Jean 1
1
Mambu mayijalala na monyu
1Ne Nsambi akasunda bulongu vamaba mutu diina diandi Diambu na Diambu dimaba na Nsambi na Diambu dieni dimaba Nsambi. 2Kabogu Diambu dimaba vana dibandu na Nsambi. 3Bima biotsu bimasundu nandi na vagaa ne yimosi mu abimasundu ayisamasundu nandi. 4Mu dionyi mumaba monyu na monyu eni umalasa batu yijalala. 5Yijalala yibangingi mu pisama na pisama jigoyitsimisa, via!
6Vamalabana mutu agumasindugu na Nsambi: diina diandi Jean. 7Amaruga uba mbeji uvosa bumbeji buyijalala yiri botsu boyivayila yitu. 8Asamaba yijalala tumba amalabana uvosa bumbeji buyijalala. 9Yijalala yieni yimaba tindi yijalala; ava yimaruyila mu bulongu yimamonitsa batu botsu.
10Diambu dimaba mu bulongu na Nsambi amadisalisa ava amasundila bulongu diuleba bulongu busamadijaba. 11Dimaruga ombu abandi na abandi basamadidila. 12Tumba ombu botsu abamadidila ombu jogu abamavayila diina diandi yitu jandi amabavega musuga uba baana baNsambi. 13Bamaburu tsiri na malungu nesi na duganu dumusonyi vo na duganu dumutu tumba na duganu duNsambi agumaba Taji ogu.
14Diambu dimaburu mutu agumatsananga va gari etu agumaba ubasa de na maboti na ngensa na bundumba. Bundumba bueni bumaba abu Muana divingu amadila ombu Taji. 15Jean amasingisila bumbeji na amagamuga rie: La jandi agu nyimavosila rie: Jandi oyiruyi o nsima ami amateyila mu mbari jandi amateyila uba.
16Jetu botsu tumadila dikabu dibusina buandi diwendi rie: amatugagabila miula. 17Mugaga uNsambi umavegu na Moise tumba maboti maNsambi na ngensa bimavegu na Jesus Christ. 18Mutu asadkalaba Nsambi. Tumba Muana divingu avu Nsambi aguitsaningi na Taji la jandi agumamujabisa.
Bumbeji buJean Baptiste
(Matt 3.1-12; Marc 1.1-8; Luc 3.1-18)
19Abubu bumbeji buJean ava baJuif baJerusalem bamasindiyila bivunda bibavagulitsi bapagu na baana baLevi umuwivula rie: Ndeju la nyi?
20Asamabusa uwagula tumba amasinga va gusu botsu rie: Ngaa Christ.
21Bamamuwivula rie: Kabogu yika tsie? Ndeju la Elie? Amawagula rie: Ngaa Elie. Bamamuwivula rie: Ndeju la mubiyitsi? Amabagabusila rie: Nesi.
22Mbana bamamuwivula rie: Ndeju la nyi? Tuirondi uwagula jogu abatsitusindiga. Mbe ka ndeʼ yi guivosi?
23Jean amawagula rie:
Menu la
Diufi dijandi oyigamuyi o kumu rie:
Futsanu nsila Fumu!
(Mubiyitsi Esaie agumadivosa.)
24Va gari bilumbi abimasindugu ombu Jean bamosi bamaba baJuif abamaba baPharisie. 25Bamamuemuwivula yivu yieyiyi rie: Kabogu dibandu yi guibatisili pa gugaa Christ vo Elie vo mubiyitsi?
26Jean amabagabusila rie: Menu nyibatisi mu mamba tumba va gari enu va mutu agu jenu dugejabi. 27Eruyi va nsima ami na nyisawelimina ne unyangula mikudu mibapondu bandi.
28Motsu mana mamavagulu o Bethanie o disimu dina diJourdain agu Jean amabatisilanga.
Jesus Yindombu yiNsambi
29Ava kedi Jean amalabilila Jesus uruga eruyi ombu gandi na amavosa rie: Labanu Muana Yindombu yiNsambi aguigusuli masumu mabisi bulongu. 30La jandi agu nyimavosila rie: Va nsima ami veruyi mutu agumateyila mu mbari jandi amateyila uba. 31Nyisamalemujaba tumba nyimaruga uyibatisa na mamba nomujabisa ombu baIsrael.
32Mbana Jean amasingisila bumbeji buebubu rie: Nyimalaba Yinyunyi ava amasunduyila o julu nana dibembi na amasikama ombu gandi. 33Nyisamalemujaba tumba Nsambi agumansindiga ubatisa na mamba, jandi guria amansingula rie: Gulaba Yinyunyi aguiruyili ombu Nsambi ava osunduyila nosikama ombu mutu; la jandi agubatisa na Yinyunyi yiNsambi. 34Nyimalaba na nyimasingisila bumbeji yiri jandi aji MuanaNsambi.
Badukitsi batega
35Ava kedi Jean mbe akivu vana na badukitsi bandi babeji 36ava amalabilila Jesus uvioga evioyi amavosa rie: Labanu Muana Yindombu yiNsambi.
37Badukitsi babeji baJean bamagulu adi evosi na bamaduka Jesus. 38Jesus amageluga na anobalaba amabawivula rie: Yi duirombi?
Bamamugabusila rie: Rabbi (divindugulu rie: mulonsi) agunyi guitsanini?
39Amabatsingula rie: Ruganu uyilaba.
Bamamuduka na jogu botsu bamatsana nandi. (Bamatola ava tsisiga.)
40Andre muananguji Simon Pierre amaba umosi va gari babeji abamagulu mambu maJean na abamaduka Jesus. 41La jandi agumabenguna tetega na muana nguji andi Simon na amamutsingula rie: Jetu tumaiaba Messie (divindugulu rie: Christ).
42Amamubega ombu Jesus. Jesus anomugengila amavosa rie: Ndeʼ la Simon muana uJean; gunengulungu Cephas (divindugulu rie: dimanyi).
Jesus unengila enengili Philippe na Nathanael
43Ava kedi Jesus amaronda uwenda o Galilee na amabenguna na Philippe. Amamutsingula rie: Nduki! 44(Philippe amaba muisi Bethsaida musiengi uAndre na Pierre.) 45Philippe amabenguna na Nathanael na amamutsingula rie: Jetu tumalaba jandi agu Moise amasonina mu mugaga na agu babiyitsi bamabiyila. Jandi la Jesus muana Joseph agumaruyila o Nazareth.
46Nathanael amamuwivula rie: Diboti diurungula upalila oNazareth?
Philippe amawagula rie: Ruga yilaba.
47Jesus anolaba Nathanael uruga eruyi ombu gandi amavosa rie: Labanu tindi muisi Israel, ndunsulu tsigaa nandi, via!
48Nathanael amamuwivula rie: Agunyi gumanjabila?
Jesus amamugabusila rie: Ne Philippe akagunengila ava gubetsili va tsi mumanga, nsigulaba.
49Nathanael amamugabusila rie: Mulonsi ndeju la Muana Nsambi, ndeju la kaga jiIsrael.
50Jesus amamugabusila rie: Guipayili yitu mu mbari nsigutsingula nsigulaba va tsi mumanga? O gusu gulaba mambu ameviolili diambu diedidi.
51Amabuela rie: Dingensa dulaba julu jiudibuga na biansa biumatanga nosunduganga ombu Muana Mutu.
Currently Selected:
Jean 1: PUU1992
Highlight
Share
Copy
Want to have your highlights saved across all your devices? Sign up or sign in
La sainte Bible en langue Yipunu © Alliance Biblique du Cameroun, 1992.
