Luc 7
7
Jesus ubelusa ebelusi musalitsi uyivunda yikama bagora
(Matt 8.5-13)
1Ava Jesus amamanina utsingula batu mambu memama amawenda o Capernaum. 2Yivunda yikama bagora amaba na musalitsi agu amaronda puela; amabela diambu. 3Anogulu beranguli Jesus, amasindiga bivunda bibaJuif ombu gandi uyemunengila uyibelusa musalitsi andi. 4Banotola ombu Jesus bamamulembiyila rie: Kokolu tsiagu, dibaala diedidi divu diwelimina uwamusu. 5Erondi batu betu na jaʼ beni amaturungila Ndagu Yibenguna.
6Kabogu Jesus amawenda nogu. Yika uweʼ bewendi na yivunda yikama bagora amatinda bambatsi bandi umutsingula rie: Fumu, guyamueketsoyisa. 7Nyisaawelimina yiri nyugudila o ndagu ami na ngekelaba yiri nyiji uwelimina uruga ombu gagu. Kabogu vosa yika uvosa na musalitsi ami obeluga. 8Menu wami nyivu o tsi durumu dubivunda na nyina bagora aba nyirumi. Nyirumi umosi rie: Wenda na ewendi; nyirumi musalitsi ami rie: Vaga nana na edivayi. 9Jesus amakambulu ava amagululu mambu memama; amageluga ombu batu abamamudukanga na amavosa nogu rie: Nyiruyilanga nyisakalaba yitu yimunongu egugu nesi o Israel! 10Kabogu bilumbi bimagabuga ombu yivunda yikama bagora na bamarasuna musalitsi amabeluga.
Jesus urambusa erambusi muana umukuili
11Ava kedi Jesus amawenda o musiengi aguinengulu Nain; badukitsi bandi na batu bapuela bamawenda nandi. 12Banotola bebeli na dikotulu dimusiengi, bamabenguna na batu abamabeganga mfumbi. Agumafu amaba muana divingu umukuili. Bisi musiengi bapuela bamamukelisa. 13Fumu anomulaba amagaangu na yingeba na amavosa na mugetu rie: Guyamuelila!
14Mbana Jesus amakueka ombu gogu; amabemba yigara yimfumbi na babaala abamayibeganga bamasikama. Jesus amaruma rie: Mufudu, rambugati!
15Amatsana na amabanda uvosa. Mbana Jesus amayemugabusa ombu nguji andi. 16Botsu bamagaangu na goma na bamayitsa Nsambi novosa rie: Mubiyitsi aguneni amalabana va gari etu! Nsambi amalingula batu bandi!
17Misamu miJesus mimanyavanga o Judee na mbanda tsi jiotsu.
Badukitsi baJean Baptiste
(Matt 11.2-19)
18Jean anotsingulu mambu meni motsu na badukitsi bandi, amanengila babeji basusu 19na amabasindiga ombu Jesus umuwivula rie: Ndeʼ la jandi agu Jean amavosa uruga eruyi vo tuviva ususu? 20Banotola ombu Jesus bamavosa rie: Jean Baptiste atsitusindiga ombu gagu uguwivula rie: Je ndeʼ la jandi agu Jean evosi yiri uniga eruyi vo tuviva ususu? 21Va misu mogu Jesus amabelusa bibedu na bibomfi na amapalisa binyunyi bibi na amatiemusa bidunga. 22Amabagabusila rie: Wendanu noyetsingula Jean adi dutsilaba nogulu, diwendi rie: bidunga bikalaba, bitsondu bigemuetsonduga, bibedu binyambi bikabelusu, madiba makagulu, bamfumbi bakarambuga na Musamu Uboti ukasamunu ombu bijaga. 23Ka muna ubueji gu jandi olaba agugetumuni mambu mami paga!
24Badukitsi baJean banowenda Jesus amabanda uwivula batu mu diambu diJean rie: Yi dutsiyelaba o kumu? Dugobu adutsipupusu na punga? Tsatsabi! 25Yika tsie dutsiyelabila? Mutu aduara biduaru biboti? Nesi! Abeduari biduaru biboti na abetsani na maboti bavu o mandagu mabukaga. 26Anyi dutsiyelaba? Mubiyitsi? Nyiina, nyidutsinguli dutsilaba aguviolila ne mubiyitsi. 27Jean amavosulu mu Bisonu rie:
Nsambi evosi rie:
Laba nyisindiyi yilumbi yiami va gusu agu
ugutsonsiyila nsila.
