Dibandu 30
30
1Ava Rachel amalabila yiri ageburili Jacob baana, amawava muana nguji andi na amatsingula Jacob rie: Peyi baana, pa tsiri nana nyufu!
2Jacob amanyoyila Rachel na amawivula rie: Menu nyivu Nsambi? Menu nyigugandisi ufunanga?
3Rachel amavosa rie: Bonga muviga ami Bila, fubana yitsiga nandi yiri jandi omburila baana bababaala.
4Amamuwakisa muviga andi Bila uba mugatsi andi; Jacob amafubana yitsiga nandi. 5Bila amadila dimi amaburila Jacob muana dibaala. 6Rachel amavosa rie: Nsambi amatabulila bunsonsi, ngensa amagulu diufi diami, amapega muana dibaala. La dibandu amamuluyila Dan.
7Bila, muviga uRachel amamuedila dimi na amaburila Jacob muana umubeji udibaala. 8Rachel amavosa rie: Nyimatoga na muana nguji ami na nyimalunga.
La dibandu amamuluyila Neftali.
9Lea anolaba yiri agemuebura amabonga muviga andi Zilpa na amamuwakisa Jacob uba mugatsi andi. 10Zilpa, muviga uLea, amaburila Jacob muana udibaala. 11Lea amavosa rie: Ka muna yiesa yi! Amamuluga Gad. 12Zilpa, muviga uLea, amamueburila Jacob muana umubeji udibaala. 13Lea amavosa rie: Ka muna maboti ma mavu nami! Bagetu bondengilanga mungo nsangu.
La dibandu amamuluyila Asser.
14Yilumbu yimosi Ruben amalinga o manungi va temu dutsonsugu duble amadila mandarago, milunda miyivaru yimusiru, amayemivega nguji andi Lea. Mbana Rachel amavonda Lea rie: Kokolu tsiagu peyi mua mandarago tsimuana agu udibaala.
15Lea amamugabusila rie: Gusakamana diambu diagu, gumalekala mulumi va julu vana guirondi umuebonga mandarago tsimuanaami?
Rachel amawaka rie: Guluati, tukunsa adietu: mukolu egugu Jacob osilama nagu na ndeʼ gukapega mandarago tsimuana agu udibaala.
16Ava Jacob amaruyila o musiru va tsisiga, Lea amalemubengusana na amavosa rie: Gusilama nami mu mbari nyimagusopana na mandarago tsimuana ami. Mukolu eni Jacob amafubana yitsiga na Lea. 17Nsambi amagulu dusambu duLea, amadila dimi na amaburila Jacob muana umuranu udibaala. 18Lea amavosa rie: Nsambi amamfuta mu mbari nyimavega muviga ami ombu mulumi ami.
La dibandu amamuluyila Issakar. 19Lea amamuedila dimi na amaburila Jacob muana umusiamunu udibaala. 20Lea amavosa rie: Nsambi amapega muensili udufunu duneni; mbana mulumi ami obanganga na nsala ami mu mbari nyimamuburila baana basiamunu bababaala.
La dibandu amamuluyila Zabulon. 21Va julu vana amabura muana umugetu agu amaluga Dina.
22Nsambi amakipanga Rachel; amamugulu wandi, na amamufunisa. 23Amadila dimi na amabura muana dibaala, amavosa rie: Nsambi amakusulila yisonyi.
24La dibandu amamuluyila Joseph amavosa rie: Fumu ambuesi muana ususu udibaala.
Jacob amakedilila busina
25Rachel anobura Joseph, Jacob amatsingula Laban rie: Ndundi nyuyenagabuga o bulongu buami. 26Peyi bagatsi bami na baana bami; mu diambu diogu nyimagusalila, yika uweʼ nyiwendi; ndeʼ beni guijabi nana nyimagusalila.
27Laban amawaka rie: Gugorungula undasa yingeba? Nyijabi mu diambu diagu Nsambi amakabila miula. 28Tubula futa agu nyugufuta.
29Jacob amamuwagula rie: Ndeʼ beni guijabi nana nyimagusalila na nana biruitsi biagu bivu namunyi yika mu diambu diami. 30Abimaba nagu ne mbe nyisakaruga bimaba yika mua pesu; tumba yiotsu ayi nyimaruyila biagu biotsu bimafuna. Yiotsu ayi nyimatolila ombu gagu Fumu amagugabila miula. Temu jisakatola usalila mukuta ami? 31Laban amawivula rie: Yi nyuguvega?
Jacob amawaka rie: Gugopega yisalu. Pa guisingi adi nyuvosa, nyumuebungula migamba miagu nana na kala. 32Namunyi nyuvioga va gari migamba miagu miotsu; nyukakasana baana babindombu abivu na matodi na abivu na milimba na abi vu bipinda nesi binsabi abivu na milimba na abivu na matodi abina biuba futa ami. 33O gusu businginyi buami bulabana ava guiuyila uyilaba futa ami; pa gulaba abigoba na matodi na milimba va gari binsabi na bindombu bipinda, diwendi rie: nyimadaga. 34Laban amavosa rie: Diwelimina, dibi nana guivosili. 35Muna yilumbu yieni Laban amakakasana balumi babinsabi abimaba na milimba na matodi na bibusi bibinsabi abimaba na matodi na milimba; binsabi biotsu abimaba na matodi mavema na bindombu biotsu abimaba bipinda. Amabiwakisa ombu baana bandi bababaala. 36Laban amavaga dilala dibilumbu birieru va gari mbura andi na mbura Jacob.
Jacob amabungulanga bindombu biLaban abimasialulu. 37Jacob amabonga bitayi bimupepli na bimumandi na bimupalata abi amavaga bakurumuna-mundemunde. 38Mbana amasunsa bitayi abi amavaga bakurumuna-mundemunde va gusu migamba va mbura ayi migamba mimayenuinanga; ava mimanuinanga avana mimabebilanga. 39Migamba mimabebanga bebeli na bitayi bieni, bionyi bimarombisa baana babindombu uburu na milimba na matodi maneni nesi mageyi. 40Jacob amakakasana baana babindombu va mbura mosi na biotsu abimaba na milimba na bipinda va mbura jisusu, diwendi rie: migamba miLaban.
Anana amadilila migamba mijaʼ beni ami asamamuesobana na migamba miLaban. 41Dimaba yiri temu tsiotsu atsi bibulu abimaba na mangolu bimabebila, Jacob amasunsanga bitayi bieni va gusu ogu va binuinu yiri bibulu biubebila vana bitayi bieni. 42Tumba ava bibulu abisamaba na mangolu bimatolila asamabisunsanga, kabogu bibulu abisamaba na mangolu biLaban; abimaba na mangolu bimaba biJacob.
Jacob urina erini Laban
43Jacob amakaluga tindi yisina; amadila migamba mipuela na basalitsi bababaala na babagetu na basamo na baburu.
Currently Selected:
Dibandu 30: PUU1992
Highlight
Share
Copy
Want to have your highlights saved across all your devices? Sign up or sign in
La sainte Bible en langue Yipunu © Alliance Biblique du Cameroun, 1992.
