लूकाल 3
3
योहान पेनदा पोल्लेन वेहांतोर
(मत्तयाल 3:1-6; मरकुस 1:1-5; योहान 1:19-28)
1तिबेरियुस कैसर इनना वरोर राजाल पूरा रोम राज्येमपोर्रो पेद्दा राजाल मत्तोर. ओर राज्येम कियालय दल्गिसि पदिहेन वर्सां पूरा आतां. अवे तूकुल्कुने पुंतुस पिलातुस इनानोर यहुदिया एरियाता राज्यपाल मत्तोर. अंतिपस हेरोद राजाल गालिल एरियाता राज्यपाल मत्तोर. इंका ओना तम्मुर पिलिप इतुरिया आनि तारकोनितिस इव एरियान पोर्रो राज्यपाल मत्तोर.#3:1 अंतिपस हेरोद राजाल आनि पिलिप ईर इव्वुरगुडा लूकाल 1:5 ने मनना पेद्दा हेरोद राजाना मर्कु मत्तुर. लिसानियास इनानोर बारे अबिलेन इनना एरियाता राज्यपाल मत्तोर. 2अस्के हन्नाल आनि ओना हडे कयपाल इनानोर इव्वुर पेद्दा पेर्मालोर मत्तुर. अवे तूकुल्कुने बतल आता इत्ते जकर्याहना मर्रि योहान बय्लि जेगाते मननेंके ओनगा पेनदा वचनम एव्ता. 3अस्के ओर योर्दन बेरेटा सुट्टु-मट्टुना एरियंता इल्हा वेहासेके तिरियुंदुर, “कीता पापाल्कुन ओप्कुंचि मनसु मार्सकुंचि बापतिस्मा येतानय्ते, पेन मीवा पापाल्कुन मापि कींता.” 4इल्हा यसायाह इनना पेनदा कबुरतोर वेल्लेन वर्सां मुन्ने रासतद इंदके निजम आता. अद पोल्ले इल्हा मत्ता:
“बय्लि जेगाते केयानद उंदि अल्किर केंजा वांता,
सामि मीवा मनसुने वायनाहाटीं हर्रि तयार कीम्ट,
इंका ओना हर्कुन सवरगा कीम्ट.
5इत्ते, अन्नि लोद्दिं-लोंका निंडमळ गावाले,
अन्नि गुट्टां-गट्टुक समानम आयमळ गावाले.
वंकर-डिंकर मत्ता हर्कु अन्नि, सवरगा आयमळ गावाले.
उतार-बोगडा मत्ता हर्कुगुडा, समानम आयमळ गावाले.
6अस्के अंटोर लोकुल्क पेन मुक्ति हियानदुन हूळंतुर.” #यसायाह 40:3-5
योहान लोकुल्कुन तेरहंतोर
(मत्तयाल 3:7-12)
7योहानुनाहेंदाल बापतिस्मा#3:7 योहानुनाहेंदाल बापतिस्मा योहानुना बापतिस्मा इत्ते, नावा पळाना पिस्वरतुन होळसि, पूना पिस्वर पिस्संतन इंचि हुप्सालय एते मुडगिसि तेदमळ. येतानाहाटीं लोकुल्क पेद्दा मंदानां-मंदां वातुर. अस्के बापतिस्मा हियना योहान ओर्कुन, “ए कट्ला तरासनसंटोरिटा! पेनदा होंगुनाल तपिच्कुनालय बापतिस्मा येतट इंचि मीकु बोर वेहतुर? 8अय्ते मरि, निजमे मीवा मनसु मार्सुकुत्तिर इंचि रुजुव कीसि हुप्सट. वट्टिदे, मोमोट अब्राहामुना वंसमतोरम आंदुम, इंचि बस्केने इनकुनमट. नना मीकु निजम वेहांतन, पेन अब्राहामनाहाटीं ई बंडानालगुडा पिलाल्क पुट्टिचि हिया परंता. 9इंदके मराकुना हिह्कुनगा मर्सु इरसि मंता. बव मराकुंक अय्ते बेसता पंडिं हादोंगों, अवुन नर्किसि तडमिते वाटमळ जर्गंता,” इंचि इत्तोर.
