Luka 2

O Nika Hofoc ci Yisan

(Matay 1.18-25)

1Itiya i, ira ko limo'ot ni Aukustus o hongti no Loma, to sapipatilidaw to ngangan no finawlan i polong no makowanay no Loma a kitakit. 2Onini i, o sa'ayaway a pipatilid no finawlan to ngangan yo ci Kurinius ko mikomoday no Siriya. 3Orasaka, paytmek sa ko tamdamdaw a minokay i niyaro' no tireng to sapatilidaw to ngangan.

4O tloc no loma' na Tafiti ci Yosif saka, lomowad cingra nai Nacali a niyaro' no Kalili a macokacok a tayra i Piclihim hananay a niyaro' no Yutaya o niyaro' na Tafiti. 5Malahaklong ci Yosif ato nipatapangan ningra a malofafahi ningra ci Mariya a tayra to sapipatilidaw to ngangan nangra. O mamahofocto ci Mariya itiya, 6yo itira cangra i Piclihim i, maraodto ko kahofocan ni Mariya a folad. 7Saka, mahofoc cingra to fa'inayan a fisac a wawa. Popot han ningra to kiradom a mipakafoti' i toptop no pa^faan, nawhani awaayto ko malokafoti'an nangra i pilafinan a loma'.

O Pakaenay to Siri ato Coyoh

8Ira itira toya pala ko pakaenay to siri. Milafin cangra i palapalaan to dadaya a misimaw to masaflaway a siri nangra. 9Itiya i, fahal sa ira ko ccay a coyoh a miraod i cangraan. Mapatdi no 'dil no Tapang ko taliyok nangra. Saka, tata'ang ko talaw nangra. 10Sowal sa koya coyoh cangraan, <<Aka ka talaw. Pitngil. O paratohay kako i tamowanan to nga'ayay ratoh. O tadakalipahakan no polong no finawlan konini a sowal ako. 11Nawhani mahofocto anini a dadaya itira i Tafiti hananay a niyaro' ko papa'orip i tamowanan. O Tapang o Kristo Cingra. 12O malokacipinangan namo i, o mama'araw namo ko nika popot noya Wawa to kiradom a mapakafoti' i toptop,>> saan.

13Itiya i, fahal sa a ira ko 'alomanay a coyoh no kakarayan a malakapot atoya ccay a coyoh a pahmek to Kawas, sowal sa,

14<<Nanay mapahmek ko i tiraay i satakaraway ko aro' a Kawas.

Nanay rihaday ko i tiniay i hkal a kaolahan no Kawas a tamdaw,>> saan.

15Yo miliyas i cangraan koya coyoh a minokay i kakarayan i, sowal sa koya pakaenay, <<Tatata. Tayra kita i Piclihim. Nengnengaw ita ko niparatohan no Tapang titaanan a dmak,>> saan koya pakaenay to siri a masasowasowal.

16Saka, tamor sato cangra a tayra. Ta ma'araw nangra ci Mariya aci Yosif atoya mapakafoti'ay i toptop a nihofocanho a Wawa. 17Nama'araw nangra koya Wawa i, tangsol sa cangra a palosiyang to nano piparatoh no coyoh i cangraan to pakayniay toya Wawa. 18Safahka' sa ko mitngilay a tamdaw to nisowalan noya pakaenay to siri. 19Nikawrira, pakifaloco' han ni Mariya konini a dmak a ma^min a misaharaterateng. 20Oya nitngilan atoya ninengnengan noya pakaenay to siri i, mado^do ko nipasowalan no coyoh i cangraan. Saka, hmek sato cangra to Kawas a minokay.

O Pipangangan ci Yisan

21Nanoya, saka falo a romi'ad i, maraodto ko pakritan toya Wawa a mido^do to krit a lisin. Saka, ci Yis han nangra ko pipangangan toya Wawa. Onini i, o nipanganganan no coyoh yo caho ka cipoyapoy ci Mariya.

O Pipacakat ci Yisan i Pita'ongan

22Nanoya, yo malponto ko pikoracan nangra a romi'ad to nano Rikec ni Mosi i, alaen na Yosif aci Mariya koya Wawa a macokacok a tayra i Yirusalim to sapacakataw i Tapang toya Wawa. 23Onini i, o pido^do to matiliday i rikec no Tapang toya, <<O fisac a fa'inayan a wawa a ma^min i, o papacakaten i Tapang,>> sanay. 24O romasato, o pido^do nangra to rikec no Tapang a pacakat to tosa a topi no lotok ano ^ca i, tosa a topi no loma'.

25Itiya i, ira i Yirusalim ci Simiyon hananay a tamdaw. O mo^celay ko faloco', o malalokay a mitoor to Kawas cingra. O hinatalaay cingra to papa'orip to Israil. O mikapotay ko Fangcalay 'Adingo i cingraan. 26O nipahapinanganto no Fangcalay 'Adingo cingra saka, mafana' cingra, <<I 'ayaw no nika patay ako i, caay ka^ca o mama'araw ako ko nisowalan no Tapang a Kristo,>> saan cingra. 27Tona mangiyangi no Fangcalay 'Adingo ko faloco' ningra, saka tayra cingra i Fangcalay Pita'ongan. Itiya i, alaen ni Yosif aci Mariya koya Wawa ci Yis a micomod to Pita'ongan. Onini i, o sapido^doaw nangra to lkakawa no Rikec to saki Cingraan. 28'Afofo han ni Simiyon koya Wawa a pahmek to Kawas. Sowal sa cingra,

29<<Tapangaw, anini mado^do ko nano sowal Iso.

