Luka 6

O Pakayniay i Pasla'an a Romi'ad a Licay

(Matay 12.1-8; Maroko 2.23-28)

1Yo ccay a Pasla'an a Romi'ad i, pakayra i ci^miay a omah ca Yis a romakat. Hapricen no nisawawaan Ningra ko minaro'an no ^mi. Moric han nangra to kamay a komaen. 2Itiya i, ira ko papinapina a Farisay a tamdaw a somowal, <<Nawiro midmak kamo to caay ko dadmaken i Pasla'an a Romi'ad saw?>> han nangra.

3Paca'of sa ci Yis, <<Caho ka asip namo saw ko pakayniay i nano dmak na Tafiti ato kapot ningra yo macahiw cangra? 4O citodongay to ta'ong a ccay ko kakomaen to nipacakatan a ^pang saan ko sowal a matilid i Rikec. 'Arawhani, micomod ci Tafiti i Pita'ongan to Kawas a Loma' a miala to nipacakatan i Kawas a ^pang a komaen. Ta paflien ningra ko kapot ningra,>> han Ningra.

5Pasowal sa ci Yis i cangraan, <<O Tapang no Pasla'an a Romi'ad ko Wawa no Tamdaw,>> han Ningra.

O Piadah to Mapikingay ko Kamay a Tamdaw

(Matay 12.9-14; Maroko 3.1-6)

6Roma a Pasla'an a Romi'ad, micomod ci Yis i kasa'opoan no Yutaya a loma' a pasifana'. Ira itira ko ccay a mapikingay ko kawanan a kamay a tamdaw. 7Misa'imer ko papinapina a pasifana'ay to Rikec ato Farisay a tamdaw to dmak ni Yis. <<Miadah ci Yis tora mapikingay hakini i Pasla'an a Romi'ad?>> saan cangra a minengneng. Onini i, o pikilim nangra to sapakokotaw to dmak ni Yis. 8Nikawrira, mafana' ci Yis to harateng nangra, saka, sowal sa Cingra toya mapikingay ko kamay a tamdaw, <<Kalomowad, katayni i sifo',>> han Ningra a somowal i, lowad sato koya tamdaw a tomireng itira. 9Pasowal sa ci Yis i cangraan, <<Licayen Ako kamo, pakayniay i Pasla'an a Romi'ad i, maan sa ko lkakawa no Rikec ita saw? Pidmak to nga'ayay, ano ^ca pidmak to tatiihay saw? Pipa'orip ano ^ca pipatay hakiya?>> han Ningra. 10Ta nengneng sa ci Yis to i taliyokay a tamdaw a ma^min. <<Fiyacen ko kamay iso,>> han Ningra koya tamdaw. Fiyac han ningra ko kamay ningra i, tatiko sato a manga'ay ko kamay ningra.

11Kter sato koya Farisay a tamdaw ato pasifana'ay to Rikec. Saka, <<Samaanen ita ko dmak ci Yisan,>> saan cangra a masasowasowal.

O Pipili' ni Yis to Tosa ko Safaw a Tarokos

(Matay 10.1-4; Maroko 3.13-19)

12Yo ccay a romi'ad talalotok ci Yis a mitolon. Salafii sa Cingra a mitolon to Kawas itira. 13Yo dafak sato tahidangen Ningra ko nisawawaan i ka'ayaw Ningra a pasa'opo, ta pili'en Ningra ko tosa ko safaw a tamdaw nai cangraan a palatarokos. 14Oya ci Simon (mapangangan haca ni Yis cingra to Pitiro) ato safa ningra ci Antiri, ci Yakop aci Yohani, ci Filip aci Partolomay, 15ci Matay, aci Tomas, o wawa ni Alfayus ci Yakop aci Simon hananay <<O malalokay to no kitakit>>, 16ci Yuta o wawa ni Yakop atoya malamipacakayay i ikor ci Yisan a tamdaw ci Yuta no Iskariyot.

