Jean 19

1Mbana Pilate amaruma rie: Beganu Jesus na mudimbianu. 2Bagora bamavasa dugaba dumatsiendi, bamamuduisa duonyi na bamamuduisa yijungi yibenga wandi. 3Mbana bamabambana nandi na bamamudesanga rie: Labatianu kaga jibaJuif! Bamamudimbanga mambata.

4Pilate amamuepala na amatsingula baJuif rie: Labanu nyimupalisi o gusu kana yiri dujaba rie: Ngelabi yiri ana diambu diwelimina na mbela dufu.

5Kabogu Jesus amapala aduara dugaba dumatsiendi na yijungi yibenga. Pilate amavosa nogu rie: Mutu enu, jandi guna.

6Ava bivunda bibavagulitsi bapagu na bagora bamamulabiia bamagamuga rie: Mugomini va kurusu! Mugomini va kurusu!

Pilate amabagabusila rie: Mubongianu jenu beni na pa duirondi mugominianu va kurusu mu mbari ngelabi yiri ana diambu diwelimina na mbela dufu.

7BaJuif bamamutsingula rie: Jetu tuna mugaga aguivosi yiri afu mu mbari evosi yiri aji Muana Nsambi.

8Ava Pilate amagululu diambu dieni amagaangu na goma jineni. 9Amakota o mulebi na amawivula Jesus rie: Ndeju muisi yiari yi?

Tumba Jesus amabusa uwagula. 10Pilate amamuwivula rie: Je ndeʼ gugerondi uvosa nami? Gugejabi yiri nyina musuga ugugomina va kurusu? Gugejabi yiri nyina musuga wandi ugupalisa?

11Jesus amagabusila rie: Ndeʼ gugaa na musuga ombu gami pa usamaguvegu na Nsambi. La dibandu jandi oyikwakisi ombu gagu ana mbela jiviolila jiagu.

12Pilate anogulu nana amaronda umupalisa tumba baJuif bamawaka rie: Pa gumupalisa, kabogu gugaa mbatsi kaga! Uotsu oyivosi yiri aji kaga aji muvinitsi ukaga.

13Pilate anogulu mambu meni amabega Jesus va gusu kana va mbura aji betabulili bunsonsi ajimanengulungu rie: dulombili dudalage ajimanengulungu mu Hebreu rie: Gabbatha.

14Motsu mana mamaba diweru dimuangulu yilumbu ayi betsonsiyili Paque. Pilate amavosa na baJuif rie: Labanu kaga enu.

15Tumbajogu bamawakarie: Afu! Afu! Mugomini va kurusu!

Pilate amabawivula rie: Nyugomina kaga enu va kurusu?

Bivunda bibavagulitsi bapagu bamavosa rie: Tugaa na kaga jisusu!

16Kabogu Pilate amawakisa Jesus ombu gogu yiri bomugomina va kurusu.

Jesus amagomunu va kurusu

(Matt 27.32-44; Marc 15.21-32; Luc 23.26-43)

Kabogu bamagaanga Jesus. 17Jesus amapala na amayenakebeyilanga kurusu andi te na amatola va mbura dubengili, (ajinengulungu mu Hebreu rie: Golgotha). 18Avana bagora bamagominina Jesus va kurusu na basusu babeji umosi yiari na ususu yiari, Jesus va gari.

19Pilate amarenda mirendu amimagomunu va kurusu. Amarenda rie: Jesus muisi Nazareth Kaga jibaJuif. 20BaJuif bapuela bamaranga mirendu mieni mu mbari mbura aji Jesus amaba jimaba bebeli na musiengi: mimarendu mu Hebreu na mu Grec na mu Latin. 21Bivunda bibavagulitsi bapagu bamatsingula Pilate rie: Guyarenda rie: Kaga jibaJuif. Renda yiri amavosa rie: Menu nyiji kaga jibaJuif.

22Pilate amagabusila rie: Ama nsirenda nyimakerendila.

23Bagora banomana ugomina Jesus va kurusu bamabonga biduaru biandi na bamabigabana makabu mana; mutu mutu dikabu diandi. Bamabonga yilinga yiandi wandi ayimaba tsanda mosi buandi. 24Bamavosasana rie: Tuyayipasanu tumba tubuayianu mbanda; dionyi dimalabana udugusu Bisonu abimasonugu rie:

Bamagabana biduaru biami

na bamabuayila yilinga yiami mbanda. Anana bagora bamavayila.

25Banguji baJesus na Marie mugatsi Clopas na Marie muisi Magdala bamaba vana. 26Jesus anolaba nguji andi na mudukitsi agu amarondanga amavosa na nguji andi rie: Mugetu laba muana agu. 27Amabuesa ombu mudukitsi rie: Laba nguji agu! Ubanda mu temu eni mudukitsi amamubonga.

Dufu duJesus

(Matt 27.45-56; Marc 15.33-41; Luc 23.44-49)

28Amana manovioga Jesus amajaba yiri motsu mamadugusu kala. Kabogu udugusu Bisonu amavosa rie: Nyigulu puila. 29Avana vamaba yisanga yibasa na dive dinganyi. Bagora bamaputiga mutsabu muna na bamamuvakiga mu dingasa umunuisa. 30Jesus anomana unu amavosa rie: Motsu mamadugusu.

Anobandama amatabuga.

Gora unonga enongi Jesus dikongu va dubansi

31BaJuif bamaronda ugusula mamfumbi va bakurusu la dibandu bamawivulila Pilate musuga uteba makulu mogu. Bamaronda udivaga mu mbari yilumbu yieni yimaba vendredi na basamaronda yiri mamfumbi moba va bakurusu yilumbu yisamedi mu mbari samedi eni jimaba jiPaque. 32Kabogu bagora bamateba bivisi bimakulu mamutu agutega mbana ususu agumagomunu na Jesus. 33Banotola ombu Jesus bamalaba amakefuila kabogu basamamuteba makulu. 34Tumba gora mosi amamunonga dikongu va dubansi; vana vana malungu na mamba bimapala. 35Oyisoni mambu amama amaba vana, bumbeji buandi buvu bungensa, kabogu durungula ubuvayila yitu. 36Mambu meni mamalabana udugusu Bisonu abimasonugu rie: Vagotabuga ne yivisi yimosi mu dunyuru duandi. 37Na rie: Bogengila dunyuru adumatobu.

Jesus utsigu etsigu

(Matt 27.57-61; Marc 15.42-47; Luc 23.50-56)

38Amana manovioga Joseph muisi Arimathee amawivula Pilate musuga ubonga mfumbi Jesus (Joseph amaba mudukitsi uJesus o musuega mu mbari amalaba baJuif goma). Pilate amasinga kabogu Joseph amayebonga mfumbi Jesus. 39Nicodeme omalewenda mukolu ombu Jesus amabega bebeli na magumarieru makilu tsimuyombu, diwendi rie: mira na alowe. 40Kabogu bamapieta mfumbi na matsanda mbana bamajigotsamuyombu nana yifu yibaJuif yimabila. 41Mu nungi aji Jesus amagomununu mumaba ngila jigona aji mbe jisakatsigulu mfumbi. 42Ngila eni jimaba bebeli; diweru didutsonsugu du? baJuif dimatola kabogu bamatsiyila Jesus muna.

Currently Selected:

Jean 19: PUU1992

Highlight

Copy