Saka, sanga'ay hanto a panokay kako o matayalay Iso.

30Nawhani ma'arawto ako ko sapa'orip Iso.

31Onini a papa'orip i, o nipatalaan Iso i ka'ayaw no kasafinawlan.

32O patdiay to roma a finacadan a likat Cingra.

O sakaci'dil no Israil a finawlan Iso Cingra,>> saan.

33Safahka' sa ko mama ato ina noya Wawa a mitngil to sowal ni Simiyon to pakayniay i Wawa nangra. 34Itiya i, palmeden ni Simiyon cangra. Sowal sa cingra ci Mariyaan o ina noya Wawa,

<<O nipatirengan no Kawas konini a Wawa to malosakatkop,

ano ^ca i, o malosakapa'orip no 'alomanay a Israil a tamdaw.

O lalokesen no 'alomanay a tamdaw Cingra,

35ta pakayni i Cingraan a mapatalahkal ko i laloma'ay no faloco' no 'alomanay a tamdaw.

O mamalasakararom, sakacocok no faloco' iso konini a dmak,>> han ni Simiyon.

36O romasato, ira ko ccay a fafahiyan ci Anna hananay a pali'ayaway to sowal no Kawas. O wawa ni Fanuil, o ngasaw ni Asir cingra. O tadamato'asayto cingra. Na ciramod cingra, pito a mihca ko nika polong ningra to fa'inay a ma'orip. 37Nanoya, maponengto cingra, falo a polo' ira ko spat no mihcaan ningra.#2.37 Nanoya, maponengto cingra, falo a polo' ira ko spat no mihcaan ningra -- ano ^ca i, maponengayto cingra to falo polo' ira ko spat no mihcaan. Caay piliyas cingra to Fangcalay Pita'ongan. To dadaya to romi'ad misaliway, mitolon cingra a mita'ong to Kawas. 38Itiya i, irato konini a fafahiyan a tahira a mikansiya to Kawas. Ta pasowal cingra to pakayniay toya Wawa i hinatalaay to pitdal no Kawas to i Yirusalimay a tamdamdaw a ma^min.

O Pinokay i Nacali

39Malahcito na Yosif aci Mariya ko dado^doen a nitilidan a Rikec no Tapang a mido^do. Saka, nokay sato cangra i niyaro' no tireng i Nacali no Kalili. 40Tata'angto koya Wawa. Tanektek ko tireng Ningra. Citaneng a citaneng Cingra. Matongal a matongal ko nipipalmed ato nipikapot no Kawas i Cingraan.

O Nika Tayra ni Yis i Fangcalay Pita'ongan

41Maraodto ko Pita'lifan a Lisin to mihcahcaan i, macokacok ko mama ato ina ni Yis a tayra i Yirusalim. 42Yo tosato ko safaw no mihcaan ni Yis i, matiya o dmak to mihcahcaan cangra a tayra a misalisin. 43Yo mahrekto ko pisalisin, yo minokay cangra i, itira sa koya Wawa ci Yis i Yirusalim. Caay ka fanafana' ko mama ato ina Ningra. 44O iraayto i kasa'alpad no kasacfang niyam Cingra saan ko harateng nangra. Saromi'ad sa cangra a romakat. Nanoya, sakilikilim han nangra Cingra i malininaay ato kafanafana'an nangra a tamdaw i, 45awaay a matama nangra. Saka, halonipikilim han nangra a patiko a tayra i Yirusalim. 46Sakatolo a romi'ad i, matama nangra ci Yis i laloma' no Fangcalay Pita'ongan. Mikapot ci Yis to pasifana'ay to Rikec a tamdaw a maro' itira. Tngilen Ningra, licayen Ningra cangra. 47O mitngilay a tamdaw i, fahka' a ma^min to nika fana' ni Yis a paca'of. 48Paka'araw ko mama ato ina Ningra Cingraan i, safahka' sa cangra. Sowal sa ko ina Ningra i Cingraan, <<Wawaaw, nawiro haenen iso kami? Maroray kako a ci mama iso a mikilim i Tisowanan,>> han ningra.

49Pasowal sa ci Yis i cangraan, <<Mimaan a mikilim kamo i Takowanan? Caay ka fana' kamo saw to nika o a i tini Kako i loma' no Wama Ako,#2.49 o a i tini Kako i loma' no Wama Ako, -- ano ^ca i, mipa'ayaw to dmak no Wama Ako.>> han Ningra. 50Nikawrira, caay ka fana' cangra to tatodong no sowal ni Yis.

51Nanoya, haklong sato Cingra to mama ato ina Ningra a maloklon a minokay i Nacali. Mitoor Cingra to sowal no mama ato ina. Pakifaloco' han no ina Ningra konini a dmak a ma^min. 52Macakat a macakat ko taneng ato nika lahad no tireng ni Yis. Matongal a matongal ko nika olah no Kawas ato tamdaw i Cingraan.

Currently Selected:

Luka 2: AMIS2019

Highlight

Copy