O Pipatnak ato Piadah ni Yis

(Matay 4.23-25)

17Ta maloklon ci Yis ato tarokos. Tireng sa cangra i dafdaf#6.17 dafdaf -- o roma i, ^nar (ka'amis).. Ira itira ko 'alomanay a nisawawaan Ningra ato nai cowacowaay no Yutaya ato nai Yirusalimay ato nai lilisay no riyar no Tiri ato Siton a 'alomanay a finawlan a masa'opo itira. 18O sakatayni nangra i, o sapitngilaw nangra to sowal ni Yis ato sapapiadahaw nangra ci Yisan to adada nangra. Ira a tayra ko mapadesay no kaackan a 'adingo i, halocangra a maadah. 19Sapitfingan ci Yisan ko finawlan a ma^min, nawhani masadak nai ci Yisan ko tadamaanay a 'icel a miadah to tamdamdaw a ma^min.

O Lipahak ato Rarom

(Matay 5.1-12)

20Pasayra sa ci Yis to nisawawaan Ningra a somowal,

<<Kamo o pakoyocay a tamdaw i, o malmeday.

Nawhani o finawlan no Kitakit no Kawas kamo.

21<<Kamo o macahiway anini i, o malmeday.

Nawhani o mamapafcol kamo.

<<Kamo o tomangicay anini i, o malmeday.

Nawhani o mamatawa kamo.

22<<Ano ka'intelen no tamdamdaw kamo, ano mafalah kamo, ano malokes kamo, ano mapakangodo kamo tona mitoor kamo to Wawa no Tamdaw i, o malmeday kamo. 23Halotato'asan noya mikari'angay tamowanan a mikari'ang to pali'ayaway to sowal no Kawas i ti:yaho. Ano hatiratira ko dmak nangra i tamowanan i, kalipahak kasakro kamo itiya. Nawhani matrek ko tadamaan a sapakaolah i tamowanan i kakarayan.

24<<Kamo o cidafongay a tamdaw anini i, o cacilafo.

Nawhani mahrekto kamo a lipahak.

25<<Kamo o mafcolay anini i, o cacilafo.

Nawhani o mamacahiw kamo.

<<Kamo o matawaay anini i, o cacilafo.

Nawhani o tatomangic kamo a mararom.

26<<Ano makahmek no tamdamdaw kamo i, o cacilafo kamo. Nawhani hatiraayto a makahmek no tato'asan nangra ko mangah a pali'ayaway to sowal no Kawas.

Kaolahen ko 'Ada

(Matay 5.38-48; 7.12)

27<<Nikawrira, pasowalen Ako kamo o mitngilay tonini a sowal Ako, olahen ko 'ada namo. Sanga'ayen ko dmak to mi'intelay i tamowanan. 28Palmeden ko mi'kakay i tamowanan a tamdaw. Pitolon to saki misamsamay tamowanan. 29Ano patpihen no nima ko paci'eng iso i, pahalaen to tatihi a paci'eng iso. Ano alaen no nima ko kafafang iso i, halo i laloma'ay a riko' iso a paflien. 30Ano cimacima ko milongocay i tisowanan i, paflien. Ano alaen no tao ko maan iso i, akato pilongoc to sapatikoaw ningra. 31Ano o maan a dmakan no tao ko kaolahan namo to saki tamowanan i, haenen ko dmak to saki cangraan.

32<<Ano o maolahay i tamowanan a ccay ko kaolahan namo i, hakowa ko nika tadamaan iso saw? Halociraraway a tamdaw a mahaen ko dmak. 33Ano o misanga'ayay i tamowanan a ccay ko nisanga'ayan namo i, hakowa ko nika tadamaan namo saw? Halociraraway a tamdaw a mahaen ko dmak. 34Ano o pakapatikoay a tamdaw a ccay ko pacaliwen namo i, hakowa ko nika tadamaan namo saw? Halociraraway a tamdaw a mipacaliw i pakapatikoay toyanan to. 35Nikawrira, kaolahen ko 'ada namo. Sanga'ayen cangra. Pacaliwen cangra to payso. Aka piharateng to sapatikoaw nangra o micaliway. Ano haenen namo i, tadamaan ko sapakaolah i tamowanan. Ta malawawa no Isatakaraway a Kawas kamo. Nawhani sida'it ko Kawas i mafokilay to sini'ada ato tatiihay a tamdaw. 36Haenen o nika sini'ada no Wama a Kawas namo ko nika sini'ada namo.

