Bisalu Bibilumbi 9
9
Dugobutsu duSaul
(Bis 22.6-16; 26.12-18)
1Saul mbe aki na nsala ulasa badukitsi baFumu maguga nesi ubaboka kabogu amawenda ombu bivunda bibavagulitsi bapagu 2na amabawivula musuga yiri pa orasuna batu abekelisi malongi meni magona o Damas orungula ubabega bakapu o Jerusalem.
3Ava amawendilanga anotola bebeli na Damas yijalala yimamuvedimina yiari na yiari. 4Amaberuga va tsi na amagulu diufi adimamuwivula rie: Saul, Saul, dibandu yi guikuanini?
5Amawivula rie: Ndeʼ la nyi?
Diufi dimawagula rie: Menu la Jesus agu ndeʼ guikuani. 6Relama na kota o musiengi na bogutsingula adi guvaga.
7Babaala abamawendanga nandi bamasikugu, bamakambulu; bamagulungu diufi na buranga tumba basamalaba mutu. 8Saul amarelama na diuleba misu mandi mamatiemuna, asamalabanga ne pesu. Kabogu bambatsi bamamubega te no Damas. 9Amatsana bilumbu birieru na budunga bueni, tsiri uji vo unu.
10Vamaba mudukitsi, diina diandi Ananias agumatsananga o Damas. Fumu amamunengila mu yiriariamu rie: Ananias!
Amawagula rie: Fumu meʼ janduʼ gu!
11Fumu amamutsingula rie: Relama na wenda mu nsila ajinengulu jisungama o ndagu Judas. Guwivula mutu, diina diandi Saul muisi Tarse. Gumurasuna usambila esambili. 12Amalaba yiriariamu ayitsimulasa inambu memamarie: Vamaruga dibaala diina diandi Ananias. Amaniusakiga miogu na amamuelaba.
13Ananias amawagula rie: Fumu, nyimagulu mabi motsu ama dibaala diedina amavayila batu bagu o Jerusalem. 14Ne namunyi ana musuga ubivunda bibavagulitsi bapagu ukilisa botsu abesambili mu diina diagu.
15Tumba Fumu amamutsingula rie: Wenda, nyimamusola unsalila yiri diina diami diunyavila o malongu motsu nombu bakaga nombu baIsrael. 16Dingensa olaba maguga maneni mu diambu diami, adina nyumulonsa kengili.
17Kabogu Ananias amawenda. Amakota o ndagu, amamusakiga miogu na amavosa nandi rie: Saul, mbatsi ami, Fumu Jesus agumalabana nagu mu nsila amansindiga yiri gumuelaba na yiri gubasu na Yinyunyi yiNsambi. 18Vana vana vamabonduga bima nderi magagala amamadibiga misu mandi na amalaba. Anomana ubatusu 19amaji mbana amawara.
Saul ulonsa elonsi o Damas
Saul amaletsana mua bilumbu ombu badukitsi abamaba o Damas. 20Vana vana amabanda ulonsa o Mandagu maBibenguna. Amalonsa rie: Jesus aji Muana Nsambi. 21Botsu abamamugulungu bamakambulu puela. Bamawivulanga rie: Tsia jandi otsikuananga jogu abesambilingi mu diina dieni o Jerusalem? Tsiri jandi agumalekilisa batu na musuga ubivunda bibavagulitsi bapagu? 22Tumba Saul amawarisa ulonsa yiri Jesus aji Christ te no Damas na batu bamakambulu puela. 23Mua bilumbu binovioga baJuif bamabenguna na bamatunga fundu ubokisa Saul. 24Tumba fundu ogu jimamutubululu. Nyangu na mukolu bamakelisanga dikotulu dimusiengi yiri agorina. 25Mbana mukolu mosi badukitsi baSaul bamamupodula mu ditsa na bamamubega o yivaga yimusiengi na bamayemusundusa.
Saul o Jerusalem
26Saul amatola o Jerusalem na amaronda ufubana na badukitsi abamaba guna. Tumba bamalaba goma umudila mu mbari basamatasa yiri ngensa amakalula diela. 27Barnabas amaronda umuwamusa kabogu amamubega ombu bilumbi. Amabatsingula rie: Fumu amalabana na dibaala diedidi mu nsila na amavosa nandi. Ava amabila o Damas amalonsa na mangolu mu diina dilesus. 28Amayenalinganga o Jerusalem jiotsu na amalonsa na mangolu mu diina diFumu. 29Amatsundanga na baJuif abamavosanga Grec, kabogu bamarondanga umubokisa. 30Badukitsi basusu banodijaba bamamubega o Cesaree na bamamusindiga o Tarse.
31Dimaba rie: Mabundu maJudee na maGalilee na maSamarie mamaba sui. Mabundu meni motsu mamawara mu mbari bisi mabundu bamaba na goma Fumu na Yinyunyi yiNsambi amabawamusanga.
Dubelusu duEnee
32Ava Pierre amalingulilanga batu baNsambi, amatola nesi ombu bango yitu o Lydda. 33Amarasuna yibomfi, diina diandi Enee agumaba va tangi yinana yibilima. 34Pierre amamutsingula rie: Enee, Jesus Christ egubelusi; relama, kunsa tangi agu. Kabogu amarelama. 35Bisi Lydda na Saron botsu banomulaba bamavayila Fumu yitu.
Dorcas urambuga erambuyi o dufu
36O Joppe umaba mudukitsi, diina diandi Tabitha (mu Grec, Dorcas, divindugulu rie: tsiesi). Jandi amasalanga bisalu biandi biboti na amawamusanga bijaga. 37Yilumbu yimosi amagaangu nobela na amafu. Banomana ukunsa mfumbi bamajisiliga. 38Badukitsi basusu bamagulu yiri Pierre aji o Lydda, dimbu adivu bebeli na Joppe; bamasindiga batu babeji uyemulanda. 39Pierre amawenda nogu. Ava amatolila bamamubega o ndagu ajimaba mfumbi. Bakuili botsu bamamutsiengila nolila na bamamulasa bijungi na biduaru abi Dorcas amabarariyilanga. 40Pierre amapalisa batu botsu; amakutama na amasambila mbana amageluga o yiari yimfumbi. Amavosa rie: Tabitha, relama! Amatiemuna, anolaba Pierre amatsana. 41Pierre amamusamba dikaka na amamureliga. Mbana amanengila bisi dibundu na bakuili na amabalasa yiri Tabitha aji monyu. 42Dionyi dimajabunu mu Joppe jiotsu na bapuela bamavayila Fumu yitu. 43Pierre amatsana mua temu o Joppe ombu ngela bibanda, diina diandi Simon.
Currently Selected:
Bisalu Bibilumbi 9: PUU1992
Highlight
Share
Copy
Want to have your highlights saved across all your devices? Sign up or sign in
La sainte Bible en langue Yipunu © Alliance Biblique du Cameroun, 1992.