10“अय्ते इंदके मोमोट बतल कियना मरि?” इंचि आ लोकुल्क योहानुन पूसकीतुर. 11अस्के योहान, “बोनगा रोंडु अंगिं मंतां, ओर ओनद उंदि अंगि, अंगि हिल्वोंकु हियना आनि बोनगा अय्ते गाटो मंता, ओरगुडा हिल्वोंकु तूस कीसि हियना,” इंचि वेहतोर.
12बापतिस्मा येतनाहाटीं अगा कर वसुल कियानोरगुडा वासि मत्तुर. ओर लोकुल्कुन वेल्लेन मुळाह्चि मत्तुर. ओरगुडा, “मोमोट बतल कीकोम गुरुजी?” इंचि पूसकीतुर. 13अस्के योहान, “सरकार मीकुन बच्चोन जमा कियालय वेहता, अचोने जमा कीम्टु, दानकन्ना एक्को जमा कियमट,” इंचि ओर्कु वेहतोर.
14अस्के इच्चुर सिपाइल्कगुडा ओनगा वासि, “अय्ते मोमोट बतल कीकोम मरि?” इंचि पूसकीतुर. अस्के योहान ओर्क, “मीकु दोर्कना पगारतेन मिमेट कूस मंटु, बोरहेकटाले आयि बेदरिच्चि हिलाकोंटे आबद्दम तप्पु दोस्सि कोत्तां येतमट,” इंचि वेहतोर.
15पेन लोहना पिसागोटनोर बिरानेन वायानुर इंचेके लोकुल्क बेस आसेते एदुर हूळसेक मत्तुर. अदुनहाटीं योहानुन हूळसि, वायनद मत्ता किरिस्तु ईरे अय्ते आयोर गदा, इल्हा अंटोर ओरद-ओरे मनसुल्कुने इनकुनुंदुर. 16अस्के योहान ओरा मनसुना विचारमतुन एरपाट कीसि ओर अंटोर्कुन, “नना अय्ते मीकु बापतिस्मा एततोने हींतन. गानि बोर अय्ते वायानोर मंतोर, ओर नाकन्ना एक्को ताकततोर मंतोर. ओर केरसि मत्ता हेरपुह्कुन इट्टना विलुवागुडा नाकु हिल्ले. ओर मीकु पवित्र आत्मा आनि तळमितोनि बापतिस्मा हींतोर. 17ओना कय्दे हेती मंता. ओर ओना कडातुन बेस साप कीतारित्ते गोह्कुन तूरपाल्क पीसि गुम्मिते दोसंतोर, पोट्टुनबारे बस्केने पिर्रुवा तडमिते वाटसि बोळसंतोर,” इंचि इत्तोर. 18इल्हा योहान वेल्लेन पोल्लें कराहसेक, ओर्क बेसता कबुर वेहुंदुर.
योहान येसुंक बापतिस्मा हींतोर
(मत्तयाल 3:13-17; मरकुस 1:9-11)
19-20पजा बतल आता इत्ते, गालिल एरियाता राजाल हेरोद, ओना तम्मुर पिलिप पिस्सि मननेंकेन ओना मुत्तो हेरोदियास इनानदान ओनगा तच्चि इरकुत्तोर. हेरोद राजाल ओना अंगेनतोनि कीता पापम, इंका वेरे-वेरे वेल्लेन तप्पु कबाह्कुनाहाटीं हेरोद राजान योहान तेराहतोर. अदुनहाटीं हेरोद राजाल योहानुन जेलने वाटसि, ओना तप्पुकुने इंकुंदि तप्पु कल्पकुत्तोर.#मत्तयाल 14:3; मरकुस 6:13 21योर्दन बेरेटे योहान वेल्लेन लोकुल्कुंक बापतिस्मा हीसेक मत्तोर. अस्के येसुगुडा अगा वासि योहानुना कय्दे बापतिस्मा एततोर. बापतिस्मा एततंका येसु पारतना कियनेंके मब्बु अंता बैय्यरा आता. 22अस्के पवित्र आत्मा पावरेम पिट्टे रूपमते वासि ओनपोर्रो रेयतस्के, स्वर्गमताल उंदि अल्किर इल्हा केंजावाता. “निमे नावा पावरमगल्ला मर्रिन आंदिन, नना नीकुन वेल्लेन जीवा कींतन, नीवा लोप्पो नना वेल्लेन आनंदमते मंतन.”
