisha hiwusunsh nashi‐jegi wigijgux hisha rushorojshana egi nabhoruxaj hirukana hungra ware harnira hojina, egi najawara gixgurna.

48Egi Jesus horniharna egi wawagena: Wamanuke hiraji hinagish’uwishe, wigijgux egi wiwapox hashini rajiwi hishgurajiwigi?

49Hambga harnikishu hauanjena wohokhu‐hojhixeteja washa ningiguswi egi inke hinshurukos‐winina. Eshi jasgegi wowagaxra exji herekjanena.

50Egi harnaj d’unairena egi gias‐hirena.

51Egi wang hojinjisha hironagshana linen waini hirokikewejana nanokajege, egi wang hojinjisha harukoshirena,

52Egi linen wainira d’unena egi nanoka wagigiasshana.

53Egi Jesus nabhoruxaj hirukana hung‐eja howe‐harniakarairena. Egi e nabhoruxaj hirukana hungra harnaj sto wakishu una egi xetera egi wowagax‐hiperesra.

54Egi Peter hari hironagshana, nabhoruxaj hungra jhixete harnieja hokewena. Egi warera wakishu minagshana, egi pejeja tashjuj khina.

55Egi nabhoruxaj hirukana hungra egi waehira wihohi horninena Jesus hiraki‐rairanaga d’ehirekjege, egi inke hisha hieranina.

56Egi woroha washa woretungra airena Jesus hakira, eshi jagu airega inke hakishjeg‐hiranina.

57Egi hota nashinena egi washa woretunk higairena, wairena:

58Naxguwina, wena, wohokhu‐hojhi de‐e maisinshhakjanena, nab‐hiuranagre, hambra danihangi hijanera inke nab‐hiuranira hisha haunana.

59Eshi jagu airera shige inke hikisge hiranina.

60Egi nabhoruxaj hirukana hungra horogeja nashinjirena, egi Jesus higiwaxshana wena: Inke waragi‐xabnishe? De‐e jagu hinigarnagre.

61Eshi Jesus inke xabnina. Nabhoruxaj hirukana hungra shige higiwaxshana egi wagena: Jasge Kristus nenineshe, Rajanghirera hinigra nenineshe?

62Egi Jesus wena: Newinena, egi Wankshig‐hinigra hashjakjanihawina homashjara hoishoro‐hieja minagnaikjanena egi wangregi maxiwieja jikjanena hashjakjanihawina.

63Esge nabhoruxaj hirukana hungjega wainira kurugasshana egi wena: Jagu‐u hijaira wihohi hiunkjawishe?

64Maura raxjashgunira hinaxguwingaja. Jagu hirarawishe? Egi harnaj wairena: D’ehire phingaja.

65Egi hota hasho hajiarairena egi hishjara hagirukainena egi nab‐hirojinena egi wagairena: Prophetre. Egi warera nab‐ruparas hirojinena.

66Egi Peter jhi‐xetenaka khuhainja unjau nabhoruxaj hirukana hungra hinug‐ware harnira eja hirahina.

67Egi jaja hinugjega Peter tashjuj‐khinjau hajagi, horuxuj‐shana egi wena: Nishge ne Jesus Nasareth‐eja herera harakishu‐shuna.

68Eshi khibakhina, wena: Inke hiaperesnina egi shige inke nanixgunina jagu hishare. Egi jang jhi‐oxorojhikeja higaja egi bagawaxge‐wangra xagshana.

69Egi shige hinughisha hajarna, egi hijarnashinankhi wawagajirena: De‐e hisha herejena.

70Egi shige khibakhina. Egi jowexjinig hageja hijarnashinankhi shige Peter wagairena: Hisgexji ne hisha ninegaja, Galilea ranina egi hoit’e hashinira wirakisgerajena.

71Eshi washoshishig howe rokigujirena egi wihohina, wena: Wang waragarajane inke hiaperesnina.

72Egi bagawaxge‐wangra hinupahana xagshana. Egi Peter hiperesjijena Jesus hoit’e jagu higarnihera: Kheni bagaxge‐wangra nupaha xagni, daniha khibaina‐khinkjanena. Egi jaja she‐e wewingi xagshana.

Currently Selected:

Markga 14: WIN

Highlight

Copy