Aka Pipastek to Tamdaw

(Matay 7.1-5)

37<<Aka pipastek to tamdaw, ta caay ka sawkit no Kawas kamo. Aka pastek i raraw to tamdaw, ta caay pasteken no Kawas kamo i raraw. Hpolen ko raraw no tao, ta hpolen no Kawas ko raraw namo. 38Palada'en ko tao, ta matiya o pipi^pi no tamdaw a miseksek i sato a mitomes a mipafli i tamowanan ko pipafli no Kawas i tamowanan. Ano o maan ko sapilatang namo a pafli i, orira ito ko sapilatang no Kawas a pafli i tamowanan,>> han Ningra.

39Pasowal haca ci Yis to roma a tinako, <<Ma^deng ko mapohaway a mikrid to mapohaway saw? Ano haenen ningra i, o mamatfad cangra a tatosa i rfong. 40Caay pikikaka to singsi ko nisawawaan ningra. Nikawrira, ano malahci ningra ko nipinanam ningra i, o mamatiya cingra toya singsi ningra.

41<<Paka'araw kiso to coca' no mata no salikaka iso i, nawiro caay pakahapinang kiso to nika ira no mifalatay a kilang i mata iso saw? 42Caay paka'araw kiso to nika ira no mifalatay a kilang i mata iso saka, caay ka nga'ay kiso a somowal to, <Salikakaaw, alaaw ako ko coca' no mata iso,> saan a somowal i salikaka. Kiso o misamangahay a tamdaw, i 'ayawen a miala ko mifalatay a kilang i mata iso, ta paka'araw kiso a miala to coca' no mata no salikaka.

O Kilang ato Hci

(Matay 7.16-20; 12.33-35)

43<<Caay ka tatiih ko hci no nga'ayay a kilang. Caay ka nga'ay ko hci no tatiihay a kilang. 44I tini i hci a mahapinang ko nika masamaanay koya kilang. Tinako sa i, caay ka i fadal a miala to hci no sokon. Caay ka i 'odidal a miala to hci no fadisoso'. 45O nga'ayay a tamdaw i, o nga'ayay a nina'angan ningra i faloco' ko nisadakan ningra to nga'ayay. O tatiihay a tamdaw i, o tatiihay a nina'angan ningra i faloco' ko nisadakan ningra to tatiihay. Nawhani ano masamaanay ko faloco' noya tamdaw i, hatiraay ko masadakay i ngoyos ningra a sowal.

Tosaay a Paranaan

(Matay 7.24-27)

46<< <Tapangaw, Tapangaw> saan kamo a mitahidang i Takowanan i, nawiro caay pido^do kamo to sowal Ako saw? 47O tayniay i Takowanan a tamdaw a mitngil to sowal Ako a mido^do i, sowalaw Ako kamo to nika o masamaanay a tamdaw cingra. 48Matiya o patirengay to loma' cingra. Satalolongen ningra a mikarkar ko sra a misanga' to paranaan i 'ongcoy. Tata'ang ko nanom, stolen no cdas koya loma' i, caay ka ngyangi. Nawhani tanektek ko nipipatireng noya tamdaw toya loma'. 49Nikawrira, o caay pido^do to nitngilan a sowal Ako i, matiya o caay pisanga' to paranaan i sra a mipatirengay to loma' a tamdaw. Stolen no cdas koya loma' i, tangsol sa a malfek. Tastas sato koya loma'.>>

Currently Selected:

Luka 6: AMIS2019

Highlight

Copy