योसेपुना वंसम
(मत्तयाल 1:1-17)
23येसु सेवा कियना कबळ#3:23 येसु सेवा कियना कबळ लोकुल्कुंक पेनदा पोल्लें कराहना कबळ. सुरुव कीतस्के ओर दग्गेर-दग्गेरा मुप्पै वर्सानोर मत्तोर. लोकुल्क येसुन, योसेपुना मर्रि इनकुनुंदुर. योसेप एलि पोरोलतोना मर्रि आंदुर. 24एलिना बाना पोरोल मत्तातु, मत्तातुना बाना पोरोल लेवि, लेविना बाना पोरोल मल्कि, मल्किना बाना पोरोल यान्ना, यान्नाना बाना पोरोल योसेपु. 25योसेपुना बाना पोरोल मत्तियाल, मत्तियाना बाना पोरोल आमोस, आमोसुना बाना पोरोल नाहोम, नाहोमुना बाना पोरोल एस्लि, एस्लिना बाना पोरोल नागय्या. 26नागय्याना बाना पोरोल मयातु, मयातुना बाना पोरोल मत्तियाल, मत्तियाना बाना पोरोल सिमय्या, सिमय्याना बाना पोरोल योसेकु, योसेकुना बाना पोरोल योदाल. 27योदाना बाना पोरोल योहानन, योहानननुना बाना पोरोल रेसाल, रेसाना बाना पोरोल जेरुबाबेल, जेरुबाबेलना बाना पोरोल सलितिएल, सलितिएलना बाना पोरोल नेरी. 28नेरीना बाना पोरोल मल्कि, मल्किना बाना पोरोल अद्दि, अद्दिना बाना पोरोल कोसाम, कोसामुना बाना पोरोल एलमादामु, एलमादामुना बाना पोरोल एर्राल. 29एर्राना बाना पोरोल यहोसु, यहोसुना बाना पोरोल एलियाजर, एलियाजरना बाना पोरोल योरिमु, योरिमुना बाना पोरोल मत्तातु, मत्तातुना बाना पोरोल लेवि. 30लेविना बाना पोरोल सिमोनु, सिमोनुना बाना पोरोल यहुदल, यहुदाना बाना पोरोल योसेपु, योसेपुना बाना पोरोल योनामु, योनामुना बाना पोरोल एलकिमु. 31एलकिमुना बाना पोरोल मल्लयाल, मल्लयाना बाना पोरोल मिन्नाल, मिन्नाना बाना पोरोल मत्तातु, मत्तातुना बाना पोरोल नातानु, नातानुना बाबल दाविद राजाल. 32दाविद राजाना बाना पोरोल यिस्सल, यिस्साना बाना पोरोल ओबेद, ओबेदुना बाना पोरोल बोआज, बोआजुना बाना पोरोल सलमोनु, सलमोनुना बाना पोरोल नहसोन. 33नहसोनुना बाना पोरोल अमिनादाब, अमिनादाबुना बाना पोरोल अदमिन, अदमिनुना बाना पोरोल अरनि, अरनिना बाना पोरोल हेसरोन, हेसरोनुना बाना पोरोल पेरेस, पेरेसना बाना पोरोल यहुदा. 34यहुदाना बाना पोरोल याकोब, याकोबुना बाना पोरोल इसाक, इसाकुना बाना पोरोल अब्राहाम, अब्राहामुना बाना पोरोल तेराहाल, तेराहाना बाना पोरोल नाहोर. 35नाहोरुना बाना पोरोल सरुग, सरुगुना बाना पोरोल रेऊ, रेऊना बाना पोरोल पेलेग, पेलेगुना बाना पोरोल एबेराल, एबेरालना बाना पोरोल सेलाल. 36सेलाना बाना पोरोल केनान, केनानुना बाना पोरोल अरपक्सद, अरपक्सदना बाना पोरोल सेमु, सेमुना बाना पोरोल नोहाल, नोहाना बाना पोरोल लामेक. 37लामेकुना बाना पोरोल मतुसेल, मतुसेलना बाना पोरोल हनोक, हानोकुना बाना पोरोल यारेद, यारेदुना बाना पोरोल महलेल, महलेलना बाना पोरोल केनान. 38केनानुना बाना पोरोल अनोस, अनोसुना बाना पोरोल सेतु, सेतुना बाना पोरोल आदाम, आदाम पेनदा मर्रि मत्तोर.
Currently Selected:
लूकाल 3: esg-Deva
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
