Jean 16

1Nyidulubusi yiri dugotsiemusa yitu. 2Jogu bodubinga o Mandagu maYibenguna; o gusu pa mutu oduboka otasa yiri esali yisalu yiNsambi. 3Jogu bovaga nana mu mbari bagenjabi na bagejabi Tata ami wandi. 4Nyidutsinguli mambu memama yiri o gusu durangimina yiri nyimadulubusa.

Yisalu yiYinyunyi yiNsambi

Ava dibandu nyisamaledutsingula mambu memama mu mbari nyibetsi nenu. 5Uweʼ nyiwendi ombu omansindiga na ne mutu agekwivuli agunyi guiwendi? 6Duilabi munyongu mu mbari nyimadutsingula mambu meni. 7Tumba nyidutsinguli ngensa rie: Diviolila ubueji yiri nyiwendi mu mbari pa ngowenda Muwamusi agoruga tumba pa nyiwendi nyumusindiga ombu genu. 8Ava oruyila olasa bisi bulongu mbela na ndunga na obatabulila bunsonsi buNsambi. 9Obavega mbela mu mbari bagepayili yitu; 10ndunga andi jilabini mu mbari nyiwendi ombu Tata na bagomuendaba; 11bunsonsi builabini mu mbari kaga bulongu buebubu amabetsu.

12Nyina mambu mapuela umuedutsingula tumba vana dedi te na Muwamusi oruga. 13Jandi la Yinyunyi Yingensa na odulonsa ngensa jiotsu. Agovosa amandi tumba ovosa motsu ama amagulu na odutubulila amoba o gusu. 14Jandi ondodisanga mu mbari oposila ava odutsingulila amami. 15Motsu amavu na Tata mavu nami la dibandu nsivosila rie: Yinyunyi obonga amami nodutubulila monyi.

Munyongu uikaluyi nsangu

16Mua pesu temu dugomuendaba mbana mua pesu temu dumuendaba.

17Badukitsi bandi bamosi bamawivasana rie: Divindugulu yi, evosi rie: Mua pesu temu dugomuendaba mbana mua pesu temu dumuendaba? Na evosi rie: Mu mbari nyiwendi ombu Tata. 18Kabogu divindugulu yi, Dugomuendaba? Jetu tugegulu ama evosi.

19Jesus amajaba yiri utumuna betumuni paga kabogu amavosa rie: Merianu: Mua pesu temu dugomuendaba mbana mua pesu temu dumuendaba. Mu dionyi duiwivusini bivu? 20Nyidutsinguli rie: Dingensa dulila na dutsukama tumba bisi bulongu bosangila; jenu dulaba munyongu tumba munyongu enu ukaluga nsangu. 21Ava mugetu eguluiu misongu elabi maguga mu mbari diweru diandi dimatola tumba pa amabura agemuerangimina maguga meni, yika nsangu elabi mu mbari muana amaburu. 22Kabogu jenu wenu duilabi munyongu namunyi tumba o gusu nyumuedulaba na nsangu enu jiuba tindi nsangu.

23Mu yilumbu yieni dugokwivula ne diambu dimosi. Nyidutsinguli rie: Dingensa ama duwivula Tata oduvayila monyi mu diina diami. 24Te na namunyi dusakawivula yima mu diina diami. Wivulanu, dudila yiri nsangu enu jiuba jidugu.

Jesus mubelisitsi ubisi bulongu

25Nyimaledulonsa na banongu. Tumba diweru dimatola yiri ngomuebuaga banongu, nyudulonsa yika ulonsa mambu maTata. 26Mu yilumbu yieni duwivula Tata ama duirondi mu diina diami, menu ngomueduwivulila; 27jaʼ beni Tata edurondi mu mbari dumatonda na duna yitu yiri nyimaruyila ombu Nsambi. 28Nyimapalila ombu Tata, uruga gunu; namunyi yika ugabuga nyigabuyi ombu Tata.

29Badukitsi bamamutsingula rie: Namunyi guivosi ama tuigulu mu mbari gugemuebuaga banongu. 30Kabogu tuijabi yiri guijabi mambu motsu. Dibandu yi mutu omueguwivulila bivu? Tuisingi yiri gumapalila ombu Nsambi.

31Jesus amabawivula rie: Kabogu dumapayila yitu? 32Namapapa dupansiga yiari na yiari, menu nyusiala pinsa. Ne nana ngaa pinsa mu mbari Tata aji nami. 33Nyimadutsingula mambu meni yiri ava dufubinina mirima nami duba sui. Dulaba maguga tumba wangalananu mu mbari nyimabelisa bisi bulongu kala.

Currently Selected:

Jean 16: PUU1992

Highlight

Copy