28Mbana Jesus amabuela rie: Dingensa nyidutsinguli rie:
Vasakaburu mutu aguiviolili Jean buneni.
Ne nana aguviolila ugeyi mu Durumu duNsambi emuviolili buneni.
29Batu botsu na babongitsi balepu bamamugulu; diwendi rie: jogu bamalededila duganu duNsambi ava bamabatusulu na Jean. 30Yika baJuif abamaba baPharisie na milonsi mimigaga basamagaru yiri duganu duNsambi duvu duwelimina nogu na bamabusa ubatusu na Jean.
31Jesus amavosa rie: Diambu yi nyubagusunu batu bebaba na nyi bebagunu? 32Bebagunu na bangebi abesani o dikasa. Dibuli dimosi bevosi na dibuli disusu rie: Tutsidusiyila dimbika tumba dugaayina! Tutsiduwimbilila nyimbu tsimanyonyi tumba dugaalila. 33Ava Jean Baptiste amaruyila amawarila nsala na asamanuanganga malamu na dumavosa rie: Ana yinyunyi yibi! 34Ava Muana Mutu amaruyila amajanganga nonuanganga na dumavosa rie: Ka muna mubi gu! Aji mulitsi na munuitsi, aji mbatsi babongitsi balepu na bango bikumbu. 35Diela diotsu diNsambi divu dingensa na dimavegu ombu botsu abedisingi.
Jesus aji o ndagu Simon
36MuJuif mosi agumaba muPharisie amanengila Jesus uji nandi. Jesus amakota o ndagu na amayetsana va tavula. 37O musiengi eni umaba yimbembu yimugetu. Ava amagululu yiri Jesus aji va tavula o ndagu muPharisie amaweʼ guna na yirura yimuyombu. 38Anokota ndagu amasikama o nsima Jesus va makulu mandi. Amabanda ulila na amabotsa makulu maJesus na matsanga mandi mbana amamatsindula na nanga tsiandi; anomafifa amamagotsa muyombu. 39Ava Simon, agumanengila Jesus o ndagu andi, amadilabila amatasa rie: Mbe mutu egugu avu tindi mubiyitsi mbe atsijaba yimbembu avu. 40Jesus amavosa nandi rie: Simon, nyirondi ugutsingula mua diambu.
Simon amawaka rie: Ka vosa, Mulonsi.
41Jesus amavosa rie: Mutu amasombisa batu babeji: ombu umosi kama yiranu tsimbongu tsilora jivema nombu ususu magumaranu mambongu tsilora jivema. 42Anolaba yiri bagorungula umufutila kabogu amabasingilila miganu miogu. Anyi va gari jogu botsu babeji amamurondila viri?
43Simon amawagula rie: Nyitasi jandi agu amasingilila tsipuela.
Jesus amamutsingula rie: Gutsiwagula buranga.
44Mbana anogeluga ombu mugetu amawivula Simon rie: Guilabi mugetu egugu? Nsikota o ndagu agu na gugaapega ne mamba ususa makulu mami tumba jandi atsisusa makulu mami na matsanga mandi na atsimatsindula na nanga tsiandi. 45Gugaambumba tumba nyikotilanga jandi egugu asakadunda ufifa makulu mami. 46Va julu vana gugaawitila muru ami matsi tumba jandi atsigotsa makulu mami muyombu. 47Kabogu nyigutsinguli yiri durondu duandi duneni duilasi yiri masumu mandi mapuela mamatandu. Uotsu agumatandu masumu mageyi elasi yika mua durondu. 48Mbana Jesus amavosa na mugetu rie: Masumu magu mamatandu. 49Jogu abamatsana va tavula nandi bamatasa rie: Agugu la nyi oyitandi masumu? 50Tumba Jesus amavosa na mugetu rie: Yitu yiagu yimagugobula, wenda na buranga!
Currently Selected:
Luc 7: PUU1992
Highlight
Share
Copy
Want to have your highlights saved across all your devices? Sign up or sign in
La sainte Bible en langue Yipunu © Alliance Biblique du Cameroun, 1992.
