Dibandu 15

Nsambi uvangana evangini pangini na Abram

1Mambu meni manovioga Mbembu Fumu jimamuetsingulu Abram mu yiriariamu rie: Abram guyalabanga keri; nyiji ngubu agu, yisaku yiagu yiuba yineni.

2Abram amawivula rie: Fumu Nsambi ami, yisaku yi gupega? Yika ufu nyifu na te na namunyi ngaa na baana yika Eliezer muisi Damas aguvu na musuga ubialila bima biami. 3Mbana Abram amavosa rie: Kokolu gusamapega baana kabogu jandi agumaburu musalitsi o ndagu ami obialila disiala diami. 4Mbana Nsambi amamutsingula rie: Tsiri jandi agubialila disiala diagu, tumba muana dibaala agu ndeʼ beni gubura odibialila.

5Amapalisa Abram va gusu kana novosa nandi rie: Gengilao julu, tala bambuelili, tsie gurungula ubatala? Na amamutsingula rie: Anana bategula bagu bofuninanga.

6Abram amavayila Fumu yitu; mu yionyi Fumu amamulaba asungama. 7Fumu amamuemutsingula rie: Menu la Fumu agumagupalisa o Our o bulongu buBabylonie uyigudilisa bulongu buebubu. 8Abram amawivula rie: Fumu Nsambi ami, yilimba yi yiunjabisa yiri nyubudila?

9Fumu amamutsingula rie: Bonga muana-ngombi agukavu bilima birieru, na yinsabi ayikavu bilima birieru na dikunda dimosi na dibembi dimosi.

10Abram amabonga bibulu bieni biotsu amabitabula bibuku bibeʼ bibeji na amayenabibambasana tumba asamatabula batsoli. 11Miletsi mimalevikana bibindi tumba Abram amamibinga.

12Ava tsisiga Abram amawenda tindi yilu yineni; goma jimamugaanga na pisama jineni jimamugumba. 13Fumu amatsingula Abram rie: Jaba yiri bategula bagu boba benyi o bulongu bungana; boba baviga na bolasu maguga te na kama jina tsibilima. 14Tumba nyutabulila bisi bulongu abobalasa maguga bunsonsi, mbana bategula bagu bopala na busina buneni. 15Mbe ka ndeʼ gununa na gulabanga nsangu na dufu duagu dugoba na mambu. 16Ava bategula bagu botofila o dukula dumuina bogabuga gunu. Je mabi mabaAmor magodugu?

17Wisi unotsima vamaba tindi pisama, muji uneni umasundila ulabana agumapalisa nsumbili; yitutu yimuji yimayenavioganga va gari milonga mibibuku bibibulu abimatabulu. 18Muna yilumbu yieni Fumu amavangana pangini na Abram rie: Nyiveyi bulongu buebubu ombu bategula bagu, ubandila o mujamba uEgypte te no mujamba uneni aguinengulungu Euphrate, 19na bulongu bubaQueni na bubaQuenizi na bubaQuadmoni, 20na bubaHitt na bubaPerezie na bubaRefaim, 21na bubaAmor na bubaCanaan na bubaGuirgachie na bubaJebusie.

Currently Selected:

Dibandu 15: PUU1992

Highlight

Copy