Jean 12

Marie amagotsa makulu maJesus muyombu

(Matt 26.6-13; Marc 14.3-9)

1Bilumbu bisiamunu ne Paque jikatola Jesus amawenda o Bethanie o dimbu diLazare agu amarambusa o dufu amatsaninanga. 2Banomulambila biguji bitsisiga Marthe amabakelisa ava bamatsanina va tavula. Lazare amaba umosi va gari jogu abamatsana va tavula na Jesus. 3Marie amabonga yirura yimuyombu udufunu duneni na amagotsa makulu maJesus mbana amamufienyi makulu na nanga tsiandi; ndagu jiotsu jimabasa na mbunga muyombu. 4Mudukitsi umosi uJesus, Judas Iscariote, jandi agumafunda Jesus amawivula rie: 5Mu mbari yi tugaasumbisila muyombu eni? Mbe tumafuta musalitsi ne digumi ditsungi. 6Jandi amaba mudayitsi la dibandu amavosila nana tsiri mu mbari amarondanga bijaga. Ava amakelisilanga yisuegulu yimbongu amatsidaganga. 7Jesus amavosarie: Mudundi, ayimavagu na muyombu yivu yiwelimina na dufu duami. 8Bijaga bigowenda mbura tumba menu yika uweʼ nyiwendi.

Fundu ajimatungulu Lazare

9BaJuif bapuela bamagulu yiri Jesus amaba o Bethanie kabogu bamawenda tsiri ulaba Jesus buandi tumba bamaronda ulaba Lazare agu Jesus amarambusa o dufu. 10Bivunda bibavagulitsi bapagu bamaronda ubokisa Lazare wandi. 11Mu diambu diLazare baJuif bapuela bamakakana nogu na bamavayila Jesus yitu.

Jesus uwenda ewendi o Jerusalem

(Matt 21.1-11; Marc 11.1-11; Luc 19.28-40)

12Ava kedi batu bamaruga o feta Paque na bamagulu yiri Jesus amawenda o Jerusalem. 13Bamabonga metu na bamarela o gusu noyenagamuganga rie: Diboti ombu Nsambi! Miula mibi ombu jandi oyiruyi mu diina diFumu! Miula ombu Kaga Israel!

14Jesus amarasuna muana buru na amatsana va julu uonyi nana Bisonu bimasonugulu rie:

15Sion, guyalaba keri;

laba Kaga agu eruyi

atsana va julu buru.

16Badukitsi bandi basamaletsiyisa mambu meni tumba ava Jesus amamatusulu bamarangimina motsu amamasonu na amamalabana.

17Botsu abamaba na Jesus o ngila Lazare bamagulu nana amamunengilila na bamalaba nana amamurambusila kabogu bamatubula ama bamalaba. 18Abamabagulu bamaruga umulaba mu diambu diyimaga yieni. 19Kabogu baJuif abamaba baPharisie bamavosasana rie: Labatianu tugelungi. Botsu bemuduki!

BaGrec bamosi bamaromba Jesus

20BaGrec bamosi bamawenda o Jerusalem wandi uyesambila. 21Bamarasuna Philippe (muisi Bethsaida o yiari yiGalilee) na bamavosa nandi rie: Kokolu, tuirondi ulaba Jesus.

22Philippe amawenda uyetsingula Andre; mbana Andre na Philippe bamaditsingula Jesus. 23Jesus amabagabusila rie: Diweru dimatola adi Muana Mutu vengu omatusulu. 24Nyidutsinguli rie: Dingensa tsangu jigofuna pa jigovaru, diwendi rie: jiulefu mbana jinofu jiburingi puela. 25Jandi oyirondi monyu andi ogutsiemusa na jandi oyivini monyu andi ogudila mutubu. 26Pa mutu erondi unsalila anduki; avana nyivu avana voba musalitsi ami wandi. Tata ami elabi ubueji na mutu oyinsalili.

Jesus ulonsa ebalonsi nana ofuila

27Namunyi nyilabi keri. Diambu yi nyuvosa? Tata kaguli mu diweru diedidi? Nesi, mu dionyi nyimaruyila. 28Tata dodisa diina diagu! Vana vana diufi dijulu dimavosa rie: Nyimadidodisa na nyumuedidodisanga.

29Batu abamaba vana bamadigulu na bamawivula rie: Ayina yidumi?

Basusu bamawagula rie: Nesi, yiansa yitsivosa nandi.

30Jesus amavosa rie: Diufi dieni ditsigulunu mu diambu dienu tsiri mu diambu diami. 31Temu jibunsonsi jimatola, kaga bulongu buebubu obetsu. 32Menu ava nyugusululu va butamba nyuduta batu botsu ombu gami.

33(Ava amavosila nana jandi amalonsa munongu mfuitsi aji ofuila.) 34Batu botsu bamamuwivula rie: Migaga mivosi yiri Christ otsananga mutubu; kabogu tsie guivosili rie: Vengu Muana Mutu omatusu? Muana Mutu eni anyi?

35Jesus amabatsingula rie: Yijalala yikivu nenu mua pesu temu. Volanu muendu ava dukivu na yijalala yiri pisama jigodurasuna; jandi oyilingi o tsi pisama agejabi agu ewendi. 36Ava jenu dukivu na yijalala, yivayilianu yitu yiri dubanganga na yijalala.

Mirima migala mibaJuif

Jesus anovosa mambu meni amayesuema vala nogu. 37Diuleba amavaga bimaga bipuela va misu mogu basamamuvayila yitu. 38Mambu ama Esaie amavosa mamadugusu rie:

Fumu, anyi amavayila malongi metu yitu?

Anyi amalasu mangolu maFumu?

39Bagovaga yitu nana Esaie amabiyila rie:

40Nsambi amadibiga misu mogu;

na amagalisa mirima miogu

mu mbari bakelaba na misu na baketsiyisa;

bamabusa ukalula diela yiri nyubabelusa.

41Esaie amavosa mambu meni ava amalabila bundumba buJesus na amamavosila mu diambu diandi.

42Tumba nesi va gari bivunda bibaJuif, bapuela bamamuvayila yitu tumba mu diambu digoma jibaJuif abamaba baPharisie basamadivosa yiri bakepalusu mu muyitsa. 43Bamarondanga ulasa batu ubueji tsiri Nsambi.

Bunsonsi na mambu maJesus

44Jesus amagamuga rie: Jandi oyipayili yitu evayili omansindiga yitu wandi; 45na jandi oyindabi elabi jandi omansindiga. 46Nyimaruga o bulongu nana yijalala yiri jandi oyipayili yitu akefu o tsi pisama jimasumu. 47Pa mutu egulu mambu mami na agemakelisi tsiri menu oyimuveyi mbela mu mbari nyisamaruga uvega batu mbela, nyimaruga ubagobula. 48Jandi oyimbuayi na ebusi mambu mami ana mbela; mambu ama nyimalonsa amana momuvega mbela mu yilumbu yinsimunina. 49Mu mbari nyisamavosa amami tumba ama Taji omansindiga, jaʼ beni amansingula ama vengu nyulonsa. 50Nyijabi yiri diruma diandi diveyi monyu umutubu. Kabogu mambu ama nyivosi, nyimavosi nana Tata etumini.

Currently Selected:

Jean 12: PUU1992

Highlight

Copy